Ounjutsü wayuu Rahab

ALUWATAAINJANA wayuukana naainnua süpüla nnojoluin noʼutunuin aaʼin. Ajayajülii naya, tü akaaliinjakat naya shia Rahab. Kepiasü shia Jericó. Wekirajaa sünain jamakuwaʼipat tia.

Alüʼütsü süpüla nalatüin na israeliitakana tü süchikat Jordán otta nantüin Canaánmüin. Süpülapünaa tia, nuluwataaka Josué piamashii ajayajülii. Nümaka namüin: ‹Jünala tü mmakat otta tü mmakat Jericó›.

Nantaka na ajayajüliikana Jericómüin shipialuʼumüin Rahab. Namaka wanee wayuuinnua nümüin chi aluwataaikai Jericó: ‹Antüshii aipaʼainka piamashii israeliita süpüla najayajüin tü mmakat›. Naapapa tia, nuluwataaka wanee wayuuinnua shipialuʼumüin Rahab, namaka sümüin: ‹¡Pujuʼitira na wayuu yaakana pipialuʼu!› Sunjuluin Rahab na ajayajüliikana süraloʼu shipia. Sümaka namüin na wayuukana: ‹Antüshii wanee wayuuinnua tepialuʼumüin, nnojotsü tatüjaain aaʼu jalejeʼewalin naya. Oʼunushii motsopa chi Kaʼikai, süpülapünaa süsürülaain soʼu süsepü Jericó. ¡Juwataale nachiirua jüsaʼwateena!› Nawataaka na wayuukana nachiirua.

Noʼunapa suwataaka Rahab eemüin na ajayajüliikana, sümaka namüin: ‹Tatüjaa aaʼu naapeerüin Jeʼwaa tü mmakat jümüin. Waapa achikirü josoin nutuma tü paala ishosükat wanaa sümaa juʼunuin Egiptojee otta müsia juʼutuin naaʼin chi aluwataaikai Sehón otta Og. Süka anamiain taya jümüin, anamia jia tamüin. Kata noʼu jutuma chi tashikai, tü teikat otta na tawalayuukana›.

Namaka sümüin: ‹Meeria shia watuma. Süpüla tia piʼitaa sünain shiwentaanase pipia tü jiiku ishosükat, püntira na püpüshikana pipialuʼumüin. Weʼrüle tü jiiku ishosükat waleʼejapa, nnojoleena woʼutuin aaʼin jia›. Naleʼejapa naküjaka nümüin Josué tü alatakat.