Tü kasa anasü neʼrakat na oonookana sümaa nünüiki Maleiwa

Naashin Moisés wanee nünüikimaajachi Maleiwa, chi wayuu oonookai sümaa tü nuluwataakalü anain Maleiwa eʼreechi kasa anasü nutuma (Deuteronomio 10:13; 11:27). Oonooshii waya sümaa tü nuluwataakalü anain Maleiwa süka alin maʼin nia wapüla, nnojotsü shiain sutuma mmoluin waya seema süsalain waya waainjala. Süka anashaatain maʼin nukuwaʼipa Maleiwa, aishi maʼin nia wapüla otta nnojotsü mojeein naaʼin watuma. «Müleka waaʼinrüle tü nuluwataakat anain waya chi Maleiwakai, shiimüin alin nia wapüla» (1 Juan 5:3).

¿Jamüsü aneetka wakuwaʼipa nutuma Maleiwa woonoole sümaa nünüiki? Wekirajaa sünain piamasü kasa.

1. KEKIIJEENA WAYA WOONOOLE SÜMAA NÜNÜIKI MALEIWA

«Tayakai Jeʼwaa, taya chi Pümaleiwasekai, Chi ekirajakai pia süpüla anainjatüin pukuwaʼipa, Chi oʼunirakai pia suluʼupünaa tü wopu anasükat» (ISAÍAS 48:17).

Niʼraajüin maʼin wakuwaʼipa Jeʼwaa chi Kakumalakai waya otta nikirajüin waya süpüla anainjatüin wakuwaʼipa. Süpüla anainjatüin sukuwaʼipa tü kasa waneekakat, ekirajaainjana waya sünain tü sümakat tü Wiwüliakat süchiki tü keeʼireekat naaʼin Maleiwa otta waaʼinrajatüin tü nümakat.

2. EʼREENA WAYA ANAA WOONOOLE NÜMAA MALEIWA

«Naya müleʼoka anaa amüin na aapakana nünüiki Maleiwa sünain noonooin sümaa» (LUCAS 11:28).

Maaʼulu yaa, wainma na wayuu talatakana maʼin naaʼin sutuma naaʼinrüin tü sümakat tü Wiwüliakat. Eejachi wanee wayuu chejeʼewaikai España, jashichipuʼushi sümüin wayuu, mepettajüüsai nia otta müliapuʼusü nuʼwayuuse nutuma. Naashajeʼeraka soʼu wanee kaʼi suluʼujee tü Wiwüliakat anamiain maʼin José, chi nüchonkai Jacob. Wainma müliaa niʼraka José, jamüshijaʼa nia, oikünüshi süpüla achepchieein nia otta püreesashi nia atumawaa. Mayaapejeʼe müin nukuwaʼipa, ayatüshia nia anamiain, kamaneein otta nülatirüin sooʼopünaa naaʼin naainjala na waneinnua (Génesis, kapiitulo 37-45). Anuu nünüiki chi wayuu chejeʼewaikai España: «Anasü takuwaʼipa sutuma tekirajaain süchiki nukuwaʼipa José. Anamiaichipa taya, kamaneeshi otta tachecherüin taaʼin suulia jashiee. Anashaatasü maʼin takuwaʼipa maaʼulu».

Aküjünüsü suluʼu tü Wiwüliakat tü waaʼinrajatkat süpüla anainjatüin wakuwaʼipa namaa na waneinnua. Wekirajaa sünain tia.