Aaʼinmajünüshi Jesús nutuma Jehová

Wüinpüjee sünain tü mmakat Israel, nanouja anainrü na wayuukana suʼunirüin nakuwaʼipa tü jolotsükalüirua. Soʼu wanee ai, eejana waneinnua wayuu suluʼujeejana tia mmakat eʼrakana wanee jolotsü chuwatüsü maʼin sümaa unatüin shia. Oʼunushii naya süchiirua tia jolotsükat. Suʼunirüin naya Jerusalénmüin. Nasakiraka: «¿Jalashi chi joʼuu jemeikai aluwataainjachikai saaʼu tü wayuu judíokalüirua? Weeʼiyateein nujut nümüin».

Herodes chi aluwataaikai saaʼu Jerusalén, naapüin süchiki tü münakat nüchiki Jesús sünain nuluwataainjachin. Shapaasü naaʼin Herodes sutuma tü naapakalü achiki. Nüsakiraka na laülaashiikana napüleerua na sacerdotekana: «¿Jalainjachi jemelin chi aluwataainjachikai?», nümaka. Nasoutaka nümüin: «Naashin na nünüikimaajanakana Maleiwa jemelinjachin nia Belén». Neenajiraka Herodes na wayuu wüinpüjeʼewaliikana. «Juʼuna Belénmüin, jee jüntapa nünain chi joʼuukai jaapireechi taya süpüla toʼunuin nünainmüin süpüla teeʼiyatüin nujut nümüin», nümaka namüin. Alawaapejeʼe neʼe tia nümakat.

Oʼunusü tü jolotsükat napüleerua, nantaka Belénmüin. Süshaʼwalaaka tü jolotsükat sümamüin maʼin tü miichikat, nekerotoko na wayuukana suluʼu tü miichikat, eejana napüla José, María otta Jesús. Nayasaʼa na wayuukana, nasapainkashii süpüla neeʼiyatüin nujutu nümüin otta nasülajüin nümüin ooro, wanee wunuʼu jemeta eejuut jee wanee wunuʼu kanüliasü mirra. ¿Niache Jehová oʼuniraka naya nünainmüin Jesús? Nnojo.

Soʼu aikat tia, aashajaashi Jehová nümaa José nüʼlapüinruʼu. «Herodes chi aluwataaikai nuʼutee aaʼinchi Jesús, puʼuna nümaa chi joʼuukai otta sümaa puʼwayuuse Egiptomüin. Makata jia chayaa waneʼereeya taküjain jümüin nnojoleechin jamajüin chi joʼuukai», nümaka nümüin. Oʼunamaatüshi José sümaa María otta Jesús Egiptomüin.

Nümaka Jehová namüin na wayuu wüinpüjeʼewaliikana nnojoliinjanain naleʼejüin nachikuaʼa nümaʼanamüin Herodes. Naapapa Herodes sünain naleʼejüin naya wayuukana suluʼupünaa wanee wopu naata, jashichishaatashi maʼin nia jee nuʼutirüin naaʼin napüshuaʼa na joʼuuyuu makana aka saaʼin najaʼapüin Jesús chaa Belén. Nnojotpajaʼa kasain alatüin nümüin Jesús süka chajachin nia Egipto.

Outaka Herodes mapa. «Nnojoluichipa chi wayuu oʼuteepuʼukai naaʼin Jesús, eeshii süpüla jüleʼejüin jüchikuaʼa», nümaka Jehová nümüin José. Nuʼunaka José sümaa María otta Jesús Israelmüin jee makataka naya chaa Nazaret.