Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
SETTIENPÜROʼU 2-8
KOROLO KOJUTUSÜ SULUʼUKA TÜ WIWÜLIAKAT | HEBREOKANA 7, 8
«Piainjachi sacerdooteka ‹waneepia süpüla kaʼikat süpüshua maa aka nukuaippa Melquisedec›»
it-2-S 359
Melquisedec
Sülaülashi Melquisedec tü pueulokot Salem otta nia wanee sacerdoote eʼitaaushika nutuma chi Maleiwa Miyoʼushikai maʼin kanüliakai Jeʼwaa (Gé 14:18, 22). Nia chi palajachikai sacerdoote aküjünakai achiki suluʼu tü Wiwüliakat. Sacerdootepuʼushi nia süpülapünaa tü juyakat 1933 Sü.W. Jimatuuisü, maluʼulu tü pütchikat Salem, müshijeseʼe «naaʼinrüin tü anasükat sünain aluwatawaa» nümüin Pablo nümüin Melquisedec. Aluwataai loto akuwaʼipachi maluʼulu tü pütchikat Melquisedec (Heb 7:1, 2). Eesü süpüla Salem sümünapuʼuin tü mmakat Jerusalén, müsüjeseʼe Salem sümünüin maaʼulu. Sünain tü pütchikat Jerusalén eesü tü pütchikat «Salem» (Sl 76:2).
Nükanajüin Abrán (Abraham) Kedorlaomer otta na aluwataalii nümaajanakana. Süchikijee antüshi nia eemüin tü patajatshii kanüliakat Savé, suwalaʼata tü anülieekat shia «Nuumain chi Laülaashikai». Niyuʼlaka Melquisedec pan ooʼulaka wiino nümüin Abraham otta nuchuntakat nümüin Maleiwa naʼanasia nüpüla Abraham, sümaa nümüin nümüin: «Maleiwakalee, pia Miyoʼushikai maʼi, pia kakumalakai kasa süpüshua chaa iipünaa je yaa mmoluʼu, anakaja piiʼiyatüle paʼanasia nümüin Abram. Waʼwaajüin pia Maleiwa Miyoʼushikai maʼi, süka pükaaliijain Abram süpüla niyamülüinjatüin nüʼünüü». Naapakalaka Abraham nümüin Melquisedec «poloʼowai sünainjee poloʼowai shikii tü nüsitkat sünainjee atkawaa» (Gé 14:17-20; Heb 7:4).
it-2-S 360 püt. 4
Melquisedec
¿Jamüsü nnojotka sütüjaain aaʼu wayuu joujachin jemelin Melquisedec otta joujachin outuin nia?
Nüküjain Pablo nüchiki Melquisedec sünain nnojoluin atüjaanüin aaʼu «nüchiki nüshi, süchiki nii, süchiki nutuushinuu, nüchiki sünain jemeishin, otta nüchiki sünain ouktüin» nia, aküjünüsü neʼe nüchiki sünain «sacerdotein nia, maa aka nükuaippa chi Nüchonkai Maleiwa sünain sacerdotein süpüla kaʼikat süpüshua» (Heb 7:3). Jemeishi Melquisedec jee outushi nia maʼaka saaʼin wayuu süpüshuaʼa. Nnojotsü aküjünüin suluʼu tü Wiwüliakat süchiki sünülia tü niikat jee nünülia chi nüshikai, nachiki na nutuushinuukana, na nuuʼuliwoʼukana otta süchiki joujachin jemelin nia jee outuin nia. Müshijeseʼe niain Melquisedec niyaawasein Jesuu. Melquisedec nnojoishi nuuʼuliwoʼuin nia wanee sacerdoote otta nnojoishi eein wanee wayuu kasa nünain sacerdootekai nüchikumüin. Müsia neʼe nukuwaʼipa Jesuu, nnojoishi nuuʼuliwoʼuin nia wanee sacerdoote otta süküjain tü Wiwüliakat nnojoleechin eein wanee wayuu sacerdootekai nüchikumüin. Aluwataashi Jesuu sutuma nuuʼuliwoʼu nia David, mayaapejeʼe nuuʼuliwoʼuin nia Judá eeshi süpüla sacerdootein nia. Ekeraajüsü tia süka nüpansaajüin shia Jeʼwaa sünain müinjatüin shia.
it-2-S 359
Melquisedec
Niyaawaseshi Melquisedec Kürisüto sünain sacerdootein nia. Shia wanee pütchi nüküjaka Jeʼwaa nüchiki chi Mesíaskai nümüin David: «¡Sacerdooteinjachi pia süpüla kaʼikat süpüshuaʼa maʼaka saaʼin nukuwaʼipa Melquisedec!» (Sl 110:1, 4). Sutuma tü aküjünakat suluʼu tia salmokot, nayaawata aaʼu na israeliitakana sacerdooteinjachin jee nuluwataainjachin chi Mesías aküjünakai achiki paala. Suluʼu Hebreokana, nüküjain Pablo nüchiki chi Mesíaskai aküjünakai achiki paala, müshi nia: «Nia Jesús chi sacerdote müloʼushikai süpüla kaʼikat süpüshua maa aka naaʼin Melquisedec sünain niʼyataain nümüin Maleiwa» (Heb 6:19, 20; 5:10; paashajeʼera PACTO).
Püchajaa süchiki kaaʼürüi suluʼu tü Wiwüliakat
w00-S 15/8 14 püt. 11
Tü asülajaa anakat nümüin Jeʼwaa
11 «Chi laülaakai napüleerua na sacerdote judíokana, aneekünüshi süpüla naapawalinjatüin nümüin Maleiwa tü kasa anasü saapakat wayuu sünain saapüin analuʼut nümüin je tü sümüʼünüin ouktajatkat saaʼu saainjala», müshi Pablo (Hebreokana 8:3). Nüküjain Pablo piamain sukuwaʼipa niʼyataain chi laülaakai napüleerua na sacerdootekana: palajana, naapawalinjatü «nümüin chi Maleiwakai tü kasa anasü saapakat wayuu sünain saapüin analuʼut nümüin» otta piama, naapüinjatü nümüin Maleiwa «tü sümüʼünüin ouktakat saaʼu saainjala» (Hebreokana 5:1). Asülajüshii na wayuukana kasa anasü süka alin napüla wayuu, aleeweein naya namaa otta süpüla talatüin naya nümaa (Génesis 32:20; Proverbios 18:16). Müsia neʼe sukuwaʼipa tü Pütchi Aapünakat nümüin Moisés, asülajüshii na wayuukana nümüin Maleiwa süpüla talatüin naaʼin Maleiwa namaa. Saashin tü Pütchi Aapünakat nümüin Moisés, kaainjarale wanee wayuu, aapüinjachi nia wanee mürüt süpüla suʼutunüin aaʼin saaʼu naainjala. Suluʼu tü karaloʼutakat Éxodo, Levítico otta Números, aküjünüsü süchiki sukuwaʼipa tü nasülajüinjatkat na israeliitakana saaʼujee wanee kasa. Eesü kapüleere wamüin wayaawatüin saaʼu süpüshuaʼa tü naaʼinrapuʼukat na israeliitakana nasülajapa wanee kasa nümüin Maleiwa, anapejeʼe jülüjale waaʼin tia süka watüjeenain waneirua kasa sünainjee.
it-2-S 574 püt. 4
Tü Pütchi Apansaajünakat
¿Jamüsü nnojoluitpaka «kasain anain apüla» tü Pütchi Nüpansaajakat Jeʼwaa nükajee Moisés?
Nüküjapa Maleiwa nükajee Jeremías eeinjatüin wanee Pütchi jeket pansaatüjütkalia, müsü nnojoluitpakai kasain anain apüla tü Pütchi Nüpansaajakat Jeʼwaa nükajee Moisés (Jer 31:31-34; Heb 8:13). Maawainrüpa shia sutuma outuin Kürisüto saaʼu waainjala soʼu tü juyakat 33 So. W., jee shiaitpa kojutuka tü Pütchi jeketü nüpansaajakat Maleiwa (Col 2:14, TNM; Heb 7:12; 9:15; Alu 2:1-4).
SETTIENPÜROʼU 9-15
KOROLO KOJUTUSÜ SULUʼUKA TÜ WIWÜLIAKAT | HEBREOKANA 9, 10
«Shiyaakua tü kasa anasü naapeetkat chi Maleiwakai wamüin»
it-2-S 635 püt. 4
Motoo aaʼin aainjalaa
Sünain tü Pütchi Aapünakat nümüin Moisés nutuma Jeʼwaa, süküjain tü naaʼinrajatkat na israeliitakana kaainjarale naya nuulia Maleiwa jee nuulia wanee wayuu, sünain nanouteʼerüinjatüin palajana tü naainjakat otta süchikijee noʼutüinjachin aaʼin wanee mürüt nümüin Maleiwa (Le 5:5–6:7). Müshijeseʼe nümüin Pablo: «Saashin tü ashajuushi aluwataanakat anain na watuushi judíokana nütüma Maleiwa, alatinnüsü saainjala tü wayuukolüirua müleka sütülüittinnüin süsha mürüt naaʼu. Nnojolüiwaʼaya ouktüin wane mürüt sümaa sütülüittinnüin süsha naaʼu, nnojotsü alatinnüin naainjala» (Heb 9:22). Tü süshakat mürüt nnojotsü süpüla sülaʼajüin naainjala wanee wayuu otta nnojotsü saapüin nümüin jimata aaʼin (Heb 10:1-4; 9:9, 13, 14). Aluʼuinjaʼa tü Pütchi jeket pansaatüjütkalia, eesü süpüla sülaʼajaain saainjala wayuu sükajee outuin Jesuu (Jer 31:33, 34; Mt 26:28; 1Co 11:25; Éf 1:7). Wanaa sümaa yaajachin Jesuu saaʼu tü Mmakat, niiʼiyatüin eein süpüla nülaʼajaain saainjala wayuu wanaa sümaa anain nutuma wanee «outa asaʼachi, outa atünachi» (Mt 9:2-7).
cf-S 183 püt. 4
«Ayata tamaain pia waneepia»
4 Nnojotsü süküjain tü Wiwüliakat süpüshuaʼa tü alatakat wanaa sümaa nüntüin Jesuu chaa iipünaa, tü aainjünakat wanaa sümaa nüntüin otta niʼrapa nüchikuaʼa chi Nüshikai. Aküjünapejeʼe paala süpüshi tü alatüinjatkat chayaa. Aküjünüsü süchiki wanee outkajawaa aainjünaka noʼupala na judíokana soʼu 1500 juya. Ekerotushi juyawai chi laülaashikai napüleerua na sacerdootekana suluʼu tü paü shiinaluʼusükat «Nümülatuʼu Maleiwa» münakat, nütülüittüin süsha mürüt shiʼipoʼujee tü jurasükeetkat. Aainjünüsü tia soʼu tü Kaʼi Alatinnakalü oʼu Naainjala na israeliitakana. Tü naainjakat chi laülaashikai napüleerua na sacerdootekana soʼu tia kaʼikat, ekeraajüsü nünain Jesuu soʼu nüleʼejüin chaa sirumatuʼu. Nüntapa Jesuu eemüin chi Nüshikai, ekerotushi nümaʼanamüin chi Maleiwakai süpüla asoutaa waaʼu waneepia nümüin süpüla nükaaliijain waya (Hebreokana 9:11, 12, 24). ¿Anasüche tia nümüin Jeʼwaa?
it-2-S 638 püt. 7
Lotoo akuwaʼipaa
Lotusü maʼin tü Pütchi Aapünakat nümüin Moisés. Aküjünüsü suluʼu tü Pütchi Aapünakat namüin na israeliitakana nükajee Moisés, aneekünüinjana waneinnua sacerdoote otta tü mürüt nasülajüinjatka na wayuukana süpüleerua tü naainjalakat. Mayaapejeʼe nümaʼanajeejatü Maleiwa tia pütchikat jee lotuin maʼin shia, nüküjain Pablo nnojoluin süpüla anajiraain naya nümaa Maleiwa jaʼitairü naaʼinrüin süpüshuaʼale tü sümakat (Heb 7:11, 18, 19; 10:1). Sutuma tü Pütchi Aapünakat nümüin Moisés, nayaawata aaʼu na israeliitakana kaainjaralin naya jee nnojoishii naya taashin suulia tü kaainjalaakat jee tü outaakat (Ro 3:19, 20; 7:7-13). Eepejeʼe wanee kasa anaka apüla tü nuluwataakalü anain Maleiwa: «Süntirüin waya nünainmüin Cristo süpüla anajiraainjanain waya sünainjee wanoujain nünain» jee shiyaakuayaasü neʼe tü kasa anasü naapeetkat chi Maleiwakai wamüin (Gal 3:19-25; Heb 10:1). Wanaa sümaa nüküjain Pablo süchiki nnojoluin süpüla suuntuin tü Pütchi Aapünakat nümüin Moisés sujuʼitirüin wayuu suulia tü outaakat, shia naashajaaka achiki chi laülaashikai napüleerua na sacerdootekana maʼaka süküjain tü Wiwüliakat (ekerotushi juyawai chi laülaashikai napüleerua na sacerdootekana suluʼu tü paü shiinaluʼusükat «Nümülatuʼu Maleiwa» münakat, nütülüittüin süsha mürüt shiʼipoʼujee tü jurasükeetkat. Aainjünüsü tia soʼu tü Kaʼi Alatinnakalü oʼu Naainjala na israeliitakana) (Heb 7:11, 18-28; Ro 8:3). Eesü süpüla anain na israeliitakana noʼuluʼu Maleiwa sutuma noʼutuin naaʼin mürüt nümüin nükajee chi sacerdootekai, mayaapejeʼe naaʼinrüin tia, ayatüshii kaainjalain naya. Nüküjain Pablo nnojoluin süpüla nountuin na israeliitakana anajiraain naya nümaa chi Maleiwakai, jaʼitairü aapünawalin süsha mürüt nümüin (Heb 10:1-4; paashajeʼera Heb 9:9). Nnojoishii süpüla taashin na israeliitakana suulia naainjala sutuma tü naaʼinrakat chi laülaashikai napüleerua na sacerdootekana. Chi eekai süpüla nuuntuin tia nia Kürisüto süka outuin nia saaʼu waainjala jee sacerdootein nia waneepia (Heb 9:14; 10:12-22).
Püchajaa süchiki kaaʼürüi suluʼu tü Wiwüliakat
w92-S 1/3 31 püt. 4-6
Nasakitka anain na wayuukana
Nüküjain Pablo choʼujaain amülain süsha wanee mürüt jee shiale naapajiraain nikii wanee wayuu süpüla shikeraajüin tü pütchi nüpansaajakat Maleiwa namaa na wayuukana. Aainjünüsü tia sükajee tü Pütchi Nüpansaajakat Jeʼwaa namaa na israeliitakana. Nuluwataain Jeʼwaa Moisés eemüin na israeliitakana süpüla nünüikeʼejanain nia, anakatche maʼin tü aʼyatawaa naainjakat Moisés. ¿Choʼujaashiche outuinjachin Moisés naaʼu na israeliitakana süpüla shikeraajüin tü Pütchi Nüpansaajakat Jeʼwaa namaa? Nnojo. Tü aainjünakat shia noʼutuin saaʼin mürüt süpüla amülain tü süshakat (Hebreokana 9:18-22).
¿Kasa aküjünaka süchiki tü Pütchi jeketü pansaatüjütkalia nutuma Jeʼwaa namaa na anoujashii chainjanakana iipünaa? Nia Jesuu chi nünüikeʼejanakai Jeʼwaa namüin na anoujashii chainjanakana iipünaa. Mayaapejeʼe niain Jeʼwaa keʼinaajalain tü Pütchi jeket pansaatüjütkalia, ekeraajüsü shia nükajee Jesuu. Aleewashi Jesuu namaa na palajanakana anoujashii eeinjanakana chaa iipünaa (Lucas 22:20, 28-30). Jee müsia kettaashi Jesuu süpüla shikeraajüin tü Pütchi jeket pansaatüjütkalia nutuma Jeʼwaa. Nnojotsü choʼujaain amülain süsha mürüt süpüla shikeraajüin tia, choʼujaashi outuin wanee wayuu eekai maainjalain. Müsüjeseʼe nümüin Pablo pansaain tia pütchikat nükajee Jesuu. Süchikijee nikeroluin Kürisüto «nümaʼanamüin chi Maleiwakai chaa iipünaa süpüla asouktaa waaʼu waneepia nümüin süpüla nükaaliijain waya», oʼttüsü sünain shikeraajüin tü Pütchi jeket pansaatüjütkalia nutuma Jeʼwaa (Hebreokana 9:12-14, 24).
Mayaainjeʼe nüküjain Pablo niain Moisés otta niain Jesuu apansaajaka tü pütchi nümakat Jeʼwaa, nnojotsü niiʼiyatüin nayain aikaleʼerüin tia pütchikat, nia Jeʼwaa aikaleʼeraka shia. Nayakana nünüikeʼejanain neʼe Jeʼwaa. Wanaa sümaa nüikaleʼerüin Jeʼwaa tü Pütchi Nüpansaajakat namaa na israeliitakana, oʼutuna aaʼinrü wanee mürüt otta wanaa sümaa süikaleʼennüin tü Pütchi jeket pansaatüjütkalia nia aapajiraaka nikii Jesuu.
it-1-S 291 püt. 4
Woutiisaa
Nüküjain Lucas oʼuraajüshi Jesuu soʼu woutiisain nia (Lu 3:21). Ashajünüsü suluʼu tü karaloʼuta Hebreokana tü nümakat Jesuu soʼu nüntüin yaa mmoluʼu saʼakamüin wayuu, naainjain tia süpülapünaachon nuwoutisaajüin jee süpülapünaa nuʼttüin sünain aküjaa pütchi, anuu nünüiki saashin Salmo 40:6-8: «‹Tatüjaa aaʼuchi pia sünain piyouktüin süpüleerua saapünawalin pümüin tü süshakat mürüt. Shia püchekaka tapüleerua jemeinjachin taya maa aka sukuaippa wayuu süpüshua süpüla ouktajachin taya saaʼu [›]. [...] ‹Maleiwakalee, maa aka paala tü tachiki ashajünakat nütüma Moisés, yapaichipa taya süpüla taaʼinrüinjatüin waneepia süpüshua tü keeʼireekat paaʼin tapüleerua›» (Heb 10:5-9). Saaʼu judíoin Jesuu, süpüshitchipa nia tü nupueulosekat Maleiwa, na nüpansaajiraakana amaa paala wanee pütchi (Éx 19:5-8; Gal 4:4). Nnojoishi woutiisain Jesuu süpüla naapüin naaʼin nümüin Maleiwa, woutiisashi nia süpüla niiʼiyatüin nümüin chi Nüshikai yapain nia süpüla naaʼinrüin tü keeʼireekat naaʼin nüpüleerua sünain naapajiraainjatüin nikii saaʼu saainjala wayuu jee nnojoluin choʼujaain suʼutunüin aaʼin mürüt süchikuaʼa. Müshi Pablo: «Je jooluʼu, süka naaʼinrüitpain Jesucristo süpüshua tü nüchekakat chi Maleiwakai nüpüleerua sünain aapajirawaa nikii wwatua neʼe süpüla ouktaa waaʼu, taashiinapa waya suulia waainjala süpüla warütkaainjanain nünainmüin chi Maleiwakai» (Heb 10:10). Tü wanee kasa keeʼireekat naaʼin chi Nüshikai nüpüleerua, shia niʼyataain süpüleerua tü Nuluwataayakat otta shia tü naaʼinrakat Jesuu (Lu 4:43; 17:20, 21). Anasü nümüin Jeʼwaa tü naainjakat chi Nüchonkai, müsüjeseʼe nüneeküin nia nükajee chi naaʼinkai jee müshi nia nümüin: «Pia chi Tachonkai aishikai tapüla. Talatüshi maʼi taya pümaa» (Mr 1:9-11; Lu 3:21-23; Mt 3:13-17).
SETTIENPÜROʼU 16-22
KOROLO KOJUTUSÜ SULUʼUKA TÜ WIWÜLIAKAT | HEBREOKANA 11
«¿Jamüsü choʼujaaka kanoulain wanee wayuu?»
(Hebreokana 11:1, TNM) Tü kanoulaakat shia shiimainre wamüin shikeraajeerüin tü kasa waʼatapajakat maʼin, weeʼiyatüle shiimain wamüin tü kasa nnojotkat weʼrüin.
(Hebreokana 11:6, TNM) Manoujainre wanee wayuu, nnojoishi talatüin Maleiwa nümaa. Chi eekai nürütkaain nünainmüin Maleiwa, acheküshi nunoujainjachin sünain eein nia sümaa nuwalaajüin na achajaakana maʼin nüchiki.
w13-S 1/11 11 püt. 2-5
Naapüin kasa anasü Maleiwa namüin na achajaakana maʼin nüchiki
¿Kasa waaʼinrajatka süpüla talatüin Jeʼwaa watuma? Müshi Pablo: «Manoujainre wanee wayuu, nnojoishi talatüin Maleiwa nümaa». Nnojotsü nüküjain Pablo sünain «kapüleein tia», tü nüküjakat shia «nnojoluin» talateechin Jeʼwaa nnojoire wanoujain nünain.
¿Kasa waaʼinrajatka kanourale waya? Choʼujaasü waaʼinrüin piamasü kasa. Palajana, wanoujainjanain «sünain eein nia», nnojotsü süpüla talatüin Jeʼwaa watuma nnojoire wanoujain sünain eein nia. Jamüshiijaʼa na yolujaakana, anoujashii naya sünain eein chi Maleiwakai, nnojotpejeʼe naaʼinrüin tü nüchekakat Maleiwa (Santiago 2:19). Wanoujale sünain eein chi Maleiwakai, waaʼinreerü tü nüchekakat wapüleerua (Santiago 2:20, 21, 26).
Piama, wanoujainjatü anain «nuwalaajüin» Maleiwa tü anasü waaʼinrakat nümüin, naapüin kasa anasü wamüin. Chi wayuu eekai kanoulain, nütüjaa aaʼu nnojoleerüin amülain neʼe tü niʼyataainkat nümüin Jeʼwaa (1 Corinto 15:58). Nnojorüle wanoujain sünain nükaalinjeenain waya otta naapeerüin kasa anasü wamüin, ¿aashin nnojoleerüin talatüin naaʼin watuma? (Santiago 1:17, TNM; 1 Pedro 5:7). Nnojoishi weʼraajüin Maleiwa nnojoire nüsülajülin waaʼinruʼu, nnojoire kojutuin waya nümüin jee nnojoliire jülüjain waya naaʼin waküjainruʼu.
¿Jaralii na naapakana amüin Maleiwa kasa anasü? Naya na «achajaakana maʼin nüchiki», müshi Pablo. Tü pütchi griego aapaanakat anainjee tü pütchikat «na achajaakana maʼin nüchiki» makat, nnojotsü shiain neʼe «wantüinjachin anain» Maleiwa, choʼujaasü warütkaain nünainmüin «süpüla waʼwaajüin nia», müsü wanee karaloʼuta napülajatü na ashajakana tü Wiwüliakat suluʼu naata anüikii. Keeʼireesü maʼin naaʼin naaʼinrüin maluʼulu tia pütchikat saashin suwalaʼata karaloʼuta. Müsüjeseʼe naapüin Maleiwa kasa anasü namüin na aʼyataakana maʼin nümüin süka kanoulain naya nünain jee alin nia napüla (Mateo 22:37).
Püchajaa süchiki kaaʼürüi suluʼu tü Wiwüliakat
it-1-S 920 püt. 3
Kanoulaa
Washata nakuwaʼipa nanoula na wayuu namaiwajanakana. Na wayuu «wattakana aalii» nüküjaka achiki Pablo, nnojoishii naya anoujain neʼe süpaʼa mma (Heb 12:1, TNM). Jamüshijaʼa Abel, nütüjaa aaʼu tü nümakat Jeʼwaa sünain neewainjeerüin shikii tü wüikat chi suuʼuliwoʼukai tü jietkat otta müsia niʼrüin nikeraajüin Maleiwa tü nümakat nümüin Adán sümaa Eva sutuma nnojoluin noonooin sümaa nünüiki. Sutuma niyüülajüin Maleiwa tü mmakat, niʼrüin Abel nümüliala Adán otta na nüpüshikana süpüla nantüin sünain tü neküinjatkat süka keipüsein tü mmapaʼakat. Jülüjasü naaʼin Abel ayatüin müliain Eva niiʼiree Adán otta niain aluwataain saaʼu. Eesü süküjale Eva nümüin Abel müliain saaʼin saʼalijaapa nümaa wanee joʼu. Niʼitaain Maleiwa wanee aapieeirua nümaʼanajeejana chaa wüinpejeeruʼu sünain tü apainkat otta wanee chajaruuta leeyatüsü waneepia sümaa chuwatüin (Gé 3:14-19, 24). Niʼitaain naaʼin Abel sünain taasheerüin wayuu nükajee chi suuʼuliwoʼukai tü jietkat otta shiimainsü nümüin tia süka niʼrüin shikeraajüin süpüshuaʼa tü nümakat Jeʼwaa. Sutuma kanoulain maʼin Abel, alanaʼaleesia tü nüsülajakat nümüin Maleiwa suulia tü nüsülajakat Caín (Heb 11:1, TNM; 11:4).
SETTIENPÜROʼU 23-29
KOROLO KOJUTUSÜ SULUʼUKA TÜ WIWÜLIAKAT | HEBREOKANA 12, 13
«Achiaanüshii waya süka alin waya nüpüla Maleiwa»
w12-S 15/3 29 püt. 18
Nnojo piirakaain sümüin tü kasa püpütakat
18 Achiawaa. ¿Achiaanüinnache waya nutuma wanee wayuu? Ayatüle jashichin waya sutuma wachiaanüin, mülieena waya otta mojeerü neʼe waaʼin waneepia (Heb. 12:5). Wayoutule tü achiaanakalü aaʼujee waya jee shiale nnojoluin waaʼinrüin tü aküjünakat wamüin, nnojoleerü wooʼulaain sunoutuin wakuwaʼipa. Anasü waaʼinrüle tü nümakat Salomón: «Püchecheraa süchiirua sunoʼuteʼennüin pukuwaʼipa, nnojo motuin paaʼin shia, süka kateerüin poʼu sutuma» (Pro. 4:13). Müinjatü wakuwaʼipa maʼaka naaʼin na atüjakana chupeeraa neʼrapa tü señales de transito münakat: nayaawata aaʼu tü neʼrakat, naaʼinrüin tü sümakat otta ayatüshii naya oʼunuin (Pro. 4:26, 27; paashajeʼera Hebreokana 12:12, 13).
w12-S 1/7 21 püt. 3
«Meena jia jüchuntapa nümüin Maleiwa: ‹Taata Maleiwa›»
Chi wayuu kachonkai, nücheküin anainjatüin nakuwaʼipa na nüchonniikana, müshiijeseʼe nüchiaain naya (Éfeso 6:4). Nüchiajaain naya süka anakalü akuwaʼipa jee nnojoishii müliain naya nutuma. Müsia neʼe nukuwaʼipa chi Washikai Maleiwa, nütüjaa aaʼu joujain choʼujaain wamüin wachiajaanüin. Niiʼiyatüin alin waya nüpüla nüchiaapa waya, nnojoishii waya müliain nutuma. Müsia neʼe nukuwaʼipa Jesuu maʼaka naaʼin chi Nüshikai, nnojoishii müliain naaʼin na nikirajüinkana nutuma soʼu nnojoluin naapaain amaa tü nüchiaakalü anain naya (Mateo 20:20-28; Lucas 22:24-30).
Püchajaa süchiki kaaʼürüi suluʼu tü Wiwüliakat
(Hebreokana 12:1, TNM) Sutuma jülüjain waya naaʼin na wayuu wattakana aalii, wasünneʼera woulia tü kasa shapaakalü atuma waaʼin, jee müshia tü kaainjalaakat, tü akoʼojooka sünain wasaʼa süpüla wojutuuin, wachechera waaʼin sünain tü ayoujirawaa eʼitaanakat wapüleerua.
w11-S 15/9 17 püt. 11
Wachechera waaʼin sünain tü ayoujirawaakat
11 Nnojoishii yalain neʼe na «wayuu wattakana aalii» sünain anajaa naaʼu na ayoujiraakana jee neʼrüin jaralin chi akanajüinjachikai, yalashii naya süpüla natütüleʼerüin naaʼin na ayoujiraakana. Eesü süpüla naainjain tia süka nayoujiraaliin namaiwa jee nakanajüitpain tü ayoujirawaakat. Mayaapejeʼe outuinnapain naya, müshii yalakai naaʼin sünain atütüleʼeraa saaʼin wayuu. ¿Jamüsü naaʼin na jekenakana natüjaapa saaʼu neʼrajünüin aaʼu natuma na atüjakana maʼin ayoujirawaa? Awataweena maʼin naya jee alanaʼaleejeeria maʼin natuma. Eeshii süpüla nakanajüin jaʼitairü kapüleein maʼin shia, naashin na «wayuu wattakana aalii». Jülüjale naaʼin na ayoujiraakana nakuwaʼipa naya wayuukana, katchinjeerü naaʼin sünain tü ayoujirawaa eʼitaanakat napüleerua. Shia wanee pütchi anaka maʼin namüin na hebreokana eejanakana soʼu nükalia Jesuu otta wamüin wapüshuaʼa wayakana.
(Hebreokana 13:9, TNM) Nnojo junoujain sünain tü alawaa ekirajünakalü anain. Anaʼleesia jükatchinrüle junoula sükajee jaapüin analuʼut nümüin Maleiwa saaʼujee nümüliajüin jia, nnojotsü shiainjatüin sükajee tü jiküinkat, tü nnojotkat kasain anain apüla namüin na aaʼinrakana tia.
w89-S 15/12 22 püt. 10
Wasülaja wanee kasa anaka nümüin Jeʼwaa
10 Nnojoluinjana nanoujain na hebreokana tü alawaa nekirajakat na judíokana (Galacia 5:1-6). Nnojotsü neʼe katchin nanoula sutuma tü ekirajünakalü anain naya, shia sükajee jaapüin analuʼut nümüin Maleiwa saaʼujee nümüliajüin jia. Eeshii na aʼülüjiraakana saaʼujee tü ekünajatkat otta tü nasülajüinjatkat nümüin Maleiwa, müshijeseʼe nümüin Pablo namüin nnojoluin katchin nanoula sükajee tü neküinkat, «tü nnojotkat kasain anain apüla namüin na aaʼinrakana tia». Wanee wayuu aʼwaajakai Maleiwa sümaa kojutuin nia nümüin otta kojutuin nümüin outuin Jesuu naaʼu, katchinjeerü tü nunoulakat sutuma. Shapaale neʼe naaʼin sutuma tü anakat jee tü mojukat süpüla niküin otta naaʼinrüle neʼe tü nanoujapuʼukalü anain na judíokana, nnojoleerü katchin nunoula (Roma 14:5-9). Nnojoluitpa choʼujaain naaʼinrüin tia, süka outuichipain Jesuu saaʼu saainjala wayuu süpüshuaʼa (Hebreokana 9:9-14; 10:5-10).
SETTIENPÜROʼU 30–OʼUTUUPÜROʼU 6
KOROLO KOJUTUSÜ SULUʼUKA TÜ WIWÜLIAKAT | SANTIAGO 1, 2
«Tü kasa kaainjalakalü atuma wanee wayuu jee outaka atuma nia»
g17.4-S 14
Tü suchuntaakat waaʼin
Waaʼinrüin wanee kasa süka suchuntuin shia waaʼin, eepejeʼe süpüla waaʼinrüin wanee kasa mojuka maʼin sutuma. Jamüshijaʼa chale pia sünain ayaʼlajaa wanee kasa jee piʼretka wanee kasa püchekaka maʼin, eesü jülüjale paaʼin anain süpüla puʼluwajüin shia süka nnojoleerü jaralin eʼrüin pia. Piyoutapejeʼe tü jülüjakat paaʼin sutuma piyaawatüin saaʼu mojuin maʼin tü paaʼinrüinjatkat jee oʼunüshi pia yalejee. Anasü paaʼin sutuma nnojoluin poonooin sümaa tü suchuntaakat paaʼin.
TÜ SÜMAKAT TÜ WIWÜLIAKAT
Suchuntaale tü waaʼinkat waaʼinrüinjanain kasa mojusü, nnojotsü shiain sutuma wayuuin mojulaashii waya. Ooʼulakünüsü waaʼin wapüshuaʼa saashin tü Wiwüliakat (1 Corinto 10:13, TNM). Eejüinjatü waaʼin suulia tü kasa suchuntaakat waaʼin. Eeshii na aaʼinrakana kasa mojusü sutuma jülüjain naaʼin waneepia tü kasa mojusü antakat nekiiruʼumüin otta eeshii na asünneʼeramaatakana tü antakat nekiiruʼumüin sutuma natüjaain saaʼu mojuin shia.
«¿Kasa kaainjaleeka atüma wane wayuu? Kaainjaleeshi süka noonooin sümaa tü kasa mojusü keeʼireekat naaʼin» (Santiago 1:14).
g17.4-S 14
Tü suchuntaakat waaʼin
Süküjain tü Wiwüliakat tü eekat süpüla kaainjalain atuma wanee wayuu. Müsü Santiago 1:15: «Naaʼinrüle tü mojusükat keeʼireekat naaʼin, kaainjalaa tia». Nnojorüle wayoutamaatüin tü kasa mojusü antakat wekiiruʼumüin, iseerü wachiki wachecherüin waaʼin suulia aaʼinraa tia, meerü wakuwaʼipa maʼaka wanee jierü jakütakat, iseerü süchiki süchecherüin saaʼin suulia jemeyulaa. Nnojotpejeʼe waya süchepchiain tü kasa mojusü antakat wekiiruʼumüin, eesü süpüla wasünneʼerüin shia.
Püchajaa süchiki kaaʼürüi suluʼu tü Wiwüliakat
(Santiago 2:8, TNM) Müleka jaaʼinrüle tü pütchi alanaʼaleekat maʼin sünain anain maʼaka süküjain tü ashajuushikat paala, tü makat mayaa: «Anasü aire püpüla napüshuaʼa na wayuukana maʼaka alin pia püpülajiraa», aneerü maʼin tü jaaʼinrakat.
it-2-S 227 püt. 6
Tü pütchi aluwataanakat
«Tü pütchi alanaʼaleekat maʼin sünain anain». Alanaʼaleesia maʼin tüü suulia tü aluwataanakalü anain na wayuukana maaʼulu yaa, müshi aka nukuwaʼipa wanee aluwataai alanaʼaleekai sümaa kojutuin nia noulia na nuluwataakana aaʼu (Snt 2:8, TNM). Suluʼu tü Pütchi Nüpansaajakat Jeʼwaa nükajee Moisés, aküjünüsü alinjachin Jeʼwaa napüla na israeliitakana otta alinjatü wayuu napüla. Sünainjee tia piamasükat pütchi, nüikaleʼerüin Jeʼwaa süpüshuaʼa tü pütchi nuluwataakalü anain naya nükajee Moisés otta tü nekirajapuʼukalü anain na nünüikimaajanakana Maleiwa. Tü pütchi alanaʼaleekat maʼin sünain anain shia tüü: «Anasü aire püpüla wayuu süpüshua maa aka alin pia püpülajiraa» (Mt 22:37-40). Nnojoluitpa choʼujaain naaʼinrüin na anoujashiikana tü Pütchi Nüpansaajakat Jeʼwaa nükajee Moisés, shia naaʼinrajatka tü Pütchi jeket pansaatüjütkalia otta naaʼinrüinjatü tü nuluwataakalü anain Jeʼwaa otta Jesuu süka nayainnapain Aluwataain naaʼu.