Waneepiaka atuma wayuu sümaa nuʼwayuuse

1, 2. (1) ¿Jeʼrainjatü sükalia tü kaʼwayuuseekat? (2) ¿Kasa naainjüinjatka süpüla tia?

KASAALÜIWAʼAYA Adán sümaa Eva nutuma Maleiwa, nnojotsü nüküjüin nooʼulaajiraainjanain, kepiajiraainjana waneepia (Génesis 2:24). Tü kaʼwayuusee wulekat noʼuluʼu Maleiwa shia saʼaniraale nukuwaʼipa wanee toolo sümaa wanee jierü. Saashin tü Wiwüliakat, ooʼulaajiraainjana na wayuukana otta eeshii süpüla kasaalüin naya nachikuaʼa namaʼüjiraale nakuwaʼipa (Mateo 5:32).

² ¿Eeshi süpüla talatajiraain otta waneepiain wanee wayuu sümaa nuʼwayuuse? Aa. Süpüla tia, süküjüin tü Wiwüliakat piamasü kasa aainjünajatka. Naainjüle shia na kaʼwayuuseshiikana, talateena otta aneerü nakuwaʼipa. ¿Jarat tia kasa naainjüinjatkat?

TÜ PALAJATKAT KASA AAINJÜNAJATKA

3. ¿Jarat tü apünüinsükat sukuwaʼipa aijirawaa neʼitaainjatka suluʼu nakuwaʼipa na kaʼwayuuseshiikana?

³ Tü palajatkat kasa naainjüinjatka shia aijiraainjanain naya. Kojuya sukuwaʼipa tü aijirawaakat saashin tü Wiwüliakat. Tü palajatkat shia aire wapüla wanee watünajuchi (Juan 11:3). Tü piamakat shia aire wapüla wapüshi (Roma 12:10). Tü apünüinkat shia aire wanee jierü nüpüla wanee toolo (Proverbios 5:15-20). Shia nakuwaʼipainjatka na kaʼwayuuseshiikana tüü. Eesü wanee sukuwaʼipa tü aijirawaakat alanaʼaleeka suulia tü waneeirua.

4. ¿Jarat tü wanee sukuwaʼipakalü aijirawaa?

⁴ Tü wanee sukuwaʼipakalü aijirawaa ashajünüsü shia suluʼu griego süka tü pütchikat a·gá·pe, shia tü pütchi eʼitaanakat suluʼu 1 Juan 4:8, eere sümüin: ‹Aishii waya nüpüla Maleiwa›. Shiimain tia, «aishi wapüla chi Maleiwakai süka alin waya nüpüla palajana» (1 Juan 4:19). Alinjachi wapüla Jeʼwaa palajana otta süchikijee na waneeinnua (Marcos 12:29-31). Tü pütchikat a·gá·pe eʼitaanüsü shia suluʼu Éfeso 5:2, eere sümüin: ‹Anakaja aijiraale jia jüpüla, maa aka alin jia nüpüla Cristo süka naapajiraain nikii süpüla ouktaa waaʼujee›. Naashin Jesuu, ayaawatüneena na anoujüshii shiimainshiikana süka aijiraain naya: ‹Aijiraale jia jüpüla [a·gá·pe], ayaawatüneena jia sünain tekirajanain jia› (Juan 13:35). Anuu wanee sukuwaʼipa tü pütchikat a·gá·pe suluʼu 1 Corinto 13:13: ‹Anakaja ayatüle waya sünain wanoujain, sünain [waʼatapajüin] tü kasa anasü naaʼinreetkat je sünain alin wapüla tü wayuukolüirua. Otta tü alanaʼaleekat shia alii apüla wayuu [a·gá·pe]›.

5, 6. (1) ¿Jamüsü sülanaʼaleeka tü aijirawaakat suulia tü anoujaakat otta tü waʼatapajakat nünainjee Maleiwa? (2) ¿Jamüshii kepiajiraajeenaka waneepia na kaʼwayuuseshiikana aijiraale naya?

⁵ ¿Jamüsü sülanaʼaleeka tü aijirawaakat a·gá·pe suulia tü anoujaakat otta tü waʼatapajakat nünainjee Maleiwa? Shia süka sünainjeein shia tü pütchi nümakat Jeʼwaa suluʼu tü Wiwüliakat (Salmo 119:105). Tia aijirawaakat shia tü waainjakalü atuma kasa anasü sümüin wayuu, jaʼitairü saainjüin kasa anasü jee kasa mojusü wamüin. Sutuma tia aijirawaakat, oonooshii na kaʼwayuuseshiikana sümüin pütchikat tüü: ‹Jaaʼinra tü anasükat nümüin juʼwayuuse jee sümüin juʼwayuuse, sümaa motojiraain jaaʼin jaainjala maa aka naaʼin chi Senyotkai motüin naaʼin jaainjala› (Colosas 3:13). Na kaʼwayuuseshii kojutüjiraakana ‹aijiraashii› naya [a·gá·pe]. Sutuma tia, ‹motojiraasü naaʼin naainjala› (1 Pedro 4:8). Saashin tü Wiwüliakat, moteerü waaʼin tü aainjünakat wamüin aire wapüla wayuu. Akatsaʼa ayateerüin aainjünüin kasa mojusü wamüin süka nnojoluin wanee wayuu lotoko maʼin akuwaʼipa (Salmo 130:3, 4; Santiago 3:2).

⁶ Talatajiraajeena otta kepiajiraajeena waneepia na kaʼwayuuseshiikana aijiraale naya otta aire napüla Maleiwa süka ‹matüjüin ajaʼttaa tü aipüralüükat› (1 Corinto 13:8, NM). ‹Paaʼinwajiraasü› wayuu sutuma tü aijirawaakat (Colosas 3:14). ¿Jamüsü süpüla neʼitaain suluʼu nakuwaʼipa na kasaatshiikana tia akuwaʼipaakat? Naashajeʼerüinjatü tü Wiwüliakat otta aashajaajiraainjana süchiki; nekirajaainjatü anain nukuwaʼipa Jesuu sünain aipüralin nia otta nashatüinjatü tü naainjakat jee tü jülüjakat naaʼin. Oʼunüinjana naya sünain tü outkajawaakat, eere shikirajünüin tü Nünüikikat Maleiwa otta nachuntajatü nümüin aipüraliinjanain naya (Proverbios 3:5, 6; Juan 17:3, NM; Galacia 5:22; Hebreokana 10:24, 25).

TÜ PIAMAKAT KASA AAINJÜNAJATKA

7. ¿Kasa naainjüinjatka wanee wayuu süpüla talatajiraain nia sümaa nuʼwayuuse?

⁷ Shiimainre aijiraain wanee wayuu sümaa nuʼwayuuse kojutüjiraajeena naya. Tia, shia tü piamakat kasa naainjüinjatka süpüla talatajiraain naya. Müsü tü Wiwüliakat namüin na anoujüshiikana otta namüin na kaʼwayuuseshiikana: «Jiiʼiyata nojut napüshua na juwalayuukana» (Roma 12:10). Müshi Pedro: ‹Jiakana tooloyuukana, kojutü jutuma juʼwayuuse. Mayaasüje nnojoluin wanaawain sütsüin saaʼin jümaa. Je sümaʼinruʼu jümaain naya anakaja kapürale jaaʼin naya› (1 Pedro 3:7). Akaʼaya tü jietkat ‹kojutüinjachi sümüin suʼwayuuse› (Éfeso 5:33). Kojuteere wamüin wanee wayuu kamaneeshii waya nümüin, kapülasü waaʼin nukuwaʼipa, nünüiki otta waainjüin süpüshuaʼa tü nüchekakat.

8-10. ¿Kasa naaʼinrajatka chi wayuukai süpüla waneepiain otta talatajiraain nia sümaa nuʼwayuuse?

⁸ Na talateekana sümaa naʼwayuuse kojutüjiraainjana otta ‹kapülainjatü naaʼin sukuwaʼipa, nnojotsü kapülainjatüin naaʼin nakuwaʼipa namüiwaʼa› (Filipos 2:4, 5). Nnojotsü jülüjüin naaʼin tü keeʼireekat naaʼin namüiwaʼa, shia jülüjaka naaʼin tü anakat sümüin naʼwayuuse otta palajanasü natuma tü choʼujaakat sümüin.

⁹ Kojutüjiraale wanee wayuu sümaa nuʼwayuuse, nnojoleerü mojuin nümüin naatale tü sümakat tü jietkat suulia tü nümakat. Nnojotsü süpüla wanaawainjatüin maʼin tü namakat. Tü kasa anakat nümüin chi toolokoi, eesü nnojorüle shiain tü anakat sümüin tü jietkat. Akatsaʼa kojutüjiraainjatüin namüin tü namakat otta tü kasa nachekakat, anale shia nümüin Jeʼwaa (Galacia 5:13; puʼwanaajireʼera sümaa Filemón 14). Kojutüjiraainjatü namüin tü nakuwaʼipakat, nnojotsü nemeeʼerainpalainjatüin naʼwayuuse suʼupala wayuu jee namüiwaʼale naya.

¹⁰ Aneerü maʼin nakuwaʼipa aire napüla Maleiwa, aijiraale otta kojutüjiraale naya. ¿Jamüsü süpüla naainjüin tia?

NÜSHATÜINJATÜ NUKUWAʼIPA JESUU

11. ¿Jarai chi laülaakai saaʼu tü jietkat saashin tü Wiwüliakat?

¹¹ Saashin tü Wiwüliakat akumajünüshi chi toolokoi sümaa tü akuwaʼipaa anakat süpüla laülaainjachin nia saaʼu nüpüshi. Niainjachi asouktaka nümüin Jeʼwaa saaʼu sunoula nuʼwayuuse, nüchonnii otta saaʼu nepijia. Anainjatü maʼin süneekia wanee kasa nutuma, naainjüinjatü shia wanaapünaa sümaa tü nümakat Maleiwa otta niiʼiyatüinjatü anain nunoula. ‹Maa aka jüüjüüin waya nümüin Cristo süka niain wekiipüʼüin, akaainjana jia jieyuukana namüin na juʼwayuusekana süka nayain laülaain jaaʼu› (Éfeso 5:22-24). Saashin tü Wiwüliakat, eeshi wanee laülaaka naaʼu chi toolokoi. Müshi Pablo: «Chi laülaashikai saaʼu wane jierü, nia chi suʼwayuusekai. Je chi laülaakai naaʼu chi suʼwayuusekai, nia Cristo. Ooʼulaka chi laülaakai naaʼu Cristo, nia Maleiwa» (1 Corinto 11:3). Chi wayuu kekiikai maʼin nüshatüin nukuwaʼipa Jesuu sünain laülaain nia saaʼu nüpüshi.

12. ¿Kasa naainjaka Jesuu süka jüüjüüin nia otta anain sukuwaʼipa laülawaa nutuma?

¹² Nia Jeʼwaa laülaaka naaʼu Jesuu otta jüüjüüshi nia nümüin. Müshi Jesuu: «Nnojotsü shiain [taaʼinrüin] tü talatakat atüma neʼe taaʼin tayakai tamüiwa. Süka shiain taaʼinrüin tü nümakat chi Maleiwakai tamüin» (Juan 5:30). ¡Anakatche maʼin nukuwaʼipa Jesuu! Nia ‹chi nükumajakai anainjee Maleiwa kasakat süpüshua›, chi Mesiiakai mapa (Alateetkat Mapeena 3:14). Nia chi Laülaainjachikai naaʼu na anoujüshii chainjanakana sirumatuʼu otta nia chi aneekünakai süpüla aluwatawaa noulialeʼeya na aapieekana (Filipos 2:9-11; Hebreokana 1:4). Mayaapejeʼe anasüin maʼin tü aʼyatawaa aapünakat nümüin otta tü aapünajatkat nümüin mapeena, nnojoishi mojulaain nia, nnojoishi ichein süchiirua tü nümakat otta nnojoishi kaluwataaralin maʼin nia. Nnojoishii müliain maʼin nutuma na nikirajüinkana süpüla jüüjüüin naya nümüin. Aipürai nia otta nümüliajüin na müliakana atumawaa. Müshi nia: ‹Anakaja jüüjüüle jia tamüin taapaiwa jümüin eemerawaa otta jüshata tü shiimüin tekirajeekat anain jia. Süka mapüleejeerüin jümüin tü tachekakat jüpüleerua. Jüüjüüle jia tamüin, taapeerü jümüin tü eemerawaakat süka anamiain maʼi taya jee nnojoluin yaletüin taaʼin› (Mateo 11:28-30). Anasü maʼin saaʼin wayuu nümaa Jesuu.

13, 14. ¿Kasa naaʼinrajatka chi wayuukai süpüla nüshatüin nukuwaʼipa Jesuu sünain laülaain nia saaʼu nüpüshi?

¹³ Talateere chi wayuukai sümaa nüpüshi nikirajaainjatü anain tü nukuwaʼipakat Jesuu. Nnojoishi mojulaainjachin otta nnojotsü niimolojuinjatüin nuʼwayuuse sükajee laülaain nia saaʼu. Aisü nüpüla otta kojutsü shia nümüin. ‹Nnojotsü yaletüin naaʼin› Jesuu, müinjatia naaʼin chi wayuukai. Maainjalasai Jesuu, akaisaʼa chi wayuukai kaainjarai nia. Sutuma tia, nnojotsü mojuinjatüin sünüiki nuʼwayuuse nümüin. Chi wayuu nnojoikai yaletüin aaʼin, niyaawata aaʼu mojuin nutuma wanee kasa, müshi nia jaʼitairü kapüleein nümüin: «Shiimain tü pümakat, moto paaʼin tü taainjakat». Nnojorüle yaletüin naaʼin otta nnojorüle ichein nia süchiirua wanee kasa, mapüleejeerü sümüin tü jietkat kojutüin nia sümüin. Akaʼaya tü jiet kojutkalü amüin suʼwayuuse, süküja achikit wanee kasa mojuka sutuma.

¹⁴ Nukumajüin Maleiwa tü jietkat sümaa tü akuwaʼipaa anakat maʼin süpüla talatajiraain shia nümaa suʼwayuuse. Chi wayuu kekiikai maʼin niyaawata aaʼu tü akuwaʼipaa anakat maʼin sünain nuʼwayuuse otta nnojotsü mojutüin shia nümüin. Amüliajüt maʼin tü jietkat otta shiyaawatamaata aaʼu wanee kasa. Choʼujaasü tia sümüin süpüla saaʼinmajüin süpüshi otta sükaaliinjüin naya süpüla anajiraain namaa na waneeinnua. Anasü maʼin sümüin anain sutuma shipiapaʼa. Anasü maʼin sukuwaʼipa tü jiet saashajaakalü achiki Proverbios kapiitulo 31, wainma tü kasa sütüjakalü apüleerua otta anaka atuma sukuwaʼipa süpüshi. ¿Jamüsü anaka sukuwaʼipa süpüshi sutuma? Shia süka ‹niʼitaain naaʼin chi suʼwayuusekai sünain› (Proverbios 31:10, 11, NM).

15. ¿Kasa naainjüinjatka chi wayuukai süpüla alin nüpüla nuʼwayuuse otta kojutüin shia nümüin?

¹⁵ Suluʼu waneeirua mma alanaʼaleesia nujutü chi toolokoi süka laülaain nia saaʼu nüpüshi otta mojusü nüsakinnüle sünain wanee kasa. Müsü nüchepchiaka saaʼin tü nuʼwayuusekat. Mojusü tia süka mojujiraajeechin nia sümaa nuʼwayuuse otta nümaa Maleiwa (puʼwanaajireʼera sümaa 1 Juan 4:20, 21). Eeshii tooloyuu nnojoliika acheküin laülaain saaʼu napüshi, shia laülaaka natuma tü jietkat. Chi wayuu jüüjüükai nümüin Jesuu, nnojotsü müliain nutuma nuʼwayuuse otta nnojotsü mojutüin nümüin tü sukuwaʼipakat. Aipürai nia maʼaka naaʼin Jesuu otta naainjüin tü nümakat Pablo: ‹Jiakana tooloyuukana, anakaja aire jüpüla juʼwayuuse maa aka naaʼin Cristo sünain alin nüpüla na anoujashiikana. Je aapajiraashi nia waaʼu› (Éfeso 5:25). Aishii maʼin nüpüla Jesuu na nikirajüinkana, makalaka ouktüin nia naaʼu. Anale nukuwaʼipa wanee wayuu nüshatüinjatü nukuwaʼipa Jesuu, nüchajaainjatü tü kasa anakat sümüin nuʼwayuuse otta nnojoishi kaluwataaralinjachin nia. Jüüjüüle nia nümüin Jesuu, aire nüpüla nuʼwayuuse otta kojutüle shia nümüin, jüüjüüjeerü maʼin shia nümüin (Éfeso 5:28-30, 33).

JÜÜJÜÜINJATÜ TÜ JIETKAT

16. ¿Kasa shiiʼiyatüinjatka tü jietkat nümüin suʼwayuuse?

¹⁶ Süchikijee nukumajünüin Adán nutuma Jeʼwaa, müshi nia: «Anasü saaʼin tamüin kamaajanale chi wayuukai. Anakaja taainjüle joo wane akaaliijia nia, [wanee niʼipajana]» (Génesis 2:18). Nukumajüin Maleiwa Eva süpüla ‹niʼipajanain› Adán, nnojotsü niʼipoloinjatüin. Tü kaʼwayuuseekat nnojoluinjatü müin aka saaʼin wanee anua noʼuniraka piamashii wayuu peʼipolooshii. Niiʼiyatüinjatü chi wayuukai alin nüpüla nuʼwayuuse wanaa sümaa laülaain nia saaʼu. Shiiʼiyatüinjatü tü jietkat alin nia süpüla, kapülain nia saaʼin otta jüüjüüin maʼin shia nümüin.

17, 18. ¿Kasa saaʼinrajatka tü jietkat süpüla sükaaliinjüin suʼwayuuse?

¹⁷ Anale sukuwaʼipa wanee wayuu, jüüjüüsü shia nümüin suʼwayuuse otta sükaaliinjüin nia sünain tü kasa nüneekakat. Jaʼitairü nnojoluin anain shia saaʼin sümüin, aneerü sukuwaʼipa tü naainjakat sükaaliinjüle nia.

¹⁸ Eesü wanee kasa saainjüinjatka tü jietkat süpüla anainjatüin nutuma chi suʼwayuusekai laülaain nia saaʼu. Saapüinjatü tü analuʼutkat nümüin saaʼu laülaain nia süpüleerua otta nnojotsü mojuinjatüin sünüiki süchiki tü naainjakat. Sükaaliinjapa nia, sotuinjatü saaʼin kojutüin noʼuluʼu chi suʼwayuusekai otta ‹noʼuluʼu Maleiwa anamiashaatale jee kamaneere maʼin shia› (1 Pedro 3:3, 4; Colosas 3:12). ¿Kasa saaʼinrajatka manoujüinre chi suʼwayuusekai? Saashin tü Wiwüliakat ‹shiiʼiyatüinjatü naaliin suʼwayuuse otta süchonnii. Laülaainjatü saaʼin, wuleinjatü saaʼin, saaʼinmajüinjatü shipia, kamaneeinjatü jee jüüjüüinjatü nümüin suʼwayuuse suulia mojujain sünüiki wayuu sümüin nünüiki Maleiwa› (Tito 2:3-5). Nuluwataale shia chi suʼwayuusekai sünain aainjaa wanee kasa mojuka atuma saaʼin, kojuteerü nümüin sünüiki ‹shiiʼiyatüle nujutü sümaa kamaneein shia nümüin›. Eeshii wayuu manoujüinsalii eeka ‹kapülain naaʼin nünüiki Maleiwa sutuma nayaawatüin saaʼu kojutüin naya sutuma naʼwayuuse jee neʼrüin sünain anain sukuwaʼipa› (1 Pedro 3:1, 2, 15; 1 Corinto 7:13-16).

19. ¿Kasa saaʼinrajatka tü jietkat nuluwataale shia chi suʼwayuusekai sünain aainjaa wanee kasa mojuka nümüin Maleiwa?

¹⁹ ¿Kasa saaʼinrajatka tü jietkat nuluwataale shia chi suʼwayuusekai sünain aainjaa wanee kasa mojuka nümüin Maleiwa? Sotuinjatü saaʼin niain Maleiwa Aluwataain saaʼu otta saaʼinrüinjatü tü naainjakat na aluwataaushiikana wanaa sümaa nooʼuleʼenneein suulia aküjaa pütchi. Müsü Aluwataaushikana 5:29: «‹Alanaʼaleesüjaʼa sünain niainjachin woonooin amaa anüikü Maleiwakai suulialeʼeya sünüikü wayuu›».

AASHAJAAJIRAAINJANA

20. ¿Kasa choʼujaaka anain aijiraain otta kojutüjiraain chi wayuukai sümaa nuʼwayuuse?

²⁰ Choʼujaasü maʼin aijiraain otta kojutüjiraain chi wayuukai sümaa nuʼwayuuse naashajaajiraapa. Aire nüpüla nuʼwayuuse wanee wayuu, aashajaashi sümaa süchiki tü kasa saainjakat, tü alatakat sümüin, tü jülüjakat saaʼin otta waneeirua kasa. Choʼujaasü tia sümüin tü jietkat. Chi wayuu akatalakai kaʼi süpüla naashajaain sümaa nuʼwayuuse sümaa naapajüin sünüiki, aisü nüpüla otta kojutsü shia nümüin (Santiago 1:19). Eeshii na jieyuu nnojoliikana aashajaain maʼin naʼwayuuse namaa. Mojusü tia. Aʼyataashi maʼin chi wayuukai maaʼulu jee tü jietkat süka choʼujaain maʼin tü nneetkat. Choʼujaasü nakatalüin kaʼi na kaʼwayuuseshiikana süpüla naashajaajiraain. Nnojorüle naainjüin tia, eesü süpüla laülaajaain naaʼin namüiwaʼa otta sülatüin kasa mojusü namüin naʼaleewajaale sümaa wayuu nnojotka naʼwayuusein.

21. ¿Kasa naaʼinrajatka wanee wayuu sümaa nuʼwayuuse süpüla talatajiraain naya naashajaajiraapa?

²¹ Anainjatü natuma sukuwaʼipa nanüiki naashajaajiraapa. «Tü pütchi analuʼutkat müsü aka saaʼin tü mapakat, püsiasü sümüin wayuu otta anasü shiipüse sutuma» (Proverbios 16:24, NM). Jaʼitaichi anoujüin jee manoujüin wanee wayuu sünainpünaasü nukuwaʼipa pütchikat tüü: ‹Kemeʼeria jünüiki sümaa kamaneein jia› (Colosas 4:6). Mapüsale chi toolokoi süchikijee aʼyatawaa, aneerü maʼin naaʼin kemeʼeriale sünüiki nuʼwayuuse nümüin otta kamaneere shia. «Tü pütchi aküjünakat wanaa sümaa choʼujaain maʼin shia, müsü aka saaʼin wanee mansaanairua aainjuushi süka ooro eʼitaanaka suluʼu wanee iita aainjuushi süka pülaata» (Proverbios 25:11, NM). Anasü maʼin jülüjüle naaʼin tü pütchi naküjüinjatkat otta jamüinjatüin süküjia natuma. Eeshi nümüle wanee wayuu sümaa jashichin nia otta niʼrüin wayumüin: «¡Püsürüla türa miichoʼukot!». Suulialeʼeya tia, anashi nümüle: «Püsürüla maa tamüin türa miichoʼukot». ‹Kemeʼerieerü› maʼin nünüiki jiattale shia nutuma jee kamaneere nia.

22. ¿Kasa naaʼinrajatka chi wayuukai sümaa nuʼwayuuse süpüla anainjatüin sukuwaʼipa nanüiki naashajaajiraapa?

²² Naashajaajiraapa chi wayuukai sümaa nuʼwayuuse choʼujaasü kemeʼeriain nanüiki, nnojoluin jashichin noʼuuta, anamiain naya, nayaawatüin saaʼu tü jülüjakat naaʼin otta aipüraliin naya. Naashajaajiraale waneepia, naküjiraajeerü tü kasa choʼujaakat namüin otta akaaliinjiraweena naya sülatüle kasa mojusü namüin. Müsü tü Wiwüliakat wamüin: «Jütütüleʼera naaʼin na wayuu mojukana aaʼin» (1 Tesalónica 5:14, NM). Mojule naaʼin chi toolokoi otta tü jietkat, katsüinjeerü naaʼin ‹natütüleʼerajiraale naaʼin› (Roma 15:1, 2).

23, 24. ¿Kasa naaʼinrajatka chi wayuukai sümaa nuʼwayuuse aijiraale jee kojutüjiraale naya? Püküja süchiki wanee sukuwaʼipa.

²³ Na wayuu aijiraakana jee kojutüjiraakana nnojoleerü kapüleein namüin nanoukteʼerüin tü kasa mojujiraakalü atuma naya otta ‹nnojoleena jashichijiraain naya› (Colosas 3:19). Jülüjüinjatü naaʼin ‹suʼunüin tü jashieekat nasouktüle süka pütchi analuʼut› (Proverbios 15:1, NM). Nnojotsü mojutüinjatüin wamüin waʼwayuuse otta mojuinjatüin wanüiki süchiki süküjapa wamüin tü suluʼukat saaʼin. Suulialeʼeya tia, wayaawatüinjatü aaʼu tü alatakat sümüin. Wachajaainjatü maʼin sukuwaʼipa süpüla wanoukteʼerüin tü mojujiraakalü atuma waya süpüla anajiraainjanain waya wachikuaʼa.

²⁴ Soto waaʼin tü süküjakat Sara nümüin Abraham süpüla nanoukteʼerüin wanee kasa alataka namüin. Nnojotsü anain nümüin Abraham tü sümakat Sara, nümaka Maleiwa nümüin: «Paaʼinra tü sümakat Sara pümüin» (Génesis 21:9-12). Naainjaka shia Abraham, sutuma tia, naapüin Jeʼwaa nümüin wainma kasa anasü. Süküjüle tü jietkat wanee kasa naata suulia tü jülüjakat naaʼin chi suʼwayuusekai, naapajüinjatü tü sünüikikat. Nnojotsü alanaainjatüin shia sümaa sünüiki, shia jülüjüinjatka saaʼin tü nümakat chi suʼwayuusekai (Proverbios 25:24). Macheʼere naya süchiirua naainjüin tü keeʼireekat naaʼin, nnojoleerü neeʼiyatüin aijiraain otta kojutüjiraain naya.

25. ¿Jamüshii talatajiraajeenaka na kaʼwayuuseshiikana naashajaajiraale süchiki tü ainkawaakat?

²⁵ Choʼujaasü naashajaajiraain na kaʼwayuuseshiikana süchiki tü ainkawaakat. Nachajaale tü nachekakat namüiwaʼa otta nnojorüle nachecherüin naaʼin, mojujiraajeena naya. Choʼujaasü naküjüin tü shiimainkat otta kaʼatapalain naya. Jülüjüle naaʼin waneʼewai nakua tü anakat namüin, nnojoleena mojujiraain naya sünainjee nnojoluin nainkaain. Sünain tia otta waneeirua kasa jülüjüinjatü naaʼin ‹tü jalouikat sümüin naʼwayuuse, nnojotsü shiainjatüin neʼe tü akaaliijiakat naya namüiwa› (1 Corinto 7:3-5; 10:24).

26. Mojujiraale na kaʼwayuuseshiikana, ¿kasa naaʼinrajatka süpüla sükaaliinjüin naya tü Nünüikikat Maleiwa?

²⁶ Anasü maʼin tü pütchi süküjakat tü Wiwüliakat. Eejeerü kaʼi mojujiraaka oʼu na kaʼwayuuseshiikana. Naainjüle tü nümakat Jeʼwaa, aijiraale otta kojutüjiraale naya, talatajiraajeena jee kepiajiraajeena waneepia. Müle shia natuma, kojuteechi Jeʼwaa natuma, chi keʼitaalakai shikii tü kaʼwayuuseekat.