¿Kaseerü alataka sümüin tü iküleesiakalüirua?

1. ¿Anasü süpüshuaʼa tü iküleesiakalüirua?

Suluʼu tü iküleesiakalüirua, eeshii wayuu eekai anamiain otta natüjaweein saaʼu tü shiimainkat. Kojutshii nümüin Maleiwa otta nakaaliinjeein naya. Akatsaʼa wainma na aainjakana kasa mojusü (2 Corinto 4:3, 4; 11:13-15). Eesü waapüle nachiki sünainpünaain naya atkawaa, oʼutaa saaʼin wayuu, ataüjawaa tepichi otta müliain naya natuma. Sutuma tia, ¡mojushaatasü naaʼin na wayuu anoujakana nünain Maleiwa! Püleeja Mateo 24:3-5, 11, 12.

Kojutshi Jeʼwaa namüin na wayuu suluʼukana tü iküleesia shiimainkat otta mojutsai namüin na suluʼukana tü nnojotkat shiimain. Ekirajüshii naya alawaa nüchiki Maleiwa, nachiki na ouktüshiikana otta ekirajüshii süchiki tü kasa nnojotkat suluʼuin tü Wiwüliakat. Nücheküin Jeʼwaa napüleerua na wayuukana natüjaainjatüin saaʼu tü shiimainkat. Püleeja Ezequiel 18:4 otta 1 Timoteo 2:3-5.

2. ¿Kaseerü alataka sümüin tü iküleesiakalüirua saashin tü Wiwüliakat?

Nütüjaa aaʼu Maleiwa jaraliin na anoujüshii aikana apüla nia otta jaraliin na aaʼinrakana tü nüchekakat Satanaa (Santiago 4:4). Saashin tü Wiwüliakat, «Babilonia, tü pueulo kojutkat sütüma wayuu», shia süpüshuaʼa tü iküleesia nnojotkat shiimain. Sümaiwajatü tia pueulokot, chajatü akumajaain süpüshuaʼa tü iküleesia nnojotkat shiimain. Alatsü tia soʼu nükalia Noé, süchikijee tü juya miyoʼukat maʼin. Alüʼütsü maʼin süpüla najaʼlajeʼerüin Maleiwa süpüshuaʼa tü iküleesia ekirajakalü alawaa otta amojujaka sukuwaʼipa wayuu. Püleeja Alateetkat Mapeena 17:1, 2, 5, 16, 17 otta 18:8.

Na wayuu anamiakana, nujuʼitirüin Jeʼwaa naya suluʼujee tü iküleesia nnojotkat shiimain. ¿Kasa apüla? Süpüla nikirajüin naya sünain tü shiimainkat. Püleeja Miqueas 4:2, 5.

3. ¿Kasa naaʼinrajatka na achekakana tü shiimainkat?

Nükaaliinjeein Jeʼwaa na wayuu kojutkana amüin tü shiimainkat otta na aaʼinrakana tü kasa anasükat. Müsüjeseʼe nachuntüin namüin nojuʼitüinjanain suluʼujee tü iküleesia nnojotkat shiimain. Shiimainre alin nia napüla, neeʼirateerü nakuwaʼipa süpüla talatüin nia natuma. Püleeja Alateetkat Mapeena 18:4.

Wainma na wayuu achekakana tü pütchikat wanaa sümaa naküjüin tü pütchi anasükat na nikirajüinkana Jesuu. Nikirajüin Jeʼwaa naya süpüla talatüin naaʼin otta natüjaain saaʼu anainjatüin nakuwaʼipa mapeena. Müinjanaʼaya waya, wacheküinjatü tü pütchi sümakat tü Wiwüliakat otta palajanainjachi watuma Jeʼwaa sünain wakuwaʼipa. Püleeja 1 Tesalónica 1:8, 9 otta 2:13.

Talatüshi maʼin Jeʼwaa namaa na wayuu ojuʼitakana suluʼujee tü iküleesia nnojotkat shiimain otta namaa na achekakana tü shiimainkat. Aleewashii naya nümaa Jeʼwaa, aishii naya napüla na wawalayuukana otta kateerü noʼu waneepia. ¿Pücheküin müin pukuwaʼipa? Püleeja Marcos 10:29, 30, TNM otta 2 Corinto 6:17, 18.

4. ¿Kaseerü naainjaka Maleiwa süpüla anain sukuwaʼipa wayuu sainküin Mmaka?

Aneerü sukuwaʼipa wayuu najaʼttirapa Jeʼwaa süpüshuaʼa tü iküleesia nnojotkat shiimain. Nnojoleena ekirajünüin sünain alawaa otta akatannüin naya. Naʼwaajeechi Maleiwa napüshuaʼa na wayuukana. Anasü maʼin tia, ¿aashimüin? Püleeja Alateetkat Mapeena 18:20, 21 otta 21:3, 4.