Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
SETTIENPÜROʼU 5-11
KOROLO KOJUTÜSÜ SULUʼUKA TÜ WIWÜLIAKAT | SALMO 119
«Woonoo sümaa tü nuluwataakalü anain Jeʼwaa»
(Salmo 119:1-8). Talatüsü maʼin naaʼin na nnojoliikana kaainjalain, na oonookana sümaa tü nuluwataakalü anain Jeʼwaa. 2 Talatüsü maʼin naaʼin na aaʼinrakana tü nuluwataakalü anain; na achajaakana waneepia süka süpüshuaʼa naaʼin. 3 Nnojoishii naya aaʼinrüin tü kasa mojusükat. Ayatüshiʼiya naya suluʼu tü nüpünakat. 4 Püküjüin tamüin saainjünüinjatüin tü kasa puluwataakalü anain. 5 ¡Kasataalejeseʼe waneepiain taya pümaa süpüla tonooin sümaa tü puluwataakalü anain! 6 Nnojoleechi taya japülin tekirajaapa sünain tü puluwataakalü anain. 7 Tatüjapa süpüleerua tü puluwataakalü anain, taʼwaajeechi pia süka süpüshuaʼa taaʼin. 8 Ayatüsia taaʼinrüin tü puluwataakalü anain taya. Nnojo piyüülajüin taya.
(Salmo 119:33-40). Jeʼwaa, pikiraja taya sünain tü puluwataakalü anain, süpüla taaʼinrüinjatüin shia waneepia. 34 Piyaawatira taya süpüla taaʼinrüinjatüin tü puluwataakalü anain, otta süpüla yaainjatüin shia suluʼu taaʼin. 35 Pikiraja taya sünain tü puluwataakalü anain, talatüsü taaʼin sümaa tia. 36 Pimeʼeja taaʼin sünainmüin tü puluwataakalü anain, nnojotsü shiainjatüin sünainmüin wanee korolo. 37 Nnojo puuʼulaain teʼrüin tü kasa nnojotkat kasain anain apüla; ayataʼaya katüin toʼu putuma suluʼu tü püpünakat. 38 Pikeraaja tü pümakat tamüin, tayakai chi püchepchiakai, süpüla mmoluwaain wayuu peema. 39 Pülatira toulia tü kasa mojusü mmotkalü eema taya, süka lotuin maʼin sukuwaʼipa tü kasa puluwataakalü anain. 40 Taaʼinreein maʼin tü puluwataakalü anain. Ayataʼaya katüin toʼu putuma süka lotuin maʼin tü pukuwaʼipakat.
(Salmo 119:41-48). Anashi aire taya püpüla Jeʼwaa, puʼtteʼera taya maʼaka püküjüin shia tamüin; 42 tasoukteechika nümüin chi mojukai anüiki tamüin, süka jamüin, teʼitaain taaʼin sünain tü pünüikikat. 43 Pükaaliinja taya süpüla taküjüin waneepia süchiki tü shiimainkat, süka jamüin, teʼitaain taaʼin sünain tü puluwataakalü anain. 44 Taaʼinreerü waneepia tü puluwataakalü anain. 45 Waraiteechi taya eere nnojoluin mojulawaa, süka jamüin, tachajaain tü puluwataakalü anain. 46 Taküjeerü tü puluwataakalü anain namüin aluwataashiikana, nnojoleechi japülin. 47 Kojuteerü tamüin tü puluwataakalü anain, kojuteerü maʼin tamüin. 48 Tayalereerü tajapü iipünaamüin saaʼu taaʼinrüin tü puluwataakalü anain, jülüjeerü maʼin taaʼin waneepia tü puluwataakalü anain.
Püchajaa süchiki kaaʼürüi suluʼu tü Wiwüliakat
(Salmo 119:71). Eesü tü kasa anasü tatüjakat sünainjee teʼrüin tamüliala, shia süpüla tatüjüinjachin süpüleerua tü puluwataakalü anain.
w06-S 1/9 süp. 14 püt. 4
Pütchi anaka maʼin sünainjee tü jaʼraikat shiʼipa tü karalouktakat
119:71. ¿Kasa anasü eeka sünainjee eʼraa müliaa? Weʼrüle müliaa, eeshi süpüla weʼitaain waaʼin nünain Jeʼwaa, woʼuraajüin weinshi nümüin, wekirajaain sünain tü Wiwüliakat otta weʼitaain suluʼu wakuwaʼipa tü sümakat. Weeʼiyateerü sükajee tü kasa waaʼinrakat, choʼujaain wamüin wanoukteʼerüin wanee kasa sünain wanoula.
(Salmo 119:96). Teʼrüin sajaʼlajaʼalaa sümüin kasa, akatsaʼa matüjüin ajaʼlajawaa tü puluwataakalü anain.
Wetsiikulo aashajeʼennajatka
(Sl 119:73-93). Pia kakumajalakai taya süka pajapü. Anashi piyaawatirüle taya tü puluwataakalü anain süpüla taaʼinrüinjatüin shia. 74 Na talatakana aaʼin tamaa otta na eʼrakana taya naya na mmoluwaakana peema, süka jamüin, teʼitaain taaʼin sünain tü pünüikikat. 75 Jeʼwaakalee, tatüjaa aaʼu lotuin maʼin sukuwaʼipa tü kasa puluwataakalü anain, otta jamüin teʼraka müliaa. 76 Anashi pümüliajüle taya pansaa sümaa tü pümakat tamüin, süka jamüin, alin taya püpüla. 77 Pümüliajaʼaya taya, süpüla ayatüinjachin katüin toʼu; süka jamüin kojutüin maʼin tamüin tü puluwataakalü anain. 78 Anashii neʼrüle japülii putuma na yaletakana aaʼin, süka jamüin, maaʼawain taya natuma sümaa nnojoluin kasain taainjalain namüin. Akaisaʼa tayakai, jülüjashaatasü taaʼin tü puluwataakalü anain. 79 Anashii naleʼejüle nachikuaʼa tanainmüin na mmoluwaakana peema, na atüjaakana saaʼu tü pikirajakalü anain. 80 Anasü wulere taaʼin süpüla taaʼinrüin tü puluwataakalü anain, süpüla nnojolinjachin teʼrüin japülii. 81 Taʼatapajüin maʼin puʼtteʼerüinjachin taya; teʼitaain maʼin taaʼin sünain tü pünüikikat. 82 Teʼreein maʼin tü pümakat tamüin, sümaa tamüin: «¿Joujaleechi pümüliajaka taya». 83 Müshi taya maʼaka saaʼin wanee paaʼata asüinyeʼe sikonsalasü. Sotoyülia taaʼin tü puluwataakalü anain. 84 ¿Jeʼrainjachi maʼin taya kaʼi sünain aʼatapajaa, tayakai chi püchepchiakai? 85 Oponushii ishi tapülajatü na yaletakana aaʼin, na nnojoliikana aaʼinrüin tü puluwataakalü anain. 86 Shiimain süpüshuaʼa tü puluwataakalü anain. Müliashi taya atumawaa sümaa nnojoluin kasain taainjalain. Pükaaliinjaʼaya taya. 87 Ouktataaichijeʼe taya atumaa; nnojotpajaʼa motuin taaʼin tü puluwataakalü anain. 88 Kataʼaya toʼu putuma süka aipüralin maʼin pia, süpüla taaʼinrüinjatüin tü pusoʼirakalü anain taaʼin. 89 Jeʼwaakalee, chasü waneepia sirumatuʼu tü pünüikikat. 90 Tü pünüikikat süpülajatü wayuu süpüshuaʼa. Pukumajala tü mmakat, otta eejeerü shia waneepia. 91 Ayatshiʼiya eein naya maaʼutpünaa, süka jamüin, püchepchiain naya. 92 Nnojorülejeʼe kojutüin tamüin tü puluwataakalü anain, ouktüshijeʼe taya sutuma teʼrüin müliaa. 93 Soteerü taaʼin waneepia tü puluwataakalü anain, süka jamüin, katüin toʼu sutuma.
SETTIENPÜROʼU 12-18
KOROLO KOJUTÜSÜ SULUʼUKA TÜ WIWÜLIAKAT | SALMO 120-134
«Nia Jeʼwaa chi akaaliinjakai taya»
(Salmo 121:1, 2). Eirakaweechi taya chaa saaʼumüin tü uuchikat. ¿Jaraiche akaaliinjeechika taya? 2 Nia Jeʼwaa chi akaaliinjakai taya, chi Kakumajalakai tü sirumatuʼukat otta tü mmakat.
(Salmo 121:3, 4). Nnojoleechi pia ashanaain nutuma. Naaʼinmajeechi pia jee nnojoleechi atunkeein sünain aaʼinmajaa pia. 4 ¡Jülüja paaʼin! Nnojoleechi nia atunkeein jee atunküin sünain aaʼinmajaa pia, niakai chi aaʼinmajakai Israel.
(Salmo 121:5-8). Naaʼinmajüin pia Jeʼwaa. Yalashi Jeʼwaa pikialuʼujee maʼaka saaʼin piyolojo. 6 Nnojoleechi pia jamajüin nutuma chi kaʼikai soʼukai, jee nutuma chi kashikai saʼwai. 7 Naaʼinmajeechi pia Jeʼwaa suulia kasa mojusü eeka eein. Naaʼinmajeechi pia Jeʼwaa. 8 Akaʼaya pujuʼitüle jee pikerotüle naaʼinmajeechi pia Jeʼwaa, naaʼinmajeechi pia maaʼulu jee süpüla kaʼikat süpüshuaʼa.
Püchajaa süchiki kaaʼürüi suluʼu tü Wiwüliakat
(Salmo 123:2). Maʼaka chüntüin noʼu nüchepchia wanee wayuu sünainmüin najapü chi nalaamainkai, maʼaka chüntüin soʼu wanee achepchiee sünainmüin najapü chi sülaamainkai, müshiʼiya wayakana, chüntüsü woʼu nünainmüin Jeʼwaa, chi Wamaleiwasekai, waʼatapajüin nükaaliinjain waya.
w06-S 1/9 süp. 15 püt. 4
Pütchi anaka maʼin sünainjee tü jaʼraikat shiʼipa tü karalouktakat Salmo
123:2. ¿Kasa watüjaka sünainjee tü aküjünakat süchiki «noʼu na achepchieekana»? Na achepchieekana, eirakaʼawaishii sümüin najapü chi nalaamainkai süpüla neʼrüinjatüin tü nuchuntakat jee süpüla nakaaliinjünüin nutuma. Müshiʼiya wayakana, arütkaashii waya nünainmüin Jeʼwaa süpüla watüjaain saaʼu tü nüchekakat otta süpüla nükaaliinjain waya.
(Salmo 133:1-3). ¡Jülüja jaaʼin! ¡Anakatche maʼin kottiraale na wawalayuukana sümaa paaʼinwajiraain naya! 2 Müshii aka saaʼin saʼanasiain wanee seita oʼyotunaka saaʼu nikii Aarón, apalanajaaka saaʼumüin nüliima jee sünainmüinreʼeya sunut nüsheʼin. 3 Müshii aka saaʼin tü joojotshikat saaʼu tü uuchikat Hermón, jee saaʼu tü uuchikalüirua Sión. Süka jamüin, nüjütüin Jeʼwaa yalamüin naʼanasiain otta kataa oʼu süpüla kaʼikat süpüshuaʼa.
w06-S 1/9 süp. 16 püt. 3
Pütchi anaka maʼin sünainjee tü jaʼraikat shiʼipa tü karalouktakat Salmo
133:1-3. Anasü waaʼin otta katchinsü waaʼin sutuma paaʼinwajiraain na wayuu suluʼukana nupueulose Jeʼwaa. Nnojotsü mojuinjatüin wanüiki nachiki otta nnojoishii waya atkaainjanain namaa.
Wetsiikulo aashajeʼennajatka
(Sl 127:1–129:8). Nnojoire niain Jeʼwaa akumajüin tü piichikat, amülaʼatshii neʼe aʼyataain maʼin na wayuu akumajakana shia. Nnojoire niain Jeʼwaa aaʼinmajüin wanee pueulo,amülaʼatshi neʼe matunküin chi wayuu aaʼinmajakai shia. 2 Amülaʼatshii neʼe jia atamaain wattachon, aliikain jaaʼu sünain joyotoo sümaa jikaataain süchikumüin jümüliala. Anasü naaʼin nutuma sünain atunkaa chi wayuu aikai maʼin nüpüla. 3 ¡Jülüja jaaʼin! Nüpaala Jeʼwaa nümüin wanee wayuu na nüchonniikana; otta nüsülajala naya nümüin. 4 Nachonnii na jimaʼaliikana müshii aka saaʼin wanee jatü najapuluʼu wanee wayuu atüjakai maʼin atkawaa. 5 Anataʼaleeshijaʼa chi wayuu epirajakai naka naya tepichikana süpülaya tü jatü nümaʼanakat. Nnojoleena eʼrüin japülii, süka naashajaweenain namaa naʼünüü soʼuluʼu tü pueulokot. 128 Anataʼaleeshijaʼa chi mmoluwaakai neema Jeʼwaa, chi aaʼinrakai tü nuluwataakalü anain. 2 Emireechi pia sünainjee piʼyataain. Talateerü paaʼin otta aneerü pukuwaʼipa. 3 Tü puʼwayuusekat, meerü aka saaʼin suulia wanee uuwa kachonsü pipialuʼu. Na püchonniikana meena aka saaʼin suuʼulia olivo süʼütpünaa tü pimeesainkat. 4 Meerü nukuwaʼipa chi wayuu mmoluwaakai neema Jeʼwaa. 5 Naapeerü Jeʼwaa pümüin naʼanasiain chejee Sión.Piʼreerü anaa akuwaʼipa waneepia chaa Jerusalén 6 piʼreena na püikeyuukana. Kasataalejeseʼe eein jimataa aaʼin saaʼu Israel. 129 «Müliashi maʼin taya atumawaa jintüliiwaʼaya taya, müsü nünüiki Israel, 2 müliashi maʼin taya atumawaa jintüliiwaʼaya taya; akaisaʼa isain taya nachiki. 3 Müshii nousakai aaʼin saaʼu tasapü, aʼikaajüsü maʼin tasapü natuma». 4 Lotusü maʼin nukuwaʼipakat Jeʼwaa. Nuchonoojüin tü tapükat noulia na mojulaashiikana. 5 Eʼreena naya japülii, otta aleʼejaweena naya nachikuaʼa, napüshuaʼa na üttakana aaʼin sooʼomüin Sión. 6 Meena naya maʼaka saaʼin tü alama yotokot saaʼu piichi, jurulaa maka süpülapünaa suusunüin, 7 nnojotka piratüin amaa najapü wanee wayuu atpajüi, otta nnojotka wainmain nutuʼupünaa chi akotchojüikai pünajüt 8 Nnojoleerü müin nanüiki na wayuu alatakana: «Kasataalejeseʼe nükaaliinjain jia Jeʼwaa. Anaa jukuwaʼipa nutuma Jeʼwaa».
SETTIENPÜROʼU 19-25
KOROLO KOJUTÜSÜ SULUʼUKA TÜ WIWÜLIAKAT | SALMO 135-141
«Anasü maʼin wakumajia nutuma Jeʼwaa»
(Salmo 139:14). Taʼwaajeechi pia süka anain maʼin takumajia putuma. Tatüjaa aaʼu anain maʼin putuma sukumajia tü kasakalüirua.
(Salmo 139:15, 16). Piʼratüjülia tü teipüsekat süleʼeruʼuiwaʼaya taya tei. 16 Akaʼaya tü tachüʼükat piʼratüjülia shia, otta tü waneeirua kasa tanainkat, püshajatüjülia suluʼu pükaraloukse. Nnojotsü kasain choʼujaain putuma pukumajaiwaʼaya taya.
(Salmo 139:17, 18). ¡Kojutüsü tamüin tü jülüjakat paaʼin! Maleiwakalee, ¡wainmaleʼeya sujutü tamüin! 18 Tayaawajüle shia, alanaʼaleejeeria maʼin suulia tü jasaikat, shiasaʼa tachijiraale, ayateechia taya pümaa.
w06-S 1/9 süp. 16 püt. 8
Pütchi anaka maʼin sünainjee tü jaʼraikat shiʼipa tü karalouktakat Salmo
139:17, 18. ¿Anasüche wamüin ekirajawaa nüchiki Jeʼwaa? (Proverbios 2:10) Müle shia, anashaatasü tü kasa waaʼinrakat, süka jamüin, sülanaʼaleein maʼin suulia tü jasaikat tü jülüjakat naaʼin Jeʼwaa. Ayateenaʼaya waya waneepia ekirajaain nüchiki Maleiwa.
Püchajaa süchiki kaaʼürüi suluʼu tü Wiwüliakat
(Salmo 136:15). Otta chi wüinsitkai atuma Faraón otta na nusurulaatsekana chayaa shiroku tü palaa Ishosükat: süka jamüin, aipüralin maʼin nia süpüla kaʼikat süpüshuaʼa.
(Salmo 141:5). Kalioʼulejeʼeya taya nutuma chi wayuu eekai lotuin nukuwaʼipa shia süka alin taya nüpüla. Nüchiaalejeʼeya taya, müsü aka saaʼin wanee seita oʼyotunaka saaʼu tekii, nnojoleerü tayouktajaain amaa. Ayateechia taya oʼuraajüin napüleerua naya mojulaashiikana.
Wetsiikulo aashajeʼennajatka
(Sl 139:1-24). Jeʼwaakalee, pünaʼlüin süpüshuaʼa tü takuwaʼipakat otta piʼraajüin maʼin shia. 2 Pütüjaa aaʼu müleka taikkalaale jee müleka tatamaale. Pütüjaa aaʼu tü jülüjakat taaʼin, jaʼitaichi wattain pia. 3 Pütüjaa aaʼu müleka tawaraijaale jee tojuleraale, otta pütüjaa aaʼu süpüshuaʼa tü takuwaʼipakat. 4 Pütüjaatüjülia aaʼu süpüshuaʼa tü pütchi taküjüinjatkat, Jeʼwaakalee. 5 Yalashi pia tachiirua otta tapüleerua; otta piʼitaain pajapü taaʼu. 6 Atüjashaatashi maʼin pia, isasü tachiki tayaawatüin saaʼu süpüshuaʼa. 7 ¿Jalakualeechi taya suulia tü pütsüinkat, jee puulia piakai? 8 Toʼunule sirumatuʼumüin, cheechi pia chayaa; jee tojoitünüle tanaajaapa, yaleechi pia tapülayaa. 9 Toʼunule wattamüin eere nujuʼitüin chi kaʼikat, toʼunule wattamüin eere sajaʼttüin tü palaakat, 10 puʼunireechi taya süka pajapü otta paaʼalijeechi taya süka tü pajapü pikiakat. 11 Müleka tamüle: «¡Ounjulaajeechi taya saʼaka piyuushi!», chuwatuuijeerü taʼütpünaa. 12 Jaʼitakajaʼa tü piyuushikat, nnojoleerü piyuushin pümüin, chuwatuuijeerü pümüin maʼaka saaʼin soʼukai; wanaaweerü pümüin chuwatuuire jee piyuushiire. 13 Pia kakumajalakai tü tachüʼükat; paaʼinmajüin taya süleʼeruʼu tei. 14 Taʼwaajeechi pia süka anain maʼin takumajia putuma. Tatüjaa aaʼu anain maʼin putuma sukumajia tü kasakalüirua. 15 Piʼratüjülia tü teipüsekat süleʼeruʼuiwaʼaya taya tei. 16 Akaʼaya tü tachüʼükat piʼratüjülia shia, otta tü waneeirua kasa tanainkat, püshajatüjülia suluʼu pükaraloukse. Nnojotsü kasain choʼujaain putuma pukumajaiwaʼaya taya. 17 ¡Kojutüsü tamüin tü jülüjakat paaʼin! Maleiwakalee, ¡wainmaleʼeya sujutü tamüin! 18 Tayaawajüle shia, alanaʼaleejeeria maʼin suulia tü jasaikat, shiasaʼa tachijiraale, ayateechia taya pümaa. 19 ¡Piakai Maleiwakalee, kasataalejeseʼe puʼutüin saaʼin tü mojulaasükalüirua! Noʼuneenaka toulia na wayuu uwomuyuuliikana, 20 na mojukana anüiki püchiki; mojutsat [tü pünüliakat] namüin... na püʼünüükana. 21 ¿Aashin üttüin taaʼin nanain na wayuu üttakana maʼin aaʼin pünain, Jeʼwaakalee, otta aashin talerajüin na wayuu eʼrakana wayumüin pümüin? 22 Shiimain üttüin taaʼin nanain süka süpüshuaʼa taaʼin, taʼünüʼüya na wayuu püʼünüükana. 23 Maleiwakalee, pünaʼla süpüshuaʼa tü takuwaʼipakat otta piʼrajaa kasain suluʼuin taaʼin. Pünaʼlaa sümüin tü kasa shapaakalü atuma taaʼin, 24 otta piyaawata saaʼu; kamaʼa mojeerüle takuwaʼipa sutuma tü taainjakat otta puʼunira taya suluʼu tü wopu süpülajatkat kaʼika süpüshuaʼa.
¿Jamüshiche nujuʼitinnaka wanee wayuu naʼakajee na anoujashiikana?
Süpüla nüleʼejüinjachin wanee wayuu naʼakamüin na anoujashiikana, acheküsü shiiʼiyatünüin nümüin tü naaliinkat, ayatüinjatpajaʼa naaʼinrüin tü münakat nümüin wanaa sümaa nüchiaanüin. «Kalioʼulejeʼeya taya nutuma wayuu eekai lotuin nukuwaʼipa shia süka alin taya nüpüla. Nüchiaalejeʼeya taya, müsü aka saaʼin wanee seita oʼyotunaka saaʼu tekii, nnojoleerü tayouktajaain amaa», müshi David (Sal. 141:5, TNM). Süpüla wayaawatüin saaʼu tia, anashii wekirajaale sünain tüü: ittüle nuuʼui wanee wayuu suukalakai asha jee itta itta sümüle nüsaʼa sutuma tia, amaanamaatüinjachi nia pitaaruluʼumüin, nnojoire nümaanüin sümaʼanamüin tottoot, eeshi süpüla ouktüin nia. «Wachotooinjatü püsaʼa süpüla anainjachin pia», namüle na tottootkana nümüin, mojeerü naaʼin chia wayuukai sümaa alin nümüin tü aainjünajatkat nüka. Shiapejeʼe shipin tia süpüla nnojolinjachin ouktüin nia. Akaʼaya David, aisü nümüin nüchiaanaiwaʼaya, nütüjaapajaʼa saaʼu aneerüin nukuwaʼipa sutuma tia.
SETTIENPÜROʼU 26–OʼUTUUPÜROʼU 2
KOROLO KOJUTÜSÜ SULUʼUKA TÜ WIWÜLIAKAT | SALMO 142-150
«Waʼwaajüinjachi Jeʼwaa süka niain miyoʼushin saaʼu kasa süpüshuaʼa»
(Salmo 145:1-9). Yaleteechi pia tatuma, piakai Tamaleiwasekai, chi Aluwataaikai, taʼwaajeerü tü pünüliakat süpüla kaʼika süpüshuaʼa. 2 Taʼwaajeechi pia waneepia soʼukai otta taʼwaajeerü tü pünüliakat süpüla kaʼika süpüshuaʼa. 3 Aʼwaajünüinjachi Jeʼwaa süka niain miyoʼushin saaʼu kasa süpüshuaʼa otta nnojotsü jaralüin ayaawatüin saaʼu süpüshuaʼa tü kasa nütüjaakalü aaʼu. 4 Aneerü sünüiki wayuu waneepia süchiki tü kasa pukumajakat, otta naküjeerü süchiki tü kasa pülasü paainjakat. 5 Jülüjeerü taaʼin pülashaatain maʼin pia otta anashaatain maʼin tü kasa pukumajakat. 6 Aashajaweena naya süchiki pülashaatain maʼin pia; otta taküjeerü sümüin wayuu süchiki miyoʼushaatain maʼin pia. 7 Talateena maʼin naya sümaa naküjüin anamiain maʼin pia otta süka lotuin maʼin pukuwaʼipa, eeʼirajeena naya sümaa talataa aaʼin. 8 Anamia maʼin Jeʼwaa otta amüliajüi nia, nnojoishi aashichijaamaatüin nia otta aipüraishaata maʼin nia. 9 Anamia Jeʼwaa sümüin wayuu süpüshuaʼa, otta nümüliajüin süpüshuaʼa tü kasa nukumajalakat.
w04-S 15/1 süp. 15 püt. 2
Aipüraishaata maʼin Jeʼwaa
2 Niiʼiyatüin Jeʼwaa alin maʼin nüpüla waneepia na aʼyataashiikana nümüin. «Aipüraishaata maʼin nia», müsü tü ashajuushikat nüchiki Jeʼwaa suluʼu hebreo. Kojutüsü maʼin nümüin David tia akuwaʼipaakat. Sünainjee tü alatakat nümüin otta jülüjain naaʼin tü nukuwaʼipakat Maleiwa sümüin tü kasa nukumajalakat, müshi nia nümüin Jeʼwaa: «Aipüraishaata maʼin [Jeʼwaa]» (Salmo 145:8).
(Salmo 145:10-13). Suʼwaajeechi pia süpüshuaʼa tü kasa pukumajalakat, Jeʼwaakalee, otta naʼwaajeechi pia na waneepiakana pümaa. 11 Aküjeena naya süchiki tü puluwataayakat, otta süchiki pülashaatain maʼin pia, 12 süpüla sütüjaainjatüin aaʼu wayuu süchiki tü kasa pülasü naainjakat otta süchiki anashaatain maʼin tü nuluwataayakat. 13 Tü puluwataayakat süpülajatü kaʼika süpüshuaʼa, otta pia aluwataainjachikai saaʼu tü wayuukalüirua waneepia.
(Salmo 145:14-16). Nükaaliinjain Jeʼwaa napüshuaʼa na wayuu ojuttakana, otta nütameeʼerüin napüshuaʼa na ojutteekana. 15 Pia neirakaaka amüin napüshuaʼa na wayuukana, otta paapüin namüin tü neküinkat soʼu choʼujaain shia namüin. 16 Pujutalüin tü pajapükat otta paapüin tü keeʼireekat saaʼin süpüshuaʼa kasa.
Püchajaa süchiki kaaʼürüi suluʼu tü Wiwüliakat
(Salmo 143:8). Wattaʼa maalü, piiʼiyata tamüin aipüralin maʼin pia, süka teʼitaain maʼin taaʼin pünain. Piʼraajira taya tü wopu toʼunüinjatkalü aluʼumüin, süpüla tantüinjachin pünainmüin.
w10-S 15/1 süp. 21 püt. 1, 2
¿Kasa waaʼinrüinjatka süpüla waʼwaajüinjachin Maleiwa weinshi saashin Salmo 143:8?
Achuntüinjana waya kaaliinwaa nümüin Jeʼwaa süpüla anainjatüin watuma süneekia wanee kasa süpüla waaʼinrüin shia. Eeshi süpüla nuʼwaajünüin jee maʼwaajuuin Jeʼwaa sükajee tü kasa waainjakat weinshi. Makalaka weeʼiyatüinjatüin sükajee wakuwaʼipa alawaain tü nüküjakat chi Yolujaakai. Jee aʼyataainjana waya nümüin Jeʼwaa waneepia «soʼukaʼi je saʼwai» süpüla talatüinjatüin naaʼin wamaa (Alat 7:15; Pr 27:11).
(Salmo 150:6). Süpüshuaʼa tü kasa eekai katüin soʼu suʼwaajüinjachi Jeʼwaa... juʼwaaja Jah. ¡Juʼwaaja Jah!
Wetsiikulo aashajeʼennajatka
(Sl 145:1-21). Yaleteechi pia tatuma, piakai Tamaleiwasekai, chi Aluwataaikai, taʼwaajeerü tü pünüliakat süpüla kaʼika süpüshuaʼa. 2 Taʼwaajeechi pia waneepia soʼukai otta taʼwaajeerü tü pünüliakat süpüla kaʼika süpüshuaʼa. 3 Miyoʼu maʼin Jeʼwaa, aʼwaajünüinjachi nia otta nnojotsü jaralüin ayaawatüin saaʼu süpüshuaʼa tü nütüjaakalü aaʼu. 4 Aneerü sünüiki wayuu waneepia süchiki tü kasa pukumajakat, otta naküjeerü süchiki tü kasa pülasü paainjakat. 5 Jülüjeerü taaʼin pülashaatain maʼin pia otta anashaatain maʼin tü kasa pukumajakat. 6 Aashajaweena naya süchiki pülashaatain maʼin pia; otta taküjeerü sümüin wayuu süchiki miyoʼushaatain maʼin pia. 7 Talateena maʼin naya sümaa naküjüin anamiain maʼin pia otta süka lotuin maʼin pukuwaʼipa, eeʼirajeena naya sümaa talataa aaʼin. 8 Anamia maʼin Jeʼwaa otta amüliajüi nia, nnojoishi aashichijaamaatüin nia otta aipüraishaata maʼin nia. 9 Anamia Jeʼwaa sümüin wayuu süpüshuaʼa, otta nümüliajüin süpüshuaʼa tü kasa nukumajalakat. 10 Suʼwaajeechi pia süpüshuaʼa tü kasa pukumajalakat, Jeʼwaakalee, otta naʼwaajeechi pia na waneepiakana pümaa. 11 Aküjeena naya süchiki tü puluwataayakat, otta süchiki pülashaatain maʼin pia, 12 süpüla sütüjaainjatüin aaʼu wayuu süchiki tü kasa pülasü naainjakat otta süchiki anashaatain maʼin tü nuluwataayakat. 13 Tü puluwataayakat süpülajatü kaʼika süpüshuaʼa, otta pia aluwataainjachikai saaʼu tü wayuukalüirua waneepia. 14 Nükaaliinjain Jeʼwaa napüshuaʼa na wayuu ojuttakana, otta nütameeʼerüin napüshuaʼa na ojutteekana. 15 Pia neirakaaka amüin napüshuaʼa na wayuukana, otta paapüin namüin tü neküinkat soʼu choʼujaain shia namüin. 16 Pujutalüin tü pajapükat otta paapüin tü keeʼireekat saaʼin süpüshuaʼa kasa. 17 Lotusü nukuwaʼipa Jeʼwaa sünain süpüshuaʼa kasa otta sünain süpüshuaʼa tü kasa naaʼinrakat. 18 Pejeshi Jeʼwaa nanain napüshuaʼa na achuntakana nia otta nanain napüshuaʼa na aʼwaajakana nia süka tü shiimainkat. 19 Naapeerü tü keeʼireekat naaʼin na mmoluwaakana neema, otta naapajeerü nanüiki nachuntapa kaaliinwaa nümüin jee nuʼtteʼereena naya. 20 Naaʼinmajüin Jeʼwaa napüshuaʼa na wayuu aikana apüla nia, akanasaʼa na mojulaashiikana, najaʼttireena naya. 21 Taʼwaajeechi Jeʼwaa süka tanüiki; otta tü nünüliakat, suʼwaajeerü tü wayuukalüirua süpüshuaʼa süpüla kaʼika süpüshuaʼa.