EKIRAJAAYA 1

Anainjatü suʼttia pünüiki

Aluw. 17:22

PÜTÜJAINJATKA APÜLEERUA: Kamalainjatü namüin na wayuukana tü suʼttiakat pünüiki, pütüjaainjatü aaʼu palajana tü paashajaainjatkalü achiki otta püküja jamüin choʼujaaka shia namüin na wayuu aapajakana pünüiki.

SUKUWAʼIPAINJATKA

Kamalainjatü pünüiki. Püneeka tü püsakirüinjatkalü anain, tü paashajaainjatkalü achiki, shiale tü alatakat sümüin wanee wayuu jee shiale wane kasa alataka kamalainka namüin na wayuukana.

Shia jülüja paaʼin palajana tü kamalainkat namüin na wayuukana otta punouta tü pünüikinjatkat wanaapünaa sümaa nakuwaʼipa.
Tü paashajaainjatkalü achiki. Tü suʼttiakat pünüiki sünainpünaainjatü tü paashajaainjatkalü achiki otta mapüleeinjatü shia süpüla nayaawatüin saaʼu na aapajakana pünüiki.
Püküja jamüin choʼujaaka shia namüin. Tü paashajaakalü achiki, wanaapünaainjatü sümaa nakuwaʼipa na aapajakana pünüiki. Nayaawatüinjatü aaʼu jamüin choʼujaaka namüin tü paashajaainjatkalü achiki.

Sümaʼainruʼu pikirajaain, püsakira paaʼin: «¿Kasa eejiraaka amaa na tawalayuu toutkajaakana amaa?». Süchikijee tia, shiainjatü paashajaaka achiki tü wanaapünaakat sümaa nakuwaʼipa na wawalayuukana.