Waküja pütchi süka tü poyeetokot ¿Kasa shikirajaka anain waya tü Nünüikikat Maleiwa?
1. ¿Jara tü karaloukta ojuʼitakat jekenainka? ¿Kasapülajatü shia?
1 Ojuʼitüsüinka jekenainka tü karalouktakat ¿Kasa shikirajaka anain waya tü Nünüikikat Maleiwa? Ashajünüsü suluʼu tia karalouktakat kojuyasü wetsiikulo sünainpünaaka wanee pütchi; meematüsü aka saaʼin tü karalouktakat Razonamiento. Anasü maʼin ayuʼlaa yalejee tü wanüikinjatkat namüin na wayuukana woʼttapa sünain aküjaa pütchi. Anuu tü waaʼinrajatkat süpüla waainjain tia.
2. ¿Jamüinjatü süküjia pütchi süka ¿Kasa shikirajaka anain waya tü Nünüikikat Maleiwa??
2 Eeshii süpüla waküjüin pütchi süka tü pütchikat 8. Müinjana waya: «Yootushii waya sümaa wayuu otta weʼrüin wainmain na anoujakana sünain müliain wayuu nutuma Maleiwa. [Eeshii na wayuu achekakana weeʼiyatüin namüin tü pütchikat suluʼujee tü poyeetokot.] ¿Jamüsü saaʼin pümüin türa pütchikat? [Puuʼulaa nusouktai.] Lotusü maʼin sünüiki tü Wiwüliakat süchiki tia». Waashajeʼereetka namüin waneesia jee piamasü wetsiikulo ashajünaka yala. Kamalainre tü pümakat namüin na wayuukana, piiʼiyata namüin tü pütchiirua suluʼukat süpana waneesia. Püma namüin: «Seechi taya wanee takueena süpüla yootoo pümaa süchiki wanee asakiraa sünainjee türairua». Otta eesü süpüla paapüin namüin wanee karaloukta ekirajünaka aka wayuu. Püma namüin: «Süküjüin karalouktakat tüü waneeirua pütchi sünainpünaaka tü waashajaakalü achiki».
3. ¿Jamüinjatü waküjia pütchi süka tü poyeetokot namüin na anoujashii nnojoliikana oʼunüin süchiirua tü nikirajakalü anain Jesuu?
3 Eeshii na anoujashii nnojoliikana oʼunüin süchiirua tü nikirajakalü anain Jesuu. Makalaka anain maʼin aküjaa pütchi namüin süka tü pütchikat 4 otta tü pütchikat 13 sünainmüin 17. Püküjüle pütchi süka tü pütchikat 17, meerü pünüiki: «Yaapünaashii waya namaʼanapünaa na wayuukana sünain akaaliinjaa naya sümaa napüshi. ¿Aashin wainmain tü kasa shapaakalü atuma naaʼin? [Puuʼulaa nusouktai.] Wainma na wayuu aainjakana tü sümakat pütchikat tüü: ‹Jiakana jieyuu kaʼwayuusekana, kojutüinjachi jümüin juʼwayuuse›. [Nnojotsü choʼujaain püküjüin nümüin suluʼujeejatüin Éfeso 5:33 tü pümakat nümüin. Püküjüle pütchi sümüin wanee jierü, shieerü paashajeʼeraka Éfeso 5:28.] ¿Aneetche paajüin nakuwaʼipa na kaʼwayuuseshiikana noonoole sümaa tia pütchikat?».
4. ¿Jamüinjatü pünüiki namüin na wayuukana puʼunajachipa?
4 Puʼunajachipa, püküja namüin na wayuukana püleʼejeechin püchikuaʼa süpüla yootoo namaa. Püleʼejapa püchikuaʼa, paashajeʼera namüin waneeirua wetsiikulo yalaka sünain tü pütchi paashajaakalü achiki soʼu tü palajatkat pukua. Anashiire saaʼin pümüin, püküja namüin yalain suluʼu tü Wiwüliakat tü paashajaakalü achiki namaa. Paapa namüin wanee karaloukta kamalainjeetka namüin, sünainpünaaka tü paashajaakalü achiki namaa. Jülüja paaʼin tü namakat pümüin süchiki tü Wiwüliakat.