¿Kasa pütchi anasü watüjaainjatka aaʼu?

1. ¿Kasa pütchi anasü nüküjüinjatka Maleiwa wamüin?

Keeʼireesü naaʼin Maleiwa talatüin naaʼin na wayuukana. Süka alin naya nüpüla, nukumajüin tü Mmakat napüla otta süpüshuaʼa tü kasa eekat suluʼu. Süpüla anainjatüin nakuwaʼipa, najaʼttireerü Maleiwa tü kasa müliakalü atuma naya. Püleeja Jeremías 29:11.

Nnojotsü eeirüin wanee aluwataaya ajaʼttirajatka tü atkawaakat, tü ayuuliikat otta tü ouktaakat. Akatsaʼa eein wanee pütchi anasü watüjaainjatka aaʼu: soʼu palitchon kaʼi, najaʼttireerü Maleiwa naluwataaya na wayuukana otta shieerü eeka waneepia tü nuluwataayakat. Soʼu kaʼikat tia, aneerü waaʼin otta nnojoleena waya ayuulin. Püleeja Isaías 25:8; 33:24 otta Daniel 2:44.

2. ¿Jamüsü watüjaainjatka saaʼu tia pütchikat?

Süpüla sajaʼttüin tü müliaakat, najaʼttirajana Maleiwa na mojulaashiikana (Sofonías 2:3). ¿Joujeerü tia? Süküjüin tü Wiwüliakat müliainjatüin maʼin saaʼin wayuu süpülapünaa kaʼikat tia. Tüü, shiiʼiyatüin sülüʼülüin maʼin nükalia Maleiwa. Püleeja 2 Timoteo 3:1-5.

3. ¿Kasa anaka süpüla waaʼinrüin?

Ekirajaainjana waya sünain tü Wiwüliakat, tü makalü aka saaʼin wanee karaloukta nüshajala wamüin washi. Süküjüin wamüin tü waaʼinrajatkat süpüla talatüin waaʼin maaʼulu otta süpüla katüin woʼu waneepia. Eejeena na ayouktakana pikirajaain sünain tü Wiwüliakat. Nnojo puuʼulaain sutuma tia. Ayatüle pikirajaain, wainmeerü kasa anasü naapaka Maleiwa pümüin. Püleeja Proverbios 29:25 otta Alateetkat Mapeena 14:6, 7.