Jesukürisüto, chi Mesías aküjünakai achiki paala

NÜKÜJÜIN Jeʼwaa namüin na nünüikimaajanakana tü naainjainjatkat otta tü alatüinjatkat nümüin chi Mesíaskai, chi Oʼtteʼerüi aküjünakai achiki paala. Wayaawateechi nia sükajee tü aküjünakat nüchiki wanaa sümaa jemein nia, nüküjüin pütchi jee ouktüin nia. Ekeraajüsü nünain Jesukürisüto süpüshuaʼa tü aküjünakat nüchiki. Pansaajeerü shia wamüin wekirajaale sünain tü alatakat nümüin wanaa sümaa jemein otta jintülin nia.

Nüküjüin Isaías, nuuʼuliwoʼujachin David chi Mesíaskai (Isaías 9:7). Müsia shia: nuuʼuliwoʼu David Jesuu (Mateo 1:1, 6-17).

Nüküjüin Miqueas, jemeijachin Jesuu «Belén Efrata» otta aluwataainjachi nia (Miqueas 5:2). Wanaa sümaa jemein Jesuu mmapaʼa, eejatü piamasü mma kanüliasü Belén chaaʼaya Israel. Chajatü wanee palaapünaa süʼütpaʼa Nazaret otta tü wanee chajatü Judá süʼütpaʼa Jerusalén. Tü chajatkat süʼütpaʼa Jerusalén Efrata münapuʼusü shia. Suluʼu tia mmakat jemeishi Jesuu. Ekeraajüsü tü aküjünakat nüchiki paala (Mateo 2:1).

Süküjüin tü Wiwüliakat nuunejüinjachin Maleiwa chi Nüchonkai süpüla nujuʼitüin «Egiptojee». Müsia shia, alüʼüjünüshi chi joʼuukai Egiptomüin. Mapa ouktapa chi aluwataaikai Herodes, aleʼejüshi Jesuu nuumainpaʼamüin. Ekeraajüsü tü aküjünakat paala (Oseas 11:1; Mateo 2:15).

Paashajeʼera tü pütchikat «Tü aküjünakat nüchiki chi Mesíaskai» kanüliaka «aküjünaka», ashajünüsü yala tü aküjünakat nüchiki chi Mesíaskai. Eesü süpüla puʼwanaajireʼerüin shia sümaa tü kanüliakat «shikeraajia». Sutuma tia, punoujeerü anain shiimain tü sümakat tü Wiwüliakat.

Pikirajaapa sünain tia pütchikat, nnojo motuin paaʼin ashajuushin shia wainma juya süpülapünaa jemein Jesuu. Müshi nia: ‹Ekettaajüitpa joo tü ashajünakat tachiki nutuma Moisés, na nünüikimaajanakana Maleiwa jee nutuma David› (Lucas 24:44). Ekeraajüsü süpüshuaʼa tü pütchi aküjünakat paala suluʼu tü Wiwüliakat.