Nakaraloukse Na Laülaayuu Nekiipüʼükana na Aküjüliikana Pütchi
Wawalayuu aishiikana wapüla:
¡Anakatche maʼin weʼraajünüle süka tü anülieekat: Aküjülii Pütchi nüchiki Jeowa! Eʼraajünüshii waya süka tü nünüliakat Jeowa, wanee anüliee eeinjatü waneepia otta naatajatü shia. Nia Jeowa keʼinaajalaka wanain anülieekat tia soʼujee juyaka 1931 (Isa. 43:10). Makalaka yaletüin waaʼin süka weʼraajünüin sükajee tü anülieekat: Aküjülii Pütchi nüchiki Jeowa.
Akaisaʼa chi Yolujaakai nüchajaain sukuwaʼipa süpüla nüsünneʼerüin nünülia Maleiwa. Mojutsat nünülia Jeowa natuma na wayuu nuluwataakana aaʼu Satanaa otta süsünneʼerüin shia tü Babilonia miyoʼusükat suluʼujee wainma Wiwülia süka üttüin saaʼin sünain anülieekat tia. Akatsaʼa naata maʼin tü kasa naainjakat Jesuu. Palajanasü nutuma nünülia Maleiwa wanaa sümaa nikirajüin na nikirajüinkana sünain oʼuraajaa: «Müinjatü juʼuraajia mayaa: «Taata chakai iipünaa kasataalejeseʼe wulein pünülia› » (Mat. 6:9, NM). Süchikijee, nuʼuraajaka nümüin Jeowa süka süpüshuaʼa naaʼin: «Teʼraajirüin pünülia na wayuu paapakana tamüin naʼakajee na manoujüinsaliikana» (Juan 17:6, NM). Washatüle nukuwaʼipa Jesuu, keeʼireejeerü waaʼin weʼraajirüin nünülia Maleiwa sainküin Mmaka.
Tü pütchi eʼitaanakat soʼu juyaka 2009, ‹Wekeraaja tü aküjaakat süchiki tü pütchi anasükat›, sütütüleʼerüin waaʼin sünain aküjaa maʼin pütchi (Aluw. 20:24). Anasü maʼin sukuwaʼipa tü waʼyataainkat nutuma Jeowa soʼu tü juya alatakat, wainküin waküjüin pütchi sainküin mmaka süpüla suʼwaajünüin otta kojutüin nünülia Jeowa. Kooʼomüinshii 7.313.173 aküjülii pütchi, aküjüshii pütchi otta nekirajüin na wayuu ekirajaweekana süpüla eejiraain naya sümaa tü kasa mojusü joutkat maaʼulu. Süka noutkajaain 18.168.323 wayuu süpüla sotuin naaʼin ouktüin Kürisüto, shiiʼiyatüin kojuyeenain na wayuu achuntakana nünülia Jeowa süpülapünaa sajaʼttinnüin tü kasa nuluwataakat aaʼu Satanaa.
Nuuʼulaale waküjüin pütchi Jeowa, ayateerü waainjüin shia sümaa talatüin waaʼin, waainjeerü shia sükajee tü kasa eekat süpüla saainjünüin aka (Mat. 24:14; Mar. 13:10). Eeshii süpüla waküjüin pütchi sainküin piichi, suluʼupünaa wopu jee kaaye, süka karaloukta, süka teleepono jee eepünaale waya. Ayata weʼraajirüin napüshuaʼa na wayuukana tü nünüliakat Jeowa otta tü keeʼireekat naaʼin.
Wainma tü kasa wanoujakat atuma sünain sülüʼülüin süpüla wulein nutuma Jeowa tü nünüliakat (Eze. 36:23). Alüʼütsü maʼin süpüla najaʼttinnüin na mojukana anüiki süchiki nünülia Maleiwa. Aneerü maʼin kaʼikat tia namüin na aʼyataakana nümüin Jeowa, na eʼraajirakana nünülia otta na achekakana nuluwataain naaʼu.
Jaʼyasü saalin nupueulose Jeowa nüpüla sükajee tü outkajawaa miyoʼu apünüinkat kaʼi ‹¡Ayata eejüin jaʼin!›, aainjünaka sainküin mma soʼu juyaka 2009, eere nantüin na wawalayuu naatakana oumain. Nnojotsü süpüla motuin waaʼin outkajawaakalüirua tia otta sükaaliinjüin waya süpüla eejüin waaʼin sünain tü nükaliakat Jeowa (Mar. 13:37; 1 Tes. 5:1, 2, 4).
Aishii maʼin waya nüpüla Jeowa, talatüsü waaʼin nutuma, neemereʼerüin waya suluʼu wanee mma wüittüsü otta nuʼunirüin waya suluʼu wanee wopu eere miyoʼuin wüin (Sal. 23:1, 2; 100:2, 5).
Wawalayuu aishiikana wapüla, jülüja jaaʼin aneerüin maʼin jukuwaʼipa nutuma Jeowa ayatüle jiʼyataain nümüin soʼu tü kashiirua choʼujaakat. Aishii jia wapüla.
Na juwalayuukana,
Na Laülaayuu Nekiipüʼükana na Aküjüliikana Pütchi nüchiki Jeowa