ASAKIRAA 3
¿Jamüsüche kapüleeka tamüin yootoo nümaa tashi otta tei?
¿KASAJEʼE PAAʼINRAKA?
Anuu tü alatakat nümüin Guille, 17 nuuyase: kettaapa nutuma nütareease, eemeraashi nia. Nuchuwajaaka telewisootka sümaa nujuleraain saaʼu niinase.
Wanaa sümaa tia, antüshi chi nüshikai sümaa jashichin nia.
«¡Guillermo! ¿Kasa paaʼinraka juʼletaka pia yala? ¿Jamüshi nnojoika pükaaliinjain chi pimüliakai? ¡Matüjainkaiche pia jaa maa!».
«Alesaʼaya papaa», nümaka Guille sümaa peimatüin nia.
Nürütkaaka chi nüshikai nünainmüin sümaa nümüin nümüin: «¿Jamüsün?».
«Nnojotsü jamüin», nümaka Guille mojusheeka.
Jashichishaatashi chi nüshikai sümaa nümüin nümüin. «¡Jamüshikai pia makaʼa pünüiki!».
¿Kasajeʼe paainjaka sülatüle pümüin tia?
JÜLÜJA PAAʼIN TÜÜ
Jamüshijaʼa chupeerüle pia jee süttüle püpüla tü karateetkat, eesüjaʼa süpüla püchajaain sukuwaʼipa süpüla puʼunüin suluʼumüin wanee eekai anain. Müsia neʼe sukuwaʼipa tü paaʼinrajatkat yootule pia nümaa püshi otta püi.
ANUU WANEE SUKUWAʼIPA:
«Kapüleesü tamüin yootoo nümaa chi tashikai. «¿Jamüsün?», eeshi nümüle tamüin yaaulerü süchiki yootuin taya nümaa», müsü Lidia.
APÜNÜINSÜ KASA EEKA SÜPÜLA SAAʼINRÜIN LIDIA
Suʼwoolojooin nümüin chi süshikai.
«¡Jülüja paaʼin tü tamakat!», müsü shia sümaa suʼwoolojooin nümüin.
Nnojoluin süküjüin tü alatakat sümüin.
Nnojotsü süküjüin Lidia nümüin chi süshikai süchiki tü alatakat sümüin.
Yootuin shia nümaa mapa.
Yootusü Lidia nümaa chi süshikai mapa jee shiale süshajüin karaloukta nümüin süchiki jamüin saaʼin sutuma tü alatakat.
¿Kasache anaka süpüla saaʼinrüin Lidia saaʼin pümüin?
JÜLÜJA PAAʼIN TÜÜ: Naata neʼe tü jülüjakat naaʼin chi süshikai Lidia suulia tü sümakat nümüin. Shiale süküjüin Lidia tü ashajünakat suluʼu pütchikat 1 jee suʼwoolojoole nümüin, eesüjaʼa süpüla nuponojooin sümaa sünüiki, nnojoluin kachipünaain naaʼin sünüiki otta nnojolin kojutüin nia sümüin (Éfeso 6:2). Nnojotsü anain suʼwoolojoole nümüin chi süshikai.
Püchajaa sukuwaʼipa süpüla yootuin pia nümaa püshi otta püi, jaʼitairü kapüleein shia pümüin.
Nnojotsü anain tü pütchikat 2 süka nnojoluin süpüla sunoukteʼerüin tü alatakat sümüin. Yootuinjatü Lidia nümaa chi süshikai süpüla nükaaliinjain shia. Nnojotsü anain yüütüle neʼe shia nuulia.
Shiale süküjüin Lidia tü ashajünakat suluʼu pütchika 3, yooteerü shia mapa nümaa chi süshikai süka anaka akuwaʼipa. Eesü aneerüle saaʼin süshajüle karaloukta nümüin süchiki tü alatakat sümüin.
Eesü süpüla pansaain sünüiki Lidia süshajüle suluʼu karaloukta tü alatakat sümüin. Naashajeʼerapa chi süshikai tü süshajakat, niyaawateerü aaʼu tü alatakat sümüin. Anasü süpüla saaʼinrüin Lidia nümaa chi süshikai tü ashajünakat suluʼu pütchi 3. Yootiraale shia nümaa süshi jee süshajüle suluʼu karaloukta tü alatakat sümüin, saaʼinrüin tü sümakat tü Wiwüliakat, tü makat mayaa: «Anakaja wakaaliijiraale suulia aʼülüjaajirawaa» (Roma 14:19).
¿Kasa maa eeka süpüla saaʼinrüin Lidia?
Jülüja paaʼin tü anakat saaʼin pümüin otta tü kasa eejeetkat sünainjee.
PANSAA PÜNÜIKI
Soto paaʼin tüü: Eesü nnojorüle nayaawatüin saaʼu pünüiki püshi otta püi.
ANUU WANEE SUKUWAʼIPA:
Nasakirüle pia püshi otta püi jamüin jashichika pia. «Nnojotsü kasain alatüin tamüin», eeshijaʼa süpüla pümüin namüin.
Shiasaʼa sünainjee tia, meechi pümakai nekiiruʼu: «Nayeena taküjaka amüin taʼaleewainyuu nuulia papaa otta maama tü alatakat tamüin».
Eesü sülatüle pümüin wanee kasa mojusü jee kaalinweere pia nutuma püshi otta püi. «Aneechi taya maaʼaya, tanoukteʼereerü tamüiwaʼa», eeshi pümüle.
¿Jameerü pünüiki saaʼin nümüin püshi otta püi?
¿Kasache tü anakat süpüla püküjüin?