Mardoqueo otta Ester

SÜPÜLAPÜNAA nuʼunuin Esdras Jerusalénmüin, kojutushi maʼin sutuma wayuu Mardoqueo otta Ester chaaʼaya Persia. Nuʼwayuuse chi aluwataaikai Ester otta aluwataashi Mardoqueo niʼipajee. Wekirajaa sünain tia.

Mooʼutsü Ester joʼuuiwaʼaya, nipijaka shia Mardoqueo. Chi aluwataaikai Asuero kepiashi Susa otta aʼyataashi Mardoqueo nümüin. Soʼu wanee kaʼi nnojotsü oonooin Vasti nümüin Asuero chi suʼwayuusekai, nüneekaka wanee jierü naata süpüla nuʼwayuusein. ¿Jara nüneekaka? Shia Ester.

¿Piʼrüin chi wayuu yaletakai aaʼin nasapainkaka anainmüin na wayuukana? Nia Hamán wanee wayuu kojutushi maʼin sutuma wayuu chaaʼaya Persia. Keeʼireesü naaʼin nüsapainkain Mardoqueo nünainmüin. Nnojoishi nüsapainkain Mardoqueo süka mojulaain Hamán. Jashichika maʼin Hamán sutuma tia.

Müshi Hamán nümüin chi aluwataaikai: ‹Mojulaashii otta nnojoishii oonooin na israeliitakana sümüin pünüiki, anashii noʼutunule aaʼin›. Nnojotsü nütüjaain aaʼu Asuero israeliitain Ester, nüshajaka wanee karaloukta eere süküjüin noʼutunuinjanain aaʼin na israeliitakana.

Naapapa Mardoqueo tia mojusü maʼin naaʼin, nuluwateʼeraka nünüiki sümüin Ester, nümaka: ‹Paashajaa nümaa chi aluwataaikai, puchunta nümüin nükaaliinjai waya›. Mojusü antaa eemüin chi aluwataaikai nnojorüle neenajüin wanee wayuu. Saainjüin Ester tia. Niyaʼleraka nunuʼuse chi aluwataaikai süpüla nnojoluin suʼutunuin aaʼin. Suunejaaka chi aluwataaikai otta Hamán sünain wanee ekawaa. Sünain tia ekawaakat nüsakiraka shia sünain tü kasa suchuntajatkat. Süküjeerü shia saashin waneemüin kaʼi sünain wanee ekawaa.

Sünain tia ekawaakat sümaka nümüin chi aluwataaikai: ‹Oʼutunajatü aaʼin taya sümaa tapüshi›. Jashichika chi aluwataaikai, nümaka: ‹¿Jarai chi eʼrüikai wayumüin?›

Sümaka Ester: ‹¡Chi wayuukai, nia chi mojulaashikai Hamán!›

Jashichika maʼin chi aluwataaikai, nuʼutiraka naaʼin Hamán. Süchikijee tia niaka Mardoqueo aluwataain niʼipajee. Nuluwataaka Mardoqueo na israeliitakana süpüla natkaain soʼu tü kaʼi ouktuinjanaka oʼu naya. Akaaliinjünüshii na israeliitakana natuma wainma wayuu, nakanajuuka na naʼünüükana.