Kachon müshiijaʼa naya

Kakaliairü Sara nuʼwayuusein Abrahán. Napütüin tü nepiakat chaa Ur süpüla kepiayaain naya loona. Nnojotpajaʼa mojuin sümüin Sara tia süka shiʼitaain saaʼin nünain Jehová.

Süka kachonweein maʼin Sara, müsü shia nümüin Abrahán: «Müleka kachonle pümüin tü tachepchiakat Agar, chi süchonkai meechi aka neʼe naaʼin wanee tachon». Kachonka mapa Agar nümüin Abrahán. Ismael nünülia chi süchonkai.

Kakalia süchikijee tia, wanaa sümaa 99 nuuyase Abrahán otta 89 suuyase Sara, antüshii apünüinshii wayuu neʼiyou. «Anashii jeemeraale motsoʼo yaa seemioushi wunuʼukot tüü süpüla jiküinjanain wanee kasa», nümaka Abrahán namüin. ¿Pütüjaa aaʼu jaraliin naya wayuukana? ¡Aapiee naya! «Soʼuweena juyakat tüseena soʼu kashikat tüü, kachonjeerü Sara, tü puʼwayuusekat, wane joʼuu toolo», namakalaka nümüin Abrahán. Saapüinjaʼa Sara nanüiki na aapieekana paülüʼüjee. «Laülaairü taya süpüla kachoinjatüin», sümaka sümaa süsirajüin.

Kachonka Sara waneemüin juya süchikijee tia, ekeraajüsü tü nümakat paala chi aapiee nümaʼanajeejachikai Jehová. Isaac nünülia chi joʼuukai nutuma Abrahán, «asirajaa» maluʼulu tia anülieekat.

Wanaa sümaa jaʼralin nuuyase Isaac, shiʼrüin Sara meeʼerapalain Isaac nutuma Ismael. Süka saaʼinmajeein chi süchonkai, sümaka nümüin Abrahán: «Püjüta woulia tü achepchieekat nümaa chi süchonkai». Nnojotsü naainjeein Abrahán tü sümakat Saara nümüin. Süka naaʼinmajeein Jehová Isaac, nümakalaka nümüin Abrahán: «Paaʼinra tü sümakat Sara pümüin, takaaliinjeechi chi püchonkai Ismael, akatsaʼa na nuuʼuliwoʼukana Isaac, nayeena na puuʼuliwoʼukana maa aka tü taküjakat achiki paala pümüin».