Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
Nowienpüroʼu 7-13
KOROLO KOJUTÜSÜ SULUʼUKA TÜ WIWÜLIAKAT PROVERBIOS 27-31
«Ashajünüsü suluʼu tü Wiwüliakat süchiki wanee jierü anaka maʼin akuwaʼipa»
(Proverbios 31:10-12). ¿Jaraleechi antaka sünain wanee jierü anaka akuwaʼipa? Alanaʼaleesia sujutü suulia tü coralkat. 11 Niʼitaain naaʼin chi suʼwayuusekai sünain, otta nütüjaa aaʼu aneerüin sukuwaʼipa. 12 Aainjasü kasa anasü waneepia nümüin, maainjüinsat kasa mojusü.
w00-S 1/2 süp. 31 püt. 2
Sünüiki wanee wayuu nümüin süchon
Aküjünüsü nümüin Lemuel sukuwaʼipa wanee jierü eeka anain: «Niʼitaain naaʼin chi suʼwayuusekai sünain» (Pr 31:11, TNM). Tü süküjeekat tia pütchikat shia eein kasa anaka süpüla süneeküin tü jietkat süka saaʼin sümüiwaʼa süka niʼitaain naaʼin chi suʼwayuusekai sünain. Eepejeʼe kasa naashajaajiraaka achiirua wanee wayuu sümaa nuʼwayuuse süpülapünaa naneeküin tü naaʼinrajatkat, maʼaka saaʼin ayaʼlajaa wanee kasa eekai kojutüin jee jamüinjatüin nepijia nachonnii natuma. Müleka naashajaajiraale süpülapünaa naneeküin wanee kasa, aijiraajeena naya sünainjee.
(Proverbios 31:13-27). Aʼyataalü maʼin shia, wainma kasa saainjaka süka sajapü, jee achajaasü shia liino sümaa laana. 14 Müsü aka saaʼin tü anua namaʼanakat na oikkaaliikana. Akolojusü shia eküülü namüin na süpüshikana. 15 Atamaasü wattachon sünain aʼlakajawaa neküin na süpüshikana jee sümaa shikirüin na jieyuu süchepchiakana. 16 Ayaʼlajüsü wanee mma eere süpünajüin uuwa. 17 Katchinsü maʼin shia jee aʼyataasü maʼin shia waneepia. 18 Shiyaawata aaʼu anain tü shiʼyataainkat jee nnojotsü oyokojooin tü süranparasekat. 19 Aainjasü jiitpai süka rueca otta süka huso. 20 Sükaaliinjain na wayuu müliakana aaʼin jee na maʼletsekana. 21 Nnojotsü mmoluin seema jemiai süka piantuain nasheʼin na süpüshikana sutuma. 22 Akumajüsü saanala. Aainjuushi süka liino tü süsheʼinkat otta süka laana eʼishojuushi. 23 Chi suʼwayuusekai nia wanee wayuu eʼraajünakai maʼin, jee aikkalaashi nia namaa na laülaashiikana soʼuluʼu supuettoʼuse tü pueulokot. 24 Aʼyapüjüsü wusi, suikkaain shia otta saapüin namüin na oikkaaliikana wanee süchechajia nasheʼin. 25 Anasü maʼin süsheʼin sümaa saʼatapajüin kasa anasü. 26 Shiiʼiyatüin kekiin maʼin shia saashajaapa jee asouktüsü süka pütchi analuʼut. 27 Jülüjasü saaʼin süpüshuaʼa tü kasa alatakat shipialuʼu jee nnojotsü shokulain shia.
w00-S 1/2 süp. 31 püt. 3, 4
Sünüiki wanee wayuu nümüin süchon
Wainma kasa shiʼyataaka anain wanee wayuu kaʼwayuusesü. Suluʼu wetsiikulo 13 sünainmüin 27 aküjünüsü süchiki tü saaʼinrajatkat wanee jierü süpüla anain na süpüshikana sutuma. Jamüsüjaʼa maaʼulu yaa, akooʼomüinraasü sülia tü washeʼinkat jee müshia tü kasa choʼujaakat wepialuʼu, sutuma tia ekirajaasü wanee jierü sünain aainjaa wainma kasa jee shiisattüin tü nneetkat süpüla anainjatüin naʼanaaya chi suʼwayuusekai jee na süchonniikana (Pr 31:13, 19, 21, 22). Saainjain tia süpüla süsetaain tü nneerü nayaʼlajüinjatkalü aka eküülü, jee apünajüsü shia wanee kasa süpüla suiküinjatüin (Pr 31:14, 16).
Tü jietkat «nnojotsü shokulain». Aʼyataasü maʼin jee sunouktüin maʼin sukuwaʼipa tü kasa eekat shipialuʼu (Pr 31:27, TNM). «Katchinsü maʼin shia», pütchikat tia shiiʼiyatüin katchinjatüin wanee wayuu süpüla aainjaa wanee kasa eekai kapüleein maʼin (Pr 31: 17, TNM). Atamaasü shia wattachon maalü sünain aʼyatawaa jee atunkaleesia shia kaʼlepa aika. Müsü aka saaʼin wanee ranpara chuwataka waneepia (Pr 31:15, 18).
(Proverbios 31:28-31). Atamaashii na süchonniikana sümaa anain nanüiki süchiki otta chi suʼwayuusekai atamaashi sümaa anain nünüiki sümüin. 29 Wainma maʼin na jieyuu eeʼiyatakana sünain anain nakuwaʼipa jee atüjain maʼin naya, piapejeʼe neʼe pümüiwaʼa anaka akuwaʼipa suulia tü waneeirua. 30 Nnojotsü anain süpüla aʼwaajünaa wanee jierü sutuma anasüchoin maʼin shia, shia anaka süpüla aʼwaajünaa wanee jierü mmoluwaale shia neema Jeʼwaa. 31 Jaapa kasa anasü sümüin wanaajiraa sümaa tü shiʼyataainkat, jee juʼwaaja shia sünainjee anain maʼin tü saainjakat.
w00-S 1/2 süp. 31 püt. 5
Sünüiki wanee wayuu nümüin süchon
Anainjatü maʼin sunoula wanee jierü kaʼwayuusesü. Mmoluwaasü neema Maleiwa, suʼwaajüin nia jee kojutüshi sümüin (Pr 31:30). Sükaaliinjain chi suʼwayuusekai sünain epijaa na süchonniikana süpüla anain nakuwaʼipa. Müsü sünüiki Proverbios 31:26, TNM: «Shiiʼiyatüin kekiin maʼin shia» süchiaapa süchonnii otta asouktüsü süka pütchi analuʼut».
w00-S 1/2 süp. 31 püt. 8
Sünüiki wanee wayuu nümüin süchon
Tü niikat Lemuel süküjüin nümüin kojutüinjatüin nümüin tü jiet nuʼwayuuseinjatkat. Aishaatainjatü nüpüla nuʼwayuuse suulialeʼeya wayuu eekai eein. Müsüjeseʼe talatüin maʼin shia wanaa sümaa nümüin sümüin suʼupala wayuu: «Wainma maʼin na jieyuu eeʼiyatakana sünain anain nakuwaʼipa jee atüjain maʼin naya, piapejeʼe neʼe pümüiwaʼa anaka akuwaʼipa suulia tü waneeirua» (Proverbios 31:29, TNM).
Püchajaa süchiki kaaʼürüi suluʼu tü Wiwüliakat
(Proverbios 27:12). Chi wayuu kekiikai maʼin, oʼunüshi suulia tü kasa mojusükat, akaisaʼa chi malakai aaʼin, oʼunüshi sünainmüin jee sülataka kasa mojusü nümüin.
(Proverbios 27:21). Süpüla sütüjaanüin aaʼu anale maʼin tü pülaatakat, ooʼulakünüsü süʼlakajünüin suluʼu wanee süpülaya otta tü oorokot, suluʼu wanee horno; otta wanee wayuu ooʼulakünüshi sükajee nuʼwaajünüin.
w11-S 1/8 süp. 29 püt. 2
Wanee kaʼi eere suʼwaajünüin nakuwaʼipa na ekirajaakana sünain tü Wiwüliakat
Chi wawalakai Morris, nüküjüin tü piamakat kasa waaʼinrajatka süpüla weeʼiyatüin mmoluwaain waya neema Jeʼwaa, naashajeʼerüin Proverbios 27:21, eere sümüin: «Süpüla sütüjaanüin aaʼu anale maʼin tü pülaatakat, ooʼulakünüsü süʼlakajünüin suluʼu wanee süpülaya otta tü oorokot, suluʼu wanee horno; otta wanee wayuu ooʼulakünüshi sükajee nuʼwaajünüin». ¿Jamüshi nütüjaanaka aaʼu wanee wayuu anale nia müleka nuʼwaajünüle? Shia sükajee niiʼiyatüin jetsüin maʼin nukuwaʼipa wanee wayuu sutuma nuʼwaajünüin. Sutuma nuʼwaajünüin, eesü süpüla yaletüin naaʼin jee amatchinjaweerü nunoula, otta eeshii na kojutükana amüin tü kasa naapakat Jeʼwaa sümaa noonooin sümaa nünüiki. Chi wawalakai nüküjüin namüin na ekirajaakana suluʼu Galaad shiainjatüin naneeküin kojutüin Jeʼwaa natuma jee neeʼiyatüin mmoluwaain naya neema.
w06-S 15/9 süp. 19 püt. 12
Pütchi anaka maʼin sünainjee tü karalouktakat Proverbios
27:21. Waʼwaajünüle, jaʼyeerü waaʼu müleka anale maʼin tü wakuwaʼipakat. Jaʼyeerü waaʼu müleka nnojorüle yaletüin waaʼin, wayaawateerü aaʼu niain Jeʼwaa aainjaka wainma kasa wapüleerua otta aʼyataweejeena maʼin waya nümüin. Müleka yaletüle waaʼin sutuma waʼwaajünüin, jaʼyasü sünain wakuwaʼipa nnojoliin anamiain waya.
Wetsiikulo aashajeʼennajatka
(Proverbios 29:11–30:4). Chi wayuu malakai, kaashichijaarai; akaisaʼa chi wayuu kekiikai maʼin, nüchecherüin naaʼin. 12 Anale nümüin wanee aluwataai wanee pütchi nnojotka shiimain, mojulaajeena nutuma napüshuaʼa na aʼyaatakana nümüin. 13 Chi wayuu maʼletsekai otta chi wayuu aaʼinrakai kasa mojusü, wanaawashii sümaa katüin noʼu nutuma Jeʼwaa. 14 Anale nuluwataaya wanee wayuu jee noonoole sümaa tü nümakat Jeʼwaa, aluwataajeechi süpüla kaʼika süpüshuaʼa. 15 Kekiishi maʼin wanee jintüi niʼyaatünüle otta nüchiajaanüle. Akaisaʼa chi jintüi nnojoikai achiajaanüin, japüijeerü nii nutuma. 16 Wainmale na wayuu mojulaakana, awainmalaasü tü kasa mojusükat, akanasaʼa na anamiakana, neʼreena ojuttüin na mojulaashiikana. 17 Püchiajaa püchon süpüla anain paaʼin otta süpüla talatüin maʼin paaʼin nutuma. 18 Nnojorüle kayaawasein wanee kasa namüin na wayuukana, naainjeerü tü keeʼireekat naaʼin, aneetpajaʼa nukuwaʼipa wanee wayuu noonoole sümaa nünüiki Jeʼwaa. 19 Nüchiaanapa wanee achepchiee süka wanee pütchi, eesü nnojorüle naapaain sümaa, jaʼitairü nütüjaain saaʼu, macheʼesai suulia. 20 ¿Piʼrüichi wanee wayuu mayaawajaainka saaʼu nünüiki? Anaʼleesia nukuwaʼipa wanee wayuu malakai nuulia chi mayaawajaainkai saaʼu nünüiki. 21 Waapüle waneepia tü nuchuntakat wamüin wanee wachepchia jintüliiwaʼaya nia, eʼreechi wayumüin wamüin mapa. 22 Naashichijaale wanee wayuu, mojeerü nukuwaʼipa, jashichire maʼin nia, kaainjaleechi sünainjee. 23 Sünainjee yaletüin naaʼin wanee wayuu, mojeerü nukuwaʼipa, chi nnojoikai pülain aaʼin, nieechi kojutüka atumawaa. 24 Chi wayuu aʼyataakai nümaa wanee kaʼruwarai, nnojotsü aneein nukuwaʼipa. Naapüle wanee pütchi airuʼulu, nnojotsü nüküjüin achiki. 25 Mmorüle pia seema wayuu, meechi pülaasajünakai aaʼin; aluʼusaʼa chi eekai niʼitaain naaʼin nünain Jeʼwaa, nnojoleechi jamajüin nia. 26 Wainma maʼin kasa naainjaka na wayuukana süpüla neʼraajüinjachin wanee aluwataai, niapejeʼe neʼe Jeʼwaa atüjaaka saaʼu jamüinjatüin sukuwaʼipa wanee kasa. 27 Na wayuu anamiakana, nayouktüin tü naainjakat na kaainjaraliikana, akaʼaya joo na kaainjaraliikana, nayouktüin tü naainjakat na lotokana akuwaʼipa. 30 Tüü, shia nünüiki Agur, chi nüchonkai Jaqué, nünüiki wanee wayuu tütükai maʼin sünain niʼyataain, nümüinjatü Itiel nümaa Ucal. 2 Malashi neʼe taya, nnojotsü tayaawatüin saaʼu wanee kasa maʼaka nayaawatüin na waneeinnua; 3 nnojoishi kekiin maʼin taya otta nnojoishi teʼraajüin chi Pülashikai maʼin. 4 ¿Jarai chi oʼunakai iipünaamüin jee ashakatakai nüchikuaʼa? ¿Jarai chi ataʼülakai tü jouktaikat süka najapü? ¿Jarai chi ajaittakai wüin süka kuluulu? ¿Jarai chi eʼitaakai sülüjüle tü mmakat sotpaʼajee tü palaakat? ¿Pütüjaa aaʼu kasaichin nünülia otta kasaichin nünülia nüchon?
Nowienpüroʼu 14-20
KOROLO KOJUTÜSÜ SULUʼUKA TÜ WIWÜLIAKAT ECLESIASTÉS 1-6
«Talata paaʼin sünainjee piʼyataain maʼin»
(Eclesiastés 3:12, 13). Tatüjaaitpa aaʼu anain maʼin namüin talatüin naaʼin otta naainjain kasa anasü kataiwaʼaya noʼu; 13 Otta müshiʼiya napüshuaʼa na wayuukana, eküinjana, asüinjana otta talatüinjatü naaʼin sümaa tü kasa anasü neʼrakat sünainjee naʼyataain maʼin. Tia, nüsülajala Maleiwa.
(Eclesiastés 4:6). Shia anaka neemeraale wanee wayuu suulia niʼyataain maʼin, nnojoleerü kasain niʼrüin sünainjee, meechi nuwataakai aaʼin süchiirua jouktai.
Püchajaa süchiki kaaʼürüi suluʼu tü Wiwüliakat
(Eclesiastés 2:10, 11). Süpüshuaʼa tü kasa teʼrakat eesü shia tamaʼana. Tü suchuntakat taaʼin shia taainjaka maʼin. Sükajee taʼyataain maʼin, talatüsü maʼin taaʼin otta shia teʼraka tia sünainjee taʼyataain. 11 Tasakiraka taaʼin sünain tü kasa taʼyataakalü anain paala. Tayaawataka saaʼu amülain neʼe süpüshuaʼa tü kasa aainjünakat sainküin mma, müsü aka saaʼin nuwataale wanee wayuu süchiirua jouktai.
w08-S 15/4 süp. 22 püt. 9, 10
¿Kasache talataka atuma naaʼin wanee wayuu?
¿Talatüsüche naaʼin wanee wayuu sutuma washirüin nia?
9 Wainma kasa nümaʼana Salomón wanaa sümaa nüshajüin tü karalouktakat Eclesiastés (2 Cró. 9:22). Wainma nneerü nümaʼana süpüla niyaʼlajüin tü keeʼireekat naaʼin. «Tü suchuntakat taaʼin shia taainjaka maʼin», müshi nia (Ecl. 2:10, TNM). Akatsaʼa nütüjaain saaʼu mapa nnojoluin talatüin naaʼin wanee wayuu sutuma tü washirüükat. «Chi wayuu keeʼireekai aaʼin washirüü, nnojotsü talatüin naaʼin sümaa tü kasa eekat nümaʼana, keeʼireesü naaʼin sooʼomüin», müshi nia (Ecl. 5:10, TNM).
10 Mayaapejeʼe sülatalaʼa sümüin tü washirüükat, keeʼireesü maʼin shia aaʼinyüü. Asakinnüshiinka waneeinnua ekirajaashii suluʼu eʼikülee miyoʼu chaa Estados Unidos, eeshii maʼaka 75% na makana: «Tü keeʼireekat taaʼin shia kanneetsein taya». Shikeraajüle tü keeʼireekat naaʼin, ¿talateetche naaʼin sutuma tü nneetkat? Eesüjaʼa süpüla nnojoluin talatüin naaʼin. Naashin na ekirajaakana süchiirua nakuwaʼipa na keeʼireekana aaʼin washirüü, nnojotsü talatüin naaʼin chi wayuu keeʼireekai maʼin aaʼin washirüü. Anuu nünüiki Salomón süchiki tia sümaiwa paala: «Wainma pülaata, ooro eejatkat tamaʼana otta eejatü tamaʼana tü eekat nümaʼana wanee aluwataai [...] ¡Jülüja paaʼin! Nnojotsü kasain eein sünainjee tia, müsü aka saaʼin nuwataale wanee wayuu süchiirua jouktai (Ecl. 2:8, 11, TNM). Akanasaʼa waʼyataale nümüin Jeʼwaa süka süpüshuaʼa waaʼin otta naapüle kasa anasü wamüin, washireena waya noʼuluʼu (paashajeʼera Proverbios 10:22).
(Eclesiastés 3:16, 17). Nnojotsü lotoo akuwaʼipaa sainküin tü mmakat, shia neʼe eeka mojulawaa. 17 Müsü taaʼin taleʼeruʼu: «Na wayuu anamiakana jee na mojulaashiikana, asoukteena nümüin Maleiwa saaʼu naainjala, süka jamüin, eein wanee kaʼi saainjünajatka oʼu wanee kasa, maʼaka saaʼin tü naainjüinjatkat Maleiwa soʼu tia».
w06-S 1/11 süp. 14 püt. 9
Pütchi anaka maʼin sünainjee tü karalouktakat Eclesiastés
3:16, 17. Nnojotsü waʼatapajüinjatüin weinshi saainjünüinjatüin tü kasa lotusükat. Nieechi Jeʼwaa anaka atuma tü mmapaʼakat, müsüjeseʼe nnojoluinjatüin shapaain waaʼin sutuma tü weʼrakat maaʼulu.
Wetsiikulo aashajeʼennajatka
(Eclesiastés 1:1-18). Nünüiki Salomón, chi nüchonkai David chi aluwataakai saaʼu Jerusalén. 2 Anuu nünüiki süchiki tü kasa nnojotkat kasain anain apüla: «¡Süpüshuaʼa tü kasa eekat, nnojotsü kasain anain apüla!». 3 ¿Kasa eeka nümaʼana wanee wayuu aʼyataakai maʼin süpüla kaʼi? 4 Eshii na wayuu ouktakana jee eeshii waneeinnua neʼiraka, akatsaʼa tü mmakat, ayateeria eein shia waneepia. 5 Ojuʼitüshi chi kaʼikai sümaa chuwatüin maʼin nia, kaleʼu yalashi nia iipünaa, jee ekerotushi aipaʼapa süpüla nujuʼitüin nüchikuaʼa wattaʼa maalü. 6 Waawatüsü uuchimüin tü jouktaikat otta leeyatüsü shia palaamüin. Leeyata, leeyata müsü shia waneepia. 7 Antüsü shirokumüin tü palaakat sainya tü juyakat, matüjüinpejeʼe epirajawaa tü palaakat. Oʼuna müsia tü wüinkat iipünaamüin süpüla shiʼitüinjatüin süchikuaʼa. 8 Kakulajiasü kasa süpüshuaʼa, nnojotsü süpüla saashajaain wayuu süchiki. Matüjüinsat mapüsaa tü woʼukot suulia eʼrajaa wanee kasa, otta tü wacheʼekat matüjüinsat mapüsaa suulia aapajaa. 9 Wanee kasa eeka shiʼitaanüinjatüin, ayatajatia, otta wanee kasa eeka saainjünajatüin, shieerü aainjünaka, müsüjeseʼe nnojoluin kasain aʼwanajaain. 10 ¿Eesüche wanee kasa eeka süpüla «jeketü türa», sümünüinjatüin amüin? Eetüjülia tü kasakalüirua süka süpülajatüin shia kaʼika süpüshuaʼa. 11 Nnojotsü jaralüin sotuin aaʼin na wayuu namaiwajanakana, otta nnojoleena sotuin aaʼinyüü na eejeenakana mapeena. Nnojoleena naya sotuin saaʼin tü wayuu eejeetkat nachikumüin. 12 Tayakai, chi outkajeʼerakai wayuu, aluwataashi taya saaʼu Jerusalén. 13 Ekirajaashi taya süpüla tatüjaain saaʼu tü kekiiwaa sünainpünaakat tü kasa eekat mmapaʼa... tü kasa kapüleesü naapakat Maleiwa sümüin wayuu süpüla shiʼyataain sünain. 14 Teirakaaka sümüin süpüshuaʼa tü kasa eekat sainküin mma, tayaawataka saaʼu amülain neʼe süpüshuaʼa tü kasa aainjünakat, müsü aka saaʼin nuwataale wanee wayuu süchiirua jouktai. 15 Wanee kasa eekai shokotuin, nnojotsü süpüla süloʼinnüin, nnojotsü süpüla shiyaawajünüin wanee kasa choʼujaale shia. 16 «¡Jülüja jaaʼin! Kooʼomüinsü tamüin tü kekiiwaakat, nuulialeʼeya wanee wayuu eejachikai paala tapülapünaa yaa Jerusalén, watta saalii kasa tatüjaaka aaʼu otta kekiishi maʼin taya», maa müshi taya taleʼeruʼu. 17 Taapaka taaʼin süpüla tatüjaain saaʼu tü kekiiwaakat maʼin, tü mamainnaakat otta tü malaakat, teʼrüin müin aka saaʼin nuwataale wanee wayuu süchiirua jouktai. 18 Kekiire maʼin wanee wayuu, kooʼomüinsü maʼin tü jashieekat nümüin, chi eekai nütüjaain saaʼu wainma kasa, kooʼomüinsü tü müliaakat nümüin.
Nowienpüroʼu 21-27
KOROLO KOJUTÜSÜ SULUʼUKA TÜ WIWÜLIAKAT ECLESIASTÉS 7-12
«Soto paaʼin chi Kakumalakai pia maiwaʼaya pia jimaʼalin»
(Eclesiastés 12:1). Soto paaʼin jooluʼu chi Kakumalakai pia maiwaʼaya pia jimaʼalin. Süpülapünaa süntüin tü kaʼi piʼreetkalü oʼu müliaa otta suulia majüin pünüiki: «Nnojoluitpa taaʼin sünain».
(Eclesiastés 12:2-7). Süpülapünaa shipiyuushijaain tü kaʼikat, chi kashikai otta tü jolotsükalüirua, süpülapünaa süleʼejüin tü sirumakat süchikijee wanee juya miyoʼu; 3 süpülapünaa kutkuttüin na aaʼinmajakana tü miichikat, namatchinjaain na tooloyuu katchinkana maʼin, isain nachiki aʼyatawaa na jieyuukana süka palitchoin naya, süpülapünaa piyuushin napüla na jieyuu anaʼlaakana suluʼupünaa tü wentaanakat; 4 süpülapünaa süsürülaain tü puettoʼukalüirüa sünainmüinka tü kaayekat, nnojoluin paapüin shipisana tü moliinakat, püchijiraain sutuma shiiʼira wüchii jee paapüin jiattaʼaya shiiʼirain tü jieyuukalüirua. 5 Süpülapünaa mmoluin pia seema kasa eekai miyoʼuin, seema oʼunaa suluʼupünaa wanee wopu. Süpülapünaa kasiin wanee almendro, lemütüin wanee kaashapa, susottüin süta wanee alcaparra, süka jamüin, nuʼunüin chi wayuukai suluʼumüin tü nipiainjatkat waneepia otta naʼleeyatüin tü kaayekat na aʼyalajakana saaʼu wayuu ouktüsü, 6 süpülapünaa süsünneʼennüin tü jiiku akumajuushikat süka pülaata, susottüin tü kuriia akumajuushikat süka ooro, susottüin tü jaronkot süʼütpaʼa süʼwüira wüin otta süshataain tü ajaraijiakat wüin suluʼujee ishi. 7 Aleʼejüsü mmain süchikuaʼa tü sümamülakat mma maʼakaapuʼu sümaiwa otta tü sütchinkat saaʼin wayuu, aleʼejüsü eemüin chi Maleiwa [shiimainshikai], chi kaapajalakai shia.
w08-S 15/11 süp. 23 püt. 2
Aneena waya waaʼinrüle tü nuluwataakalü anain waya Jeʼwaa
Aküjünüsü suluʼu Eclesiastés 12 tü alatakat namüin na wayuukana wanaa sümaa laülaain naya (paashajeʼera Eclesiastés 12:1-7). Tü walashi kasuusükat müsü aka saaʼin süsii almendro. Nasaʼa na laülaayuukana müsü aka naaʼin na «tooloyuu katchinkana maʼin» jee sutuma laülaayuuin naya kutkuttüsü nasaʼa sümaa jokotüin naya. Tü noʼukot, müsü aka saaʼin tü jieyuu anaʼlaakana suluʼupünaa tü wentaanakat, nnojotsü kasain neʼrüin, piyuushisü noʼupaʼa. Sutuma sujutuuin tü naikat müsü aka naaʼin na jieyuu isakana achiki aʼyatawaa süka palitchon naya.
w06-S 1/11 süp. 16 püt. 8
Pütchi anaka maʼin sünainjee tü karalouktakat Eclesiastés
11:9; 12:1-7. Asouktüinjana na jimaʼaliikana otta na majayünnüükana waneʼewai nakua saaʼu tü kasa naainjakat nümüin Jeʼwaa. Müsüjeseʼe anain nalatirüle wainma kaʼi sünain naʼyataain nümüin Jeʼwaa süka süpüshuaʼa natchin süpülapünaa laülaain naya.
(Eclesiastés 12:13, 14). Anuu tü paaʼinrajatkat sünainjee tia: Mmoluwaa pia neema chi Maleiwa [shiimainshikai] otta paaʼinra tü nuluwataakalü anain pia. Süka jamüin, shiainjatüin [naaʼinrüin] wanee wayuu tia. 14 Asoukteena nümüin chi Maleiwa [shiimainshikai] na wayuu aainjakana wanee kasa ojuunaa, jaʼitasü anain jee mojuin shia.
Püchajaa süchiki kaaʼürüi suluʼu tü Wiwüliakat
(Eclesiastés 10:1). Maʼaka keejuuin otta poolotuin wanee perfume kojutüshaatasü maʼin sutuma ouktüin jaʼyumülerü saʼaka, müsia neʼe nukuwaʼipa wanee wayuu kekiikai maʼin naainjüle wanee malaa, amojujaasü süpüshuaʼa nukuwaʼipa otta nnojoishi kojutüin sümüin wayuu.
w06-S 1/11 süp. 16 püt. 4
Pütchi anaka maʼin sünainjee tü karalouktakat Eclesiastés
10:1. Eejüinjatü waaʼin wanaa sümaa waashajaain jee sünain tü kasa waaʼinrakat. Jamüshiijaʼa waashichijaale sünainjee wanee kasa, wepeʼrüle jee wamaʼüjiraale wakuwaʼipa, nnojoleena waya kojutüin atumawaa jee mojeerü pütchi wachiki sünainjee tü waainjalakat.
(Eclesiastés 11:1). Püjüta tü pankat sooʼopünaa tü wüinkat, süka jamüin, puusüteerüin sünain mapa sülatapa kojuya kaʼi.
w06-S 1/11 süp. 16 püt. 6
Pütchi anaka maʼin sünainjee tü karalouktakat Eclesiastés
11:1, 2. Wachajaainjatü sukuwaʼipa süpüla wasülajüliinjanain. Sükajee tia, wekirajeena na waneeinnua süpüla nasülajüliinjanain (Lucas 6:38).
Wetsiikulo aashajeʼennajatka
(Eclesiastés 10:12–11:10). Eesü kasa anasü eeka sutuma nünüiki wanee wayuu kekiikai maʼin, akaajasaʼa nünüiki chi wayuu eekai malain, eesü kasa mojusü sutuma. 13 Malaa neʼe tü naashajaakalü achiki otta eesü kasa mojusü sutuma. 14 Wainma nünüiki chi wayuu eekai malain. Nnojotsü nütüjaain aaʼu wanee wayuu tü alateetkat nümüin; otta tü kasa alateetkat nnojoitpa nia, ¿jaraleechi aküjaka tia nümüin? 15 Akulajaasü naaʼin na malashiikana sutuma naʼyataain maʼin, nnojoishi eein wanee atüjaakai saaʼu tü wopu chainjatkat pueulopaʼamüin. 16 ¿Jameerü sukuwaʼipa wanee mma nuluwataale wanee jintüi saaʼu otta nekaale neʼe wattaʼa maalü na laülaakana saaʼu? 17 Anataʼaleesüjaʼa maʼin sukuwaʼipa wanee mma niale aluwataain saaʼu wanee wayuu süchonka wayuu washinnuu, nnojoishii ekaain neʼe na laülaakana saaʼu otta nnojoishii asaain neʼe. 18 Ojutuusü sutujuna nipia wanee wayuu shukulale nia, otta sutuma nüshakatirüin najapü, shottüsü nipia juyapoʼu. 19 Talatüsü naaʼin na aʼyataashiikana neküle eküülü, otta talatüsü naaʼin wanee wayuu nüsüle wiino; akatsaʼa shiain keejialeein maʼin tü nneetkat. 20 Jaʼitaichi chain pia pipialuʼu, nnojo mojuin pünüiki nüchiki chi aluwataashikai, otta chale pia eere pütunküin, nnojo mojuin pünüiki nüchiki wanee wayuu washirü; süka jamüin, süküjüneerüin tü pümakat nutuma wanee wüchii. 11 Püjüta tü pankat sooʼopünaa tü wüinkat, süka jamüin, puusüteerüin sünain mapa sülatapa kojuya kaʼi. 2 Püsülaja pan namüin akaratshishii jee mekiisatshii wayuu, süka jamüin, nnojoluin pütüjaain saaʼu kaseerüin alatüin saaʼu tü mmakat. 3 Piratüle [wüin] tü sirumakat, miyoʼu tü juya aʼitakat saaʼu tü mmakat; otta sujuttüle suuʼulia wanee wunuʼu uuchimüin jee palaamüin, yaleerü shia ojuttüin yalaʼaya. 4 Chi eekai jülüjain naaʼin tü jouktaikat, nnojoleechi apünajüin otta chi eekai nünanajüin sümüin tü sirumakat, nnojoleechi atpajüin. 5 Nnojotsü pütüjaain aaʼu tü kasa naainjakat chi Maleiwa [shiimainshikai], maʼaka nnojoluin pütüjaain saaʼu jamüin sukumajaaya niipüse wanee joʼuu süleʼeruʼu nii. 6 Püpünaja tü püwaüyainkat wattaʼa maalü, waneʼereʼeya peemeraain suulia aliika, süka jamüin, nnojoluin pütüjaain saaʼu jaleerüin süsotüin, yaʼayaa, chayaa jee süsoteerüle piamaleʼeya. 7 Anasü maʼin tü luusakat otta anasü nümüin wanee wayuu niirakaale sümüin wanee kasa sutuma nuwarala chi kaʼikai; 8 niʼrüle kataa oʼuu wanee wayuu soʼu wainma juya, anakajaʼa mata talatüle naaʼin suʼunnaa tia. Soteesü naaʼin wainmeerüin tü kasa mojusü alateetkat nümüin mapeena; süka nnojoluin kasain saamüin süpüshuaʼa tü kasa aainjünakat weinshi. 9 Jimaʼai, talata paaʼin maiwaʼaya pia, paainja tü suchuntakat paaʼin, puʼuna süchiirua tü sümakat paaʼin otta puʼuna süchiirua tü kasa piʼrakat. Akatsaʼa pütüjaweein saaʼu süsaleechin pia tia nutuma chi Maleiwa [shiimainshikai]. 10 Shia anaka aluʼu püsünneʼerüle tü jashieekat püleʼeruʼujee otta nnojo paainjain kasa mojusü mojeetka atuma pukuwaʼipa. Süka jamüin, nnojoluin kasain saamüin tia namüin na jimaʼaliikana.
NOWIENPÜROʼU 28–TISIENPÜROʼU 4
KOROLO KOJUTÜSÜ SULUʼUKA TÜ WIWÜLIAKAT EL CANTAR DE LOS CANTARES 1-8
«Washata sukuwaʼipa tü sulamiitakat»
(Cantar de los Cantares 2:7). Jia süchonniikana Jerusalén, tachuntüin jümüin sooʼopünaa tü uyalakat jee shiale tü iramakat, nnojo jütanalüin taaʼin shiiʼiree müliain taya niiʼiree wanee toolo nnojoikai tacheküin, aluʼujasaʼa müleka suchuntaale nia taaʼin.
(Cantar de los Cantares 3:5). Jia süchonniikana Jerusalén, tachuntüin jümüin sooʼopünaa tü uyalakat jee shiale tü iramakat, nnojo jütanalüin taaʼin shiiʼiree müliain taya niiʼiree wanee toolo nnojoikai tacheküin, aluʼujasaʼa müleka suchuntaale nia taaʼin.
(Cantar de los Cantares 4:12). Tü tamüraajüinkat müsü aka saaʼin wanee yüüja kasepüka jee nnojotsü jaralüin ekeroluin suluʼumüin otta müsü aka saaʼin shikii wüin süttaka.
(Cantar de los Cantares 8:8-10). «Eesü wanee wawala jimoʼolu machirayütka. ¿Kaseerü waaʼinraka suchuntünapa wamüin?». 9 «Müle shia maʼaka saaʼin süsepü pueulo, wakumajeerü wanee süsepü süka pülaata miyoʼuleeka suulia, müle shia maʼaka saaʼin wanee supuettoʼuse pueulo, watürankajaajeerü süka cedro». 10 «Müsü aka taya süsepü pueulo, tü tachirakat müsü aka saaʼin torre. Sutuma tia, niʼrüin taya sümaa jimatüin taaʼin.
Püchajaa süchiki kaaʼürüi suluʼu tü Wiwüliakat
(Cantar de los Cantares 2:1). «Müsü aka taya saaʼin wanee azafrán suluʼuka wanee mma eekai patajatshiin, müsü aka taya saaʼin wanee lirio».
(Cantar de los Cantares 8:6). »Anashi piʼitaale taya suluʼu paaʼin jee maa püshoʼojokoi tayaakua sünain pütüna; süka miyoʼuin maʼin paalii tapüla maʼaka miyoʼuin saaʼu wayuu sütsüin tü ouktaakat, taya neʼe pümaainjachika, maʼaka sümaain wayuu tü Seolkat. Müsü aka saaʼin suchuwala siki, maʼaka saaʼin nuwarala Jah.
w06-S 15/11 süp. 20 püt. 6
Pütchi anaka maaʼin sünainjee tü karalouktakat El Cantar de los Cantares
¿Jamüsü «nuwarala Jah» sümünaka shiimainre alin wapüla wayuu? Shia süka nukumajüin waya Jeʼwaa süpüla alinjatüin wayuu wapüla. Suluʼujee tia, aijiraashi chi toolokoi sümaa tü jietkat süpüla kaʼikat süpüshuaʼa (El Cantar de los Cantares 8:6).
Wetsiikulo aashajeʼennajatka
(El Cantar de los Cantares 2:1-17). »Müsü aka taya saaʼin wanee azafrán suluʼuka wanee mma eekai patajatshiin, müsü aka taya saaʼin wanee lirio». 2 «Maʼaka wanee lirio saʼaka jamücheʼe, müsia neʼe sukuwaʼipa tü müliakat eeʼiree taya saʼaka tü wanee jieyuukalüirua». 3 «Maʼaka naaʼin wanee manzano saʼaka wunuʼulia, müsia neʼe nukuwaʼipa chi wayuu müliakai eeʼiree taya naʼaka na wanee tooloyuukana. Suchuntaain maʼin taaʼin pümaain taya, müsü joyotokoi taaʼin suupünaa neemioushi wanee manzano, otta müsü tekakai saaʼin tü nüchon püsiasükat. 4 Nikerotirüin taya suluʼu piichi eere eein wiino, otta niiʼiyatüin taalin nüpüla 5 Jikira taya torta kaʼakasü pasas, jaapa manzana teküin süka müliain maʼin taya niiʼiree. 6 Naapaain tekii süka tü najapü nipeʼekat otta nujuupatüin taya süka tü najapü nikiakat. 7 Jia süchonniikana Jerusalén, tachuntüin jümüin sooʼopünaa tü uyalakat jee shiale tü iramakat, nnojo jütanalüin taaʼin shiiʼiree müliain taya niiʼiree wanee toolo nnojoikai tacheküin, aluʼujasaʼa müleka suchuntaale nia taaʼin. 8 »¡Taapüin nünüiki chi müliakai eeʼiree taya! Iseeichi ashakajüin sooʼopünaa tü uuchikat. 9 Müshi aka naaʼin wanee uyala otta süchon irama. Iraa süpüchoʼu süsepü tü pueulokot, eirakaashi suluʼupünaa tü wentaanakat otta suluʼupünaa tü reejakat. 10 Anuu nünüiki tamüin chi müliakai teeʼiree: ‹Pütamaa, tamüraajüinchee, jooʼuya tamaaiwa pia. 11 Ajaʼlajaasü sükalia tü juyakat, nnojoluitpa aʼitüin. 12 Kasiisü tü wunuʼuliakalüirua sainküin tü mmakat, antüitpa sükalia süpüla süsholojünüin sütüna tü uuwakat, otta nnojoluitpa aʼyalajüin tü wawaachikat. 13 Akaataajaʼa tü higuerakat aʼwanajaasü sünoʼu süpüla kachoin shia otta kasiisü tü uuwakat, jemetüsü maʼin seejuu. Pütamaa, tamüraajüinchee, jooʼuya tamaaiwa pia. 14 Piakat toomasüchon kepiaka saliruʼupünaa ipa, otta suluʼupünaa tü wopukot eere wunapüshiin, taapeein pünüiki süka anain maʼin pümüraluʼu otta kamalainsü maʼin tamüin teʼrüin pia›.» 15 «Wataʼüla tü walitkalüirua, tü walirü joʼuucheinka ekajakat süchon tü uuwakat, süka kasiin maʼin tü uuwakalüirua». 16 «Taya neʼe aika nüpüla otta nia neʼe aika tapüla. Arüleejüshi nia saʼakapünaa lirio. 17 Püleʼeja süpülapünaa nikerotüin chi kaʼikai otta süpülapünaa piyuushin, piakai müliakai teeʼiree, pünta sooʼopünaa tü uuchikat maʼaka naaʼin wanee uyala jee maʼaka naaʼin süchon wanee irama.