¿Shia keeʼireeka naaʼin Maleiwa tüü?
¿KASA paapaka achiki paashajeʼerüle tü karaloukta aküjakat süchiki tü kasa alatakat, pünajüle telewisoot jee paapajüle raawia? ¡Paapa achikirü wayuu ouktaka sutuma kasa eeka süsotooin, atkawaa otta kasa mojusü! Jülüja paaʼin jooluʼu tü alatakat pümüin. Eesü müliale maʼin paaʼin sutuma ayuulii, ouktuin püpüshi jee paʼaleewain. Eesü mojule paaʼin maʼaka ‹mojuin naaʼin Job sutuma tü müliaa niʼrakat› (Job 10:15, TNM).
Eesü müle pünüiki:
¿Shiache keeʼireeka naaʼin Maleiwa wapüleerua tüü?
¿Kasa akaaliinjeenaka waya sülatüle kasa mojusü wamüin?
¿Nnojoleetche atkawaa saaʼu tü Mmakat mapeena?
Tia süküjüin tü Wiwüliakat.
TÜÜ, SHIA TÜ NAAINJÜINJATKAT MALEIWA SAAʼU TÜ MMAKAT SAASHIN TÜ WIWÜLIAKAT.
«Müiria nnojolüin ouktaa, mojuu aaʼin, aʼyalajaa, je saalii ayuulii.» (Alateetkat Mapeena 21:4)
«Chi masaʼasaikai türüttaʼain müinjachi maʼaka naaʼin wanee irama.» (Isaías 35:6, TNM)
«Koʼujeena na moʼusaliikana.» (Isaías 35:5, TNM)
‹Süpüshuaʼa tü wayuu ouktusükalüirua asoʼiraajeerü saaʼin.› (Juan 5:28, 29)
«Nnojoleechi eein wanee wayuu eeka nümüin: ‹Ayuuishi taya›.» (Isaías 33:24, TNM)
«Wainmeerü eküülü saaʼu tü mmakat.» (Salmo 72:16, TNM)
ANA PUKUWAʼIPA SUTUMA TÜ WIWÜLIAKAT
Tü piʼrüipakat sünain karalouktakat tüü nnojotsü alawaain. Nüküjüin shia Maleiwa otta süküjüin tü Wiwüliakat tü sukuwaʼipainjatkat nutuma.
Otta müsia shikirajüin waya tü Wiwüliakat sünain tü wakuwaʼipainjatkat süpüla talatüin waya maaʼulu. Jülüja paaʼin tü shapaakalü atuma paaʼin. Eesü shiale tü nneetkat, püpüshi, ayuuire pia jee ouktule püpüshi. Sükaaliinjain waya tü Wiwüliakat otta sümülialüin waya wanaa sümaa süsouktüin wamüin shiʼipajee tü pütchi yaakat wünaapünaa:
¿Jamüshii müliaka waya?
¿Kasa waainjainjatka süpüla eejiraain waya sümaa tü kasa shapaakalü atuma waaʼin?
¿Kasa waainjainjatka süpüla talatüin maʼin waya sümaa wapüshi?
¿Kasa alataka wamüin ouktapa waya?
¿Kateetche noʼu nachikuaʼa na wapüshi ouktüinnapakana?
¿Jamüsü watüjaaka saaʼu nikeraajeerüin Maleiwa tü nünüikikat?
Sükajee paashajeʼerüin karalouktakat tüü piiʼiyatüin pütüjeein süchiki tü shikirajakat tü Wiwüliakat. Karalouktakat tüü, süpülajatü tia. Eesü asakiraa wünaapünaa sünain tü pütchikat. Wainma wayuu achekaka tü naainjakat na aküjüliikana pütchi nüchiki Jeʼwaa wanaa sümaa nekirajüin sünain tü Wiwüliakat, asakitshii naya otta asouktüshii na nekirajüinkana neʼipajee. Anasüjee pücheküle shia. Nieechi Maleiwa akaaliinjaka pia süpüla pikirajaain sünain tü shikirajakat maʼin tü Wiwüliakat.