ASAKINNAJANAKA ANAIN NA WOUTIISEEKANA
Shiʼipa 2 Wakuwaʼipa sünain anoujaa
Sutuma pikirajaain sünain tü Bibliakat, pütüjaaitpa aaʼu tü nüchekakat Jehová püpüleerua otta tü paaʼinrüinjatkat süpüla anainjatüin pukuwaʼipa noʼuluʼu. Müsüjeseʼe puloʼirüitpain pukuwaʼipa otta nnojoluitpain jülüjain paaʼin tü kasa jülüjapuʼukat paaʼin sümaiwa. Paaʼinrüitpa tü nuluwataakalü anain pia Maleiwa, makalaka püküjain süchiki tü pütchi anasükat sümüin wayuu.
Sutuma tü pikirajaainjatkalü anain jooluʼu, jülüjeerü paaʼin waneepia tü nuluwataakalü anain pia Jehová. Soteerü paaʼin waneirua kasa paaʼinrüinjatka müleka piʼyataweere nümüin. Paaʼinreerü tü kasa anasükat süpüla kojutuinjachin Jehová putuma (2 Cor. 1:12; 1 Tim. 1:19; 1 Ped. 3:16, 21).
Sutuma tü pikirajaaitpakalü anain, keeʼireejeerü paaʼin jüüjüüin pia sümüin sukuwaʼipa aluwatawaa nutuma Maleiwa otta naʼkejeechi pia na anoujashiikana nünain. Pikirajaale sünain tü asakinnakalü anain otta paashajeʼerüle süpüshuaʼa tü wetsiikulokalüirua, piyaawateerü aaʼu pansaale suluʼu pikii poonooinjachin sümaa tü nuluwataakalü anain Jehová suluʼu tü outkajaaleekat, anainjatüin pukuwaʼipa sümaa püpüshi otta kojutuinjanain pümüin na sülaülashiikana mma. Kojuteerü maʼin pümüin süpüshuaʼa tü naaʼinrakat Jehová süpüla nikirajüin na anoujakana nünain otta süpüla icheinjatüin nanoula. Naaʼinrüin Jehová tia sükajee tü outkajawaakat, makalaka püchajaajeerü sukuwaʼipa süpüla waneepiain pia sünain otta piyalerüin pajapü sünain.
Jülüjeerü paaʼin pukuwaʼipa süpüla piʼyataainjachin maʼin sünain aküjaa sümüin wayuu süchiki tü Sukuwaʼipakat Aluwatawaa nutuma Maleiwa, süpüla shiʼraajüinjachin Jehová otta sütüjaanüin saaʼu tü naaʼinrajatkat süpüleerua wayuu (Mat. 24:14; 28:19, 20). Paapapa paaʼin nümüin Jehová otta woutiisapa pia makataleejeeria suluʼu pikii pikeraajüinjatüin pünüiki nümüin. Shiimain talatashaatain naaʼin Jehová süka paapaain sümaa tü nümaneekat otta sümaa tü naalinkat süpüla wayuu.
¿Jamüsü nünüiki Maleiwa süchiki tü kaʼwayuuseekat? ¿Kasa neʼe eeka süpüla nooʼulaajiraain atuma na kaʼwayuuseshiikana saashin tü Bibliakat?
«¿Nnojotsüjasaʼa jaashajeʼerüin süchiki nukumajüin Maleiwa paala wanee wayuu toolo otta wanee wayuu jierü? Mataasü makai nünüiki mayaa: ‹Ojuʼiteechi wanee wayuu nümaʼanajee nüshi jee sümaʼanajee nii süpüla saʼaniraain nukuwaʼipa sümaa nuʼwayuuse, nnojoleenaka naya katataawain›. Nnojoliinnapaka piamain naya, waneesüitpa nakuwaʼipa. Na wayuu aʼaniraakana akuwaʼipa nutuma Maleiwa nnojoliinjana ooʼulaajiraain sutuma wayuu. ‹Chi wayuu ooʼulaakai suulia nuʼwayuuse sümaa nnojoluin suʼluwajiraasüin sukuwaʼipa nümaa wane wayuu naata nuulia otta kasaarüle nia sümaa wane wayuu yalejee, kaainjaleechi nia›» (Mat. 19:4-6, 9, TNM).
¿Jamüshi kasaalüinjachika suluʼu laülaapia wanee wayuu kepiajiraale nia sümaa wanee jierü? Kasaarüle pia, ¿ashajünüsüche pünülia laülaapialuʼu jee anasüche shia namüin na sülaülashiikana mma?
«Tawalachee, püsoʼira naaʼin na anoujashii chakana süpüla jüüjüüinjanain naya namüin na sülaülashiikana mma» (Tito 3:1).
«Kojutuinjatü jümüin jüpüshuaʼa tü sukuwaʼipakat kaʼwayuusee otta wuleinjatü jutuma tü jükaamainkat. Kasalajaneerü nutuma Maleiwa naainjala na wayuu aʼluwajiraakana nakuwaʼipa otta na amaʼüjiraakana nakuwaʼipa sümaa wayuu nnojotkat naʼwayuusein» (Heb. 13:4, TNM).
¿Kasa naaʼinrajatka na kaʼwayuuseshiikana, na kachonshiikana otta na tepichikana süpüla anain nakuwaʼipa sümaa napüshi?
«Poonoo sümaa nünüiki püshi otta nnojo piyoutuin tü suluwataakat anain pia tü püikat» (Prov. 1:8).
«Maa aka sünain jüüjüüin waya anoujashiikana sainküin mmakat süpüshua nümüin Cristo [...] süka niain wekiipüʼüin, akaainjana jia jieyuu kaʼwayuuseshiikana waneʼewaʼire jukua namüin na juʼwayuusekana süka nayain laülaain jaaʼu. Jiakana tooloyuukana, anakaja müleka aire jüpüla juʼwayuuse waneʼewaʼire jukua, maa aka naaʼin Cristo sünain alin nüpüla na anoujashiikana» (Éf. 5:23-25).
«Jia kachooinshiikana, anakaja müleka juluwataale na jüchooinkana süka anakat akuaippa suulia jashichijüin naya jümüin sünainjee achiajaanaa waneepia. Anashii jikirajüle naya sünain tü nuluwataakat anain chi Maleiwakai» (Éf. 6:4).
«Jia achooinkana, anakaja müleka joonoole waneepia sümaa sünüiki jii je nünüiki jüshi, süka shiain talatüin atüma naaʼin chi Senyotkai» (Col. 3:20).
«Jia jieyuukana kaʼwayuuseshiikana, anashii müleka jüüjüüle jia waneʼewaʼire jukua namüin juʼwayuuse» (1 Ped. 3:1).
¿Jamüsü kojutuinjatka wamüin katüin woʼu?
«Nia aapakaʼaya [Maleiwa] tü jouktai wasanatkat aka waaʼin otta kasakat süpüshuaʼa [...]. Süka jamüin, nünain Maleiwakai, katoʼuchii waya, waraittüshii waya otta wayuushii waya» (Aluw. 17:25, 28).
¿Jamüshii nnojoluinjanaka woʼutuin saaʼin wayuu jaʼitakajaʼa niain wanee joʼuu eekai nukumajaayülin süleʼeruʼu nii?
«Müleka natkaajiraale wanee wayuu otta kaliale natuma wanee jierü eeka ipuoluin [...]. Outule chi süchonkai otta shiakat outajachi chi kaainjalashikai» (Éx. 21:22, 23).
«Piʼratajüiya taya takumajaaiwaʼaya süleʼeruʼujee tei, püshajatüjülia suluʼu pükaraloʼuse jamüinjatüin takuwaʼipa. Nnojotsü kasain choʼujaain putuma pukumajaaiwaʼaya taya» (Sal. 139:16).
Nüʼürülashi Jehová «wanee wayuu [...] eekai nuʼutuin saaʼin wayuu eekai maainjalain» (Prov. 6:16, 17).
¿Kasa süküjaka tü Bibliakat süchiki tü ishakat?
Nnojoluinjana jia sünainpünaain [...] isha otta mürüt eekai süülüüshin (Aluw. 15:29, TNM).
¿Jamüshii aijiraainjanaka waya namaa na wawalayuukana?
«Tü taluwataainjatkat anain jia, kasa jeket. Taluwataain jia jooluʼu sünain aijiraainjanain jia jüpüla waneʼewaire jukua maa aka alin jia tapüla. Müleka shiimüinre sünain aijiraain jia jüpüla, ayaawatüneena jia sütüma wayuu süpüshua sünain tekirajanain jia» (Juan 13:34, 35).
Tü waaʼinrajatkat suulia suʼttuin wanee ayuulii outasiroʼu nanain na waneinnua: (1) Eere nünain wanee wayuu wanee ayuulii outasiroʼu eeka süpüla suttuin sünain wayuu, ¿jamüshi nnojoluinjachika nutuʼlüin otta nukoʼojooin sünain wayuu? (2) ¿Jamüshi nnojoluinjachika jashichin, müleka nnojoire nuunejaanüin nutuma wanee wawala nipialuʼumüin? (3) Müleka eere süpüla eein wanee ayuulii nünain wanee wayuu sünainjee tü nukuwaʼipapuʼukat paala ¿jamüshi nünaʼalirüinjatka palajana nüsha süpülapüna nümüraajiraain sümaa wanee wayuu? (4) Woutiisainjachire wanee wayuu kanainka wanee ayuulii eeka süpüla suttuin sünain wayuu ¿jamüshi naapirüinjachika palajana chi wawala akumajakai napüleerua na laülaashiikana tü aainjünajatkat?
«Akaajaa jia, pansaa jütüma tü jümakat süpüla aijiraain jia jüpüla jüpüshua waneepia. [...] Ai jüpüla wayuu süpüshua maa aka alin pia püpülajiraa [...]. Müleka aire wapüla wane wayuu, nnojoleena waya eʼrüliin wayumüin nümüin» (Roma 13:8-10).
«Sünain kapülain jaaʼin nakuaippa na juwalayuukana, nnojo kapülain jaaʼin jukuaippa neʼe jümüiwa» (Filip. 2:4, 5).
¿Jamüsü nuchuntaka Jehová wamüin motuinjatüin waaʼin naainjala na waneinnua?
«Jaaʼinra tü anasükat shiʼipajee eekai shiʼrülüin wayumüin jümüin, sümaa motüin jaaʼin saainjala maa aka naaʼin chi Senyotkai motüin naaʼin jaainjala» (Col. 3:13).
¿Kasa paaʼinrajatka nimeejüle pia wanee wawala otta nüküjale alawaa püchiki?
«Müleka kaainjarale wane puwala puulia, anakaja puʼunüle nünainmüin süpüla paashajaain nümaa nümüiwa süchiki tü kasa mojusü naaʼinrakat pümüin. Je müleka kapürale naaʼin tü püküjakat nümüin, puunteerü anajiraain pia nümaa. Akaajasa müleka niyouktüle pünüiki, anakaja puleʼejüle nünainmüin mapeena sünain pümaain waneesia je piama puwalayuu shiale atüjaakana saaʼu sünain pansaain tü pümakat nümüin, maa aka tü suluwataakat anain tü nüchikimaajatkat Maleiwa. Je müleka ayatüle nnojolüin kapülain naaʼin tü pümakat nümüin, anakaja püküjale süchiki tü naainjalakat namüin na anoujashiikana wanaa sümaa jutkatüin. Je müleka niyouktüle tü namakat na anoujashiikana napüshua nümüin, piirakaa pümata nümüin maa aka naaʼin eekai matüjüin ayaawajawaa suulia aainjalaa» (Mat. 18:15-17).
¿Jamüsü nünüiki Jehová süchiki tü kasa mojusü yaakat wünaapünaa?
▪ Aʼluwajirawaa akuwaʼipaa.
▪ Aʼwaajaa Maleiwa süka ayaakuaa.
▪ Jaleerüle wanee wayuu.
▪ Aʼluwajaa.
▪ Ashaitaa saaʼu nneerü.
▪ Epeʼruwaa.
«¿Nnojotsüjasaʼa jütüjaain saaʼu nnojoleerüin neʼrüin tü kasa anasü eejeetkat nuluwataapeena Maleiwa na wayuu aaʼinrakana kasa mojusü? Nnojo jimeejiraain aaʼin. Na wayuu aʼluwajiraakana nakuwaʼipa, na aʼwaajakana maleiwayaasü, na kawalaʼatakana atuma naʼwayuuse, na jaleetshiikana, na tooloyuu kakuwaʼipajiraakana namaa na tooloyuukana wanaa namaa, na kaʼruwaraliikana, na wayuu achuntaakana aaʼin wanee kasa naata kakorotshi, na epeʼrüliikana, na wayuu airuʼutkana anüiki sümüin wayuu otta na emeejüliikana wayuu, nnojoleerü neʼrüin tü kasa anasü eejeetkat nuluwataapeena Maleiwa» (1 Cor. 6:9, 10, TNM).
¿Kasa paaʼinrajatka süpüla piyoutajatüin tü aʼluwajirawaakalü akuwaʼipaa otta waneirua kasa yarüttüsü?
«Jalia jia suulia juʼluwajiraain jukuaippa» (1 Cor. 6:18).
¿Jamüshii nnojoliinjanakana wasüin wunuʼu kiʼraka atuma wayuu otta mamainnaka atuma wayuu sümaa nnojoluin saapajalain shia tottoot?
«Tawalayuwaa, sünainjee süpüshua tü anasü naaʼinrakat chi Maleiwakai jaaʼu sünain nümüliajüin jia, anakaja tosoʼirüle jaaʼin shiiʼiree juʼwaajüinjachin nia süka süpüshua jaaʼin. Saaʼu jükatannüinapain nütüma suulia jaainjala, jaapajiraa jümata jukuaippa nümüin, sünain jiʼyataain waneepia nümüin kataiwaʼaya joʼu süpüla talatüinjachin nia jümaa. Alanaʼaleesia sünain anain tü nüchekakat Maleiwa wapüleerua suulia kasa süpüshua, süka shiain tü talatakat atüma naaʼin. Je sükajee tia, juuʼulaa suulia ashataa nakuaippa na manoujainsaliikana. Nnojo jülüjüin jaaʼin maa aka tü jülüjakat naaʼin nayakana. Müleka juuʼulaale suulia, niiʼirateerü jukuaippa Maleiwa. Sünainjee tüü, juunteerü jiyaawatüin saaʼu tü nüchekakat jüpüleerua, je keeʼireejeerü jaaʼin jaaʼinreein tia» (Roma 12:1, 2).
¿Jarat tü kasa sukuwaʼipamaajatkat yolujaa niyoutaka Maleiwa?
«Nnojoishi eeinjachin wanee wayuu jaʼaka [...] eekai nuuʼulakülin, eekai naainjülin kasa pülasü, eekai nunoujain sünain tü kasa «pülasü tia» sümakat wayuu, eekai niiyajülin wayuu, eekai niiʼirajirüin ouutsü jee eekai kayaawasein saaʼu tü alatajatkat otta eekai yootuin namaa na outushiikana [sükajee süseyuu wanee ouutsü]» (Deut. 18:10, 11).
Naainjale wanee wayuu wanee kasa eekai mojuin maʼin, ¿kasa naaʼinrajatka süpüla anainjatüin süchikuaʼa nukuwaʼipa noʼuluʼu Jehová?
«Nnojoluitpa tounjulajüin süchiki tü taainjalakat, taküjaitpa süchiki pümüin. ‹Taküjeerü nümüin Jehová süchiki tü taainjalakat›» (Sal. 32:5).
«Je chi eekai ayuulin, anakaja müleka neenajirüle na laülaashiikana suluʼu tü outkajaaleekat süpüla nachuntüin nümüin Maleiwa naaʼu saaʼu nünülia chi Senyotkai sümaa nashulerüin seita nünain. Müleka nachuntüle, sünain kanoulain maʼi naaʼin, aawalaajeechi nütüma Maleiwa chi ayuuishikai. Je müleka kaainjarale nia, alatinneerü tü naainjalakat nuulia nütüma» (Sant. 5:14, 15).
¿Kasa paaʼinrajatka pütüjaale saaʼu mojuin maʼin naainjala wanee wawala?
«Niʼrüle wanee wayuu kaainjalain wanee wayuu jee shiale naapüin süchiki, nnojorüle nüküjain süchiki, asoutajachi saaʼu tia aainjalaakat» (Lev. 5:1).
¿Jamüinjatü wakuwaʼipa namüin na ojuʼitinnakana nakajee na anoujashiikana?
«Na jükatalaainjanakana oulia, naya na juwalayuukana eekai naʼluwajiraain nakuaippa sümaa wayuu jieru otta wane jierü nümaa wane toolo, eekai washireein maʼi naaʼin, eekai kamaleiwaseyaain, eekai mojuin nanüiki sujuuna wayuu, eekai neperüliin, je eekai kemeeraliin sükorolo wayuu. Anashii jükatalaale noulia jaʼitaina jia neenakirüin sünain wane ekawaa namaa» (1 Cor. 5:11).
«Müleka nüntüle wane wayuu jünainmüin eekai nnojolin nikirajüin tü shiimüinkat nikirajakat anain Cristo, nnojo kamaneein jia nümüin» (2 Juan 10).
¿Jamüshii nayainjanaka paʼaleewain na wayuu oonookana sümaa nünüiki Jehová?
«Kekiijeechi maʼin wanee wayuu naʼaleewajaale nümaa chi wayuu kekiikai maʼin. Mojeerü nukuwaʼipa wanee wayuu naʼaleewajaale nümaa chi wayuu eekai mojulaain» (Prov. 13:20).
«Amojujaasü nukuwaʼipa wanee wayuu sutuma mojuin nakuwaʼipa na naʼaleewainyuukana» (1 Cor. 15:33, TNM).
¿Jamüshii nnojoliika sünainpünaain poliitika na Aküjaliikana pütchi?
«Nnojoliishii süpüshin naya tü manoujainsatkalüirua, maa aka tayakai shiimain nnojolin süpüshinya» (Juan 17:16).
¿Jamüshii jüüjüüinjanaka waya namüin na sülaülashiikana mma?
«Nia Maleiwa aapaka laülawaa namüin na sülaülakana mma, müsüjeseʼe jüüjüüinjatüin wayuu namüin. Niʼinaajala naya Maleiwa süpüla aluwatawaa» (Roma 13:1, TNM).
¿Kasa paaʼinrajatka nachuntule pümüin na sülaülashiikana mma wanee kasa mojuka nümüin Maleiwa?
«Nia Maleiwa aapaka laülawaa namüin na sülaülakana mma, müsüjeseʼe jüüjüüinjatüin wayuu namüin. Niʼinaajala naya Maleiwa süpüla aluwatawaa» (Aluw. 5:29, TNM).
Püneeküinjachire wanee aʼyatawaa, ¿jarat tü wetsiikulo akaalinjeechika pia süpüla nnojoluin sünainpünaain pia nakuwaʼipa na manoujainsaliikana?
«Nnojoleena atkaain süka chajaruuta otta nnojoleena ekirajaain sünain tü atkawaakat» (Miq. 4:3).
«Jia tapüshikana, jujuitta jumaala chajee suluʼujee tü pueulokat Babilonia, süpüla nnojoliinjanain jaaʼinrüin tü kasa mojusükot makat aka tü saaʼinrakat tü wayuukolüirua chaʼaya, je süpüla nnojoliinjanain süsalain jia wanaajiraa sümaa süka tü müliaa antajatkat sünainmüin saaliijee saainjala» (Alateetkat Mapeena [Apocalipsis] 18:4).
¿Kasa jülüjainjatka paaʼin süpüla anain süneekia tü püshaitüinjatkat, paapajüinjatka otta tü pünajüinjatkat?
«Üttüsü naaʼin [Jehová] nünain chi eekai mojulaain» (Sal. 11:5).
«Jiyoukta tü mojusükat süpüleerua jaaʼinrüinjatüin tü kasa anasükat» (Roma 12:9).
«Tasoʼira aaʼinchii jooluʼu jia süpüla masütaajüinjanain jia sünain jülüjaa aaʼin tü anasükat: maa aka tü shiimüinkat, maa aka tü kasa anasü kojutkat sütüma wayuu, maa aka tü lotokat atüma wakuaippa, maa aka tü wulekat atüma waaʼin, maa aka tü kasa anasü kamalainkat wamüin, maa aka tü waʼwaataakat saaʼu anain maʼi shia» (Filip. 4:8).
¿Jamüshii nnojoliika noutkajaain na Aküjaliikana pütchi namaa na suluʼukana wane iküleesia naata?
«Nnojotsü anain jüikaajaale sünain ekawaa nümaa Jehová sümaa jüikaajaataain sünain ekawaa sümaa tü yolujaakalüirua» (1 Cor. 10:21, TNM).
«Jujuʼita naʼakajee, jükatala noulia, juuʼulaa suulia jaapaain tü kasa yarüttakat jee taaʼinmajeenaka jia» (2 Cor. 6:17, TNM).
¿Jarat tü wetsiikulo akaalinjeechika pia süpüla püneeküin puʼunuinjachire sünain wanee miʼiraa?
«Wanaawashii neʼe naya sümaa tü wayuukalüirua naatakana oumain otta nashatüin nakuwaʼipa. Naʼwaajakalaka tü namaleiwaseyaasükalüirua, shiaka tia maleiwayaasükalüirua emeejakat naaʼin» (Sal. 106:35, 36).
«Na outushiikana, nnojorüleesia kasain natüjaain aaʼu» (Ecl. 9:5).
«Nnojoliishii süpüshin naya tü manoujainsatkalüirua, maa aka tayakai shiimain nnojolin süpüshinya» (Juan 17:16).
«Kakaʼiya maʼi jia paalainka sünain juuʼulaküin tü mojusükot wanaa namaa na manoujainsaliikana. Juuʼulaa jumaala suulia kasa müin aka tia, maa aka jümaʼüjaain sümaa wayuu nnojotkat juʼwayuusein, maa aka jiperüin sümaa maaʼin jaaʼin sünain emiʼijaa, je maa aka aaʼinraa kasa mojushaatain sükajee jüüjüüin jia namüin na maleiwayaashiikana» (1 Ped. 4:3).
¿Jamüsü anaka jülüjale paaʼin tü sümakat tü Bibliakat püneeküinjachire oʼunaa sünain wanee miʼiraa ekeraajaa ouyasee?
«Shiasaʼa süchikijee apünüin kaʼi, ekeraajüshi juya chi Faraónkai. Nimiʼijitkalaka joo saaʼu kaʼikat tia napüla napüshua na niʼipajanakana. Je chi laülaashikai naaʼu na aapajüliikana nüsüin ooʼulaka chi laülaashikai naaʼu na aainjüliikana pan nümüin, najütinnakalaka achikü nütüma suluʼujee tü kaatsetkat süpüla neeʼiyatünüinjanain noʼupala na niʼipajanakana. Niʼitaaichipa joo chi laülaashikai naaʼu na aapajüliikana nüsüin nüchukuaʼa niʼyataaleruʼu [...]. Otta müshia chi laülaashikai naaʼu na aainjüliikana pan nümüin, nüshottira anutpünaachi sümaa niʼiteʼerüin nia shiʼiruʼu wane wunuʼu» (Gén. 40:20-22).
«Otta soʼu wane miʼiraa nütüma Herodes saaʼu nikeraajüin juya, oyonnajüsü tü süchonkot Herodías suʼupala tü wayuu antakat sünainmüin tü miʼiraakat. Süka talatüin maʼi naaʼin Herodes sümaa tü süchonkot Herodías, müshi nia sümüin suʼupala tü wayuukolüirua: ‹Tamüsü paala pümüin jooluʼu suʼupala tü kasa chakat iipünaa: Taapeerü pümüin tü kasa püchunteekat tamüin›, nümakalaka sümüin. Je saaʼu shiʼikünüin aaʼin sütüma tü shiikat sooʼopünaa tü kasa süchuntajatkat, sümakalaka nümüin: ‹Püntira tamüin yaamüin suluʼu wane pülaata tü nikiikat Juan chi owoutisaajuikai›. [...] Nümakalaka namüin na nüsurulaatsekana: ‹Juʼuna nünainmüin Juan chi püreesashikai jüshottoiwa nünutpünaa›» (Mat. 14:6-10).
¿Jamüshi jüüjüüinjachika pia sümüin tü namakat na laülaashiikana suluʼu tü outkajaaleekat?
«Anakaja müleka jüüjüüle jia namüin na juwalayuu laülaayuukana jüpüleerua sümaa joonooin sümaa nanüiki, süpüla talatüinjatüin naaʼin süka tü naʼyataainkat. Müleka mojule naaʼin saaliijee moonooin jia sümaa nanüiki, nnojoleerü kasain anasü saapüin tia jümüin» (Heb. 13:17).
¿Jamüshi püneekawalinjatka kaʼi süpüla aashajeʼeraa otta ekirajawaa sünain tü Bibliakat sümaa püpüshi?
«Suulia tia, shia naaʼinmaaka tü nünüikikat Jehová, naashajeʼerawalin shia soʼukai jee saʼwai sümaa jiattain nünüiki. Meerü nukuwaʼipa maʼaka saaʼin wanee wunuʼulia eeka sotpaʼain wüin palatüsü, eeka kachooin maʼin sümaa nnojoluin juluin tü süpanakat. Aneerü sukuwaʼipa süpüshuaʼa tü kasa naainjakat» (Sal. 1:2, 3).
¿Jamüsü kamalainjatka pümüin oʼunaa sünain tü outkajawaakat otta asoutaa shiʼipajee tü asakinnakalü anain?
«Taʼwaajeechi pia wanaa namaa na tawalayuukana» (Sal. 22:22).
«Anakaja müleka wakaaliijiraale wapüshua sünain kamaneejiraain je sünain waaʼinrüin tü anasükat. Je anakaja müleka nnojoliire müin aka waya naaʼin na wayuu akulajaakana aaʼin sünain jutkatirawaa. Shia anaka aluʼu müleka jutkatiraale waya süpüla ekirajirawaa süpüla wachecherüin waaʼin sünain anoujaa. Anakaja wachiaajiraale waneepia, süka sülüʼülüin nükalia chi Senyotkai süpüla nüleʼejüinjachin nüchikua» (Heb. 10:24, 25).
¿Jarat tü aʼyatawaa niʼitaakat Jesús wajapuluʼu?
«Je sükajee tia, juʼuna jumaala sainküin mmakat süpüshua süpüla jüküjainjatüin tachiki sümüin wayuu süpüla sünoujainjatüin tanain. [...] Je juwoutisaajeena naya. [...] Jikirajeena naya sünain tü taluwataapüʼükat anain jia süpüla noonooinjatüin sümaa» (Mat. 28:19, 20).
¿Jamüinjatü waaʼin wasülajüinjanale nneerü süpüla süküjünüin pütchi sainküin Mma jee shiale süpüla akaalinjaa na wawalayuu eʼrakana müliaa?
«Kojutu putuma Jehová süka tü kasa kojutusü pümaʼanakat» (Prov. 3:9).
«Anakaja müleka jaapüle süka jaaʼin waneʼewai jukua tü jusülajüinjatkat süpüla keraajüinjatüin shia. Nnojotsü jaapüinjatüin mojusheeka [...], süka talatüin naaʼin chi Maleiwakai nümaa chi wayuu asülajakai süka naaʼin» (2 Cor. 9:7).
¿Kasa kapüleejeetka nümüin wanee wayuu oushikajaaka süchiirua nukuwaʼipa Cristo?
«Anataʼaleeshiijaʼa maʼi jia müliakana aaʼin sütüma wayuu saaliijee jaaʼinrüin tü nüchekakat Maleiwa jüpüleerua, süka jikeroteenain chamüin eere nuluwataain. «Anataʼaleeshiijaʼa maʼi jia müleka shiʼrüle wayumüin wayuu jümüin saaliijee jünoujain tanain, müleka shimeʼerainparale jia je müleka jaashajaanüle sünain mojuin pütchi jüchiki. Meerü jukuaippa aka nakuaippa na nünüikimaajanakana Maleiwa paala sümaiwa sünain neʼnnüin amüin natüma na jutuushikanairua. Otta jiakana soʼu tü kaʼi mülieenakat oʼu jia sütüma wayuu, talata jia süka süpüshua jaaʼin, süka jütüjaain naaʼu chi Maleiwakai sünain nüsülajüinjatüin kasa anashaatakat jümüin chaa iipünaa eere nia», nümakalaka Jesús namüin» (Mat. 5:10-12).
¿Jamüsü aneetka maʼin wakuwaʼipa woutiisale waya süpüla naʼakain waya na aküjaliikana pütchi nüchiki Jehová?
«Talatüsü maʼin taaʼin sutuma tü pünüikikat; eʼnnaajünüshi taya sükajee tü pünüliakat piakai Jehová» (Jer. 15:16).