Satanás namaa na yolujaakana nnojoluinjana emeejüin wayuu mapeena. Nujutuinnapa naya Jeʼwaa sirumatuʼujee (Alateetkat Mapeena 12:9). Alüʼütshii naya süpüla nasürünnüin. Müsü nünüiki chi aluwataaushikai Juan: ‹Teʼrakalaka wanee aapiee ashakatüshi iipünaajee sümaa shiyaawein tü ishikat otta wanee kaleena miyoʼu najapuluʼu. Kapükalaka nutuma chi kayuushi sülaülakai yolujaa kanüliakai Satanás soʼu 1.000 juya. Nujutakalaka nia suluʼumüin tü ishikat. Nüsülüjaaka tü shirousekat nümaa. Nnojoluichipa eʼikeʼerüin wayuu sainküin mmakat waneʼereʼeya shikeraajapa tü 1.000 juya› (Alateetkat Mapeena 20:1-3). Mapa oʼutunajachi aaʼin Satanás namaa na yolujaakana (Alateetkat Mapeena 20:10).

Otta müshia na wayuu mojulaashiikana ajaʼlajeʼennüinjana saaʼujee tü Mmakat (Salmo 37:9, 10; Lucas 13:5).

¡Katüinjatü noʼu nachikuaʼa na ouktushiikana!

Ouktapa Satanás namaa na yolujaakana, aneerü nakuwaʼipa na wayuukana nutuma Jeʼwaa. Soto paaʼin nnojoluin katüin noʼu na ouktushiikana. Naashin Jesús tü ouktaakat müsü aka saaʼin sutunkule maʼin wanee wayuu sümaa nnojoluin süʼlapüjaain (Juan 11:11-14). Nüküjüin Jesús tia süka nachijiraainjanain nachikuaʼa na ouktushiikana. Müshi nia: ‹Soʼuweena wanee kaʼi, süpüshuaʼa tü wayuu ouktusükalüirua ojuʼiteerü mmapüjee› (Juan 5:28, 29; puʼwanaajireʼera sümaa Aluwataaushikana 24:15).

Katüinjatü noʼu nachikuaʼa saaʼu tü Mmakat. Nnojoleena waya aapüin süchiki wayuu eeka ouktuin, shieerü waapaka achiki wayuu eeka katüin soʼu süchikuaʼa. ¡Aneerü maʼin asakaa na wapüshi asoʼiraainjanakana aaʼin!

Nünoʼuteʼereerü Jeʼwaa süpüshuaʼa tü kasa mojusü naainjakat Satanás. Nia Aluwataainjachika Jesús nutuma Jeʼwaa saaʼu süpüshuaʼa tü Mmakat süpüla paraiisüinjatüin shia nutuma (Mateo 28:18; Lucas 23:43).

Tüü, shia tü naainjüinjatkat Jeʼwaa.

• WATTEERÜ SAALII EKÜÜLÜ: «Wainmeerü eküülü saaʼu tü mmakat nutuma Maleiwa». «Wainmeerü soʼu süchon wunuʼu ekünaajuui saaʼu tü mmakat; wainmeerü maʼin eküülü saaʼupünaa tü uuchikat» (Salmo 67:6; 72:16, NM).

• NNOJOLEERÜ ATKAWAA: «Jalaina, jiʼraiwa tü naainjakat Jeʼwaa, tü kasa anashaatasü niʼitaakat saaʼu tü mmakat. Najaʼlajeʼerüin tü atkawaakat suluʼupünaa süpüshuaʼa tü mmakat» (Salmo 46:8, 9, NM).

• NNOJOLEERÜ WAYUU MOJULAASÜ: «Ajaʼlajeʼennüinjana na mojulaashiikana [...] Soʼu palitchon kaʼi nnojoleechi chi mojulaashikai, jaʼitaichi püchajaain nnojoleechi puusütüin» (Salmo 37:9, 10, NM).

• 

  NNOJOLEERÜ AYUULII, MÜLIAA AAʼIN OOʼULAKA OUKTAA: «Soʼu kaʼikat tia koʼuinjana na moʼupaʼasaliikana, kacheʼeinjana na macheʼesaliikana. Soʼu kaʼikat tia chi masaʼasaikai oʼotoweechi maʼaka naaʼin wanee irama otta chi manüisaikai aashajaweechi jee aʼwaateechi sutuma talatüin nia» (Isaías 35:5, 6, NM).

  ‹Eeinjachi chi Maleiwakai namaa. Nümülialeena naya. Müiria nnojoluin ouktaa, mojuu aaʼin, aʼyalajaa, jee saalii ayuulii, süka sülatüipain süpüshuaʼale makat aka tia› (Alateetkat Mapeena 21:3, 4).

Alaa Satanás otta na yolujaakana, aluʼusaʼa Jeʼwaa matüjüinsai aküjaa naʼalain (Lucas 1:36, 37). Niakai aipürai wayuu makalaka kepieein pia nutuma suluʼu tü Mma anasü naainjüinjatkat. Paashajaa namaa na aküjüliikana pütchi nüchiki Jeʼwaa süpüla pütüjüin sooʼomüin süchiki tü shiimain aküjünakat suluʼu tü Wiwüliakat. Paainjüle tü sümakat nnojoleerü paainjüin tü naaʼinrakat na ooʼulaküliikana otta nnojoleerü punoujuin sünain tü alawaakat. Mapa, taasheerü paaʼin suulia kaainjalaa ooʼulaka ouktaa. Müshi Jesús: «Jiyaawateerü aaʼu tü shiimainkat süpüla jujuittüinjanain sütüma suulia achepchiaa» (Juan 8:32).