¿Kasa shikirajaka anain waya tü pütchi nümakat Jeʼwaa?

1. ¿Jamüsü choʼujaaka wamüin wekirajünüin?

Kekiishi maʼin woulia Jeʼwaa, chi Kakumalakai waya. Aishii waya nüpüla otta nükaaliinjüin waya. Nnojoishii nukumajüin waya süpüla laülaain waya saaʼu wakuwaʼipa wamüiwaʼa (Jeremías 10:23). Choʼujaasü wamüin wekirajünüin nutuma Maleiwa, maʼaka choʼujaain nikirajünüin wanee jintüi nutuma nüshi jee nii (Isaías 48:17, 18). Nüsülajala wamüin Jeʼwaa tü pütchi sümakat tü Wiwüliakat. Püleeja 2 Timoteo 3:16.

Tü pütchi nuluwataakalü anain waya Jeʼwaa, shikirajüin waya sünain tü akuwaʼipaa anasükat otta sünain tü waaʼinrajatkat süpüla anainjatüin wakuwaʼipa. Wacheküinjatü nikirajüin waya Jeʼwaa süka nukumajalain waya. Püleeja Salmo 19:7, 11 otta Alateetkat Mapeena 4:11.

2. ¿Kasa shikirajaka anain waya tü pütchi nümakat Jeʼwaa?

Süpüshi tia pütchikat, süküjüin wamüin tü nüchekakat Maleiwa wapüleerua. Otta waneeirua süküjaleein wamüin tü waaʼinrajatkat (Deuteronomio 22:8). Wayaawatüinjatü saaʼu wanee pütchi palajana süpüla waaʼinrüin tü sümakat tü Wiwüliakat (Proverbios 2:10-12). Jülüja waaʼin tü pütchi sümakat tü Wiwüliakat süchiki nüsülajalain Maleiwa tü kataakalü oʼuu. Sükaaliinjüin waya pütchikat tüü süpüla waaʼinmajüin wakuwaʼipa wepialuʼu, eere waʼyataain otta wawaraijaale. Püleeja Aluwataaushikana 17:28.

3. ¿Jarat tü piamasükat pütchi alanaʼaleeka maʼin?

Nüküjüin Jesuu süchiki piamasü pütchi. Tü palajatkat, süküjüin wamüin alinjachin wapüla Maleiwa otta waʼyataainjanain waneepia nümüin sükajee nukumajalain waya. Jülüjüinjatü waaʼin tia pütchikat waneekajatpa wanee kasa (Proverbios 3:6). Waaʼinrüle tia, aleeweena waya nümaa Maleiwa, talateena waya otta kateerü woʼu waneepia. Püleeja Mateo 22:36-38.

Tü wanee pütchikat, süküjüin wamüin anajiraainjanain waya namaa na waneeinnua (1 Corinto 13:4-7). Waaʼinrüle tia, washateerü nukuwaʼipa Maleiwa sünain aipüralin nia. Püleeja Mateo 7:12 otta 22:39, 40.

4. ¿Kasa waaʼinraka sutuma tü pütchi nümakat Jeʼwaa?

Aijiraashii otta paaʼinwajiraashii waya sümaa wapüshi sutuma tü pütchi nümakat Jeʼwaa (Colosas 3:12-14). Süpüshi tia pütchikat, anasü waaʼin sutuma otta süküjüin wamüin nnojoluinjatüin wooʼulaain waʼwayuuse. Püleeja Génesis 2:24.

Ousüteena waya sünain aʼyatawaa otta talateerü waaʼin woonoole sümaa tü pütchi nümakat Jeʼwaa. Na achajaanakana süpüla aʼyatawaa, naya na aainjakana tü sümakat tü Wiwüliakat, na lotokana akuwaʼipa otta na tütükana maʼin (Proverbios 10:4, 26; Hebreokana 13:18, TNM). Süküjüin wamüin tü Wiwüliakat talatüinjatüin waaʼin sümaa tü kasa eekat wamaʼana otta palajanainjachin Maleiwa watuma suulia wainmeein kasa wamaʼana. Püleeja Mateo 6:24, 25, 33, TNM otta 1 Timoteo 6:8-10.

Jülüjüle waaʼin tü pütchi sümakat tü Wiwüliakat süchiki tü epeʼruwaakat, nnojoleena waya ayuulin otta eewaain (Proverbios 14:30; 22:24, 25; 23:20). Nnojotsü mojuin nümüin Jeʼwaa süsünüle yootchon wiino (Salmo 104:15; 1 Corinto 6:10). Tü pütchi nümakat Jeʼwaa, sükaaliinjüin waya süpüla jülüjüinjatüin waaʼin tü wakuwaʼipakat otta tü jülüjakat waaʼin (Salmo 119:97-100). Nnojotsü kojutüin neʼe wamüin tü pütchi nümakat Jeʼwaa süka anain wakuwaʼipa sutuma, kojutsü shia wamüin süka niainjachin Jeʼwaa yaletaka watuma. Püleeja Mateo 5:14-16.