Akotchojirawaa asoʼiraka waaʼin nünain chi Senyotkai

ALUWATAANÜSHII na anoujashiikana sünain outkajawaa süpüla sotuin naaʼin ouktüin Kürisüto naaʼu, sünülia tia: ‹akotchojirawaa asoʼiraka waaʼin nünain chi Senyotkai› (1 Corinto 11:20). ¿Jamüsü kojutüka maʼin shia? ¿Kasoʼuluinjatü? ¿Jamüinjatü sukuwaʼipa?

Niʼitaain Jesukürisüto tü sukuwaʼipainjatkat soʼu tü Pascuakat, tü juyakat 33 so. w. Tü Pascuakat shia wanee miʼiraa aainjünüsü juyawai soʼu 14 tü kashikat nisán (wanee kashi natuma na judíokana). Tia kashikalü oʼttusü nujuʼitapa chi kashikai soʼu tü palajatkat kaʼi Nisan. 13 kaʼi süchikijee tia, aainjünüsü tü Pascuakat.

Soʼu aikat tia, naainjain Jesuu tü Pascuakat namaa na nikirajüinkana, nüjünajaain Judas Iscariote. Süchikijee tia, nekaaka sünain tü akotchojirawaa asoʼirakat waaʼin nünain chi Senyotkai. Ekawaakat tia shiiʼirakasü tü Pascuakat, makalaka eeinjatüin shia utua soʼu tü juyakat.

Naashin Mateo ‹naapaain Jesuu wanee pan sümaa naapüin tü analuʼutkat nümüin Maleiwa. Nüshaletüin otta naapüin shia namüin na nikirajüinkana. Neküinjatü shia süka naapajiraainjachin nikii naaʼu. Naapaain wanee wiino otta naapüin tü analuʼutkat nümüin Maleiwa. Naapüin shia namüin na nikirajüinkana. Nasüinjatü shia süka müin aka saaʼin tü nüsha amülainjatkat süpüla nikeraajüin Maleiwa tü pütchi jeket pansaatüjütkalia nutuma jee süpüla sülatinnüin saainjala wayuu› (Mateo 26:26-28).

Naashin noʼutku na wayuukana, panjaasü nutuma Jesuu tü niʼirukukat otta wiinojaasü tü nüshakat. Akatsaʼa ayatüin niʼiruku Jesuu nünain niitajapa tü pankat. ¿Neküinche na nikirajüinkana Jesuu tü niʼirukukat otta nasüinche tü nüshakat? Nnojo, naainjüle tia naainjüinjee wanee kasa mojushaatasü maʼin nümüin Maleiwa (Génesis 9:3, 4; Levítico 17:10). Müshi Jesuu suluʼu Lucas 22:20: ‹Asüüshikat tüü, müsü aka tü tasha amülainjatkat süpüla nikeraajüin Maleiwa tü pütchi jeketkat jee süpüla sülatinnüin saainjala wayuu›. ¿Shiajaasüche «tü pütchi jeketkat» tü iita kaluʼukat wiino? Nnojo, aashajaajirawaa tia süpüla aainjaa wanee kasa, nnojotsü iitain sümaajatü wiino.

Shiyaakuayaasü neʼe niʼiruku Jesuu tü pankat, tü anakat maʼin. Tü pan niitajakat Jesuu shia tü apütaakat süchikijee tü Pascuakat, nnojotsü ejitünüin soolojia pan saʼaka (Éxodo 12:8). Tü soolojiakat pan eesü shiyaakuayaale tü aainjalaakat saashin tü Wiwüliakat. Tü pankat shiyaakuayaasü tü niʼiruku Jesuu naapajiraakat waaʼu sümaa maainjalain nia (Mateo 16:11, 12; 1 Corinto 5:6, 7; 1 Pedro 2:22; 1 Juan 2:1, 2).

Tü wiino yuulematakat shiyaakuayaasü nüsha Jesuu, tü eekalü atuma tü pütchi jeketkat. Naashin Jesuu, amülainjatü tü nüshakat süpüla «motuin naaʼin Maleiwa waainjala». Sutuma tia, eeshii wayuu eeka wulein nuʼupala Jeʼwaa otta sünainpünaashii naya tü pütchi jeketkat (Hebreokana 9:14; 10:16, 17). Sünainjee tia pütchi jeketkat chainjana sirumatuʼumüin na 144.000 wayuu oonookana waneepia sümaa nünüiki. Chaaʼaya, aluwataainjana otta sacerdooteinjana süpüla anain nakuwaʼipa na wayuukana (Génesis 22:18; Jeremías 31:31-33; 1 Pedro 2:9; Alateetkat Mapeena 5:9, 10; 14:1-3).

¿Jaralii na eküinjanakana tü pankat otta na asüinjanakana tü wiino alatinnakat sünain tü akotchojirawaakat? Naya neʼe na sünainpünaakana tü pütchi jeketkat, na chainjanakana sirumatuʼumüin. Sutuma tü nütchinkat Maleiwa, eesü suluʼu naaʼin naluwataainjanain sirumatuʼu (Roma 8:16). Wayuukana naainnua aluwataainjana nümaa Jesuu (Lucas 22:29, 30).

¿Kasa naainjaka na kepiainjanakana waneepia Mmapaʼa? Oʼunüshii naya sünain tü akotchojirawaa asoʼirakat waaʼin nünain chi Senyotkai maʼaka nüküjüin shia Jesuu. Mayaapejeʼe nnojoluin neküin tü pankat otta nasüin tü wiinokot kojutüsü namüin tia akotchojirawaakat. Na aküjüliikana pütchi nüchiki Jeʼwaa outkajaashii juyawai soʼu 14 tü kashikat nisán, nikerotapa chi Kaʼikai süpüla sotuin naaʼin ouktüin Jesuu waaʼu. Mayaapejeʼe palitchon sainküin tü mmakat na chainjanakana sirumatuʼumüin, kojutüsü maʼin tia outkajawaakat namüin napüshuaʼa na anoujashiikana. Soʼu tia, sotusü naaʼin alin maʼin naya nüpüla Jeʼwaa otta Jesukürisüto (Juan 3:16).