EKIRAJAAYA 2

Müinjachi yootokai paaʼin

2 Corinto 2:17

PÜTÜJAINJATKA APÜLEERUA: Yootuinjachi pia süka anakalü akuwaʼipa otta shiimainjatü pünüiki, piiʼiyatüinjatü kamalain pümüin tü pikirajakalü anain otta anain paaʼin namaa na aapajakana pünüiki.

SUKUWAʼIPAINJATKA

Puʼuraaja otta jülüja paaʼin tü ekirajawaakat. Puchunta kaalinwaa nümüin Jehová süpüla shiainjatüin paashajaain achiki tü pütchi pikirajüinjatkat, nnojoishi piainjachin aʼwaajünüin sutuma wayuu. Shiainjatü jülüjaka paaʼin tü pütchiirua pikirajeekat maʼin anain. Püküjainjatü sükajee pünüiki, nnojotsü müinjatüin paashajeʼerakai saaʼin suluʼujee wanee karaloʼuta.

Shiale paashajeʼerüinjatüin tü Bibliakat jee shiale wanee karaloʼuta weitajaka, pütüjaainjatü aaʼu tü paashajeʼerüinjatkat süpüla anain saashajeʼeria putuma. Shiale paashajaain achiki nünüiki wanee wayuu, ana putuma saashajeʼeria, nnojoluinjachi pia aʼalaajaain.
Kamanee maʼin pia. Jülüja paaʼin jamüin choʼujaaka naapajüin na wayuukana tü pütchikat. Jülüja paaʼin naya, jamüin naikalaaya, jamüin noʼupünaa, kasain naainjain, tia shiiʼiyatüin kamalainre namüin tü pütchikat otta kamaneere naya.

Anainjatü sukuwaʼipa pünüiki, nnojoishi müinjachin piʼrüiyaakai aaʼin. Kojutuinjatü tü pütchikat putuma sükajee pansaain süküjia.
Piirakaa namüin na aapajakana pünüiki. Eeshi süpüla piirakaain namüin na wayuukana, nnojorüle mojushiin shia namüin. Pikirajüle, piirakaa nümüin wanee wayuu, suulialeʼeya piirakaain namüin napüshuaʼa uwatuwoʼushi.