Püchajaa sukuwaʼipa pikirajüin wayuu sünain tü Wiwüliakat
1 «Jiirakaa namüin na wayuu antakana. Müshii aka naya saaʼin wanee aʼttiee eekai yapain süpüla asüʼüjünaa. Süka kettaain naya jooluʼu süpüla akotchajünaa süpüla anoujaa tanain», müshi Jesuu namüin na nikirajüinkana (Juan 4:35). Tü nümakat Jesuu sünainpünaasü maʼin nakuwaʼipa na anoujashiikana maaʼutpünaa.
2 Süka wainmain maʼin na wayuu woutiisakana juyawai, watüjaa aaʼu eein wayuu anamia oonoweekana sümaa nünüiki Maleiwa. ¿Kasa paaʼinrüinjatka pikirajeere wanee wayuu sünain tü Wiwüliakat?
3 Püchajaa sukuwaʼipa. Tü kasa waaʼinrüinjatkat palajana shia wachajaainjatüin sukuwaʼipa wekirajüin wanee wayuu sünain tü Wiwüliakat. Jülüjaa paaʼin tia wanaa sümaa pujuʼitüin sünain aküjaa pütchi. Tü aküjaakat pütchi otta tü ekirajaakat wayuu sünain tü Wiwüliakat, naainjüinjatü shia napüshuaʼa na wawalayuukana. Aküjüinjana waya pütchi otta wekirajüinjatü wayuu süka shiain tia tü aʼyatawaa eʼitaanakat wapüleerua (Mat. 24:14; 28:19, 20).
4 Waneeirua kasa waaʼinrüinjatka. Achuntajana waya nümüin Jeʼwaa süka süpüshuaʼa waaʼin. Eesü süntünüle anain wayuu achuntaka kaaliinwaa nümüin Maleiwa. Eeshii süpüla wantüin nanainmüin naya wayuukana müleka niale Jeʼwaa oʼunirüin wakuwaʼipa (Ageo 2:7; Aluw. 10:1, 2).
5 Jamüsüjaʼa wanee wawala, achuntüsü nümüin Jeʼwaa süpüla shikirajüinjatüin waneesiaakaijeʼe wayuu sünain tü Wiwüliakat. Chayaa shiʼyataaleruʼu, süpütüin suluʼu soʼofisiinase kojuyasü karalouktachein ¿Pücheküin pütüjaweein soʼomüin süchiki tü Wiwliakat? Saashajeʼera sümüsia wanee wayuu tü karalouktakat, süshajaka sünülia süpüla shikirajünüin shipialuʼu. Saashajaaka tü wawalakat sümaa otta shikirajaka shia sünain tü Wiwüliakat.
6 Eeshi süpüla nakaaliinjain pia na wawalayuu atüjakana maʼin süpüleerua oʼttaa sünain ekirajaa wayuu. Pikirajeere wanee wayuu sünain tü Wiwüliakat, ayataa pia sünain achuntaa nümüin Jeʼwaa waneepia otta püchajaa sukuwaʼipa pikirajüin wayuu. Müle shia putuma, piʼreerü eejeerüin süpüla pikirajüin wayuu sünain tü Wiwüliakat.