Oʼutuna aaʼinchi Esteban

CHI wayuu nüsapainkakai nia Esteban, nikirajüin nia Jesús. ¡Piirakaa nümüin Esteban aʼinaʼanüshi süka ipa! ¿Jamüsü saainjünaka tia nümüin? Wekirajaa sünain.

Nükaaliinjüin Maleiwa Esteban süpüla naainjüin kasa pülasü. Wayuukana naainnua nnojotsü nacheküin tia, atkaashii naya nümaa sükajee nikirajüin nüchiki Maleiwa. Kekiishi maʼin Esteban nutuma Maleiwa otta nüküjaka nachiki na wayuukana sünain nekirajüin alawaa. Jashichika maʼin naya sutuma tia, nataʼülaka Esteban otta naküjiraka alawaa nüchiki.

Nümaka chi laülaashikai napüleerua na sacerdotekana: ‹¿Shiimain tü aküjünakat?› Naashajaaka Esteban süchiki tü sümakat tü Wiwüliakat. Nüküjüin namüin eein namaiwa wayuu mojulaashii aʼürülaaka na nünüikimaajanakana Maleiwa. Nümaka Esteban: ‹Müshiʼiya jiakana, juʼuta aaʼinchi Jesús otta nnojoishii jia oonooin nümüin Maleiwa›.

Jashichika maʼin naya, kepisanaka tü naikat sutuma üttüin maʼin naaʼin. Niirakaaka Esteban sirumatuʼumüin, nümaka: ‹Teʼrüin Jesús shaʼwatüin nikialuʼujee Maleiwa›. Nasürütka nacheʼe na wayuukana otta najarattaka nia anoipaʼamüin.

Naakataka nasheʼin otta naapaka shia nümüin Saulo süpüla naaʼinmajüin shia. ¿Piʼrüin Saulo? Naʼinaʼalaka Esteban süka ipa. Nüsapainkaka nia sümaa nuchuntuin nümüin Maleiwa: ‹Jeʼwaa, nnojo süsalain naya putuma›. Nütüjaa aaʼu Esteban nemeejünüin na wayuukana natuma na laülaashiikana naʼakajee na sacerdotekana. Süchikijee tia ouktushi Esteban.

Saainjünüle pümüin kasa mojusü, ¿paainjüin shia namüin, puchuntataapa nümüin Maleiwa müliainjanain naya? Nnojotsü naainjüin Jesús otta Esteban tia. Anamia naya namüin na mojulaakana namüin. Washata nakuwaʼipa.