Pütchi ashajuushi

¿KASA alataka suluʼu tü ayaakuaakat? Ekaashii na wayuukana. Nuunejaain wainma wayuu chi aluwataaikai Babilonia. Asaashii suluʼu tü iita aainjuushikat süka ooro otta pülaata chajatka suluʼu tü aʼwaajüleekat Jeʼwaa. Mapa eejaaka najapü wanee wayuu ashajüsü sünain süsepü tü piichikat. Nainkuuka aaʼin napüshuaʼa.

Aluwataaishi Belsasar, chi nülüinkai Nabucodonosor. Neenajitka Belsasar na ooʼulaküliikana, nümaka: ‹Tasülajeechi amüin wainma kasa otta aluwataajeechi tachikumüin eeka naashajeʼerüin tü pütchikat otta nütüjaain saaʼu jamaluʼuluin shia›. Isaka nachiki na ooʼulaküliikana tia.

Süntaka nanainmüin tü niikat Belsasar süka saapüin nanüiki, sümaka: ‹Nnojo mmoluin pia, eeshi wanee wayuu eʼraajaka na maleiwayaashiikana. Wanaa sümaa nuluwataain chi putuushikai, nekiipuʼushi nia na ooʼulaküliikana nutuma. Daniel nünülia. Püsaajira nia, nüküjeetka pümüin jamaluʼuluin tü pütchikat›.

Nüsaajinnamaataka Daniel. Süchikijee niyouktüin tü asülajünüinjatkat nümüin, naashajaaka süchiki tü nüsünneʼerakat anainjee Jeʼwaa chi nutuushikai Belsasar suulia aluwatawaa, nümaka: ‹Yaletüsü maʼin naaʼin, süsalaka nia tia nutuma Maleiwa›.

Nümaka Daniel nümüin Belsasar: ‹Pütüjaa aaʼu tü alatakat nümüin, ayatayülia yaletüin paaʼin maʼaka naaʼin Nabucodonosor. Asüshi pia suluʼu tü iita chajatkat suluʼu tü aʼwaajüleekat Jeʼwaa. Puʼwaajüin tü maleiwayaasü aainjuushikat süka taapüla otta ipa. Nnojoishi kojutuin pümüin chi Kakumajalakai waya. Makalaka nüshajirüin tü pütchikat›.

Naashin Daniel tü pütchi ashajuushikat shia: MENÉ, MENÉ, TEQUEL otta PARSÍN.

Nümaka Daniel: ‹Nuuʼuleʼerüinjachi pia Maleiwa suulia aluwatawaa maluʼulu tü pütchikat MENÉ. Epesajünüshi pia otta nnojoika anamiain pia maluʼulu tü pütchikat TEQUEL. Aapünajatü namüin na medokana otta na persakana tü puluwataayakat maluʼulu tü pütchikat PARSÍN›.

Naashajaaiwaʼaya Daniel ashutushii na medokana otta na persakana saaʼu Babilonia. Noʼutaka naaʼin Belsasar. ¡Ekeraajüsü tü pütchi ashajuushikat soʼuleʼeya aikat tia! ¿Kaseerü alataka namüin na israeliitakana? Wekirajaajeerü anain tia mapeena, wekirajaa palajana nüchiki Daniel.