Tü pütchi chiiruaajatkat namüinjatka na woutiiseekana

Awoutisaajünüshii na wayuukana sünain tü outkajawaa miyoʼu naainjakat na aküjaliikana pütchi nüchiki Jehová. Sujutaapa tü pütchi namüinjatkat na woutiisainjanakana, ashaʼwalaainjana naya süpüla nasoutuin sümaa emetuluin nanüiki shiʼipajee piamasü pütchi asakinnakalü anain naya:

1. ¿Piyaawajaaitpa oulia paainjala sümaa paapüitpain paaʼin nümüin Maleiwa otta punouja anainrü suʼttaain wayuu nükajee Jesucristo?

2. ¿Piyaawata aaʼulu Aküjalinjachin pia pütchi wanaa namaa na anoujashiikana nünain Jehová sutuma joo woutiisainjachin pia?

«Aa» namüle na woutiisainjanakana, naküjain noʼupala na jutkatüshiikana nanoujain sünain taashin naya suulia naainjala nutuma Jesús otta naapüin naaʼin nümüin Jehová (Roma 10:9, 10, TNM). Süpülapünaa jusoutuin shiʼipajee tia piamasükat pütchi, anashii juʼuraajüle otta jülüjale jaaʼin jamaluʼuluin shia süpüla jusoutajanain süka süpüshuaʼa jaaʼin.

¿Oʼuraajüitchipa pia süpüla paapüin paaʼin nümüin Jehová otta püküjain nümüin piʼyataainjachin nümüin süka süpüshuaʼa paaʼin?

¿Jamüshi piyaawatüinjatka saaʼu woutiisamaatüinjachin pia maalü?

¿Jamüinjatü sukuwaʼipa nasheʼin na woutiisainjanakana? (1 Tim. 2:9, 10; Juan 15:19; Filip. 1:10).

Süka kojutuin Maleiwa wamüin, anainjatü sukuwaʼipa washeʼin, nnojotsü arülachoinjatüin, nnojotsü eeinjatüin ayaakuaa otta ashajuushi sünain nüsheʼin chi woutiisainjachikai. Anainjatü niyolojo suʼupala wayuu otta wuleinjatü nüsheʼin.

¿Kasa nnojoluinjatka naaʼinrüin wanee wayuu woutiisapa nia? (Luc. 3:21, 22).

Washatüinjatü nukuwaʼipa Jesús wanaa sümaa woutiisain nia. Jamüshijaʼa Jesús, kojutusü maʼin nümüin tü kaʼi woutiisakalü oʼu nia otta jayasü shia saaʼu nukuwaʼipa. Müshiijeseʼe nnojoluin wemeeʼerajaainjanain soʼunnaa tia kaʼikat. Nnojoishi ashuunajainjachin wanee wayuu jee naainjain wanee kasa mojuteetka atuma tia kaʼikat. Nnojotsü anain nuʼwaajüle wanee wayuu sutuma woutiisain nia. Mayaapejeʼe talatüin waaʼin soʼu kaʼikat tia, laülaainjatü waaʼin suʼupala wayuu.

¿Jamüshi pikeraajeetka pünüiki nümüin Maleiwa ayatüle paaʼinwain pia namaa na wawalayuukana?

¿Jamüshi ayatüinjachika pia sünain ekirajawaa sünain tü Bibliakat otta aküjaa pütchi süchikijee woutiisain pia?

NAAʼINRAJATKA NA LAÜLAASHIIKANA

Eere wanee aküjai pütchi, «woutiiseeshi taya», makai, aküjünajatü nümüin nikirajaainjatüin sünain tü asakinnakalü anain suluʼu süpana 12 sünainmüin 50 otta naashajeʼerüinjatü tü «Pütchi nümüinjatü chi aküjakai pütchi sümaa nnojolin woutiisain nia», tü suluʼukat süpana 7. Aküjünüsü sünain tia pütchikat, yapainjachin nia süpüla tü nikirajaainjatkalü anain namaa na laülaashiikana. Otta aküjünüsü yala, eein süpüla jutatüin nutuma karaloʼutakat tüü sümaʼainruʼu nikirajaanüin amaa jee niirakaain sümüin tü nüshajakat. Nnojotsü choʼujaain nikirajaain paala nümaa wanee wayuu süpülapünaa nüsakinnüin natuma na laülaashiikana.

Woutiiseere wanee wayuu nüküjainjatü shia nümüin chi akumajakai napüleerua na laülaashiikana tü aainjünajatkat. Asakinneechi nia nutuma chi wawalakai müleka nuʼuraajüichipale süpüla naapüin naaʼin nümüin Jehová. Nikirajaapa chi woutiiseeshikai sünain tü «Asakinnajanaka anain na woutiiseekana», aneeküneena piamashii laülaashii süpüla nasakirüin chi wawala woutiiseeshikai, naatawaiya müinjana na ekirajakana wanee saʼata. Outkajaamaatüinjana na laülaashiikana nümaa chi woutiiseeshikai, naapüinjatpejeʼe kaʼi nümüin süpüla nikirajaain palajana. Eeshi süpüla nüsakinnüin jaʼitasü nnojoluin atüjaanüin aaʼu joujaleerüin saainjünaka wanee outkajawaa miyoʼu.

Waneeinjatü oora shikirajaanaka oʼu wanee saʼata, eepajaʼa süpüla kamaʼain na laülaashiikana choʼujaale shia saaʼin namüin. «Anasü sajaʼttamaatüle watuma», nnojoishi müinjachin chi laülaashikai otta chi woutiiseeshikai. Oʼuraajüinjana naya süpülapünaa otta sajaʼlajaapa tü nekirajaakalü anain. Nachajaainjatü sukuwaʼipa na laülaashiikana süpüla nasakiramaatüinjachin chi wayuu woutiiseekai.

Anasü nasakinnüle waneʼewai nakua na wayuukana. Müle shia natuma na laülaashiikana, naapajeerü tü nüküjakat chi woutiisainjachikai, natüjaajeerü aaʼu niyaawatüle tü shiimainkat nüchiki Maleiwa otta keraale nia süpüla woutiisaa. Otta müshia chi woutiisainjachikai, nnojoleechi mmoluin sünain asoutaa. Kaʼwayuusere wanee wayuu jee woutiisainjatüle shia wanaa nümaa, eeshi süpüla nüsakinnüin sümaa nuʼwayuuse.

Shiale woutiisainjatüin wanee jierü, outkajaainjana na laülaashiikana sümaa eere neʼnünüin sutuma wayuu, nnojotpejeʼe aapünajatüin nanüiki. Eeshii süpüla noʼunuin piamashii laülaashii jee niale wanee laülaashi nümaa wanee aʼyataakai niʼipajee, müleka shiale shiʼipakat waneesia tü asakinnakalü anain.

Nnojoliire wainmain na laülaashiikana, eeshii süpüla naneekünüin na aʼyataakana neʼipajee eekai natüjain ekirajaa otta eekai laülaain naaʼin süpüla nasakirüin na woutiiseekana sünain tü shiʼipakat 1 tü kanüliakat: «Tü wanoujakalü anain». Tü shiʼipakat 2 tü kanüliakat: «Wakuwaʼipa sünain anoujaa» nayainjana oʼunirakana sukuwaʼipa na laülaashiikana. Nnojoliire eein laülaashii suluʼu wanee outkajaalee, asakinnüinjachi chi wawala alapalaakai waaʼu süpüla naluwataanüin waneinnua wawalayuu suluʼujeejana waneirua outkajaalee pejeka nanain.

Jintüiyüire chi woutiiseekai eeinjachi nüshikai otta niikat nümaa nüsakinnapa. Nnojoire süpüla yalain naya nümaa, anashii eere piamashii laülaashii jee niale wanee laülaashii nümaa wanee niʼipajachi müleka shiale shiʼipaka waneesia tü asakinnakalü anain.

Jülüjainjatü naaʼin na laülaashiikana müleka niyaawatüle saaʼu chi woutiiseekai tü kasa mapüleekat shikirajakat anain tü Bibliakat, nnojotsü choʼujaain nütüjainjachin maʼin. Kojutuinjatü nümüin tü shikirajakalü anain tü Bibliakat jee tü naaʼinrakat na anoujashiikana nünain Jehová. Isayürüleje nüchiki niyaawatüin saaʼu tü kasa mapüleesü shikirajakalü anain tü Bibliakat, akaaliijünüinjachi natuma na laülaashiikana süpüla woutiisainjachin nia mapa. Nooʼulaainjachi nia paala süpüla jaʼyainjatüin sünain nukuwaʼipa kojutuin nümüin tü aküjaakat pütchi otta noonooin namüin na wayuu nuʼunirakana Jehová sükajee tü nüpülainkat. Naya aneeküinjanaka na laülaashiikana jeʼrainjatüin oora naashajaaka oʼu nümaa chi woutiisainjachikai süpüla natüjaain saaʼu keraale nia süpüla woutiisaa. Mayaapejeʼe eein süpüla kamaʼain naya sünain wanee asakiraa, naashajaainjatü achiki shia süpüshuaʼa.

Na laülaashii aashajaakana nümaa chi woutiisainjachikai, outkajaainjana süchikijee tü piamakat shiʼipa süpüla naküjain keraale nia süpüla woutiisain. Jülüjeerü naaʼin nütüjale karaloʼuta, tü nütüjakalü apüleerua otta waneirua kasa. Tü keeʼireekat maʼin naaʼin shia alinjachin Jehová nüpüla chi woutiisainjachikai süka süpüshuaʼa naaʼin otta nütüjaain saaʼu tü kasa mapüleesü shikirajakalü anain tü Bibliakat. Sükajee nakaaliijünüin na woutiisainjanakana, ayateena naya oonooin sümaa tü aluwataanaka anain naya nutuma Jehová, maʼaka saaʼin tü aküjaakat pütchi.

Nüküjeerü wanee laülaashi nümüin chi woutiisainjachikai keraale nia süpüla woutiisaa. Keraale nia süpüla woutiisaa, aashajaweena nümaa süchiki tü pütchi kanüliakat «Tü pütchi chiiruaajatkat namüinjatka na woutiiseekana» (süp. 51-53). Nnojorüle keraain nutuma tü karaloʼutakat Anainjatka atuma pukuwaʼipa waneepia, naküjeerü nümüin anain nikirajaale sünain süchikijee woutiisain nia. Aküjünajatü nümüin ashajünüinjatü sükalia woutiisaka oʼu nia sünain tü tarüjeeta eere süshajünüin nünülia wanaa sümaa nuʼttuin sünain aküjaa pütchi namaa na wawalayuukana. Aküjünajatü nümüin süshajünüin nünülia natuma na laülaashiikana süpüla jülüjain saaʼin na anoujashiikana nünain Jehová naʼyataain napüshuaʼa na wayuu eeka naʼaka, sükajee süshajünüin nünülia eesü süpüla saapünüin aʼyatawaa nümüin naʼaka na anoujashiikana nünain Jehová otta akaalinjünüin nia süpüla icheinjatüin nunoula. Naküjainjatü na laülaashiikana süshajünüin nanülia maʼaka süküjünüin sünain Política de privacidad eʼitaanaka suluʼu jw.org. Nnojoluinjatü alatüin suulia poloo minuuto naashajaapa nümaa.

Sülatapa wanee juya süchikijee woutiisain nia, yootuinjana piamashii laülaashii nümaa süpüla natütüleʼerüin naaʼin otta naküjainjatü waneirua kasa naaʼinrajatka. Noʼutku na laülaashii yootuinjanakana nümaa, niainjachi chi laülaashi jülüjakai aaʼin na nüküjakana amaa pütchi. Jintüiyüire chi woutiisashikai, eeinjachi chi nüshikai jee shiale tü niikat sünain tia outkajawaakat. Nachajaweerü sukuwaʼipa na laülaashiikana süpüla anain naaʼin chi woutiisashikai. Aashajaweena naya süchiki kooʼomüin nunoula, naküjeerü nümüin tü naaʼinrajatkat süpüla ayatüin nikirajaain sünain tü Bibliakat, naashajeʼerüin shia weinshi, nuʼwaajüin Maleiwa sümaa nüpüshi, waneepiain nia sünain tü outkajawaakat otta nüküjain pütchi (Éf. 5:15, 16). Nnojorüle keraain nutuma tü karaloʼutakat Anainjatka atuma pukuwaʼipa waneepia, naneekeechi na laülaashiikana wanee wawala süpüla nikirajüin nia. Nnojotsü wainmainjatüin tü kasa nachiaakalü anain nia, natütüleʼerüinjatpejeʼe maʼin naaʼin chi wawalakai.