¿Paapüirü nüchiki Maleiwa?

1. ¿Jamüshi waʼwaajüinjachika Maleiwa?

Nukumajala Maleiwa süpüshuaʼa tü kasakalüirua. Eetüjüiya nia nümaiwa otta ayateechia eein waneepia (Salmo 90:2). Nümaʼanajeejatü tü pütchi anasü suluʼukat tü Wiwüliakat (1 Timoteo 1:11, TNM). Sükajee katüin woʼu nutuma, aʼyataainjana waya nümüin otta waʼwaajüinjachi nia. Püleeja Alateetkat Mapeena 4:11.

2. ¿Eeshi süpüla weʼrüin Maleiwa?

Nnojoishi eeichin wanee wayuu eʼrakai Maleiwa süka meʼrujuin nia otta pülain nia woulia (Juan 1:18; 4:24). Jülüjüle waaʼin tü kasa nukumajakat, weʼraajeechi nia. Aipürai otta kekiishi maʼin nia süka naatawalin nutuma süsii tü wunuʼukat otta tü süchonkat. Pülashi maʼin nia süka wainmain tü kasa nukumajakat. Püleeja Roma 1:20.

Tü wanee kasa waaʼinrajatkat süpüla weʼraajüin Maleiwa, waashajeʼerüinjatü tü Wiwüliakat. Süküjüin wamüin alin waya nüpüla Maleiwa, jaralüin tü kasa anakat jee tü mojukat nümüin otta jamüin sünouktia wanee kasa nutuma. Püleeja Salmo 103:7-10.

3. ¿Kasaichi nünülia Maleiwa?

Müshi Jesuu: «Taata Maleiwa chakai iipünaa, [...] Kasataalejese kojutüin pia [wulein tü pünüliakat, TNM] sütüma wayuu süpüshua» (Mateo 6:9). Mayaasüjeʼe wainmain tü anüliee eʼitaanakat nünain Maleiwa, waneesia neʼe tü nünüliakat. Suluʼu wainma anüikii, naatawaisü süküjia tü nünüliakat. Wayuunaikiruʼu, Jeʼwaa. Eeshii wayuu aküjaka süka tü anülieekat Yavé. Püleeja Salmo 83:18 (82:19 suluʼu waneeirua Wiwülia).

Suluʼu wainma Wiwülia, aʼwanajaanüsü nünülia Maleiwa süka Senyotkai jee Maleiwa. Sümaiwa paala, ashajünüsü nünülia Maleiwa suluʼu tü Wiwüliakat maʼaka sietemiittua. Wanaa sümaa nikirajüin Jesuu na wayuukana, nüküjüin namüin nünülia Maleiwa. Püleeja Juan 17:26, TNM.

Pünaja tü videokot ¿Kasaichi nünülia Maleiwa?

4. ¿Aishii waya nüpüla Maleiwa?

Aire waya nüpüla Jeʼwaa, ¿jamakaʼa nuuʼulaaka eein tü müliaakat? Eeshii eeka namüin müliain waya nutuma otta nuuʼulaküin waaʼin. Alawaa neʼe tia. Püleeja Santiago 1:13.

Nuuʼulaain waya Jeʼwaa waneeküin tü kasa wachekakat. Saaʼu müin waya nutuma, anashii waneeküle waʼyataain nümüin (Josué 24:15). Eeshii wayuu mojuka atuma sukuwaʼipa tü kasa naneekakat, aainjüshii kasa mojusü. Sutuma tia, joutsü maʼin müliaa otta mojusü shia nümüin Jeʼwaa. Püleeja Génesis 6:5, 6.

Süka alin waya nüpüla Jeʼwaa otta nücheküin talatüin waaʼin, najaʼttireerü tü müliaakat otta tü kasa mojusükat. Süpülapünaa naaʼinrüin tia, nuuʼulaain eein tü müliaakat. Suluʼu ekirajaaya 8, aküjünüsü jamüin nuuʼulaaka shia. Püleeja 2 Pedro 2:9 otta 3:7, 13.

5. ¿Kasa waaʼinrajatka süpüla waʼaleewain Maleiwa?

Woʼuraajüle nümüin Jeʼwaa, eeshii süpüla warütkaain nünainmüin. Nükaaliinjeein waya waneʼewai wakua (Salmo 65:2; 145:18). Eesü süpüla motuin naaʼin waainjala otta kojutsü nümüin tü waaʼinrakat waainjüle tü nüchekakat, jaʼitairü isain shia wachiki. Mayaainjeʼe kaainjaraliin waya, eeshii süpüla naʼaleewain waya. Püleeja Salmo 103:12-14 otta Santiago 4:8.

Alinjachi wapüla Maleiwa süka süpüshuaʼa waaʼin süka katüin woʼu nutuma (Marcos 12:30). Aishi nia wapüla wekirajaale nüchiki otta kacheʼere waya nümüin. Müle shia watuma, aleeweena maʼin waya nümaa. Püleeja 1 Timoteo 2:4 otta 1 Juan 5:3.