Keeʼireesü naaʼin Satanás paainjüin tü naaʼinrakat na outshiikana. Wainma wayuu aainjaka kasa namüin na ouktushiikana otta sümüin tü yolujaakalüirua süpüla nnojoluin saainjüin kasa mojusü namüin. Naainjüin shia süka mmoluin naya seema. Makalaka kamaʼanain naya ajapünaa, aüliijanaa pülasü. Asüshii «wunuʼu» jee nashulejüin shia natouta süka pülain shia naashin. Eeshii na ounjulakana otta ojoitakana kasa nepialuʼu süpüla anain nakuwaʼipa. Otta waneeinnua kamaʼanashii «wunuʼu» süpüla anainjatüin nakuwaʼipa sünain aʼyatawaa, sünain amüraajaa otta akanajaa juya suluʼu tü ekirajaaleekat.

Aleewale pia nümaa Jeowa paaʼinmajeerü pukuwaʼipa nuulia Satanás. Katchinreeshia maʼin Jeowa ooʼulaka na aapiee nümaajanakana nuulia Satanás otta tü yolujaakalüirua (Santiago 2:19; Alateetkat Mapeena 12:9). Keeʼireesü maʼin naaʼin Jeowa nükaaliinjüin na naʼaleewain jaa makana maʼin nümüin (1 Pedro 3:12).

Müsü tü Wiwüliakat: Nnojo paainjüin tü naaʼinrakat «na outshiikana». Nnojotsü anain nümüin Jeowa paainjüle tü naaʼinrakat na outshiikana süka eein süpüla shiʼitaʼaleein pia najapuluʼu Satanás chi Yolujaakai (Alateetkat Mapeena 21:8).

Nuuʼulaküin paaʼin Satanás süpüla paainjüin tü kasa mojusükat. Aleeweere pia nümaa Maleiwa, piyouktüinjatü ooʼulaka üttüinjatü paaʼin sünain tü kasa nüʼürülakat Jeowa (Roma 12:9). Tüüirua shia süpüshi tü nnojoluinjatkat paainjüin:

Aainjirawaa akuwaʼipaa yarüttüsü natuma tooloyuu otta jieyuu. «Nnojo pümaʼüjaain sümaa wayuu nnojotkat puʼwayuusein otta nnojoikai puʼwayuusein.» (Mateo 5:27.) Mojusü amaʼüjirawaa süpülapünaa tü kasaalüükat (1 Corinto 6:18).

Epeʼruwaa. Na ‹epeʼrüliikana nnojoleena ekeroluin suluʼumüin nuluwataaya Maleiwa› (1 Corinto 6:10).

Oʼutaa saaʼin wayuu otta ojutiraa joʼuu. «Nnojo puʼutüin saaʼin wayuu.» (Mateo 5:21.)

Aʼluwajaa. «Nnojo puʼluwajüin sükorolo wayuu.» (Marcos 10:19.)

Alawaa. Üttüsü naaʼin Jeowa nanain na «aküjüliikana alawaa» (1 Timoteo 1:10).

Atkawaa otta jashiee maʼin. «Üttüsü naaʼin [Jeowa] sünain wayuu eeka sücheküin tü atkawaakat» (Salmo 11:5, NM). Süpüshi ‹tü naaʼinrakat chi eekai kaleʼeruʼuin süchiki kaainjalaa shia tü üttaakat aaʼin› (Galacia 5:19, 20).

Ashaittaa. «Na jükatalaainjanakana oulia, [...] eekai washireein maʼi naaʼin» (1 Corinto 5:11).

Üttaa aaʼin sünain naata eʼirukuu. «Anashii aire jüpüla na jüʼünüükana. Je anashii juchuntüle nümüin Maleiwa naaʼu na eʼrüliikana wayumüin jümüin» (Mateo 5:43, 44).

Tü nümakat Maleiwa pümüin süpülajatü anain pukuwaʼipa. Kapüleesü maʼin akayalawaa suulia aainjaa tü kasa mojusükat, akatsaʼa nutuma Jeowa otta na Aküjüliikana pütchi nüchiki eesü süpüla nnojoluin paainjüin tü kasa nnojotkat nücheküin (Isaías 48:17; Filipos 4:13, NM; Hebreokana 10:24, 25).

Püshateein nukuwaʼipa wanee paʼaleewain eeka kojutuin otta anain pümüin. Müsü tü Wiwüliakat: «Waneeshia Maleiwa niain anashin.» (Mateo 19:17.) Süpüla naʼaleewainjanain waya Maleiwa, wayuuinjana anashii waya ooʼulaka lotuinjatü wakuwaʼipa. Müsü tü Wiwüliakat: «Anakaja müleka jüshatüle nukuaippa chi Maleiwakai, süka nüchooinapain jia je süka alin maʼi jia nüpüla. Anakaja müleka aijiraale jia jüpüla jüpüshua» (Éfeso 5:1, 2). Tüüirua shia süpüshi tü waaʼinrüinjatkat:

Akaaliinjüliinjana wayuu. «Müleka watüjaale saaʼu tü anasükat süpüla aaʼinnaa, anakaja waaʼinrüle tia [...] sümüin wayuu süpüshua.» (Galacia 6:10.)

Aʼyataaliinjana waya. «Chi eekai kaʼruwaralin, anakaja müleka nuuʼulaale jooluʼu suulia aʼluwajaa. Anashi müleka niʼyataale» (Éfeso 4:28).

Wuleinjatü wakuwaʼipa otta tü kasa wamaʼanakat. ‹Anakaja wooʼulaale suulia tü yarüttakat atüma waaʼin, tü mojukat atüma wakuaippa. Je müleka shiimüinre kojutüin chi Maleiwakai watüma, wuleinjatü waaʼin nuʼupala.› (2 Corinto 7:1.)

Kojutuinjana otta alinjana wapüla na wapüshikana. «Jia tooloyuukana [...], anakaja müleka aire jüpüla juʼwayuuse maa aka alin jia jüpülajiraa. Akaʼaya jiakana jieyuukana, anakaja müleka kojutule jütüma juʼwayuuse. Je jia achonlu [achonniikana] [...], anakaja müleka joonoole sümaa sünüiki jii je nünüiki jüshi» (Éfeso 5:33–6:1).

Alinjana wapüla na wayuukana. «Süka alin waya nüpüla chi Maleiwakai, anashii müleka aijiraale waya wapüla.» (1 Juan 4:7.)

Jaa müinjana waya namüin na aluwataashiikana saaʼu tü mmakat. ‹Jüüjüüinjatü wayuu süpüshua namüin na sülaülashiikana mma. Okotchajitshii neerü süpüla tü kasa cheʼojaakat suluʼu tü mmakat. Anakaja nnojoliire jaʼalijiraain suulia awalaajaa tia namüin› (Roma 13:1, 7).