Shiʼipa 1 Tü wanoujakalü anain

Pütüjaa aaʼu tü shiimainkat nüchiki Maleiwa otta aleewashi Maleiwa pümaa sutuma pikirajaain sünain tü Bibliakat. Anaitpa punoula otta paʼatapajüin katüin poʼu waneepia suluʼu tü Paʼaraiisükat. Piyaawatüitpa aaʼu naaʼinmajüin Jehová na anoujashiikana nünain yaa saaʼu tü Mmakat (Zac. 8:23). Wattaitpa saalii tü kasa anasü piʼraka wanaa namaa na wawalayuukana.

Süpülapünaa woutiisain pia, nakaalinjeechi pia na laülaashiikana sünain ekirajawaa sünain tü wanoujakalü anain (Heb. 6:1-3). Kasataalejeseʼe nükaalinjain pia Jehová jee naapüin pümüin kataa oʼuu waneepia (Juan 17:3, TNM).

1. ¿Jamüshi woutiiseeka pia?

2. ¿Jarai chi kanüliakai Jehová?

   • «Nia Jehová chi Maleiwa shiimainshikai, chaa sirumatuʼu otta yaa saaʼu tü mmakat. Waneeshia neʼe nia» (Deut. 4:39).

   • «Piain neʼe pümüiwaʼa chi Miyoʼushikai saaʼu tü mmakat süpüshuaʼa, piakai chi kanüliakai Jehová» (Sal. 83:18).

3. ¿Jamüsü puchuntajatka nünülia Jehová?

   • «Meerü jünüiki juchuntapa nümüin Maleiwa: ‹Taata Maleiwa chakai sirumatuʼu, kasataalejeseʼe shiʼraajüin wayuu tü pünüliakat otta kojutuin pia sutuma›» (Mat. 6:9, TNM).

   • «Chi eekai nuchuntuin nünülia Jehová, oʼtteʼenneechi nia» (Roma 10:13, TNM).

4. Püküja waneirua nukuwaʼipa Jehová achuntunaka suluʼu tü Bibliakat

   • «Jehová chi Kakumainkai tü mmakat [...]. Eejeechi nia süpüla kaʼika süpüshuaʼa» (Is. 40:28).

   • «Taata Maleiwa chakai sirumatuʼu» (Mat. 6:9, TNM).

   • « Aipürai maʼin wayuu Maleiwa» (1 Juan 4:8, TNM).

5. ¿Kasa eeka süpüla paapüin nümüin Jehová?

   • «Alinjachi püpüla Jehová süka süpüshuaʼa paaʼin, süka süpüshuaʼa pukuwaʼipa, süka tü jülüjakat paaʼin jee süka süpüshuaʼa pütchin» (Mar. 12:30, TNM).

   • «Nia juʼwaajüinjachika, chi Jümaleiwasekai nümüiwa, nia jiʼyataainjachika amüin nümüiwa» (Luc. 4:8).

6. ¿Jamüshi waneepieeka pia nümaa Jehová?

   • «Kekii maʼin pia tachonchee otta pütalateʼera taaʼin süpüla tasoutuinjachin niʼipajee chi ojuyaajakai taya» (Prov. 27:11).

7. ¿Jarai puʼuraajüinjachikai amüin? ¿Jarai puʼuraajüinjachikai akajee?

   • «Shiimain tü tamakat [Jesús] jümüin, jaʼitasü kasain juchuntuin nümüin chi Tashikai tanülialuʼu, naapeerü shia jümüin» (Juan 16:23, TNM).

8. ¿Kasa eeka süpüla wachuntuin nümüin Maleiwa?

   • «Müinjatü jünüiki juʼuraajapa: ‹Washikai iipünaajachikai kasataalejeseʼe shiʼraajüin wayuu pünülia otta kojutuin pia sümüin. Wachuntuin pümüin puluwataainjachin saaʼu tü mmakat. Kasataalejeseʼe saainjünüin tü keeʼireekat paaʼin yaa mmapaʼa maʼaka sukuwaʼipa putuma chaa iipünaa». «Paapa maa wamüin tü weküinjatkat soʼukai. Moto paaʼin tü kasa nnojotkalü anain watuma, maʼaka motuin waaʼin tü kasa mojusü aainjünakat wamüin. Pükaalinja waya suulia suuʼulakünüin waaʼin. Jalia maa waya nuulia chi Yolujaakai›» (Mat. 6:9, 10, TNM; Mat. 6:11-13, TNM).

   • «¿Jamüinjatü wakuaippa sünain arütkawaa nümülatuʼumüin chi Maleiwakai süpüla achuntaa nümüin? Müleka wachuntüle nümüin tü nüchekakat wapüleerua, jaʼitairü wachuntüin kasa eekai eein, watüjaa aaʼulu sünain naapüin wanüiki» (1 Juan 5:14, 15).

9. ¿Jamüsü nnojotka naapajüin Jehová nünüiki wanee wayuu jaʼitashi nuʼuraajüin nümüin?

   • «Achunteena naya kaalinwaa nümüin Jehová, nnojoleechipajaʼa nia asoutuin namüin [...] wainmain maʼin tü namaʼülakat» (Miq. 3:4).

   • «Naaʼinmajüin Maleiwa waneepia chi wayuu eekai aaʼinrüin tü anasü nüchekakat nüpüleerua, je naapüin nünüiki wanaa sümaa nüchuntüin nümüin. Akaajasa chi wayuu eekai masütaajuin sünain aaʼinraa tü mojusükot, aʼürülaajeechi Maleiwa nümüin saaliijee tia» (1 Ped. 3:12).

10. ¿Jarai chi kanüliakai Jesucristo?

    • «Nüsouktakalaka joo Pedro nümüin: Pia Cristokaʼaya, [...]. Pia chi Nüchonkai chi Maleiwa matüjüinkai ouktaa» (Mat. 16:16).

11. ¿Kasapülajachi nüntaka Jesús mmapaʼamüin?

    • «Shiaʼaya naaʼinraka tia chi Süchonkai Wayuu. Nnojoishi nia antüshin süpüla shiʼyataainjatüin wayuu nümüin. Antüshi nia süpüla niʼyataainjachin namüin na waneinnua otta naapüinjatüin nikii süpüla suʼttaainjatüin watta saalii wayuu» (Mat. 20:28, TNM).

    • «Acheküshi taküjüinjachin tü pütchi anasükat suluʼupünaa tü pueulokat süpüshua, süchiki nukuaippa Maleiwa sünain aluwatawaa, süka shiain ajütünüin apüla taya, nümakalaka Jesús namüin» (Luc. 4:43).

12. ¿Kasa paaʼinrajatka kojutule pümüin naapajiraain nikii Jesús?

    • «Ouktüshi nia saaʼu waainjala sümaa süsoʼiraain naaʼin shiiʼiree waaʼinreein tü anasükat waneepia. Sükajee shiiʼiratüitpain waaʼin nütüma, anakaja nnojoliire waaʼinrüin tü wachekakat wamüiwa, shiainjatü tü talatakat atüma naaʼin» (2 Cor. 5:15).

13. ¿Kasa laülawaa aapünaka nümüin Jesús?

    • «Laülaashi taya atumawaa chaa sirumatuʼu jee yaa saaʼu tü mmakat» (Mat. 28:18, TNM).

    • «Eʼitaanüshi nia nütüma Maleiwa süpüla kojutüinjachin sütüma wayuu süpüshua. Aapünüsü laülawaa nümüin sünain kojutüinjachin nia sütüma wayuu noulia napüshua na sülaülashiikana mmakat, otta suulia kasakat süpüshua eekai eein» (Filip. 2:9).

14. ¿Punouja anainrü nayain Na Laülaashii Jülüjakana Aaʼin na Aküjaliikana pütchi chi «achepchiee oonookai otta kekiikai maʼin»?

    • «¿Jarai maʼin chi achepchiee oonookai otta kekiikai maʼin, chi eʼitaanakai nutuma chi nülaamainkai süpüla naapüin neküin na nüchepchiakana wanaapünaa sümaa tü kaʼi choʼujaakalü oʼu namüin?» (Mat. 24:45, TNM).

15. ¿Wayuuche tü nüpülainkat Maleiwa?

    • «Nümakalaka chi aapieekai sümüin: ‹Anteerü nüpülain Maleiwa paaʼu jee saaʼinmajeerü pia nüpülain chi Miyoʼushikai, makalaka niʼraajüneechin chi joʼuukai sünain maainjalain jee nüchooin nia Maleiwa›» (Luc. 1:35, TNM).

    • «Asülajawaishii jia kasa anasü namüin na jüchonniikana eerejeʼe wayuuin mojulaashii jia, nieemataka nnojolin aapeematüin chi Jüshi iipünaajachikai tü nüpülainkat juchuntule shia nümüin» (Luc. 11:13, TNM).

16. ¿Kasa naainjaka Jehová sükajee tü nüpülainkat?

    • «Sükajee tü nünüikikat Jehová, akumajaasü tü sirumatuʼukat, otta sükajee nujuʼulüin akumajaasü süpüshuaʼale tü eekat süpaʼa» (Sal. 33:6).

    • «Katchinjeetpejeʼe jaaʼin süntapa jaaʼumüin tü nüpülainkat Maleiwa, jüküjeenakalaka pütchi tachiki sainküinpünaa Jerusalén, Judeapünaa, Samariapünaa otta sainküinpünaa mmakat» (Aluw. 1:8, TNM).

    • «Jütüjaa aaʼu nnojoluin shikiiruʼujeejatüin neʼe wayuu tü pütchi aküjünatüjütkalia paala suluʼu tü Ashajuushikat. Nnojotsü naleʼeruʼujeejatüin tü nashajakat na nünüikimaajanakana Maleiwa. Nnojotsü nashajüin tü nekiiruʼujeejatkat neʼe, shia nashajaka tü nüchekakat Maleiwa sükajee tü nüpülainkat» (2 Ped. 1:20, 21, TNM).

17. ¿Kasa wayuu Sukuwaʼipa Aluwatawaa nutuma Maleiwa?

    • «Nüikaleʼerüinjatü chi Maleiwa sirumatuʼujeʼewaikai sukuwaʼipa wanee aluwatawaa eeinjatka süpüla kaʼikat süpüshuaʼa. Nnojoleerü jaralüin alaülaajaain saaʼu. Sükajee tia aluwataayakat, najaʼttireerü Maleiwa süpüshuaʼa sukuwaʼipa suluwataaya wayuu, shieetkalaka eein waneepia tü nuluwataayakat» (Dan. 2:44).

18. ¿Kasa naaʼinrajatka Maleiwa süpüleerua wayuu nuluwataapeena?

    • «Nülaʼateerü [Maleiwa] suʼwuira noʼu. Müiria nnojoluin ouktaa, aʼyalajaa, mojuu aaʼin otta saalii ayuulii. Süka jamüin, sülatüitpain tia kasakalüirua» (Apoc. 21:4, TNM).

19. ¿Jamüsü watüjaaka saaʼu sülüʼülüin sükalia süpüla nuluwataainjachin Maleiwa?

    • «Wanaa sümaa joyotuin Jesús eekai tü wutai kanüliakat Olivos, narütkaaka na nikirajüinkana namüiwaʼa nünainmüin jee namakalaka nümüin: ‹Püma wamüin kasoʼuleerüin alatüin tü makat, kaseerüin wayaawatüin akajee yaaichipain pia otta sülüʼülaain sükalia süpüla sajaʼttajatüin tü kasa alatakat sainküin mma›. Nusoutakalaka Jesús namüin: [...] atkaajiraajeerü wayuu suluʼujeejatü wanee pueulo sümaa waneʼeya, atkaajiraajeerü wayuu suluʼujeejatü wanee mma sümaa waneʼeya, aijeerü jamü otta akutkujaajeerü mma sainküinpünaa mmakat. Aküjüneerü sainküin mma tü pütchi anakat maʼin süchiki nuluwataainjachin Maleiwa süpüla saapüinjatüin shia wayuu maʼleekalia. Kettaapa tia, anteerü sükalia süpüla sajaʼlajaainjatüin tü kasa alatakat sainküin mma» (Mat. 24:3-5, 7, 14, TNM).

    • «Sülüʼütpa sükalia sajaʼttüinjatüin tü kasakalüirua. Mülieerü maʼin saaʼin wayuu soʼunnaa tia otta alateerü kasa eeka keemain maʼin. Süka jamüin, eejeenain na wayuu kapülakana aaʼin nakuwaʼipa namüiwaʼa, eekai kachiiruain aaʼin washirüü, pülayaain naaʼin, naʼwaataain suluʼu nakuwaʼipa, naküjain alawaa, nnojoliin jaa namüin sümüin nei otta nümüin nashi, nnojoliin naapüin analuʼut, mojutuin Maleiwa natuma, maaliin wayuu napüla, nayouktüin süchiki anajirawaa, mojuin nanüiki sujuuna wayuu, nnojoliin nachecherüin naaʼin, nayouktüin süchiki nachiaanüin, nayouktüin süchiki tü kasa anasükat, nemeejüin tü wayuukalüirua, macheʼein sümüin tü münakat namüin, yaletüin naaʼin, nashaitüin waneepia sümaa maaliin Maleiwa napüla, piamain noʼupünaa sünain anoujaa süka nnojoliin noonooin nümaa Maleiwa» (2 Tim. 3:1-5, TNM).

20. ¿Kasa paaʼinrajatka kojutule pümüin sukuwaʼipa Aluwatawaa nutuma Maleiwa?

    • «Jaaʼinmaa waneepia sukuwaʼipa nuluwataaya Maleiwa otta tü kasa anakat noʼuluʼu» (Mat. 6:33, TNM).

    • «Nümakalaka Jesús namüin na nikirajüinkana: «Eere wanee wayuu oushikaweeka süchiirua takuwaʼipa, niyoutajatü tü suchuntaakat naaʼin, müinjatü nülüʼüjakai saaʼin wanee wunuʼu sümaajatka müliaa jee nüshatajatü takuwaʼipa waneepia» (Mat. 16:24, TNM).

21. ¿Jarai chi Satanás münakai? ¿Jaralii na yolujaakana?

    • «Shia jaaʼinreeka maʼi tü kasa mojusü nüchekakat jüpüleerua chi sülaülakai yolujaa, süka niain shiimüin jüshin. Nia oʼttatüjüikajaʼa sünain uwomuyuwaa sümaiwa paala» (Juan 8:44).

    • «Nujutunakalaka iipünaajee chi kayuushi miyoʼushaatakai, chi wüi nümaiwajachikai, chi Yolujaa otta Satanás münakai. Chi eʼikeʼerakai wayuu sainküin mmaka süpüshuaʼa. Ojutünüshi nia iipünaajee namaʼaleʼeya na aapiee nümaajanakana» (Apoc. 12:9, TNM).

22. ¿Kasa alawaa nüküjaka Satanás nüchiki Jehová jee nachiki na wayuu aʼyataakana nümüin?

    • «Süsouktakalaka tü jietkat shiʼipajee tü wüikat: ‹Nnojo, eesü süpüla weküin süchon tü wunuʼuliakat süpüshua yaakat suluʼu tü apainkat. Shia neʼe apülajünaka woulia, tü wunuʼu yaa pasanainkat sünain tü apainkat süpüla nnojolüinjatüin weküin süchon. «Müleka jiküle shia, jaʼitakaje neʼe jipettüle shia, shiimüinshaana ouktajanain jia sütüma», müshi chi Maleiwakai wamüin›. Shiasaʼa jooluʼu sünüiki tü wüikat: ‹Nnojo. Nnojotsü shiimüin tia. Nnojoleena jia ouktüin. Müleka jiküle süchon tü wunuʼukot, kekiijeena maʼi jia süpüla kasa süpüshua. Meena aka jia Maleiwakai sünain jiyaawatüin saaʼu tü anasükat je tü mojusükat. Müsüjeseʼe niyouktüin süpüleerua jiküinjatüin suchon tü wunuʼukot›, sümataalakalaka tü wüikat» (Gén. 3:2-5).

    • «Nusoutakalaka Satanás nümüin Jehová: ‹Naapeerü chi wayuukai süpüshuaʼa tü kasa nümaʼanakat süpüla katüin noʼu›» (Job 2:4).

23. ¿Kasa paaʼinrajatka süpüla sütüjaanüin aaʼu alawaain tü nümakat Satanás?

    • «Piʼyataa nümüin [Maleiwa] süka süpüshuaʼa paaʼin» (1 Crón. 28:9).

    • «¡Jaʼitaichi outuin taya, ayatajachia neʼe taya nümaa Jehová!» (Job 27:5).

24. ¿Kasanainjeesü outaka wayuu?

    • «Kaainjalashii napüshuaʼa na wayuukana nünainjee waneeshia neʼe wayuu, outuinnaka naya suluʼujee tia. Aʼwalakajaasü tü outaakat naʼakapünaa napüshuaʼa na wayuukana, jama kaainjalain naya» (Roma 5:12, TNM).

25. ¿Kasa alataka nümüin wanee wayuu outapa nia?

    • «Na wayuu katüshiikana oʼu, natüjaa aaʼu outeenain naya soʼu wanee kaʼi; akanasaʼa na outushiikana, nnojorüleesia kasain natüjaain aaʼu» (Ecl. 9:5).

26. ¿Asoʼiraajeetche naaʼin na wayuu outuinnapakana?

    • «Shia taʼatapajaka nasoʼireʼennüin aaʼin süchikijee outaa na wayuu lotokana akuwaʼipa otta na wayuu nnojoliikana lotuin akuwaʼipa.» (Aluw. 24:15, TNM).

27. ¿Jeʼrainjana na wayuu aluwataainjanakana chaa iipünaa nümaa Jesús?

    • «Teʼraka chi Anneetchonkai shaʼwatüin saaʼu tü utai kanüliakat Sion, eejana 144.000 wayuu nümaa ashajünakana eʼipoʼunain nünülia chi Anneetchonkai jee nünülia chi Nüshikai» (Apoc. 14:1, TNM).