Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
Maatsoʼu 6-12
KOROLO KOJUTÜSÜ SULUʼUKA TÜ WIWÜLIAKAT JEREMÍAS 1-4
«Eejeechi taya pümaa süpüla toʼtteʼerajachin pia»
(Jeremías 1:6). Asoukta müshia taya nümüin: «¡Jeʼwaakalee, piakai chi Maleiwa miyoʼushikai! Isaleesia tachiki asoukta shiʼipajee wayuu jee jintüiyüiya maʼin taya».
w11-S 15/3 süp. 29 püt. 4
Ayata eejüin paaʼin maʼaka naaʼinrüin shia Jeremías
4 Eesüjaʼa süpüla 25 nuuyase Jeremías wanaa sümaa nüneekünüin nutuma Jeʼwaa süpüla nünüikimaajachin nia (Jer. 1:1, 2). Mmotshi Jeremías seema asoukta namüin na laülaashiikana saaʼu tü pueulokot süka kojutüin maʼin naya atumawaa otta natüjain maʼin. Maaʼatshi Jeremías maʼaka naaʼin wanee jintüi naashin (Jer. 1:6). Nüküjüinjatü Jeremías süchiki tü kasa nüntirüinjatkat Maleiwa, nüküjüinjatü shia namüin na sacerdootekana, na nünüikimaajanayaakana Maleiwa, namüin na sülaülashiikana mma, otta sümüin süpüshuaʼa tü wayuukalüirua oʼunakat süchiirua tü kasa mojusü keeʼireekat naaʼin (Jer. 6:13; 8:5, 6). Nüküjüinjatü süchiki sajaʼttinnajatüin tü aʼwaajüleekat Maleiwa nukumajitka Salomón, tü aʼwaajünakalü aluʼu Jeʼwaa suʼunnaa 400 juya. Otta müsia Jerusalén sümaʼaleʼeya tü mmakat Judá, yüütaleeinjatü shia jee amaanüinjana wattamüin na wayuu yalajanakana kepiain. ¡Naapiramaatüinjana Jeremías na wayuukana süchiki tia alatajatkat!
(Jeremías 1:7-10). Nusouktaka Jeʼwaa niʼipajee: «‹Jintüiyüiya maʼin taya› nnojo pümüin. Shia anaka aluʼu müleka puʼunüle saʼakamüin tü wayuuirua tajütakalü anainmüin pia. Püküja namüin süchiki tü kasa taküjüinjatkat pümüin. 8 Nnojo mmoluin pia neema, ‹takaaliinjeechin pia noulia›, müshi Jeʼwaa». 9 Niyurulaka Jeʼwaa najapü jee nipettaka taanüküü. Nümakalaka tamüin: «Teʼitaain tanüiki paanüküluʼu. 10 Taluwataain joo pia sünainmüin tü wayuukalüirua otta nanainmüin na sülaülashiikana mma. Püküja namüin, yüütaleeinjanain naya, ajaʼttinnajana napüshuaʼa, püküja namüin eejeenain na aikkaleʼennüinjanakana oumain nachikuaʼa otta püküja eejeerüin pünajüt namüin waneeinnua».
(Jeremías 1:17-19). »Püchecheraa tü piyatapünaajanakat, pütamaa otta püküja namüin süchiki süpüshuaʼa tü kasa taluwataakalü anain pia. Nnojo mmoluin pia neema, nnojoleechika teimmolojuin pia noʼupala. 18 Akaajasaʼa tayakai, taneeküin pia süpüla müinjachin aka saaʼin wanee mma miyoʼukat maʼin süsepü, maʼaka saaʼin wanee suuʼui miichi aainjuushika süka kachueera otta eekai kasepüin cobre suulia sushutünüin aaʼu. Nnojoleechi jamajüin pia natuma na aluwataakana saaʼu Judá, natuma na sülaülashiikana tia mmakat, na sacerdoote chakana otta sutuma tü wattakat saalii wayuu. 19 Wainmeerü wayuu peʼipaaka pümaa, piyamüleerü shia, süka jamüin, ‹eeshi taya pümaa süpüla toʼtteʼerüin pia›, müshi Jeʼwaa».
w05-S 15/12 süp. 23 püt. 18
¿Nia woonooka ama anüiki Maleiwa, nayataapa na wayuukana?
18 «Nnojo mmoluin pia neema, ‹takaaliinjeechin pia noulia›», müshi Jeʼwaa nümüin Jeremías (Jeremías 1:8, TNM). ¿Kasa eeka süpüla naaʼinrüin Jeʼwaa süpüla nükaaliinjain waya müliale waya atumawaa? Eeshijaʼa süpüla nüikkaleʼerüin Jeʼwaa wanee aluwataai eekai müin aka naaʼin Gamaliel suluʼu nnojoluin koʼuin nukuwaʼipa sümüin wayuu jee nüikkalaale wanee aluwataai anamia nüchikumüin wanee eekai mojulaain. Eepajaʼa süpüla nuuʼulaain Jeʼwaa tü kasa müliakalü atuma waya (2 Timoteo 3:12). Müleka wapüleeruaanüle aaʼin sünainjee wanoula, nükaaliinjeena waya Jeʼwaa süpüla wachecherüin waaʼin suʼunnaa tü mülia weʼrakat (1 Corinto 10:13). Jaʼitairü kasain wayuu müliain atuma waya, watüjaa aaʼu aneerüin wakuwaʼipa nutuma Jeʼwaa watta kaʼi. Amüla neʼe peʼipaain na wayuukana sümaa nupueulose Maleiwa niaʼaya neʼe Maleiwa chi peʼipaakai amaa naya.
jr-S süp. 88 püt. 14, 15
«Takatsüinreerü naaʼin chi eekai mapüsain»
¿WAKATSÜINREETCHE NAAʼIN CHI EEKAI MAPÜSAIN?
14 Anasü jülüjale waaʼin jaralin akatsüinrüin naaʼin Jeremías otta tü naaʼinrakat mapa süpüla nükatsüinrüin naaʼin chi eekai müliain (Jer. 31:25). Nia Jeʼwaa chi atütüleʼeraka naaʼin Jeremías. Jamüsüjeʼe waaʼin nümüle Jeʼwaa wamüin: «Akaajasaʼa tayakai, taneeküin pia süpüla müinjachin aka saaʼin wanee mma miyoʼukat maʼin süsepü. [...] Wainmeerü wayuu peʼipaaka pümaa, piyamüleerü shia; süka jamüin, ‹eeshi taya pümaa süpüla toʼtteʼerüin pia›, müshi Jeʼwaa» (Jer. 1:18, 19, TNM). Müshijeseʼe nümüin Jeremías nümüin Jeʼwaa: «Chi tounjulaayakai, chi tawataainjachikai anainmüin suʼunnaa müliaa» (Jer. 16:19, TNM).
15 Anasü maʼin tü nümakat Jeʼwaa nümüin Jeremías: «Eeshi taya pümaa». Anasü pütchikat tüü süpüla watütüleʼerüin naaʼin wanee wayuu eekai weʼraajüin. Nnojotsü jülüjainjatüin neʼe waaʼin choʼujaain watütüleʼerüin naaʼin wanee wawala jee nayale na kasayuukana wanain, shia anaka aluʼu müleka wakaaliinjüle naya otta watütüleʼerüle naaʼin. Anasü waainjüle tü naaʼinrakat Maleiwa nüka Jeremías, yala waya nüʼütpaʼa chi eekai müliain naaʼin. Jülüja waaʼin wanüiki süpüla süntajatüin suluʼumüin naaʼin, nnojotsü choʼujaain wattainjatüin saalii wanüiki süpüla watütüleʼerüin naaʼin chi eekai müliain. Jaʼitairü nnojoluin anashaatain maʼin wanüiki eeshi süpüla watütüleʼerüin naaʼin wanee wawala. Jaʼyale saaʼu wanüiki sünain jülüjain naya waaʼin otta alin naya wapüla aneerü maʼin naaʼin sutuma wanüiki (paashajeʼera Proverbios 25:11).
Püchajaa süchiki kaaʼürüi suluʼu tü Wiwüliakat
(Jeremías 2:13). Piamasü kasa mojusü saaʼinraka tü tapueulosekat: Oʼunüshii naya toulia, tayakai chi eekai atuma kataa oʼu. Jee nakumajüin ishi aainjuushi süka ipa, ishi nnojotka kasain anain apüla, maʼülasü neʼe wüin suluʼu.
(Jeremías 2:18). Aluʼuinjaʼa jooluʼu, ¿kasajatüinjatü pümüin Egipto, püsüinjatka süchikat Sihor? Otta müsia Asiria, ¿kasajatüinjatü pümüin püsüinjatka tü wüin shirokujeejatkat tü süchikat?
w07-S 15/3 süp. 9 püt. 8
Pütchi anaka maʼin sünainjee tü karalouktakat Jeremías
2:13, 18. Piamasü kasa mojusü naaʼinraka na Israeliita mojulaaka: akatalaashi naya nuulia Jeʼwaa, chi kanainjeejachikai tü kataakalü oʼu, jee achajaashi naya süchiki oukta süka paaʼinwaain naya namaa na surulaat chajanaka Egipto otta Asiria. Müsia neʼe wakuwaʼipa maaʼutpünaa, müleka woʼunüle süchiirua tü kasa nekirajaakalü anain na atüjashiikana maʼin otta tü kanüliakat Filosofía jee shiale tü poliitikakat nia wapütaka Jeʼwaa chi kanainjeejachikai tü kataakalü oʼuu otta tü anaakalü akuwaʼipa süpüla woʼunüin süchiirua wanee kasa nnojotka kasain anain apüla.
(Jeremías 4:10). Tamakalaka joo nümüin: «¡Aluʼutaʼaleeshiijaʼa maʼin waya Jeʼwaa, chi Miyoʼushikai saaʼu kasakat süpüshuaʼa! Shiimainshaata pimeejüin pueulokot tüü otta na wayuu chakana Jerusalén saaʼujee müin pünüiki: «Eejeerü jimataa aaʼin, shiakalaka eein neʼe ouktaa.»
w07-S 15/3 süp. 9 püt. 4
Pütchi anaka maʼin sünainjee tü karalouktakat Jeremías
4:10; 15:18. ¿Jamaluʼulu «nimeejüin» Jeʼwaa tü nupueulosekat? Soʼu nükalia Jeremías watta saalii wayuu aküjaka alawaa sümaa nünüikimaajanain naya Maleiwa naashin (Jeremías 5:31; 20:6; 23:16, 17, 25-28, 32). Mayaainjeʼe alawaain tia naküjakalü achiki, nuuʼulaain naya Jeʼwaa.
Wetsiikulo aashajeʼennajatka
(Jeremías 4:1-10) «Anuu nünüiki Jeʼwaa sümüin Israel: Müleka keeʼireere paaʼin piyaawajaain suulia paainjala, eesü süpüla paaʼinrüin shia süpüla püleʼejüin püchikuaʼa tanainmüin. Puuʼulaale suulia tü kasa yarüttüsü paaʼinrakat, nnojoleechi ounjulaakuʼu müin pia. 2 Lotule pünüiki sünain maa: ‹¡Shiimainshaata katüin noʼu Jeʼwaa, lotusü nukuwaʼipa otta naaʼinrüin kasa anasü!›. Shiimain sünain aneerüin nakuwaʼipa na wayuukana nutuma jee talateerüin maʼin naaʼin nünainjee.» 3 Anuu nünüiki Jeʼwaa namüin na wayuu chakana Judá otta Jerusalén: «Jaawaja wanee mma eekai anain süpüla apünajaa, juuʼulaa suulia apünajaa saʼaka jamücheʼe. 4 Jiyoteʼera jüta naashin Jeʼwaa. Maa jiyotookai saaʼin süta tü jaaʼinkat, jia chakana Judá otta na chakana kepiain Jerusalén; jaaʼinra tia suulia taashichijaain jooʼomüin maʼaka suchuwajaain wanee siki iipünaajee, nnojoleerü jaralin ayokojooin shia, süka wattain maʼin saalii tü jümaʼülakat». 5 Jüküja süchiki suluʼupünaa Judá otta suluʼu Jerusalén, jaapira wayuu, jiʼyalajira suʼuwaka paaʼa sainküinpünaa mmakat. Juʼwaata emetuluu, maa jünüiki: «Jooʼuya washutai saaʼu tü pueulokalüirua miyoʼuka maʼin asepü. 6 Jüshawaleʼera wanee wunuʼu shiirakaainjatüin amüin Sión. Jaaʼinra tia süpüla anain jukuwaʼipa, nnojo juuʼulaain suulia». Eejeerü wanee kasa mojusü maʼin tantireetka jünainmüin palaajee, shiimain keemeerüin maʼin tia. 7 Maʼaka naaʼin wanee wasashi eekai nujuʼitüin saʼakajee mojuui, meechia neʼe nia sooʼomüin tü pueulokalüirua, chi yüütaleekai atuma tü mmakat, ojuʼitüitchipa nia sünain ajaʼlajeʼeraa tü puumainkat, mooʼojeechi neʼe pia piirakaapa sümüin. Ajuichijaajeerü tü pupueulosekalüirua, nnojoleerü jaralüin kepiain suluʼu süchikijee. 8 Shia anaka aluʼu müleka jaʼatüle jünain tü kuluulu shiyaawasekat mojuu aaʼin, jüsheʼeta juʼluuwain otta juʼwaata maʼin, süka ayatayüiyain jashichishaatain Jeʼwaa wamüin. 9 Anuu nünüiki Jeʼwaa: «Soʼu kaʼikat tia, ajaʼlajeerü naaʼin chi aluwataaikai jee müshiʼiya na sülaülashiikana tü mmakat otta na sacerdootekana mooʼojeena neʼe. Jee ponoshooteerü naaʼin tia na nünüikimaajanakana Maleiwa.» 10 Tamakalaka joo nümüin: «¡Aluʼutaʼaleeshiijaʼa maʼin waya Jeʼwaa, chi Miyoʼushikai maʼin! Shiimainshaata pimeejüin pueulokot tüü otta na wayuu chakana Jerusalén saaʼujee müin pünüiki: ‹Jimateerü jaaʼin›, shiakalaka eein neʼe ouktaa».
Maatsoʼu 13-19
KOROLO KOJUTÜSÜ SULUʼUKA TÜ WIWÜLIAKAT JEREMÍAS 5-7
«Ooʼulaashii suulia oonowaa sümaa nünüiki Jeʼwaa»
(Jeremías 6:13-15). «Akanajüshii naya nneerü sünainjee naʼluwajüin, naainjain tia chi eekai miyoʼuin nümaa chi eekai joʼuuin, jaʼitakajeʼe chi nünüikimaajachikai Maleiwa nümaa chi sacerdootekai, mojusü tü naaʼinrakat waneʼewai nakua. 14 Otta mayaasü neʼe nanüiki shiiʼiree anain saaʼin tapueulose: ‹¡Eesü jimataa aaʼin! ¡Eesü jimataa aaʼin!›, nnojotpejeʼe eein jimataa aaʼin. 15 ¿Japüishiiche naya sutuma mojuin maʼin tü naaʼinrakat? Palajana, nnojoliireejaʼa japülin naya; otta piama, nnojoishii naya eʼrüin japülii sutuma wayuu. Müshiijeseʼe naʼakeenain naya na ajaʼttinnakana; ashanaweena naya tantapeena süpüla süsalain naya tatuma tü naainjalakat», müsü nünüiki Jeʼwaa.
w88-S 1/4 süp. 11, 12 püt. 7, 8
Aküjüshi Jeremías süchiki tü kasa nüntirüinjatkat Maleiwa
7 Müsü nünüiki Jeʼwaa: «Wainmeerü wayuu peʼipaaka pümaa, piyamüleerü shia» (Jeremías 1:19). ¿Jamüshii peʼipaaka na judíokana otta na sülaülashiikana mma nümaa Jeremías? Aisü namüin tü nüküjakalü achiki Jeremías süka talatüin naya sünain aaʼinraa kasa mojusü otta sünain ashaittaa sünain amojujeʼeraa sukuwaʼipa tü aʼwaajakat Jeʼwaa. Lotusü nünüiki Jeremías namüin wanaa sümaa nümüin: «¡Kaatei! Eʼrüshii naya japülii sutuma tü nünüikikat Jeʼwaa otta mojutsat namüin tü nümakat. Akanajüshii naya nneerü sünainjee naʼluwajüin, naainjain tia chi eekai miyoʼuin nümaa chi eekai joʼuuin, jaʼitakajeʼe chi nünüikimaajachikai Maleiwa nümaa chi sacerdootekai, mojusü tü naaʼinrakat waneʼewai nakua, [nayainjanapejeʼe asouktüin saaʼu nakuwaʼipa otta nanoula na wayuukana]» (Jeremías 6:10, 13, TNM).
8 Naya wayuukana palajanashii sünain asülajaa kasa nümüin Maleiwa. Naainjayaain tü kasa nuluwataakalü anain Jeʼwaa, nnojotpajaʼa naaʼinrüin shia süka süpüshuaʼa naaʼin. Shia kojutüleeka namüin naaʼinrüin tü nekirajapuʼukalü anain naya na natuushinuukana, nnojotpajaʼa shiain naaʼinrüin tü kasa lotokat noʼuluʼu Jeʼwaa. Shiiʼiree natalateʼerüinjatüin saaʼin tü wayuukalüirua makuʼu müshii naya süpaʼa mma: «¡Eesü jimata aaʼin! ¡Eesü jimata aaʼin!». Eetaayaai eein jimata aaʼin, nanüiki neʼe tia (Jeremías 6:14, TNM; Jeremías 8:11). Nemeejüin neʼe naaʼin na wayuukana süpüla nanoujain sünain anain nakuwaʼipa noʼuluʼu Maleiwa. Nnojoliinjana naya jamajüin naaʼinruʼu süka nayain nupueulose Jeʼwaa naashin otta suluʼujana naya wanee mma wulesü otta eejatü suluʼu tü aʼwaajüleekat Jeʼwaa. ¿Naatapajaʼa maʼin tü kasa niʼrakat Jeʼwaa?
(Jeremías 7:1-7). Anuu nünüiki Jeʼwaa, tü nüküjakat nümüin Jeremías: 2 «Püshaʼwalaa soʼuluʼu nipia Jeʼwaa, otta anuu tü pütchi pujuʼitirüinjatkat chayaa: ‹Jaapaja nünüiki Jeʼwaa, jüpüshuaʼa jiakana kepiakana Judá, jia ekerotokana süpüla jüsapainkain jia nümülatuʼu Jeʼwaa. 3 Anuu nünüiki Jeʼwaa, chi wainmakai asurulaatse, chi Sümaleiwasekai Israel: «Juloʼireʼera jukuwaʼipa otta jaaʼinra kasa anasü, ayateenaka jia tatuma suluʼu mmakat tüü. 4 Nnojo junoujain sünain wanee alawaa, sünain pütchi makalü mayaa: ‹!Tü aʼwaajüleekat Jeʼwaa, tü aʼwaajüleekat Jeʼwaa, tü aʼwaajüleekat Jeʼwaa nayaʼala neʼe nayakana!›. 5 Jamüshiijaʼa müleka juloʼireʼerüle jukuwaʼipa otta jaaʼinrüle kasa anasü, jee müleka lotule sukuwaʼipa wanee mojujirawaa jutuma otta anajiraale wanee wayuu nümaa chi naʼaleewainkai jutuma, 6 müleka nnojoire müliain jutuma wanee wayuu eekai suluʼujeejachin wanee mma naata jee niale wanee eekai mooʼutshin otta wanee wayuu oukta aʼwayuuse, nnojorüle amülain jutuma süsha wayuu maainjalasat yaa, nnojorüle juʼwaajüin wanee maleiwayaasü suulia püchajaain müliaa pooʼomüin, 7 aluʼuinjaʼa tayakai, taapeerü jümüin tü mma taapakat namüin na jutuushinuukana süpüla kepiain jia suluʼu süpüla kaʼikat süpüshuaʼa»›».
(Jeremías 7:8-15). «Kaatei, shia junoujakalü anain wanee alawaa... nnojoleerü kasain saamüin jümüin tia. 9 ¿Eesüche süpüla nuʼluwajüin wanee wayuu, nuʼutüin saaʼin wayuu, nümaʼüjiraain nukuwaʼipa, amülain naapüin nünüiki sümüin wayuu, nuʼwaajüin Baal otta nuʼwaajüin waneeirua maleiwayaasü, tü maleiwayaasü nnojotkat jiʼraajüin paala, 10 eeshiijaʼa süpüla jüntüin tamülatuʼu sümaa yaain jia suluʼu tü piichi tanülialuʼukat joo atumawaa otta müin jünüiki: ‹Shiimain oʼttaajeenain waya› mayaainjeʼe wattain maʼin saalii wamaʼüla? 11 ¿Süpülee kaʼruwarannuu miichikat tüü saaʼin jümüin, tü tanülialuʼukat? Shiaʼaya teʼraka jaaʼinrüin tia», müsü nünüiki Jeʼwaa. 12 «‹Juʼuna jümaala Silómüin, jiʼraiwa tü kasa taaʼinrakat sümüin tü miichi tanülialuʼukat paala süka jouluin maʼin tü kasa mojusü saaʼinrakat tü tapueulosekat Israel. 13 Anuu nünüiki Jeʼwaa: Ayatüshii jia sünain aaʼinraa kasa makat aka saaʼin tüü. Mayaainjeʼe tachiaain jia paala suulia, taküjüin jümüin maalia otta taashajaa amaachii jia, nnojotpajaʼa jaapüin tanüiki, ayatüshii jia teenajüin, nnojoliipejeʼe asouktüin jia tamüin, 14 maʼaka taaʼinrüin shia sümüin Sión, meeria neʼe tatuma miichikat tüü, tanülialuʼuka jutuma otta tü jiʼitaakalü anain jaaʼin, tü taapakat jümüin otta namüin na jutuushinuukana. 15 Tajünajaajeena jia toulia, maʼaka taaʼinrüin naka na juwalayuukana, na nüchonniikana Efraín.›
Püchajaa süchiki kaaʼürüi suluʼu tü Wiwüliakat
(Jeremías 6:16). Anuu nünüiki Jeʼwaa: «Jüshaʼwalaa wopuluʼu, jülüja jaaʼin, jüsakira süchiki tü jukuwaʼipa sümaiwajatkat, eere eein tü wopu anasükat, juʼuna suluʼupünaa tia jiʼraiwa wanee anaa». Ayatapajaʼa naya sünain müin nanüiki: «Nnojoluinjana waya oʼunüin suluʼupünaa».
w05-S 1/11 süp. 23 püt. 11
Waraitta pia nümaa Maleiwa.
11 ¿Shiache oʼunirüin wakuwaʼipa tü nünüikikat Maleiwa? Anasü wayaawatüle saaʼu wakuwaʼipa süpüla wanoukteʼerüin shia, jalouijeerü maʼin wamüin pütchikat tüü: «Anuu nünüiki Jeʼwaa: ‹Jüshaʼwalaa wopuluʼu, jülüja jaaʼin, jüsakira süchiki tü jukuwaʼipa sümaiwajatkat, eere eein tü wopu anasükat, juʼuna suluʼupünaa tia jiʼraiwa wanee anaa›» (Jeremías 6:16, TNM). Müinjatü wakuwaʼipa maʼaka naaʼin wanee wayuu eekai nuʼunüin wattapünaa. Ashaʼwalaashi nia eere süpaajirain tü wopukot asakirüinjachi nia sünain jaralüin tü wopu anaka süpüla noʼunüin aluʼu. Shiaʼaya neʼe tia tü naaʼinrajatka na Israeliita eʼrüijaakana wayumüin nümüin Jeʼwaa. Nachajaainjatü süchiki tü wopu anasükat. Tia wopukot, shia tü noʼunapuʼukalü aluʼu na natuushinuukana. Jaa müshii naya nümüin Jeʼwaa, akanasaʼa nayakana, akayalaashii nuulia Jeʼwaa mayaainjeʼe namüliajüneein nutuma. Ayatapajaʼa naya sünain müin nanüiki: «Nnojoluinjana waya oʼunüin suluʼupünaa». Naata maʼin nakuwaʼipa na wayuu suluʼukana tü nupueulosekat Jeʼwaa maaʼutpünaa yaa.
(Jeremías 6:22, 23). Anuu nünüiki Jeʼwaa: «¡Kaatei! Ashuteerü paaʼu waneeirua pueulo sejetü palaajee, Achijiraajeena watta naalii wayuu suluʼujee wanee mma wattakat maʼin. 23 Eeinjatü jatü namaʼana otta uraichimaainjana naya. Wayuu mojulaashii maʼin naya, mülieerü maʼin wayuu natuma. Aapüneerü tü nanüikikat maʼaka saapünüin shipisana sümüna palaa, amaʼujeena naya. Yapashii naya süpüla tü atkawaakat, süpüla natkaainjanain pümaa piakat süchonkat Sión».
w88-S 1/4 süp. 13 püt. 15
Aküjüshi Jeremías süchiki tü kasa nüntirüinjatkat Maleiwa
Süsalashii naya naainjala
15 Soʼutpünaa tü juyakat 632 Sü. W. Ashutuna aaʼu Asiria natuma na caldeokana otta na medokana, jee müsia Egipto nnojoluitpain miyoʼu maʼin, chajatü shia uuchijeeruʼu sünain Judá. Nayakaʼa eein süpüla nashutüin saaʼu Judá na palaajeeruʼukana sünain. Makalaka naapirüin Jeremías na judíokana süchiki tü kasa mojusü alatajatkat. Müsü nünüiki: «¡Kaatei! Ashuteerü paaʼu waneeirua pueulo sejetü palaajee [...] Wayuu mojulaashii maʼin naya, mülieerü maʼin wayuu natuma. [...] Yapashii naya süpüla tü atkawaakat, süpüla natkaainjanain pümaa piakat süchonkat Sión». Tü pueulo alanaʼaleeka maʼin soʼu tia shia Babilonia, nüneeküin Jeʼwaa shia süpüla süsalain naainjala na Judíokana nutuma süka manoulain naya nünain (Jeremías 6:22, 23, TNM; 25:8, 9).
Wetsiikulo aashajeʼennajatka
(Jeremías 5:26–6:5)»› Watta saalii wayuu mojulaasü suluʼu tü tapueulosekat. Ayatüshii naya ananajüin maʼaka naaʼin wanee wayuu wüchiipüʼü eekai nünanajüin tü wüchiikalüirua, neʼitaain wanee emeejia keemasü maʼin. Wayuu na nataʼülakana. 27 Emeejaa neʼe eekat nepialuʼu maʼaka wotuin wüchii wanee shipia wüchii. Müshiijeseʼe neʼnnaajünüin otta washinnuuin maʼin naya. 28 Akaüsülaashii maʼin, chinatashaatasü nata. Watta maʼin saalii tü kasa mojusü naaʼinrakat. Nnojoishii asouktüin saaʼu wayuu. Jaʼitaichi niain wanee wayuu eekai ouktüin nüshi jee nnojoishii nakaaliinjain na wayuu maʼletsekana›». 29 Anuu nünüiki Jeʼwaa: «¿Tayakai jamüin masakirüinjachin sünain tü jaainjalakat? ¿Nnojoluinjanache jia süsalain jaainjala tatuma saaʼujee müin jukuwaʼipa? 30 Mooʼosü maʼin wayuu otta watta saalii kasa mojusü aainjünaka suluʼu mmakat tüü: 31 Na nünüikimaajanakana Maleiwa, ekirajüshii neʼe alawaa jee mojusü nakuwaʼipa na sacerdootekana. Anasü joo tia sümüin tü tapueulosekat. ¿Kaseetka joo jaaʼinrüin soʼu tü kaʼi sajaʼlajaainjatkat oʼu kasa süpüshuaʼa?»
6 Jia nüchonniikana Benjamín, jükatalaa suulia Jerusalén; jiʼyalajira tü suʼwakat paaʼa chaa Teqoa. Jiʼitaa wanee siki chaa Bet-hakerem shiyaawaseinjatka jümüin sülüʼülüin wanee müliaa palaajeechika, wanee müliaa keemasü maʼin. 2 Tü süchonkat Sión müsü aka saaʼin wanee jierü anasüchonka maʼin otta alaayaachonka aaʼin. 3 Antüshii na arüleejüliikana sümaa naʼanneetse sooʼomüin. Kepiayaashii sooʼomüin sümaa noutkalüin shia. Nekajeʼerüin naʼanneetse waneʼewai nakua. 4 Anashiisü namüin natkaain sümaa: «¡Jooʼuya washutaiwa kaleʼu sooʼomüin!». «¡Aluʼutaʼaleeshiijaʼa waya, anuuka joo aliikain waaʼu, wattairü neemiouse chi kaʼikai!» 5 «Anashii woʼunüle sooʼomüin saʼwai, jee wajaʼlajeʼera tü süsepü miyoʼuyuukat.»
Maatsoʼu 20-26
KOROLO KOJUTÜSÜ SULUʼUKA TÜ WIWÜLIAKAT JEREMÍAS 8-11
«Aneerü nukuwaʼipa wanee wayuu shiale naaʼinrüin tü nümakat Jeʼwaa»
(Jeremías 10:2-5). Anuu nünüiki Jeʼwaa: «Nnojo jüshatüin sukuwaʼipa tü wanee pueulokalüirua, otta nnojo mmoluin jia seema wanee kasa jiʼraka sirumatuʼu, süka mmoluin tü pueulokalüirua seema tia. 3 Motsoʼopünaa neʼe sümaa tü kasa saaʼinrakat tü pueulokalüirua, müsü aka saaʼin wunuʼu ashottünaka wünaʼapü, maʼaka saaʼin wunuʼu ashottünaka süka podón. 4 Eʼitaanüsü pülaata sümaa ooro sünain süpüla anachoin shia. Kajapuluʼujiasü külaawa achituushi süka mattiia suulia yuunatüin shia. 5 Müshii aka saaʼin aʼatajia wüchii suulia tü pepinoʼuliakat jee isasü nachiki aashajawaa. Alüʼüjünüshii naya süka isain nachiki waraittaa. Nnojo mmoluin jia neema, süka nnojoleenain jamajüin jia natuma jee nnojoishii naya aaʼinrüin kasa eekai anain».
(Jeremías 10:14, 15). Mekiisalii neʼe na wayuukana müshiijeseʼe nnojoluin kasain natüjaain aaʼu. Japüijeechi wanee aʼyataai süka ooro otta pülaata saaʼujee shiyaakua wanee maleiwa, süka alawaain neʼe tia otta nnojotsü katüin soʼu. 15 Amüla neʼe tia, eʼrüsü japülii wayuu sutuma. Nnojorülaʼa meerü jülüjale shia saaʼin wayuu.
it-2-S süp. 633
Pepino
Ashawaleʼennapuʼusü waneeirua kasa pasanain sünain tü aʼttieekat süpüla shiimolojünüin wanee wüchii eekai sürütkaain. Shia naashajaaka achiki tia Jeremías wanaa sümaa nümüin wanaawain sukuwaʼipa shiyaakua tü maleiwayaasükat sümaa tü aʼatajiakat «wüchii suulia tü pepinoʼuliakat» (Jer 10:5, TNM).
(Jeremías 10:6, 7). Nnojoireejaʼa süpüla eein wanee eekai müin aka paaʼin piakai Jeʼwaa. Miyoʼu maʼin pia otta pülashaatasü maʼin tü pünüliakat. 7 ¿Jaraikai maʼin chi nnojoluinjachikai mmoluin peema, piakai chi Aluwataashikai saaʼu mmakat süpüshuaʼa?, süka shiimain müin pukuwaʼipa; nnojoishi eein wanee eekai müin aka paaʼin naʼakajee na kekiishiikana otta naʼakajee na sülaülashiikana mma.
(Jeremías 10:10-13). Shiimainshaata Maleiwain Jeʼwaa. Nia chi Maleiwa katakai oʼu jee nia chi Aluwataakai süpüla kaʼi süpüshuaʼa. Ayuunalaajeerü tü mmakat sutuma jashichin nia, otta nnojoleerü wanee pueulo eekai eejiraain sümaa tü nüküjüinjatkat. 11 Müinjatü jünüiki namüin: «Na maleiwa nnojoliikana kakumalain tü sirumatuʼukat otta tü mmakat nayeena ajaʼttinnaka saaʼujee tü mmakat otta wünaapünaajee sünain tü sirumakat». 12 Nia Kakumalaka tü mmakat süka tü nüpülainkat, Nia eʼitaaka tü mmakat süpüla yotuin kasa saaʼu sutumajee kekiin nia, nia eʼitaaka tü sirumatuʼukat saaʼujee nütüjain maʼin. 13 Aʼitüsü tü juyakat sirumatuʼujee sutuma nünüiki otta poolotüsü tü wüinkat mmoluʼujee nutuma. Nukumajüin süpüna sainya tü juyakat otta nuwateʼerüin tü jouktaikat.
w04-S 1/10 süp. 11 püt. 10
¿Jaralii na aʼwaajakana Maleiwa maaʼulu yaa?
10 Jaʼyasü maʼin saaʼu eein chi kakumalakai kasa süpüshuaʼa, wayaawata aaʼu tia weirakaale sümüin tü jolotsükalüirua jee shiale sümüin wanee kasa yaa Mmapaʼa (Jeremías 10:12). Wanaawainjatü waaʼin namaa na aapiee makana anüiki: «Maleiwakalee, waʼwaajüin pia süka piainjaʼa neʼe piakai aluwataain waaʼu. Alanaʼaleeshia maʼi pia sünain anain je sünain pülashin, süka piainjaʼa kakumalain kasakat süpüshua suluʼu tü püchekakat paaʼinyaka» (Alateetkat Mapeena 4:11). Mayaapejeʼe müin tia mayaa, wainma científico nnojoliika ayaawatüin saaʼu tia, jaʼitairü kamalain namüin anain maʼin sukumajia tü kasa neʼrakat (Éfeso 1:18). Süpüla wayaawatüin saaʼu tia, jülüjataa waaʼin wanee wayuu kamalainka amüin wanee cuadro epintajuushi, nnojotpejeʼe jaralüin epintajüin shia naashin. Akaataajaʼa neʼe na cientiificokana, nnojotsü jaralin kakumalain tü kasakalüirua müshii sümaa kamalain namüin sukumajia. ¡Sükajee tia, ‹nnojoishi eein chi Maleiwakai›, nnojotsü süpüla sümüinjatüin wayuu!
(Jeremías 10:21-23). Müshii saaʼin wayuu matüjainsalii na arüleejüliikana, nnojoishi nachajaain achiki Jeʼwaa. Müshiijeseʼe nnojoluin kekiin naya, jee walakatüsü neʼe süpüshuaʼa tü naʼanneetsekat». 22 ¡Kaatei! ¡Iseeirü sünülia wanee pütchi! Anuu alüʼülüin suuʼuisana wanee kasa palaajeechika, süpüla yüütaleein tü pueulo chakat Judá, shipieerü neʼe erü simoluuna. 23 Tatüjaa aaʼu Jeʼwaa nnojolin laülaain wanee wayuu saaʼu nukuwaʼipa nümüiwaʼa. Isasü nüchiki wanee wayuu nuʼunirüin nukuwaʼipa.
Püchajaa süchiki kaaʼürüi suluʼu tü Wiwüliakat
(Jeremías 9:24). «Chi eekai nuʼwaataain suluʼu nukuwaʼipa, anashi nuʼwaataale suluʼu müin nukuwaʼipa mayaa: kekiin nia, nütüjaain saaʼu tayain Jeʼwaain, chi aipüraikai maʼin wayuu, chi lotokai atuma wanee kasa saaʼu tü mmakat; shia kamalainka tamüin tia», müsü nünüiki Jeʼwaa.
(Jeremías 11:10). Oʼunüshii neʼe süchiirua tü kasa mojusü naaʼinrakat na natuushinuukana. Nayouktüin tü taluwataakalü anain naya. Oʼttüshii sünain aʼwaajaa maleiwayaasü. Shiaʼaya naaʼinraka tia na wayuu chajanakana Israel otta na chajanakana Judá, nnojoishii naya oonooin sümaa tü pütchi pansaatüjütkalia tatuma namaa na natuushinuukana.
w07-S 15/3 süp. 9 püt. 2
Pütchi anaka maʼin sünainjee tü karalouktakat Jeremías
3:11-22; 11:10-12, 17. ¿Jamüsü nüshajaka Jeremías süchiki tü poloosükat eʼirukuu sümaa sajaʼttinnüin paala Samaria soʼu juyaka 740 süpülapünaa wakalia? Ajaʼttinnüsü Jerusalén soʼu tü juyakat 607 süpülapünaa wakalia. Tia naaʼinrakat Jeʼwaa süka Jerusalén, nnojotsü sümüinjatüin neʼe Judá sümüiwaʼa, sümüinjatü shia süpüshuaʼa Israel (Ezequiel 9:9, 10). Tü kasa nanainpünaakat na israeliitakana sünainpünaasü shia Jerusalén, mayaapejeʼe najaʼttinnüin paala. Jaʼyasü tia sünain tü namakat na nünüikimaajanakana Maleiwa.
Wetsiikulo aashajeʼennajatka
(Jeremías 11:6-16). Nümaka joo Jeʼwaa tamüin: «Püküja pütchikat tüü chaa Judá otta Jerusalén, meechi pia: ‹Jaapaja jümaala tü pütchi tapansaajakat jümüin otta joonoo sümaa. 7 Tachiaain na jutuushinuukana süka anakalü akuwaʼipa soʼu tü kaʼi tojuʼitirakat oʼu naya Egiptojee sünainmüinreʼeya kaʼikat tüü, amaaliajüshi taya sünain achiajawaa, müshi taya jümüin: «Joonoo jümaala sümaa tanüiki». 8 Nnojoliipejeʼe oonooin naya sümaa tanüiki, ayatüshii eʼrüliin naya wayumüin tamüin; süka nnojoluin noonooin sümaa tü pütchi tapansaajakat namüin, kasalajanasü tatuma namüin›». 9 Anuu sooʼomüin nünüiki Jeʼwaa tamüin: «Nnojotsü lotuin nakuwaʼipa na wayuu chajanakana Judá otta Jerusalén. 10 Ouyantaashii neʼe nachikuaʼa sünain aaʼinraa tü kasa mojusü naaʼinrapuʼukat na natuushinuukana, na ayouktakana tanüiki, oʼttüshii neʼe naya sünain aʼwaajaa maleiwayaasü. Na kepiakana chaa Israel otta chaa Judá, nnojotsü nekeraajüin tü pütchi tapansaajakat namaa na natuushinuukana. 11 Anuu joo nünüiki Jeʼwaa namüin: ‹Tantirüinjatü joo nanainmüin wanee müliaa, nnojoleena isain naya suulia; shiimainshaata nachunteenain kaaliinwaa tamüin, nnojoleenapejeʼe tamülialüin naya. 12 Na chakana Judá otta Jerusalén, achunteena maʼin naya kaaliinwaa sümüin tü maleiwayaasü naʼwaajaakat, nnojoleenapejeʼe naya noʼtteʼerüin suulia tü müliaa anteetkat nanainmüin. 13 Watta maʼin saalii tü pümaleiwasekalüirua maʼaka saaʼin wattain saalii tü pueulokalüirua chaa Judá; wainma maʼin tü aʼajüleekat sümaa tü aʼwaajüleekat Baal suulialeʼeya tü kaaye suluʼukat Jerusalén›. 14 » Tamüshi paala pia, nnojo puʼuraajüin süpüleerua pueulokot tüü, nnojo puchuntüin maʼin napüleerua, süka jamüin, nnojoleerü taapajüin nanüiki nachuntapa kaaliinwaa tamüin saaʼu tü müliaa neʼreetkat. 15 » ¿Kasapülajatü chaka tepialuʼu tü aikat tapüla süchikijee saainjain kasa mojusü? Amüla neʼe tü asalaa jaʼajakat tamüin, nnojoleena toʼtteʼerüin jia suulia tü müliaa jiʼreetkat. ¿Talateetche pia piʼrapa tia? 16 Anuu pünülia nutuma Jeʼwaa: ‹Tü suuʼulia Olivo miyoʼukat, anaka maʼin achon otta wüittaka maʼin›. Süka nülonojooin, nuchuwajeʼerüin siki sooʼomüin, otta yütsü tü sütünacheinkat nutuma.
Maatsoʼu 27–Aaʼuriiroʼu 2
KOROLO KOJUTÜSÜ SULUʼUKA TÜ WIWÜLIAKAT JEREMÍAS 12-16
«Motushi Jeʼwaa naaʼin na israeliitakana»
(Jeremías 13:1-5). Anuu tü pütchi nümakat Jeʼwaa tamüin: «Puʼuna maa, püchajaa wanee shiʼipa kuluulu liino pijittaa shia pünain piyatapünaa, nnojoluinjatü piʼitaain shia shiroku wüin». 2 Tachajaaka süchiki maʼaka nüküjüin shia Jeʼwaa tamüin, tejittaaka shia tayatapünaa. 3 Nümakalaka joo tamüin Jeʼwaa nüchikuaʼa: 4 «Paapaa türa shiʼipakat kuluulu puusütaka anain, türa pijittaakat pünain piyatapünaa, püshaʼwalaa maa puʼunaiwa Éufratesmüin, puunjüleetka shia saʼatiraluʼu wanee ipa miyoʼu». 5 Toʼunakalaka joo, tounjütka shia pejesü sünain Éufrates maʼaka nüküjüin shia Jeʼwaa tamüin.
jr-S süp. 51 püt. 17
Eeja waaʼin suulia shimeejüin waya tü waaʼinkat
17 Oonooinjachi Jeremías sümaa nünüiki Maleiwa süpüla anain sukuwaʼipa nutuma tü aluwataanakalü anain nia. ¿Oonooshiijeʼe waya, wayale aluwataanüin? Aluwataanüshi Jeremías nutuma Jeʼwaa süpüla nüchajaain kuluulu aainjuushi süka liino jee naʼatüinjatü shia niyatapünaa. Nüjütaka nia eemüin tü süchikat Éufrates. Wanaʼrüle wanee maapa, watüjaweerü aaʼu eein maʼaka 500 kiloometüro oʼunüshi. Chapa nia chayaa, nuunjuluinjatü saliruʼu wanee ipa jee aleʼejüinjachi nia Jerusalenmüin süchikijee tia. Nüjütaka Jeʼwaa nia nüchikuaʼa sünain asaajaa tü kuluutkat (paashajeʼera Jeremías 13:1-9). Eesü maʼaka 2.000 kiloometüro nuʼunaka aluʼu. Ponusü naaʼin waneeinnua wayuu wattakuwalin Jeremías otta waraittüin nia soʼu jeʼra kaʼi (Esd. 7:9). Tia shia tü naaʼinrakat Jeremías süka nuluwataain nia Maleiwa sünain.
(Jeremías 13:6, 7). Shiasaʼa sülatapa kojuya kaʼi, nümaka joo Jeʼwaa tamüin: «Pütamaa puʼuna eemüin tü süchikat Éufrates, püsaaja tü kuluulu puunjutkat tamüin chayaa». 7 Toʼunakalaka joo eemüin tü süchikat Éufrates, tapotoko süchiirua tü kuluutkat. Ittaka shia tapüla.
jr-S süp. 52 püt. 18
Eeja waaʼin suulia shimeejüin waya tü waaʼinkat
18 Jülüjataa waaʼin waraittüin Jeremías sooʼopünaa tü uuchi chakat Judá süpüla chainjachin nia Éufrates jee waraittüshi nia isashiipaʼa. ¡Naaʼinrüin tia shiiʼiree nuunjulüin wanee kuluulu aainjuushi süka liino! Nasukajaain eera nia na kepiakana nüʼütpünaa. Nnojotsü tü kuluutkat niyatapünaa nüleʼejapa. Nüjütaka nia Maleiwa nüchikuaʼa sünain asaajaa tü kuluutkat, ittaka shia nüpüla, nnojoluitpa kasain anain apüla. Eeshiijaʼa süpüla wamüin amülain neʼe nukua sünain asaajaa tia kuluutkat. Nnojotpejeʼe müin nünüiki Jeremías süka nuuʼulaain nuʼunirüin nukuwaʼipa Jeʼwaa. Jaa müshi nia sümaa nnojoluin niyounnalaain.
(Jeremías 13:8-11). Nümakalaka Jeʼwaa tamüin: 9 «Anuu joo nünüiki Jeʼwaa: ‹Meeria nakuwaʼipa tatuma na chakana Judá otta Jerusalén saaʼu yaletüin naaʼin. 10 Wayuukana naainnua, mojulaashii naya, nayouktüin noonooin sümaa tanüiki, eʼrülii naya wayumüin, naʼwaajüin tü maleiwayaasükalüirua sümaa nasapainkain naya sümülatuʼu. Meeria nakuwaʼipa naya wayuukana maʼaka saaʼin tü alatakat sümüin tü kuluutkat, nnojorüleesia kasain anain apüla›. 11 ‹Maʼaka nijittaain niyatapünaajatü wanee wayuu, majatia nakuwaʼipa tatuma na chakana Israel otta Judá süpüla tapueuloseinjanain naya, süpüla neʼraajirüinjachin taya jee süpüla naʼwaajüinjachin taya otta anain maʼin nakuwaʼipa toʼuluʼu, nayouktapejeʼe noonooin sümaa tanüiki.›
jr-S süp. 52 püt. 19, 20
Eeja waaʼin suulia shimeejüin waya tü waaʼinkat
19 Nüküjüin Jeʼwaa nümüin Jeremías nüleʼejapa, kasain kayaawasein tü kuluulu nuluwataakalü anain nia: «Wayuukana naainnua, mojulaashii naya, nayouktüin noonooin sümaa tanüiki, eʼrülii naya wayumüin, naʼwaajüin tü maleiwayaasükalüirua sümaa nasapainkain naya sümülatuʼu. Meeria nakuwaʼipa naya wayuukana maʼaka saaʼin tü alatakat sümüin tü kuluutkat, nnojorüleesia kasain anain apüla» (Jer. 13:10, TNM). ¡Anasü maʼin nikirajia Jeʼwaa! Anasü maʼin tü naainjakat Jeremías, oonooshi nia sümaa nünüiki Jeʼwaa, nayaawataka maʼin saaʼu na wayuukana tü nüküjeekalü achiki Jeʼwaa (Jer. 13:11).
20 Wayakana anoujashiikana maaʼulu, nnojoishii waya waraittüinjanain wattamüin süpüla waküjüin sümüin wayuu nünüiki Jeʼwaa. Eesü kanainre naaʼin wakuwaʼipa na weʼraajüinkana jee na kepiakana waʼütpaʼa otta eesü mojule nanüiki wachiki. Eesü mojushiire namüin sukuwaʼipa waʼanaaya, tü koleejiakalü anain waya, tü waʼyataakalü anain jee shiale sutuma mojushiin wamüin tü epeʼruwaakat. ¿Waainjeetche tü nümakat Jeʼwaa maʼaka naaʼin Jeremías? Aneerü pütchi nüchiki Jeʼwaa wooʼulaale niain oʼunirüin wakuwaʼipa. Aneerü wakuwaʼipa waneepia woonoole sümaa nünüiki Jeʼwaa, tü suluʼukat tü Wiwüliakat otta wooʼulaale nuʼunirüin wakuwaʼipa nükajee chi achepchiee oonookai jee kekiikai maʼin. Eeja waaʼin suulia shimeejüin waya tü waaʼinkat jee washata nukuwaʼipa Jeremías. Wooʼulaa nuʼunirai wakuwaʼipa Jeʼwaa; weʼitaa wakuwaʼipa najapuluʼu süpüla waʼyataain waneepia nümüin.
it-1-S süp. 386 püt. 2
Aseʼeruʼu
Naashin Jeʼwaa, na wayuu chajanakana Israel otta Judá, müshii aka saaʼin wanee kuluulu niʼitaaka niyatapünaa; pejeshii maʼin naya nünain süpüla nüʼwaataain naaʼu jee müshii naya maʼaka saaʼin wanee kasa anachonsü maʼin Nümüin (Jer 13:11). Sünain tü pütchi ekeraajakat nünain Jesukürisüto, müsü pütchi nüchiki: «Meerü aka saaʼin wanee kuluulu niyatapünaa tü lotookalü akuwaʼipaa otta meerü aka saaʼin wanee kuluulu nüseʼeruʼupünaa waneepiain nia sümaa wayuu». Tia shia matüjüin nia ooʼulawaa suulia lotoo akuwaʼipaa otta anasü sukuwaʼipa wanee kasa nutuma waneepia. Tü lotookalü akuwaʼipaa müsü aka saaʼin wanee kuluulu niyatapünaaka Jesuu, nia chi niʼitaakai Jeʼwaa süpüla Süsalain saainjala wayuu nutuma (Isa 11:1, 5, TNM).
Püchajaa süchiki kaaʼürüi suluʼu tü Wiwüliakat
(Jeremías 12:1, 2). Jeʼwaakalee, lotusü pukuwaʼipa waneepia, jaʼitaichi taya aküjüin pümüin süchiki tü kasa teʼrakat, tasakirüin pia sünain jamüinjatüin putuma sukuwaʼipa wanee kasa. ¿Jamüsü anaka maʼin nakuwaʼipa na mojulaashiikana? ¿Jamüshii nnojoliika neʼrüin namüliala na eʼrüliikana wayumüin? 2 Piʼinaajala naya jee awainmalaashii naya. Natüjaa aaʼu eein pia, nnojoipejeʼe suluʼuin pia naaʼin.
(Jeremías 12:14). Anuu nünüiki Jeʼwaa sümüin tü wayuu mojulaasü kepiakat pejepünaa tanain, na epettakana tü apaalaa taapakat sümüin Israel, tü tapueulosekat: «Tojuʼitireena naya suluʼujee tia mmakat otta na chakana Judá meeria neʼe nakuwaʼipa tatuma».
jr-S süp. 118 püt. 11
«¿Jalashi Jeʼwaa? ¿Maʼwaishii waya?»
11 Mojushiisü nümüin Jeremías anain nakuwaʼipa na mojulaashiikana jee nüküjaka shia nümüin Jeʼwaa (paashajeʼera Jeremías 12:1, 3). Nnojotsü mojeein nünüiki Jeremías süchiki tü naaʼinrakat Jeʼwaa, shia nütüjaweeka aaʼu jamüin nünüiki Jeʼwaa süchiki tia. Jayasü naaʼu Jeremías aleewain maʼin nia nümaa Jeʼwaa, müsü aka saaʼin nukuwaʼipa wanee jintüi nümaa nüshi. Shia nnojotka nütüjaain aaʼu jamüin anaka nakuwaʼipa na judíokana. ¿Asouktüshiche Jeʼwaa nümüin? Jamüsaʼa, nüküjüin Jeʼwaa nümüin najaʼttirajanain na mojulaashiikana (Jer. 12:14). Niʼitaakajasaʼa maʼin naaʼin Jeremías sünain lotuin sukuwaʼipa wanee kasa nutuma Jeʼwaa jee nunouktajatüin tü nüsakirakalü anain nia. Sükajee tia, eeshi waneepiale maʼin nia sünain oʼuraajaa nümüin Jeʼwaa, chi Nümaleiwasekai sümaa Nüshin nia.
(Jeremías 15:17). Nnojoishi taya namaataralin na wayuu emeeʼerajaakana maʼin shiiʼiree anain taaʼin namaa. Joyotushi neʼe taya tamüiwaʼa süka piain laülaain taaʼu. Piʼitaain taya süpüla taküjüin namüin süchiki tü kasa mojusü naaʼinrakat.
w04-S 1/5 süp. 11 püt. 16
Yalayala waaʼin maʼaka naaʼin Jeremías
Jülüja waaʼin jaralin waʼaleewajaain amaa
16 Nüküjüin Jeremías wanee kasa yalayalaka atuma naaʼin, müshi nia: «Nnojoishi taya namaataralin na wayuu emeeʼerajaakana maʼin shiiʼiree anain taaʼin namaa. Joyotushi neʼe taya tamüiwaʼa süka piain laülaain taaʼu. Piʼitaain taya süpüla taküjüin namüin süchiki tü kasa mojusü naaʼinrakat» (Jeremías 15:17, TNM). Anashiisü nümüin Jeremías nümüiwaʼain nia, suulialeʼeya mojuin nukuwaʼipa natuma na mojulaashiikana jee wanaawasü tü jülüjakat waaʼin nümaa. Nnojo motuin waaʼin tü naapirakat oulia waya Pablo, «nnojo jaʼaleewajaain sümaa wayuu mojulaasü suulia mojujain jukuwaʼipa», jaʼitainna kakaliainnain waya sünain anain wakuwaʼipa, amojujaweerü mojulaale na waʼaleewainkana (1 Corinto 15:33, TNM).
Wetsiikulo aashajeʼennajatkat
(Jeremías 13:15-27). »Jaapaja tanüiki, nnojo pülayaain jaaʼin, süka niain Jeʼwaa chi aashajaakai jümaa. 16 Juʼwaaja Jeʼwaa chi jümaleiwasekai, süpülapünaa piyuushijaain mmapaʼakat nutuma, jee jüshanaain nipiyuushijapa chi kaʼikai jaaʼu waraittapa jia saaʼupünaa tü uuchikat. Shiimain jaʼatapajeerüin jorottüin tü luusakat jüpüleerua, kojoshaateerü neʼe tü piyuushikat sainküin mmakat nutuma. 17 Müleka nnojorüle joonooin sümaa tanüiki amülialaajeerü taaʼin sutuma pülayaain jaaʼin, aparalaajeerü taʼwuira süka wattakuwalin amaanüin na naʼanneetsekana Jeʼwaa. 18 » püma nümüin chi aluwataakai otta sümüin tü laülaasükat: ‹Jüikkalaa eere süikkalaain wayuu eekai mojutüin atumawaa, asütüneerü juulia tü kotse anakat maʼin saaʼukat jikii›. 19 Asürünnüüsü supuettoʼuse tü pueulokalüirua chaka uuchimüin, nnojoishi jaralin ojutalüin shia. Otta müshiʼiya na wayuu chejeʼewaliikana Judá amaanüshii naya wattamüin. 20 »Piyaleraa pikii, piirakaa namüin na wayuu sejenakana palaajee. ¿Jalasü tü anneerü apütünakat pajapuluʼu, anapüijaka maʼin? 21 ¿Jameetkajasaʼa pünüiki nayapa kasalajanain atuma paainjala na wayuu pikirajakana paala? Aashin aijeerüin maʼin pümüin, maʼaka saaʼin saaliin joʼuu sümüin jieyuu. 22 Pümapa suluʼu paaʼin: ‹¿Jamüsü sülatakat tamüin kasa mojusü?›, süka jouluin maʼin tü kasa mojusü paaʼinrakat aakatünüsü püsheʼin puulia otta müliasüpia atumawaa. 23 »¿Eeshiche süpüla kasuujaain nüta wanee wayuu eekai mütsiain nüta? ¿Eeshiche süpüla suʼwanajaain nünoʼu wanee leopardo? Eesüche süpüla jaaʼinrüin kasa anasü sümaa kiʼrainapain jia sünain aaʼinraa kasa mojusü? 24 Taʼwalakajaajeena jia maʼaka saaʼin sümojula mojuui awataka sutuma jouktai isashiipaʼa. 25 Anuu tü nümakat Jeʼwaa: Shiaʼaya pümüinjatkat tüü, tü taapüinjatkat pümüin, süka motuin taya paaʼin otta shiain piʼitaain anain paaʼin tü alawaakat. 26 Jee müshia tayakai, taakateerü püsheʼin puʼupala otta eʼreerü pia japülii suʼupala wayuu, 27 tatüjaa aaʼu süpüshuaʼa tü kasa mojusü paaʼinrakat maʼaka saaʼin pümaʼüjiraain pukuwaʼipa, otta tü kasa yarüttaka maʼin paaʼinrakat saaʼupünaa uuchikat otta saʼakapünaa mojuui. ¡Aluʼutaleesüjaʼa maʼin pia Jerusalén! ¿Joujaleerü pia ooʼulaain suulia aaʼinraa kasa yarüttüsü?».