Asoʼiraajeerü naaʼin na ouktüshiikana ¿Jamüsü watüjaaka saaʼu shiimain tia?

Saashin soʼutku wayuu, amülashi neʼe wanee wayuu nunoujale sünain süsoʼiraainjatüin saaʼin süchikuaʼa tü ouktüsükalüirua. Anuu nünüiki Pablo süchiki tia: «Müleka nnojoruleje shiimüin sünain süsoʼiraainjatüin waaʼin süchikijee ouktaa, nnojolujaʼa mata kasain anain apüla wanoujain nünain Cristo. Je jooluʼu tamüshii paala jia süka süpüshua taaʼin: Shiimüin maʼi sünain nüsoʼiraain aaʼin Cristo süchikijee ouktaa. Je sükajee süsoʼiraain naaʼin, watüjaa aaʼut sünain süsoʼiraainjateerüin waaʼin wayakanaya süchikijee ouktaa» (1 Corinto 15:19, 20). Shiimainshaata nümüin Pablo sünain süsoʼiraainjatüin saaʼin wayuu süchikijee ouktaa. Nunouja maʼin anainrü tia Pablo saaʼujee nüsoʼireʼennüin aaʼin Jesuu süchikijee ouktaa (Aluwataaushikana 17:31).a Naashin Pablo, nia Jesuu asoʼineʼennakai aaʼin palajana süpüla katüinjatüin noʼu süpüla kaʼikat süpüshuaʼa. Sutuma tia, watüjaa aaʼu süsoʼiraainjateerüin saaʼin wayuu süchikijee ouktaa.

Watüjaa aaʼu shiimain süsoʼiraajeerüin saaʼin wayuu süchikijee ouktaa süka matüjüin aküjaa alawaa Jeʼwaa (Tito 1:2). Nüküjüle wamüin Jeʼwaa sünain süsoʼiraainjatüin saaʼin wayuu süchikijee ouktaa, meeria shia nutuma, nnojotsü alawaain tü nümakat.

Nüsoʼireʼereerü saaʼin Jeʼwaa süchikuaʼa tü wayuu ouktüsükalüirua süka alin naya nüpüla. Müshinka Job nümüin Maleiwa: «Ouktüle wanee wayuu [...], ¿kateetche noʼu nüchikuaʼa? Shiimainshaata maʼin sünain püsoʼireʼerüinjatüin taaʼin tachikuaʼa. Puunejeechi taya otta asoukteechi taya. Keeʼireesü maʼin paaʼin paainjain shia süka pukumajalain taya» (Job 14:14, 15, TNM). Nütüjaa aaʼu Job sünain shiimain keeʼireein maʼin naaʼin Maleiwa nüsoʼireʼerüin naaʼin nüchikuaʼa. Ayatayülia keeʼireein maʼin naaʼin Maleiwa naainjain tia. Anuu sünüiki tü Wiwüliakat: «Taya tayakai Jeʼwaa; matüjüinsai taya aʼwanajawaa takuwaʼipa» (Malaquías 3:6, TNM). Keeʼireesü maʼin naaʼin Maleiwa nüsoʼireʼerüin saaʼin tü wayuu ouktüsükalüirua süpüla katüinjatüin soʼu waneepia sümaa talatüin saaʼin. Tia, shia tü keeʼireekat naaʼin wanee wayuu eekai ouktüin wanee nüchon. Watüjaa aaʼu sünain keeʼireein maʼin naaʼin Maleiwa nüsoʼireʼerüin saaʼin tü wayuu ouktüsükalüirua jee nuunteerü tia süka pülashin maʼin nia (Salmo 135:6).

Süka pülasheechin Jesuu nutuma Jeʼwaa, nuunteerü nüsoʼireʼerüin saaʼin tü wayuu ouktüsükalüirua. Talateena maʼin na wayuu eʼreenakana nachikuaʼa na napüshi ouktüinnapakana. Niʼreein maʼin waya Jesuu sünain talatüin maʼin waaʼin. Nütüjaa aaʼu Jesuu müliain saaʼin wayuu süchiirua süpüshi eekai ouktüin. Makaʼa wanüiki, shia süka niʼyalajüin Jesuu wanaa sümaa niʼrüin müliachoin saaʼin tü nuwalayuukalüirua Lázaro nüchiirua jee na naʼaleewainyuukana (Juan 11:35). Soʼu wanee kaʼi, niʼrüin Jesuu wanee wayuu oukta aʼwayuuset sünain aʼyalajaa nüchiirua chi waneeshikai süchon. Nümüliajakalaka shia Jesuu. «Nnojo piʼyalajüin, maachee», müshi nia sümüin. Süchikijee nümüin tia, nüsoʼireʼerüin naaʼin süchon tia wayuukot (Lucas 7:13). Tü wayaawatakat aaʼu sünainjee tü naainjakat Jesuu, shia mojuin maʼin naaʼin niʼrüle wanee wayuu müliain saaʼin nüchiirua wanee süpüshi eekai ouktüin. Talateechi maʼin Jesuu nüsoʼireʼerapa saaʼin tü wayuu ouktüsükalüirua.

¿Eeichia ouktüin wanee püpüshi? Eesüjaʼa mojule maʼin paaʼin süka nnojoleechin piʼrüin nia nüchikuaʼa paajüin. Kepipejeʼe tia nutuma Maleiwa. Naashin Jeʼwaa, nüsoʼireʼereerü saaʼin tü wayuu ouktüsükalüirua otta nüneeküin Jesuu süpüla naaʼinrüin tia. Niʼreein pia Jeʼwaa sünain talatüin maʼin paaʼin süsoʼiraapa naaʼin nachikuaʼa na püpüshi ouktakana. Jülüja paaʼin talateechin maʼin pia kottapa pia namaa süpüla kaʼikat süpüshuaʼa.

Anuu nünüiki Lionel: «Süküjünaiwaʼaya tamüin süsoʼiraajeerüin saaʼin tü wayuu ouktüsükalüirua, müsü alawaayaakai saaʼin tamüin tia. Shiasaʼa taashajeʼerapa suluʼujee tü Wiwüliakat süchiki tia, tanoujüitpa maʼin anain. Teʼree maʼin amüinchi nüchikuaʼa chi tatuushikai».

¿Pütüjawee aaʼu sooʼomüin süchiki tia? Nekirajeechi pia na aküjüliikana pütchi nüchiki Jeʼwaa. Neeʼiyateerü pümüin suluʼujee tü Wiwüliakat shiimain süsoʼiraainjatüin saaʼin wayuu süchikuaʼa.b