Tü apünüintuakat nukua Pablo sünain aküjaa pütchi chajatü Jerusalén. Ataʼünüshi nia chayaa. Soʼu wanee ai, wanaa sümaa chajachin nia suluʼu tü kaatsetkat, müshi Jesús nümüin: «Oʼunajachi pia Romamüin püküjaiwa pütchi chayaa». Nuʼuninnaka Pablo Jerusalénjee suluʼumüin tü mmakat Cesarea. Piama juya chajachin püreesain nia atumawaa. Soʼu wanee kaʼi, wanaa sümaa chajachin Pablo eekai chi aluwataaikai Festo, müshi nia nümüin: «Tachuntuin toʼuninnajachin nünainmüin César süpüla niainjachin ekeraajüin takuwaʼipa». «Saaʼu puchuntuitpain niainjachin ekeraajüin pukuwaʼipa César, tajüteechi pia nünainmüin», nümaka Festo nümüin. Nüjütünaka Pablo suluʼu wanee anuwa Romamüin. Oʼunushi nümaa Lucas otta Aristarco.

Pasanainpa naya sünain tü palaakat, antüsü nanainmüin wanee wawai. Alatüsü kojuya kaʼi süpüla shiimalaainjatüin tü wawaikat. Outajanayaa naya naaʼinruʼu. Anuu nünüiki Pablo namüin: «Waʼlemüinñuwaa, eeʼiyataashi wanee aapiee taʼlapüinruʼu sünain maa tamüin: ‹Nnojo mmoluin pia. Antajachi pia Romamüin otta napüshuaʼa na yalakana pümaa suluʼu tü anuwakat, oʼttaajeena naya›. Makalaka nnojoluinjanain mmoluin jia. Nnojoleena outuin waya».

Sülatapa 14 kaʼi eejiraain naya sümaa tü wawaikat, antüshii naya sotpaʼamüin tü palaakat. Tü mma nantakalü aluʼumüin Malta sünülia. Atükaasü tü anuwakat sümaa sujuichijaain. Oʼttaashii napüshuaʼa na 276 wayuu sulujunakana tü anuwakat. Eejana eeka katünain sotpaʼamüin tü palaakat otta na waneinnua, oʼunajüshii süka saʼataʼata tü anuwakat. Akaalinjünüshii naya natuma na wayuu kepiakana suluʼu tü mmakat Malta otta nachuwajaain siki süpüla naatulajüin.

Apünüin kashi süchikijee tia, oʼunushii suluʼu wanee anuwa waneinnua surulaat nümaa Pablo süpüla nantajanain Romamüin. Oʼunushii na anoujashiikana sünain anaʼlawaa nümüin Pablo nüntapa. Niʼrapa naya Pablo, atütülaasü naaʼin sümaa naapüin analuʼut nümüin Maleiwa. Mayaainjeʼe püreesain Pablo, suluʼushi nia wanee miichi anajünaka aaʼu nutuma wanee surulaat. Piama juya chajachin nia. Antawaisü tü wayuukalüirua nünainmüin Pablo otta nüküjawalin sümüin süchiki Nuluwataainjachin Maleiwa sümaa nikirajüin naya nüchiki Jesús. Kojuya karaloʼuta nüshajaka Pablo namüin na anoujashii chajanakana Asia Menor otta Judea. Wayaawata aaʼulu nükaalinjünüin Pablo nutuma Jehová süpüla nüküjain tü pütchi anasükat wattapünaa maʼin.

Wanaa sümaa chajachin püreesain chi aluwataaushikai Juan suluʼu tü mmakat Patmos, niiʼiyatüin Jesús nümüin 16 kasa alatajatka mapeena. Niʼrüin Juan jamüinjatüin sukuwaʼipa süpüla wuleinjatüin atumawaa tü nünüliakat Jehová otta Nuluwataainjachin Maleiwa süpüla saainjünüin tü keeʼireekat naaʼin chaa iipünaa otta yaa mmapaʼa.

Niʼraka joyotuin Jehová sünain aluwatawaa chaa iipünaa. Niʼrüin 24 laülaayuu süʼütpünaa eere joyotuin nia, kasuusü nasheʼin otta eesü wanee kotse ooroleʼeya saaʼu nekii napüshuaʼa. Jee sünainjee tü niinasekat chi Maleiwakai, kayaasü juya sümaa sütüttüin. Nayasaʼa na laülaashiikana nasapainkashii nümülatuʼu Jehová sümaa naʼwaajüin nia. Wanee kasa eeʼiyatünaka nümüin Juan, shia niʼrüin watta saalii wayuu saʼakajee tü eʼirukuukat süpüshuaʼa sümaa naʼwaajüin Jehová. Chi Anneetchonkai, nia Jesús, nia oʼuniraka naya sünainmüin tü wüin katüinjatkalü atuma noʼu. Sünain tü wanee kasa eeʼiyatünakat nümüin Juan, niʼrüin Jesús aikalaain sünain aluwatawaa chaa iipünaa wanaa namaa 24 laülaayuu. Sünain waneʼeya, niʼrüin Juan nütkaain Jesús nümaa chi kayuushikai jee sümaa tü yolujaa nümaajatkalüirua chi Kayuushikai. Chia Kayuushikai nia Satanás. Ayamuluushii naya nutuma Jesús jee nujutuin naya iipünaajee saaʼumüin tü Mmakat.

Niʼraka Juan mapa wanee kasa anashaatasü. Niʼrüin chi anneetchonkai namaa na 144.000 anoujashiikana saaʼu tü uuchikat Sión. Jee eejachi niʼrüin wanee aapiee waawatüin iipünaa sirumatuʼupünaa sünain maa: «Anakajaʼa kojutule jutuma chi Maleiwakai sümaa juʼwaajüin nia».

Niʼraka Juan mapa tü atkawaa kanüliakat Armagedón. Sünain tia atkawaakat, ayamünnüshi Satanás namaa na nuluwataakana aaʼu. Akanajuushii naya nutuma Jesús namaa na surulaat nümaajanakana. Sünain tü chiiruaajatkat kasa niʼraka Juan, niʼrüin talatajiraain otta anajiraain na wayuukana saaʼu tü Mmakat maʼaka eein talataa aaʼin otta anajirawaa chaa sirumatuʼu. Najaʼttirüin Jehová Satanás namaa na nümaajanakana. Kojutusü nünülia Maleiwa natuma napüshuaʼa na wayuukana otta natuma napüshuaʼa na aapiee chakana iipünaa. Nia neʼe Jehová aʼwaajünaka nümüiwaʼa.

Lotusü nünüiki Jehová wanaa sümaa nümüin: «Talaʼajaweerü suʼwüira soʼu wayuu, müiria nnojoluin outaa, mojuu aaʼin, aʼyalajaa, jee saalin ayuulii, süka sülatajatüin süpüshuaʼale makalü aka tia».

Niʼitaain Jehová Adán otta Eva suluʼu tü apainkat Edén süpüla anain nakuwaʼipa otta talatüinjatüin naaʼin. Naʼwaajüinjachi chi Nashikai Jehová otta kachooinjana naya süpüla piratajatüin tü mmakat natuma. Moonooinsalii naya sümaa tü nünüikikat Jehová, ayatapajaʼa naainjeein Jehová tü keeʼireetüjütkalia naaʼin süpüleerua tü wayuukalüirua. Suluʼu karaloʼutakat tüü, wekirajaa anainrü nikeraajüin Jehová waneepia tü nümakat. Eejeerü anaa saaʼu Mmakat süpüshuaʼa sutuma Nuluwataaya Maleiwa, nikeraajeerü mayaa tü pütchi nüpansaajakat nümüin Abrahán.

Alüʼütsü tü kaʼi eere nnojoleechin Satanás, tü Yolujaakalüirua jee tü wayuu mojulaasükalüirua yaa saaʼu tü Mmakat. Nieechi neʼe Jehová suʼwaajaka wayuu süpüshuaʼa. Nnojoleena waya ayuulin jee outuin. Atamaajeena waya sümaa talatüin waaʼin weinshi süka katüin woʼu. Paʼaraiiseerü tü Mmakat otta eejeerü emiraa sümaa aneerüin maʼin wepia. Nnojoleerü wayuu eekai mojulaain otta eekai shiʼrülüin wayumüin, anamieerü wayuu süpüshuaʼa. Maüseerü tü mürüt jashichikat maaʼulu.

Talateerü maʼin waaʼin weʼrapa nüsoʼireʼerüin Jehová naaʼin na outushiikana. Talateena maʼin waya namaa na wayuu makana aka naaʼin Abel, Noé, Abrahán, Sara, Moisés, Rut, Ester otta David. Nakaalinjeena waya süpüla paʼaraiisüinjatüin watuma tü Mmakat. Watteerü saalii kasa anasü eeka süpüla waaʼinrüin.

Niʼreein pia Jehová suluʼu tü Paʼaraiisükat. Watteerü maʼin saalii kasa watüjaajeetka aaʼu nüchiki Jehová. ¡Ayataʼaya warütkaain maʼin nünainmüin Jehová maaʼulu otta waainja shia süpüla kaʼikat süpüshuaʼa!