Eʼrüshi wayumüin Adán sümaa Eva

Soʼu wanee kaʼi, wanaa sümaa sümüiwaʼain Eva, müsü wanee wüi sümüin: «Shiimainsaʼaya nümüin Maleiwa jümüin nnojoliinjanain jiküin süchon tü wunuʼuliakat?». Sümaka Eva sümüin: «Nnojo, eesü süpüla weküin süchon tü wunuʼuliakat süpüshuaʼa. Shia neʼe nnojoluinjatkat weküin achon tü wunuʼu yaakat pasanain sünain tü apainkat. Müleka weküle shia, outajana waya». Sümaka tü wüikat: «Nnojoleena jia outuin. Müleka jiküle süchon tü wunuʼukot, meena aka jia Maleiwakai». ¿Shiimainche tü sümakat tü wüikat? Nnojo, alawaa neʼe. Sunouja anainrü Eva tü sümakat tü wüikat. Sünanajaa sümüsü süchon tü wunuʼukot otta jemetüsü maʼin saaʼin sümüin. Shikaka shia otta shikiraka Adán. Niküinña Adán süchon tü wunuʼukat, mayaainjeʼe nütüjaain saaʼu eein süpüla outuin naya sünainjee.

Asakinnüshii mapa Adán sümaa Eva nutuma Jehová. Nüsakirüin naya sünain jamüin neʼraka wayumüin. «Shimeejüin taya tü wüikat», müsü Eva. «Shia katümasitka türa jietkat», müshi Adán. Sutuma nnojoluin noonooin sümaa nünüiki Jehová, nujuʼitirüin naya suluʼujee Edén. Süpüla nnojoliinjanain nekerotuin nachikuaʼa, niʼitaain Jehová piamashii aapiee otta wanee chajaruuta leeyatüsü sümaa chuwatüin maʼin shia.

Naashin Jehová niʼrüinjatü noʼukajatü chi aküjakai alawaa sümüin Eva. Nnojotsü shiain tü wüikat aashajaain sümaa Eva. Nnojotsü nukumajalain Jehová tü wüikat süpüla kanüikinjatüin shia. Kanüikiyaasü shia nutuma wanee aapiee mojulaashi. Naaʼinrüin tia süpüla nimeejüin Eva. Aapieekai chia «Yolujaa jee Satanás» münüshi. Oʼutuneechi aaʼin Satanás nutuma Jehová mapeena. Müichia nnojoluin emeejüin wayuu süka kasa mojusü.