«Katsüinjeerü jaaʼin nutuma»

1. ¿Kasa naaʼinraka Maleiwa süpüla nükatsüinrüin naaʼin na aʼyataashiikana nümüin namaiwa?

EESÜ saashajaʼawaire tü Bibliakat süchiki katsüin maʼin naaʼin na aʼyataashiikana nümüin Maleiwa sümaiwa paala, eepejeʼe kaʼi matsüinka oʼu naaʼin. «Katsüinshi taya putuma maʼaka saaʼin wanee uuchi», müshi David wanaa sümaa yalayalain naaʼin. Eepejeʼe kaʼi mmotka oʼu nia (Sal. 30:7). Katsüinshi maʼin Sansón eepa naaʼu tü nüpülainkat Maleiwa. Niyaawatapejeʼe saaʼu wanaawain nütsüin sümaa wayuu nnojotpa shia naaʼu (Juec. 14:5, 6; 16:17). Naya wayuukana, katsüinsü naaʼin nutuma Jehová.

2. ¿Jamüsü nüküjaka Pablo katchinreein maʼin naaʼin isapa nüchiki wanee kasa? (2 Corinto 12:9, 10).

² Nütüjaa aaʼulia chi aluwataaushikai Pablo choʼujaain sükatchinnüin naaʼin nutuma Jehová (paashajeʼera 2 Corinto 12:9, 10). Maʼaka sülatawalin wamüin, eeshi ayuuiwaire Pablo (Gal. 4:13, 14). Akaʼaya joo nia, nüchajaainjatü sukuwaʼipa süpüla suchuntaain naaʼin naaʼinrüin kasa anasü (Roma 7:18, 19). Eeshi mmorüle nia sutuma tü alateetkat nümüin (2 Cor. 1:8, 9). Wanaa sümaa iseematüin nüchiki Pablo wanee kasa, katchinreesia maʼin naaʼin sutuma nükatsüinrüin naaʼin Jehová.

3. ¿Kasa wekirajaainjatka anain sünain ekirajaayakat tüü?

³ Nüküjain wamüin Jehová nükatsüinreerüin waaʼin (1 Ped. 5:10). Waaʼinrüinjatpejeʼe waneirua kasa süpüla naaʼinrüin tia wapüleerua. Jülüjataa waaʼin tüü: jamüsüjaʼa wanee kemion, awataasü sutuma sütsüin sumotootse, nnojotpejeʼe awataain shia sümüiwaʼa, awataajeerü shia nutuma chi chupeetkai. Mayaainjeʼe yapain Jehová süpüla nükatsüinrüin waaʼin, nnojoliinjana waya jimatüin sünain aʼatapajaa tia maʼaka nnojoluin naʼatapajüin chi chupeetkai suwataainjatüin sümüiwaʼa tü kemionkat. ¿Kasa naapaka wamüin Jehová süpüla nükatsüinrüin waaʼin? ¿Kasa waaʼinrajatka süpüla sükatsüinnüin waaʼin sükajee tia? Süpüla watüjaain saaʼu tia, wekirajaajeerü nachiki apünüinshii wayuu namaiwajana nükatsüinrakana aaʼin Jehová. ¿Jaralii naya? Nia Jonás chi nünüikimaajachikai Maleiwa, María tü niikat Jesús otta chi aluwataaushikai Pablo. Jee müsia, wekirajaajeerü süchiki tü naaʼinrakat Jehová maaʼulu süpüla nükatsüinrüin naaʼin na aʼyataashiikana nümüin.

KATSÜINSÜ WAAʼIN SUTUMA WEKIRAJAAIN JEE WOʼURAAJÜIN

4. ¿Kasa waaʼinrajatka süpüla nükatsüinrüin waaʼin Jehová?

⁴ Nükatsüinrüin waaʼin Jehová sükajee woʼuraajüin nümüin. Asoutushi nia shiʼipajee tü wachuntakat nümüin wanaa sümaa naapüin wamüin tü nüpülainkat (2 Cor. 4:7). Nükatsüinrüinña waaʼin waashajeʼerapa tü Nünüikikat sümaa wasakireʼerüin waaʼin sünain (Sal. 86:11). Akatsüinraasü paaʼin sutuma tü pütchi nüshajiralakat Jehová suluʼu tü Nünüikikat (Heb. 4:12). Puʼuraajapa nümüin Jehová otta paashajeʼerapa tü Nünüikikat, katsüinjeerü paaʼin soʼunnaa müliaa, ayateerü talatüin paaʼin otta puunteerü pikeraajüin wanee aʼyatawaa aapünaka pümüin. Wekirajaa süchiki tü naaʼinrakat Jehová süpüla nükatsüinrüin naaʼin Jonás chi nünüikimaajachikai.

5. ¿Jamüsü yalayalainjatka naaʼin Jonás?

⁵ Choʼujaasü yalayalainjatüin naaʼin Jonás. Mmotshi nia seema oʼunaa eemüinre nuluwataain nia Jehová. Noʼotookalaka suluʼu wanee anuwa süpüla nuʼunajachin wattamüin. Sutuma naaʼinrüin tia, outataaichijeʼe nia soʼunnaa wanee wawai otta outataainajeʼe nutuma na anuwapuʼukana. Shiasaʼa nujutunapa suluʼujee tü anuwakat, shimirajaain nia wanee jime miyoʼushaata. ¿Jamüsü naaʼin Jonás soʼu tia? ¿Niʼrüinche tü outaakat nooʼomüin? ¿Jülüjasüche naaʼin niyüülajüin nia Jehová? Shapaasü maʼin naaʼin Jonás soʼu tia.

6. Saashin Jonás 2:1, 2, 7, ¿kasa akatsüinraka naaʼin Jonás wanaa sümaa süleʼeruʼujachin nia tü jimekat?

⁶ ¿Kasakaʼa joo naaʼinrüin Jonás süpüla sükatsüinraain naaʼin wanaa sümaa süleʼeruʼujachin nia tü jimekat? Oʼuraajüshi nia nümüin Jehová (paashajeʼera Jonás 2:1, 2, 7). Mayaainjeʼe mojuin naaʼin sutuma nnojoluin naaʼinrüin tü nuluwataakalü anain nia Jehová paala, nütüjaa aaʼu nükaalinjeechin nia. Wanee kasa naaʼinraka Jonás shia jülüjain naaʼin tü Pütchi Ashajuushikat. Watüjaa aaʼu müin tia sükajee tü pütchi nuchuntakat suluʼu Jonás kapiitulo 2. Tü pütchi nuchuntakat yala müsü aka saaʼin tü pütchi ashajünakat suluʼu Salmos (anasü paashajeʼerüle Jonás 2:2, 5 sümaa Salmo 69:1; 86:7). Niʼraajüin maʼin Jonás tü pütchi ashajünakat suluʼu Salmos. Sutuma jülüjain naaʼin tia wanaa sümaa süleʼeruʼujachin nia tü jimekat, nütüjaa maʼin aaʼu nükaalinjeechin nia Jehová. Nuʼtteʼeraka nia Jehová otta yapaka nia süpüla nikeraajüin tü nuluwataainjachikalü anain nia (Jon. 2:10–3:4).

7, 8. ¿Kasa naaʼinraka wanee wawala süpüla sükatsüinraain naaʼin soʼunnaa müliaa?

⁷ Pachiiruaale tü müliaa weʼrakat, sükatsüinrüinña waaʼin tü nukuwaʼipakat Jonás. Jülüjataa waaʼin nukuwaʼipa Zhiming,b wanee wawala kepiakai Taiwán, ayuuishi maʼin nia. Müliashi maʼin nia natuma na nüpüshikana saaʼujee nunoujain. Nükatsüinrüin Jehová naaʼin nuʼuraajapa jee nikirajaapa sünain tü Bibliakat. Nüküjapejeʼe nnojoluin naaʼin sünain ekirajawaa sünain tü Bibliakat shapaapa maʼin naaʼin sutuma wanee müliaa. ¿Kasakaʼa joo naaʼinrüin süpüla sükatsüinraain naaʼin sükajee tü nikirajaakalü anain suluʼujee tü Bibliakat? Müshi nia: «Oʼuraajüshi taya, taapajüin tü jayeechi weeʼirajakat nümüin Jehová, eesü teeʼirajüle shia sümaa jiattain shia tatuma waneʼereeya shiimalaapa taaʼin suulia tü shapawaakalü aaʼin. Jimatapa taaʼin, ekirajaashi taya sünain tü Bibliakat».

⁸ Akatsüinraasü naaʼin Zhiming soʼunnaa müliaa sutuma tü nikirajaakalü anain. Süchikijee nuwaʼnnüin, antüsü nümaʼanamüin wanee perümeera süpüla süküjain nümüin mashain nia jee choʼujaain shiʼitaanüin isha nünain. Wanee ai süpülapünaa nuwaʼnnüin Zhiming, naashajeʼerüin tü süchikimaajatkat wanee wawala makalü aka saaʼin tü alatakat nümüin. Shiyoutuin tia wawalakat shiʼitaanüin isha sünain, suʼttaakalaka. Sükatchinrakalaka naaʼin Zhiming tü naashajeʼerakat süchiki tia wawalakat süpüla noonooinjachin nümaa Maleiwa.

9. ¿Kasa paaʼinrajatka süpüla katsüin paaʼin soʼunnaa shapaain maʼin paaʼin? (Piirakaa sümüin tü ayaakuaakat).

⁹ ¿Isasüche püchiki jamüinjatüin pünüiki nümüin Jehová sutuma shapaain maʼin paaʼin soʼunnaa wanee müliaa? ¿Nnojotsüche paaʼin sünain ekirajawaa sutuma? Soto paaʼin nütüjaain saaʼu Jehová jamüin paaʼin sutuma tü alatakat pümüin. Jaʼitairü palitchon pünüiki nümüin Maleiwa soʼu tia, naapeerü tü choʼujaakat pümüin (Éf. 3:20). Kapüleere pümüin paashajeʼerüin jee pikirajaain sutuma ayuulin pia, sutuma mapüsain jee shiale sutuma shapaain paaʼin, eesü süpüla paapajüin tü pütchi akürawaajuushikat suluʼujee tü Bibliakat jee shiale tü suluʼujeejatkat tü karaloʼutakalüirua. Eesü süpüla paapajüin jayeechi otta piʼrajüin video suluʼuka jw.org. Nükatsüinreein Jehová paaʼin. Naaʼinrüin tia puʼuraajapa nümüin, püchajaapa pütchi suluʼujee tü Bibliakat, pünajapa wanee video otta paashajeʼerapa wanee karaloʼuta.

KATSÜINSÜ WAAʼIN NATUMA NA WAWALAYUUKANA

10. ¿Kasa naaʼinraka na wawalayuukana süpüla nakatsüinrüin waaʼin?

¹⁰ Nükatsüinrüin waaʼin Jehová nakajee na wawalayuukana. Namülialüin waaʼin wanaa sümaa weʼrüin müliaa otta isale wachiki waaʼinrüin wanee aʼyatawaa nümüin Maleiwa (Col. 4:10, 11). Choʼujaashii wamüin na waʼaleewainyuukana weʼrapa wamüliala (Prov. 17:17). Wanaa sümaa matsüin waaʼin, eesü süpüla naapüin wamüin na wawalayuukana tü kasa choʼujaakat wamüin, namülialüin waaʼin otta nakatsüinrüin waaʼin süpüla ayatüinjanain waya waneepiain nümaa Jehová. Wekirajaa süchiki tü naaʼinrakat na waneinnua süpüla nakatsüinrüin saaʼin María, tü niikat Jesús.

11. ¿Jamüsü choʼujaaka sükatsüinnüin saaʼin María?

¹¹ Choʼujaasü sükatsüinnüin saaʼin María. Eesüjaʼa shapaale saaʼin sutuma tü saaʼinrajatkat naashin Gabriel, chi aapiee nümaʼanajeejachikai Maleiwa. Ipuoluinjatü shia sümaa nnojoluin sünainpünaain tooloyuu, nnojotsü shiʼraajüin tü epijaakat tepichi otta aapünüsü sümüin saaʼinmajüinjachin chi Mesíaskai. ¿Jameetkajasaʼa sünüiki nümüin José süchiki ipuoluin shia sümaa nnojoluin kakuwaʼipain nia sümaa? (Luc. 1:26-33).

12. Saashin Lucas 1:39-45, ¿kasa saaʼinraka María süpüla sükatsüinnüin saaʼin?

¹² ¿Kasa saaʼinraka María süpüla sükatsüinnüin saaʼin süpüla shikeraajüin tü aluwataanakalü anain? Achuntusü shia kaalinwaa namüin na waneinnua. Süsakirüin Gabriel süpüla sütüjaain sooʼomüin süchiki tü saaʼinrajatkat (Luc. 1:34). Suʼunaka suluʼumüin wanee pueulo chakat Judá süpüla süntajatüin sümaʼanamüin Elizabeth, wanee süpüshi. Atütüleʼennüsü saaʼin María sutuma Elizabeth. Sükajee tü nüpülainkat Maleiwa, süküjain Elizabeth sümüin María wanee pütchi ekeraajüinjatka nünain chi süchonkai (paashajeʼera Lucas 1:39-45). Süküjain María wainmain kasa pülasü naaʼinraka Jehová süpüleerua sükajee tü nüpülainkat (Luc. 1:46-51). Nükatsüinrüin Jehová saaʼin María nükajee Gabriel otta sükajee Elizabeth.

13. ¿Kasa shiʼraka wanee wawala sutuma suchuntuin kaalinwaa namüin na wawalayuukana?

¹³ Maʼaka saaʼin María, eesü süpüla sükatsüinnüin paaʼin nakajee na wawalayuukana. Jülüjataa waaʼin tü alatakat sümüin Dasurí, wanee wawala kepiakat Bolivia. Wanaa sümaa nuʼuninnüin chi süshikai pitaaruluʼumüin sutuma nünain wanee ayuulii mepisat, makatüsü shia nümaa süpüla saaʼinmajüin nia (1 Tim. 5:4). Kapüleesü maʼin tü alatakat sümüin. Anuu sünüiki: «Müsü iseematakai saaʼin tachiki tachecherüin taaʼin soʼunnaa tü alatakat tamüin. Nnojoishii tekeʼejeein aaʼin na wawalayuukana, ‹nieechi Jehová akaalinjaka taya› maa müsü taaʼin. Tayaawatapejeʼe saaʼu mapa anain tachuntule kaalinwaa namüin na waneinnua suulialeʼeya tanouteʼerüin tamüiwaʼa tü alatakat tamüin» (Prov. 18:1). Süshajaka Dasurí namüin na saʼaleewainyuukana süchiki tü alatakat sümüin. Anuukalaka sünüiki: «Nakatsüinrüin maʼin taaʼin na wawalayuukana, neʼikajaain teküin pitaaruluʼumüin otta naashajeʼerüin tamüin pütchi suluʼujee tü Bibliakat süpüla nakatsüinrüin taaʼin. Naʼakashii waya na nüpüshikana Jehová, nakaalinjeein waya sünain tü kasa choʼujaakat wamüin, namüliajeein waaʼin soʼunnaa müliaa otta nakatsüinreein waaʼin süpüla ayatüin waʼyataain nümüin Jehová wanaa namaa».

14. ¿Jamüsü wacheküinjatka nakaalinjain waya na laülaashiikana?

¹⁴ Nükatsüinrüin waaʼin Jehová nakajee na laülaashiikana, nümülialüin waaʼin nakajee. Anataʼaleesüjaʼa wakuwaʼipa sutuma eein naya wamaa (Is. 32:1, 2). Shapaale maʼin paaʼin, püküja shia namüin na laülaashiikana. Paapaa sümaa anakalü akuwaʼipa tü nakaalinjeekalü anain pia.

KATSÜINSÜ WAAʼIN SUTUMA TÜ KASA ANASÜ WAʼATAPAJAKAT

15. ¿Kasa anasü waʼatapajaka wapüshuaʼa?

¹⁵ Sutuma tü kasa anasü waʼatapajakat saashin tü Bibliakat, eesü süpüla sükatsüinrüin waaʼin süpüla ayatüin waʼyataain nümüin Jehová (Roma 4:3, 18-20). Wayakana aʼyataashiikana nümüin Maleiwa, waʼatapajüin katüinjatüin woʼu süpüla kaʼikat süpüshuaʼa yaa mmapaʼa jee shiale chaa iipünaa. Sutuma tü kasa anasü waʼatapajakat, wachecherüin waaʼin soʼunnaa müliaa, sükatsüinrüin waaʼin süpüla waküjain tü pütchi anakat maʼin otta süpüla wekeraajüin tü aʼyatawaa aapünakat wamüin suluʼu tü outkajaaleekat (1 Tes. 1:3). Wekirajaa süchiki sükatsüinraain naaʼin Pablo sutuma tü kasa anasü naʼatapajakat.

16. ¿Jamüsü choʼujaaka sükatsüinnüin naaʼin Pablo?

¹⁶ Choʼujaasü sükatchinnüin naaʼin Pablo. Nüküjain suluʼu tü karaloʼuta nüshajakat namüin na chejeʼewaliikana Corinto, müin nia maʼaka saaʼin wanee iita atükuushi süka pootshi. Wainma kasa ooʼulakünaka aka naaʼin, wainmajüsü naaʼin, müliashi nia atumawaa, ojuttinnüshi nia otta ajachijashi nia (2 Cor. 4:8-10). Nüshajüin tia Pablo wanaa sümaa apünüintuain nukua sünain aküjaa tü pütchi anakat maʼin wattapünaa. Eesüjaʼa nnojorüle naʼatapajüin soʼu tia sükooʼomüinraajeerüin tü müliaa niʼrakat. Shiasaʼa maʼaka jeʼra kaʼi, müliashi nia natuma na wayuu eʼrüliikana wayumüin, ataʼünnüshi nia, wüinsittaaichi nia otta püreesashi nia atumawaa.

17. Saashin 2 Corinto 4:16-18, ¿kasa akatsüinraka naaʼin Pablo süpüla nüchecherüin naaʼin soʼunnaa müliaa?

¹⁷ Nüchecherüin naaʼin Pablo soʼunnaa müliaa sutuma tü kasa anasü naʼatapajakat (paashajeʼera 2 Corinto 4:16-18). Nüküjain Pablo namüin na chajanakana Corinto nnojoleechin nümalajaain, jaʼitashi nüʼlaülaʼalaain. Naaʼinmaasü maʼin tü kasa anasü naʼatapajakat. Kojutusü maʼin nümüin Pablo naʼatapajüin kepiainjachin nia chaa iipünaa, nnojotsü eein wanee kasa eekai müin aka saaʼin tia nümüin, jaʼitashi niʼrüin müliaa motsomüin. Sutuma jülüjain naaʼin Pablo tü kasa anasü naʼatapajakat, akatsüinraasü naaʼin shiʼipaʼaya.

18. ¿Jamüsü sükatsüinraka naaʼin Tíjomir sümaa nüpüshi sutuma tü kasa anasü naʼatapajakat?

¹⁸ Jülüjataa waaʼin tü alatakat nümüin Tíjomir, wanee wawala kepiakai Bulgaria, akatsüinraasü naaʼin sutuma tü kasa anasü naʼatapajakat. Zdravko nünülia chi nimüliakai, seewainshi nia kemion, kakalia mojuin maʼin naaʼin Tíjomir sutuma outuin chi nimüliakai. Süpüla anain naaʼin otta anain naaʼin na nüpüshikana, jülüjasü naaʼin tü kaʼi nasoʼiraajeenakalü oʼu naaʼin na outushiikana. Müshi nia: «Waashajaa achiki tü waaʼinrajatkat woutkajaapa wachikuaʼa nümaa Zdravko, maʼaka saaʼin tü eküülü waʼlakajaajeetkat nümüin, jaraleena na wounejaakana weʼrapa nia nüchikuaʼa otta kaseerüin waküjain nümüin süchiki tü alatakat süchikijee outuin nia». Sutuma tü kasa anasü naʼatapajakat Tíjomir sümaa nüpüshi, sükatsüinrüin naaʼin soʼunnaa tü müliaa neʼrakat otta süpüla naʼatapajüin tü kaʼi nüsoʼiraajeechikai oʼu aaʼin Zdravko nutuma Jehová.

19. ¿Kasa paaʼinrajatka süpüla paaʼinmaain tü kasa anasü paʼatapajakat? (Piirakaa sümüin tü ayaakuaakat).

¹⁹ ¿Kasa paaʼinrajatka süpüla paaʼinmaain tü kasa anasü paʼatapajakat? Paʼatapajüle kepiainjachin pia yaa mmapaʼa, paashajeʼera tü sümakat tü Bibliakat süchiki tü Paʼaraiisükat sümaa püsakireʼerüin paaʼin sünain (Is. 25:8; 32:16-18). Jülüja paaʼin jameerüin sukuwaʼipa wayuu suluʼu tü Paʼaraiisükat, maa yalakai paaʼin suluʼu. ¿Jaralii na piʼrakana? ¿Kasa paapaka? ¿Jamüsü paaʼin sutuma tü piʼrakat? Süpüla mapüleein pümüin tia, piirakaa sümüin tü ayaakuaa süchikimaajatkat tü Paʼaraiisükat ojuʼitaka suluʼu tü karaloʼutakat jee shiale piʼrajüin tü video jayeechimaajatkat, tü makalü anülia Maa suluʼukai paaʼin jeketkat mma, Muy cerca (alijunaikiruʼusü), Jülüjasü taaʼin kaʼikat tia. Waaʼinmaale tü Paʼaraiisükat, motsoʼojeerü neʼe sümaa tü müliaa weʼrakat (2 Cor. 4:17). Nükatchinrüin waaʼin Jehová soʼunnaa müliaa sutuma tü kasa anasü waʼatapajakat.

20. ¿Kasa waaʼinrajatka matsüinre waaʼin?

²⁰ Watüjaa aaʼu nükatsüinreerüin waaʼin Maleiwa matsüinre waaʼin (Sal. 108:13). Naapüin wamüin Jehová tü akatsüinrüinjatkat waaʼin. Choʼujaale pükaalinjünüin süpüla pikeraajüin wanee aʼyatawaa nümüin Maleiwa, süpüla püchecherüin paaʼin soʼunnaa müliaa otta süpüla ayatüin talatüin paaʼin, puʼuraaja nümüin Jehová otta paashajeʼera tü Bibliakat süpüla nuʼunirüin pukuwaʼipa. Puuʼulaa nakaalinjaiwa pia na wawalayuukana otta paaʼinmaa maʼin tü kasa anasü paʼatapajakat. Paaʼinrüle tia, nükatchinreerü paaʼin Jehová sükajee tü nüpülainkat süpüla püchecherüin paaʼin soʼunnaa tü alatakat pümüin sümaa nnojoluin süshapataain paaʼin jee sümaa talatüin paaʼin (Col. 1:11).