Müliasü nüpüshi David

NULUWATAAPA David Jerusalén nükaaliinjüin nia Jeʼwaa süpüla nükanajüin na nüʼünüükana. Naashin Jeʼwaa naapüinjatü tü mmakat Canaán namüin na israeliitakana. Süka nükaaliinjüin naya noumainka tia mmakat.

Aluwataai anashi David, aishi Jeʼwaa nüpüla. Süchikijee nushutuin David saaʼu Jerusalén nülüʼüjüin chamüin tü jurasükeetkat, nukumajeein wanee piichi aʼwaajülee süpülajatü tia jurasükeetkat.

Mapa kaainjalaka David. Nütüjaa aaʼu mojuin naapaale tü kasa nnojotkat nukoroloin. Wanaa sümaa chajachin nia nipialuʼu niʼraka wanee jierü anasüchon maʼin. Bat-seba sünülia otta chi suʼwayuusekai nia Urías, nusurulaatse nia David.

Nuʼwayuuseesü maʼin David Bat-seba, nüsaajitka shia nüchikiruʼu suʼwayuuse. Nümaʼüjiraaka nukuwaʼipa sümaa. Mapa ipuotka shia, mojuka maʼin naaʼin David nütüjaapa saaʼu. Nuluwataaka Joab chi shikiipuʼukai nusurulaatse süpüla niʼitaain Urías napüleerua na surulaatkana süpüla ouktajachin nia. Ouktapa nia kasaatka David sümaa Bat-seba.

Jashichishi maʼin Jeʼwaa nümüin David, nuluwataaka Natán süpüla naashajaain nümaa süchiki tü naainjalakat. Piirakaa namüin suluʼu tü ayaakuaakat. Mojusü maʼin naaʼin David sutuma tü naainjalakat, nnojoika ouktuin nia nutuma Jeʼwaa. Nümaka Jeʼwaa: ‹Süka kaainjalain pia, mülieena maʼin püpüshi›. ¿Kasa alataka sümüin nüpüshi David?

Ouktushi chi süchonkai Bat-seba, Ammón chi nüchonkai David nütaüjaain Tamar tü nushunuukat. Jashichika maʼin Absalón sutuma tia, nuʼutaka naaʼin Ammón. Mapa kojutuka Absalón sutuma wayuu otta nuluwataaka atumawaa. Süchikijee, nükanajuuka Absalón sünain wanee atkawaa, ouktaka nia. Shiimain, müliashi maʼin David.

Mapa jemeika Bat-seba nümaa Salomón. Laülaapa otta ayuuipa David aluwataweeshi Adonías nüchikumüin. Nuluwataaka David Sadoc chi sacerdotekai süpüla niʼyotuin seita saaʼu nikii Salomón süka niainjachin aluwataain. Ouktaka David wanaa sümaa 70 nuuyase, aluwataashi nia 40 juya. Nuluwataaka Salomón nüchikumüin.