Pedro nipialuʼu Cornelio

CHII nia Pedro, naʼaleewainyuu na nümaakana. ¿Jamüshi nüsapainkaka chi wayuukai nünainmüin Pedro? ¿Anasü tia? ¿Pütüjaa aaʼu jarai chi nüsapainkakai?

Nia Cornelio. Shikiipuʼu nia surulaat chaaʼaya Roma, nnojoishi niʼraajüin Pedro. Aluwataanüshi nia süpüla nuunejaain Pedro nipialuʼumüin. Wekirajaa sünain tia.

Na nikirajakana Jesús palajana naya na judíokana, Cornelio nnojoishi judíoin. Akaisaʼa nia aishi Maleiwa nüpüla, aashajaashi nümaa otta nükaaliinjüin na wayuukana. Antüshi aliika wanee aapiee eemüin Cornelio, nümaka: ‹Talatüshi Maleiwa pümaa otta naapeerü pümüin tü puchuntakat. Püsaajira wanee wayuu kanüliashi Pedro. Chashi nia Jope nipialuʼu Simón, sotpaʼa tü palaakat›.

Naainjaka Cornelio tia. Waneemüin kaʼi, chashi Pedro iipünaa sünain nipia Simón. Niʼraka wanee kuluulu sirumatuʼujee nutuma Maleiwa otta wainma mürüt sünain, tia mürütkalüirua nnojotsü wulein süpüla ekünaa. Sümaka wanee pütchi nümüin: ‹Pedro, puʼuta saaʼin otta pikapa tü mürütkat›.

Nümaka Pedro: ‹¡Nnojo! Nnojoishi taya eküin kasa yarüttüsü›. Sümaka tü pütchikat: ‹Nnojo yarüttüsü pümüin sümüin tü wulekat naashin Maleiwa›. Apünüintua sülatüin tia. Wanaa sümaa nüsakirüin Pedro jamaluʼuluin tia antüshii na wayuu nuluwataakana Cornelio.

Nüshakataka Pedro, nümaka: ‹Taya chi wayuu jüchajaakai achiki. ¿Kasa teʼiyouka amüin jia?› Naküjaka nümüin nuluwataanüin Cornelio nutuma wanee aapiee süpüla nuunejaain nia nipialuʼumüin. Waneemüin kaʼi nuʼunaka Pedro namaa wanee naʼaleewainyuu nipialuʼumüin Cornelio, chaaʼaya Cesarea.

Nuutkajeʼerüin Cornelio nüpüshi otta naʼaleewainyuu. Nüntapa Pedro nüsapainkaka Cornelio nünainmüin maʼaka piʼrüin suluʼu tü ayaakuaakat. Nümaka Pedro: ‹Pütamaa; wayuu taya wanaa pümaa›. Mojusü saashin tü Wiwüliakat wasapainkale waya süpüla waʼwaajüin wanee wayuu. Nia waʼwaajüinjachika neʼe Jeʼwaa.

Nümaka Pedro sünain aküjaa pütchi: ‹Tatüjaaipa aaʼu nücheküin Maleiwa napüshuaʼa na wayuu aʼyataweekana nümüin›. Wanaa sümaa tia, nüntaka chi naaʼinkai Maleiwa naaʼu na wayuukana naashajaaka süka naata anüikii. Ponusü naaʼin tia na nümaajanakana Pedro süka nayain neʼe na judíokana nücheküin Maleiwa naashin. Tia shikirajüin naya wanaawain nümüin Maleiwa napüshuaʼa na wayuukana. Anasü maʼin sotule waaʼin tia.