Kojutü wamüin tü kataakat oʼuu

1, 2. ¿Kasa nüsülajaka Maleiwa wamüin kojutüka maʼin maaʼulu? ¿Jamüsü kojutüka shia?

NÜSÜLAJÜIN wamüin Maleiwa wanee kasa kojutüsü maʼin: shia tü kataakat oʼuu sümaa kekiin waya otta eein süpüla washatüin nukuwaʼipa (Génesis 1:27). Sutuma tia, eesü süpüla wasakirüin waaʼin sünain tü nümakat Jeʼwaa otta waainjüin shia. Müle shia, kooʼomüinjeerü wanoula. Laülaajeerü waaʼin sümaa alin wapüla Jeʼwaa otta ‹eejeerü waaʼin waneepia sünain tü anasükat süpüla waaʼinrüin shia jee sünain tü mojusükat süpüla wayouktüin shia› (Hebreokana 5:14).

² Choʼujaasü maʼin maaʼulu waainjüin tü nümakat Jeʼwaa. Wainma maʼin tü alatakat sümüin wayuu otta nnojotsü aküjünüin süpüshuaʼa tü aainjünajatkat. Maʼaka saaʼin tü wunuʼu anakat atuma wayuu ayuuisü otta tü aainjünakat süka tü ishakat. Choʼujaasü maʼin jülüjüin waaʼin tia süka woonoweein nümüin Jeʼwaa. Süpüla anain waaʼin otta ayatüin alin wapüla Maleiwa, ¿kasa waainjüinjatka waneekapa tü wunuʼu wepinaseinjatkat otta tü aainjünajatkat süka washa? Watüjaainjatü maʼin aaʼu tü pütchi nümakat Jeʼwaa (Proverbios 2:6-11). Wekirajaa sünain süpüshi.

KOJUTÜSÜ TÜ KATAAKAT OʼUU OTTA TÜ ISHAKAT

3, 4. ¿Joujatü nüküjüin Jeʼwaa kojutüin maʼin tü ishakat? ¿Jarat tü piamasü pütchi nümakat Jeʼwaa?

³ Naashin Jeʼwaa tü kataakat oʼuu sünainpünaasü tü ishakat otta kojutüsü shia piamaleʼeya. Tia, nüküjüin süchikijee nuʼutünüin aaʼin Abel nutuma Caín. Müshi Jeʼwaa nümüin chi uwomuyuushikai: «Aʼwaatüsü nüsha chi pimüliakai mmaapüjee sünain achuntaa pasalawaa» (Génesis 4:10). Naashin Jeʼwaa tü nüshakat Abel shia tü kataa oʼuu nünainkat, amülouika nuʼutünapa aaʼin. Müsü süchuntakai pasalawaa nümüin Maleiwa (Hebreokana 12:24, TNM).

⁴ Süchikijee tü juya miyoʼushaata soʼujatkat nükalia Noé ekünajatü shiʼiruku mürüt naashin Maleiwa, akatsaʼa eesü tü nüpülajakat, müshi nia: ‹Nnojolüinjatü jiküin süsha. Kasalajaneerü tatüma nümüin chi uwomuyuukai› (Génesis 9:4, 5). Maaʼulu oonooinjana waya sümüin tia pütchikat süka nuuʼuliwoʼuin waya Noé, tia shiiʼiyatüin shiimain tü nümakat Maleiwa nümüin Caín: palajana, tü kataa oʼuu nanainkat na katoʼuchiikana sünainsü nasha. Piama, chi Shikiishikai tü kataakat oʼuu süsaleena nutuma na mojutükana amüin tü ishakat otta tü kataakat oʼuu (Aluwataaushikana 17:25).

5, 6. ¿Jamüsü sünüiki tü pütchi aapünakat nümüin Moisés süchiki kojutüin maʼin tü ishakat? (Paashajeʼera tü pütchikat «Kojutüsü tü kataa oʼuu sünainkat mürüt».)

⁵ Tia piamasükat pütchi nüküjaka Jeʼwaa ashajünüsü saʼaka tü pütchi aapünakat nümüin Moisés. Müshi Jeʼwaa suluʼu Levítico 17:10, 11, TNM: «Wanee wayuu [...] niküle isha eeka eein jashicheechi taya nümüin otta toʼuteechi aaʼin nia jaʼakajee. Süka tü kataakat oʼuu sünainsü tü ishakat otta teʼitaain shia pümüin saaʼu tü aʼajüleekat süpüla sülaʼajaain jaainjala, süka shiain alaʼajaain aainjalaa tü ishakat». (Paashajeʼera tü pütchikat «Alaʼajaasü aainjalaa tü ishakat».)a

⁶ Nnojorüle shiʼyotunüin tü ishakat saaʼu tü aʼajüleekat, oʼyotunajatü mmoluʼu. Sükajee tia, müsü shiiteʼennakai aaʼin tü kataakat oʼuu nümüin chi Kakorolokoi shia (Deuteronomio 12:16; Ezequiel 18:4). Na israeliitakana nnojoishii aainjüinjanain wainma kasa süpüla nayuʼlüin süpüshuaʼa süsha tü mürüt neküinjatkat. Nasotuinjatü sümüla otta anainjatü shiyuʼlia süsha. Süchikijee, eesü süpüla neküin shia sümaa anain naaʼin, süka neeʼiyatüitpain kojutüin namüin chi Aapakai kataa oʼuu.

7. ¿Kasa naainjaka David süpüla niiʼiyatüin kojutüin nümüin tü ishakat?

⁷ Wanee ayaawataka saaʼu tü nümakat Jeʼwaa süchiki tü ishakat nia David, ‹wanee wayuu anashi nümüin Maleiwa› (Aluwataaushikana 13:22). Soʼu wanee kaʼi wüinyaasüshi nia. Naapapa tia na nümaajanakana, ekerotüshii apünüinshii naʼakapünaa na naʼünüükana, najaʼitaka wüin suluʼujee wanee ishi nalüʼüjaka shia nümüin David. Sutuma tia, müshi nia: «Nnojotsü tasüinjatüin nasha na wayuu ajachajakana sutuma ouktaa sünain asaajaa wüin tasüin». Tia wüinkat nümüin David müsü aka saaʼin nasha jee tü kataa oʼuu nanainkat na apünüinshiikana wayuu. Sutuma tia, mayaapejeʼe wüinyaasüin maʼin nia, «niʼyotoko shia mmoluʼu nümüin Jeʼwaa» (2 Samuel 23:15-17, TNM).

8, 9. ¿Jamüsü nnojotka suʼwanajaain tü nümakat Maleiwa süchiki tü kataakat oʼuu otta tü ishakat sükumajaapa tü anoujaakat nünain Cristo?

⁸ 2.400 juya süchikijee süküjünüin nümüin Noé nnojoluinjachin niküin isha otta 1.500 juya süchikijee tü pütchi aapünakat nümüin Moisés, outkajaashii na Laülaayuu Nekiipüʼükana na anoujüshiikana nünain Cristo. Sünain tia, müsü tü nashajakat nutuma Jeʼwaa: «Tü nütchinkat Maleiwa otta wayakana anasü wamüin nnojorüle kooʼomüin tü jaaʼinrüinjatkat, shia neʼe jaaʼinrüinjatkat tüü: nnojoluinjana jia sünainpünaain mürüt eeka suʼutuushin aaʼin sümüin tü maleiwayaasükalüirua, isha, mürüt eeka süülüüshin otta amaʼüjirawaa akuwaʼipaa» (Aluwataaushikana 15:28, 29, TNM).

⁹ Natüjaa aaʼu na laülaayuu nekiipüʼükana na anoujüshiikana nünain Cristo kojutüin tü ishakat otta mojule sukuwaʼipa atumawaa müsü aka saaʼin kamaleiwaseyawaa otta amaʼüjirawaa akuwaʼipaa. Müshiʼiya wayakana washatüin nakuwaʼipa. Sülatüle wamüin wanee kasa sünainpünaaka isha, wekirajaa anainrü tü pütchi nümakat Jeʼwaa süpüla waneeküin tü anakat nümüin.

TÜ AAINJÜNAKAT SÜKA TÜ ISHAKAT

10, 11. (1) ¿Wacheküin shiʼitaanüin isha wanain otta tü pienchisü kasa sünainkat? (2) ¿Kasa waneeküinjatka wamüiwaʼa?

¹⁰ Süka kojutüin wamüin tü pütchi makat: ‹nnojoluinjana jia sünainpünaain isha›, wayakana aküjüliikana pütchi nüchiki Jeʼwaa nnojotsü wasülajüin, weʼiteʼerüin otta sünaajaanüin washa süpüla shiʼitaanüin wanain süchikuaʼa. Otta nnojotsü wacheküin tü pienchisü kasa sünainkat: glóbulos rojos, glóbulos blancos, plaquetas otta plasma.

¹¹ Ayuʼnnüsü otta aainjünüsü wainma kasa süka tü pienchisü kasa sünainkat isha. ¿Eesü süpüla «isha» wamüin sümüin tia ayuʼnnakat? ¿Eesü süpüla wacheküin shia? Waneeküinjatü tia wamüiwaʼa. Jaʼitakajaʼa suʼuninnajatüle washa suluʼupünaa wanee kasa sümaa nnojoluin shiyuʼnnüin woulia süpüla sünaajaanüin (paashajeʼera tü pütchikat «Ayuʼnnaka saʼakajee isha otta tü aainjünakat süka» suluʼu).

12. Sünain tü kasa waneeküinjatkat süka waaʼin wamüiwaʼa, ¿kasa waainjüinjatka süpüla watüjaain saaʼu tü waneeküinjatkat?

¹² ¿Nnojotsüche kasajatüin nümüin Jeʼwaa tü waneekakat wamüiwaʼa? Nnojotsü shiain tia, eesü naaʼin sünain tü jülüjakat waaʼin otta jamüin waneekaka wanee kasa (Proverbios 17:3; 24:12; Aluwataaushikana 15:8). Sünainjee tia, ¿kasa waainjüinjatka süpülapünaa wacheküin otta wayouktüin wanee wunuʼu otta wanee kasa aainjünajatka süka washa? Palajana aashajaainjana waya nümaa Maleiwa, wekirajaainjatü anain tia otta waainjüinjatü tü sümakat tü waaʼinkat (Roma 14:2, 22, 23, TNM). Nnojotsü waainjüinjatüin tü namakat na waneeinnua otta nnojoishii waya müinjanain: «¿Kasajeʼe paainjaka piale alatüin amüin tia?». Nnojotsü waainjüinjatüin tia süka ‹wasouktüinjatüin aaʼu nümüin Maleiwa tü waaʼinrakat› (Galacia 6:5; Hebreokana 4:13; paashajeʼera tü pütchikat «¿Kojutüsü tamüin tü ishakat?»).b

AISHII WAYA NÜPÜLA JEʼWAA SÜKAJEE TÜ NULUWATAAKAT ANAIN

13. ¿Kasa shiiʼiyataka nüchiki Jeʼwaa tü nuluwataakat anain? Püküja süchiki wanee kasa nuluwataaka anain Jeʼwaa.

¹³ Tü nuluwataakat anain otta tü pütchi nümakat Jeʼwaa shiiʼiyatüin kekiin nia süpüla Aküjaa tü aainjünajatkat otta müin aka nia wanee wayuu aika apüla otta jülüjaka aaʼin nüchonnii (Salmo 19:7-11). Tü aluwataanakat anain na anoujüshiikana, ‹nnojoluinjana naya sünainpünaain isha› nnojotsü neʼinaajalain na tottootkana. Akatsaʼa anashii waya sutuma suulia sülatüin kasa mojusü wamüin sükajee shiʼitaanüin isha wanain (Aluwataaushikana 15:20, TNM). Tü aainjünajatkat maʼin maaʼulu naashin wainma tottoot shia süwaʼnnüin wayuu sümaa meʼitaajuuin isha sünain. Tü pütchi nümakat Jeʼwaa shiiʼiyatüin niain wanee Washi aipürai otta kekiishi maʼin (Roma 11:33; Juan 14:21, 23).

14, 15. (1) ¿Kasa nuluwataaka anain Maleiwa na israeliitakana? (2) ¿Jamüsü süpüla waainjüin tia pütchikat?

¹⁴ Jülüjüsü naaʼin Maleiwa waneepia anainjatüin nakuwaʼipa na nümaajanakana. Niiʼiyatüin tia sükajee tü nuluwataakat anain na israeliitakana. Nuluwataain naya sünain akumajaa sotpünaajana saajuna nepia. Wainma tü aainjünakat saaʼu, makalaka nnojoleerüin alatüin kasa mojusü namüin naainjüle tia (Deuteronomio 22:8; 1 Samuel 9:25, 26; Nehemías 8:16; Aluwataaushikana 10:9). Otta nuluwataain naya sünain nasürülüin paaʼa eeka jashichin (Éxodo 21:28, 29). Na nnojoliikana müin atuma shia mojusü tü naainjakat otta eeshii süpüla kaainjalain naya.

¹⁵ ¿Jamüsü süpüla waainjüin tia pütchikat? Jülüjüinjatü waaʼin weʼejena suulia seewaain wayuu sutuma, nnojoishii maaʼinjanain waya sünain woʼunirüin shia, jülüjüinjatü waaʼin wepia, waʼyataale, wamüʼlüin otta tü waneekakat süpüla washaittüin. Ouktüshii maʼin jimaʼalii otta majayünnüü suluʼu wainma mma sutuma maaʼin naya sünain oʼuniraa neʼejena. Makalaka na jimaʼalii otta na majayünnüü ayateekana alin apüla Maleiwa otta kojutüka amüin tü kataakat oʼuu nnojotsü neʼrayaain amüin nakuwaʼipa shiiʼiree nashaitteein. «Nnojoleena waya jamajüin» nnojoishii müin. Talatüshii maʼin süka nnojoluin naainjüin tia (Eclesiastés 11:9, 10).

16. ¿Jarat tü pütchi nümakat Jeʼwaa süchiki tü ojutiraakat? (Paashajeʼera tü makat aka saaʼin jolotsü.)

¹⁶ Kojutüsü maʼin nümüin Maleiwa tü kataa oʼuu nanainkat na wayuukana otta tü nanainkat na joʼuu süleʼeruʼukana nei. Sünain tü pütchi naapakat nümüin Moisés nüküjüin tü aainjünajatkat nümüin wanee wayuu neewainre wanee ipuolu. Shiale ouktüin jee niale chi süchonkai, uwomuyuushi otta «ouktajachi nia» (Éxodo 21:22, 23, TNM).c Sutuma tia, wayaawata aaʼu jamüin naaʼin Jeʼwaa sutuma niʼrüin wainmain maʼin jieyuu ojutitka juyawai, naainjüin tia süka aneein naya namüiwaʼa otta namaʼüjiraweein nakuwaʼipa.

17. ¿Kasa eeka süpüla waküjüin namüin na ojutitkana süpülapünaa nekirajaain sünain tü Wiwüliakat?

¹⁷ ¿Jama sujutirüle wanee jiet süpülapünaa shikirajaain sünain tü Wiwüliakat? ¿Moteerü naaʼin Jeʼwaa saainjala? Aa. Napüshuaʼa na ayaawajaakana suulia naainjala moteerü naaʼin Jeʼwaa naainjala sükajee amülain nüsha Jesús (Salmo 103:8-14; Éfeso 1:7). Naashin Cristo «antüshi [nia] saʼakamüin wayuu süpüla achajawaa süchiki eekai kaainjaralüin shiiʼiree sükatalaain suulia saainjala. Nnojoishi antüshin süpüla achajawaa süchiki eekai maainjalain» (Lucas 5:32).

WASÜNNEʼERA SULUʼUJEE WAAʼIN TÜ KASA MOJUSÜKAT

18. ¿Jamüsü shiiʼiyatia sutuma tü Wiwüliakat tü ouktakat maʼin anainjee wayuu?

¹⁸ Nnojoishi talatüin neʼe Jeʼwaa sümaa nnojoluin waainjüin kasa mojusü sümüin wayuu. Nücheküin wasünneʼerüin suluʼujee waaʼin tü ouktakat maʼin anainjee wayuu: tü üttaakat aaʼin. Naapirüin waya nükajee Juan: «Chi eekai kanain naaʼin [üttüin naaʼin nünain] nuwalayuu, uwomuyuushi» (1 Juan 3:15). Nnojotsü shiain mamaneein waya namüin na wayuukana shia keeʼireere waaʼin ouktüin naya. Sutuma tia, eesü süpüla mojuin wanüiki jee waküjüin alawaa süchiki naainjüin kasa mojusü süpüla müliain naya nutuma Maleiwa (Levítico 19:16; Deuteronomio 19:18-21; Mateo 5:22). Choʼujaasü wasünneʼerüin suluʼujee waaʼin waainjeein kasa mojusü (Santiago 1:14, 15; 4:1-3).

19. ¿Kasa shikirajaka anain waya Salmo 11:5 otta Filipos 4:8, 9 woʼunirüle wakuwaʼipa süka tü pütchi nümakat Jeʼwaa?

¹⁹ Kojutüle wamüin tü kataakat oʼuu maʼaka nümüin Maleiwa otta ayateere alin nia wapüla wayoukteerü tü jashieekat. Saashin Salmo 11:5, TNM, «üttüsü naaʼin [Jeʼwaa] sünain wayuu eeka sücheküin tü atkawaakat». Pütchikat tia, nnojotsü süküjüin neʼe mojuin nümüin Jeʼwaa tü atkawaakat; süküjüin tü pütchi oʼunirajatkat wakuwaʼipa: aire wapüla Maleiwa nnojoleerü washaittüin, wanajüin otta waapajüin wanee kasa wachekaka atuma atkawaa. Müsia waashajeʼerüle Filipos 4:8, 9 eere süküjüin niain Jeʼwaa ‹chi Maleiwa aapakai anaa›, wekirajaa anainrü weʼitaainjatüin suluʼu wekii otta suluʼu waaʼin kasa anasü, aainjiraka waya kasa anasü otta aapaka anaa wamüin.

TÜ OʼUTAKAT MAʼIN SAAʼIN WAYUU

20-22. ¿Jamüsü nakuwaʼipa na anoujüshiikana nanainmüin na manoujüinsaliikana? ¿Jamüsü naainjaka tia?

²⁰ Naashin Maleiwa oʼutüshii maʼin saaʼin wayuu maainjalasat na nuluwataakana aaʼu Satanás. Tü naluwataayakat, tü makat aka saaʼin mürüt jashichi saashin tü Wiwüliakat wainma maʼin wayuu suʼutaka aaʼin, eeshii na aʼyataashiikana nümüin Jeʼwaa naʼaka (Daniel 8:3, 4, 20-22; Alateetkat Mapeena 13:1, 2, 7, 8). Wainma na suluʼukana tü mma anakat maʼin akuwaʼipa sünain oikkawaa otta na kekiikana maʼin süpüla aainjaa wanee kasa, neʼipajanashii na suluʼukana tü mma wainmakat aluʼu nneerü süpüla nakumajüin kasa keemasü süpüla noʼutüin saaʼin wayuu, sutuma tia wainma nneerü nakanajaka. Shiimain: ‹tü wayuu manoujainsatkalüirua, nia aluwataaka saaʼu chi Yolujaakai› (1 Juan 5:19).

²¹ Akanasaʼa na anoujüshiikana, nnojoishii sünainpünaain naya tü oʼutaakat saaʼin wayuu. ¿Jamüsü? Süka ‹nnojoluin wanaawain naya namaa na manoujüinsaliikana›, müshiijeseʼe nnojoluin naya sünainpünaain poliitika otta atkawaa (Juan 15:19; 17:16).d Müliale naya atumawaa nashatüin nukuwaʼipa Cristo otta nnojoishii atkaain. Aishii na naʼünüükana napüla otta nachuntüin nümüin Maleiwa naaʼu (Mateo 5:44; Roma 12:17-21).

²² Na anoujüshii shiimainshiikana, nnojoishii sünainpünaain ‹Babilonia tü Miyoʼusükat› —süpüshuaʼa tü iküleesia nnojotkat shiimain—, tü oʼutakat maʼin saaʼin wayuu. Saashin tü Wiwüliakat ‹suʼutirapüʼüin naaʼin wainma nünüikimaajana Maleiwa ooʼulaka wainma anoujashii sainküin mma›. Sutuma tia, müshi Maleiwa wamüin: «Jujuitta suluʼujee» (Alateetkat Mapeena 17:6; 18:2, 4, 24).

23. ¿Kasa naainjüinjatka wanee wayuu süpüla nujuʼitüin suluʼujee Babilonia tü Miyoʼusükat?

²³ Na aainjakana tü nümakat Jeʼwaa süchiki nojuʼitüinjanain suluʼujee Babilonia tü Miyoʼusükat nnojotsü nachuntüin neʼe süsünneʼennüin nanülia suluʼujee. Nayouktüin tü kasa mojusü naainjakat na suluʼukana, maʼaka saaʼin akuwaʼipaa yarüttüsü, sünainpünawaa poliitika otta washirüü (Roma 12:9; Alateetkat Mapeena 18:7, 9, 11-17). ¡Wainma maʼin na ouktakana sutuma sukuwaʼipa Babilonia!

24, 25. ¿Kasa naaʼinmajaka aka Jeʼwaa na ayaawajaakana suulia naainjala? ¿Kasa eejatka nutuma Jeʼwaa suluʼu Israel?

²⁴ Süpülapünaa wekerotüin suluʼu tü iküleesia shiimainkat waainjapuʼuin tü naainjakat na nuluwataakana aaʼu Satanás. Makalaka kaainjalain waya wanaa namaa. Akatsaʼa mapa weeʼiratüin wakuwaʼipa, wanoujüin naapajiraain nikii Cristo waaʼu otta waapüin waaʼin nümüin Maleiwa. Sükajee tia, motusü naaʼin Jeʼwaa waainjala otta naaʼinmajüin wanoula. (Aluwataaushikana 3:19). Tia naainjakat Jeʼwaa shiyaawasesü tü pueulo ounjulaayakat, maʼaka wekirajaweerüin anain (Números 35:11-15; Deuteronomio 21:1-9).

²⁵ ¿Kasapülajatü tia pueulokalüirua? Süpülajatü nükaaliinjünüin chi israeliita uwomuyuukai sümaa nnojoluin naaʼinjeein shia otta awataainjachi nia chamüin süpüla katüin noʼu. Nüntapa, asouktajachi nia saaʼu naainjala namüin na laülaashiikana otta kepiainjachi nia chaaʼaya ouktaleepa chi laülaashikai napüleerua na sacerdotekana. Süchikijee tia, eeshi süpüla nuʼunüin eere nücheküin naaʼin. Tia naainjakat Maleiwa shiiʼiyatüin amüliajülin maʼin nia otta kojutüin maʼin nümüin tü kataa oʼuu sünainkat wayuu. ¿Kasa kayaawaseka tü pueulo ounjulaayakat? Shiyaawasesü tü nükaaliinjakat aka waya Jeʼwaa maaʼulu. Ouktajana paala waya sükajee mojutüin wamüin tü kataakat oʼuu otta tü ishakat sümaa nnojoluin waaʼinjeein shia, akaisaʼa Jeʼwaa naaʼinmajüin waya sükajee naapajiraain nikii Cristo waaʼu. ¿Kasa waainjüinjatka süpüla weeʼiyatüin kojutüin wamüin tia? Wanee sukuwaʼipa shia wounejaain wayuu sünainmüin tü «pueulo ounjulaaya» eekat maaʼulu. Waainjüinjatü tia süka sülüʼülüin ‹tü müliaa miyoʼusükat› (Mateo 24:21; 2 Corinto 6:1, 2).

KOJUTÜSÜ WAMÜIN TÜ KATAAKAT OʼUU WAKÜJÜLE PÜTCHI

26-28. ¿Jamüshii maka waya maʼaka naaʼin Ezequiel? ¿Kasa waainjüinjatka süpüla ayatüin alin wapüla Maleiwa?

²⁶ Na nümaakana Jeʼwaa maaʼulu müshii aka naaʼin Ezequiel, wanee nünüikimaajachi Jeʼwaa, niʼitaain nia süpüla naaʼinmajüin nanoula na israeliitakana. Müsü tü aluwataanakat anain nia: «Paapüinjatü tü pütchikat [taküjaka pümüin] otta paapirüinjana naya tamüin». Nnojorüle naainjüin shia, nia kasitka amülain nasha na süsalainjanakana naainjala nutuma Jeʼwaa chaaʼaya Jerusalén (Ezequiel 33:7-9, TNM). Watüjaa aaʼu naainjüin Ezequiel tü aluwataanakat anain nia. Sutuma tia, nnojoishii nüsirüin na ouktakana.

²⁷ Alüʼütshii süpüla najaʼlajaain na nuluwataakana aaʼu Satanás. Sutuma tia, na aküjüliikana pütchi nüchiki Jeʼwaa kojutüsü maʼin namüin otta aʼyataainjana naya sünain aküjaa süchiki «tü sükaliakat pasalawaa» nutuma Maleiwa otta süchiki Nuluwataaya (Isaías 61:2, TNM; Mateo 24:14). ¿Aʼyataashii maʼin waya sünain aainjaa tia? Aʼyataashi maʼin Pablo sünain, müshijeseʼe nümüin: ‹Nnojoluichipa tayain kasirüin jaraire amüloulin jaʼaka. Süka taküjain jümüin süpüshuaʼa tü naaʼinreekat Maleiwa› (Aluwataaushikana 20:26, 27). ¡Anasü maʼin washatüle nukuwaʼipa!

²⁸ Süpüla ayatüin alin wapüla Maleiwa nnojotsü kojutüinjatüin neʼe wamüin tü kataakat oʼuu otta tü ishakat maʼaka kojutüin shia nümüin. Ayatüinjana wulein waya noʼuluʼu, tia wekirajaajeerü anain suluʼu tü wanee ekirajaayakat.