Gedeón otta 300 wayuu

¿PIʼRÜIN tü naainjakat na wayuukana? Nayakana chejeʼewalii Israel. Na ejepülaakana asüshii wüin, shaʼwatüshi Gedeón naʼütpaʼa. Niʼrajaain tü nakuwaʼipakat sünain asaa wüin.

Piirakaa namüin na wayuukana, asüshii wüin, eeshii eeka nejepülaain otta wanee asüshii wüin süka najapü süpüla kanainjatüin naaʼin tü alatakat naʼütpünaa. Tü naainjakat anasü maʼin süka nuluwataain Jeʼwaa Gedeón sünain aneekajaa na eejakana aaʼin sünain asaa wüin. Aleʼejaashii nepialuʼumüin eeka nnojoluin naainjüin tia. Wekirajaa sünain tia.

Mojusü nakuwaʼipa na israeliitakana nachikuaʼa süka nnojoluin noonooin nümüin Jeʼwaa. Wainmashii na madianiitakana noulia otta müliashii naya natuma. Makalaka nachuntuin nümüin Jeʼwaa nükaaliinjüin naya. Naapaka Jeʼwaa nanüiki.

Nuluwataaka Jeʼwaa Gedeón sünain achajawaa wayuu. Nükotchijaka Gedeón 32.000 wayuu süpüla natkaain namaa 135.000 surulaat. Nümaka Jeʼwaa nümüin Gedeón: ‹Wainma maʼin wayuu pümaa›. ¿Jamüsü maka nünüiki?

Suuliajatü müin nanüiki na israeliitakana: ‹Akanajüshii waya wamüiwaʼa, nnojoishi choʼujaain Jeʼwaa wamüin›. Nümaka Jeʼwaa nümüin Gedeón: ‹Püleʼejeʼera nepialuʼumüin na wayuu eekana mmoluin›. Noʼunaka 22.000 surulaat. Apütüüshii 10.000 süpüla natkaain namaa 135.000 surulaat.

Nümaka Jeʼwaa nümüin: ‹Wainmayülia wayuu pümaa›. Nuluwataaka Gedeón süpüla nümaainjanain naya sünain asaa wüin otta nüleʼejeʼerüinjana nepialuʼumüin na ejepülaakana sünain asaa wüin. Nümaka Jeʼwaa: ‹Akanajeechi pia naka 300 wayuu eejaka aaʼin sünain asaa wüin›.

Natkaainjanapa na wayuukana apünüinsü neʼipapaʼa nutuma Gedeón. Naapaka namüin wanee suʼwa paaʼa, wanee iita sümaa sikoʼu. Kaʼlepa aika noutkajaaka eere na naʼünüükana. Keeʼiraka natuma tü suʼwakat paaʼa, nasottaka tü iitakat otta naʼwaataka: ‹¡Nüchajaruutse Jeʼwaa otta Gedeón!› Nachijiraaka sümaa nainkuuin aaʼin na naʼünüükana otta napantajaaka. Nakanajaka na israeliitakana.