Nüneeküin Moisés niʼyataain nümüin Jehová

Israelita münüshii na nüikeyuukana Jacob chaiwaʼaya naya Egipto. Outapa Jacob nümaa José, aikalaashi sünain aluwatawaa wanee faraón jekechi. Mmotshi faraón süka nawainmalaain na israelitakana noulia na egipciokana. Nüchepchiaka naya. Niʼyateʼerüin maʼin naya otta naainjirüin ladrillo. Mayaapejeʼe müliain maʼin naya natuma na egipciokana, akooʼomüinraashii maʼin naya. Shiasaʼa sutuma mojuin tia nümüin faraón, nuʼutiraka naaʼin na joʼuu tooloyuuchein eekai israelitain, naya kataka oʼu na jieyuucheinkana. Mmotkajasaʼa maʼin na israelitakana ¿aashimüin?

Eejatü wanee israelita Jokébed sünülia, kachonsü shia wanee joʼuu toolochon. Shiʼitaain nia suluʼu wanee kanaasüta jee suunjulaka nia pasanain sünain suuʼulia kainyaruushi, shiroku tü süchikat Nilo. Eejatü wanee nuwala, Míriam sünülia, shiʼraja aaʼuchi nia süpüla sütüjaain saaʼu kaseerüin alatüin nümüin.

Suʼunaka nüchon faraón sünain oʼoojoo shirokumüin tü süchikat, shiʼraka tü kanaasütakat. Yalajachika chi joʼuukai aʼyalajüin süpüla, sümülialaaka saaʼin naalin. «¿Jamüsü saaʼin pümüin tasaajüle wanee wayuu süpüla sutujeʼerüin nia?», sümaka Míriam sümüin. Susoutakalaka nüchon faraón: «Püsaaja maala». Süsaajaka Míriam nii chi joʼuukai. Sümaka nüchon faraón sümüin Jokébed: «Pümaa chi joʼuukai, pipija nia, tawalaajeerü pia».

Miyoʼupa chi joʼuukai, shiʼikajaaka nia Jokébed sümüin nüchon faraón. Moisés nünülia sutuma nüchon faraón, shipijain nia maʼaka naaʼin wanee süchon. Nülüinshi nia chi aluwataashikai, eesü süpüla nümaʼanain kasa eeka eein. Nnojoipejeʼe motuin nia naaʼin Jehová. Nütüjaa aaʼu Moisés israelitain nia, nüneekaka niʼyataainjachin nümüin Jehová.

Wanaa sümaa nükaalinjain Moisés na israelitakana, 40 nuuyase. Soʼu wanee kaʼi, niʼrüin wanee egipcio sünain aʼyaajaa wanee israelita. Nüsheʼetaka Moisés emetutshaata chi egipciokai, outaleeka nia nutuma, nojoitaka nia. Naapapa faraón süchiki tia, nuʼutee aaʼinchi Moisés. Nuʼunaka Moisés eemüin wanee mma Madián münüsü. Naaʼinmajaka nia Jehová chayaa.