Müsü suʼwaatakai saaʼin tü kekiwaa nümaʼanajeejatkat Maleiwa

1. ¿Jamüsü nakuwaʼipa waneinnua wayuu sümüin tü kekiwaa nümaʼanajeejatkat Jehová? (Proverbios 1:20, 21).

SULUʼU wainma mma eʼnnüshii na wawalayuukana sünain talatüin naaʼin sünain eitajaa karaloʼuta namüin na wayuu alatakana pejepünaa nanain. ¿Eeichia pia aʼyataain sünain tia? Paaʼinrüle tia, eesüjaʼa süntajaale pikiiruʼu kayaawasein atumawaa tü kekiwaakat suluʼu tü karaloʼutakat Proverbios, müsü suʼwaatakai saaʼin suʼupala wayuu süpüla saapaanüin amaa tü sümakat (paashajeʼera Proverbios 1:20, 21). Tü kekiwaa nümaʼanajeejatkat Jehová suluʼusü tü Bibliakat otta tü karaloʼuta aapünakat wamüin. Tia shia tü choʼujaakat sümüin wayuu süpüla katüinjatüin soʼu. Anasü maʼin waaʼin saapaale wayuu tü karaloʼuta weitajakat. Nnojotpejeʼe saaʼinrüin tia wayuu süpüshuaʼa. Eeshii na nnojoliikana jamajatüin namüin tü sümakat tü Bibliakat. Eetaashii joo na asirajakana waka nalatapa waʼütpünaa, nnojotsü kasain saamüin tü sümakat tü Bibliakat naashin. Eetaashii joo na mojukana amüin tü sümakat tü Bibliakat süchiki tü nukuwaʼipainjatkat wanee wayuu. Naashin nayakana, icheshii süchiirua tü namakat na aaʼinrakana tü sümakat tü Bibliakat otta nayoutuin waneejatüin sukuwaʼipa wayuu. Mayaainjeʼe sülatüin tia, ayatüsia niʼreein amüin Jehová kekiin wayuu süpüshuaʼa. ¿Jamüsü sukuwaʼipa nutuma?

2. (1) ¿Kasa waaʼinrajatka süpüla kekiinjanain waya? (2) ¿Kasa saaʼinraka wainma wayuu?

² Müsü suʼwaatakai saaʼin tü kekiwaa nümaʼanajeetkat Jehová sükajee tü Bibliakat. Karaloʼutakat tüü eesü süpüla sümaʼanain wayuu süpüshuaʼa. ¿Kasa eeka süpüla waküjain süchiki tü karaloʼuta aashajaakat süchiki tü sümakat tü Bibliakat? Sükajee nükaalinjain waya Jehová, alatüsü suulia 1.000 anüikii süshajünaka aluʼu tia karaloʼutakalüirua. Na wayuu aashajeʼerakana tü sümakat tü Bibliakat sümaa tü karaloʼutairua akumajünakat sünainjee, anasü nakuwaʼipa sutuma naaʼinrüin tü sümakat. Wainmapejeʼe na wayuu nnojoliikana jamajatüin namüin tü kekiwaa nümaʼanajeejatkat Maleiwa. Jamüshiijaʼa naneeküinjanale wanee kasa, oʼunushii süchiirua tü anakat neʼe saaʼin namüin jee shiale noonooin sümaa sünüiki wayuu. Eeshiijaʼa süpüla letüin waya naaʼin saaʼujee woonooin sümaa tü sümakat tü Bibliakat. Sünain ekirajaayakat tüü, aashajaweena waya süchiki jamüin maka sukuwaʼipa wayuu wamüin. Anashii wekirajaale palajana kasain waaʼinrajatüin süpüla naapüin wamüin Jehová kekiwaa.

KEKIISHII WAYA SUTUMA TÜ ATÜJAA NAAPAKAT WAMÜIN JEHOVÁ

3. ¿Kasa waaʼinrajatka süpüla kekiinjanain waya?

³ Chi wayuu eekai kekiin, jülüjasü naaʼin tü nütüjaakalü aaʼu süchiki wanee kasa süpüla anain tü nüneekakat. Eepejeʼe sooʼomüin tü kasa naaʼinrajatkat. Müsü tü Bibliakat: «Süpüla kekiinjachin wanee wayuu, kojutuinjachi nümüin Jehová otta süpüla niyaawatüinjatüin saaʼu wanee kasa, niʼraajüinjachi chi Wulekai akuwaʼipa» (Prov. 9:10). Waneeküinjanale wanee kasa, wayaawatüinjatü saaʼu tü jülüjakat naaʼin Jehová. Wountuin tia, wekirajaale sünain tü sümakat tü Bibliakat jee tü karaloʼuta aküjakat süchiki tü sümakat. Waaʼinrüle tia, jaʼyeerü waaʼu kekiin waya (Prov. 2:5-7).

4. ¿Jamüsü watüjaaka saaʼu niain Jehová kanainjeejachin tü kekiwaakat?

⁴ Nia Jehová kanainjeejachikai tü kekiwaakat (Roma 16:27). ¿Jamüsü watüjaaka saaʼu tia? Palajana, saaʼujee nukumalain waya otta nütüjaa aaʼu kasa süpüshuaʼa süchiki tü kasa nukumalakat (Sal. 104:24). Piama, atüjaana aaʼuchi kekiin nia saaʼujee tü naaʼinrakat (Roma 11:33). Apünüin, anasü nakuwaʼipa na wayuu aaʼinrakana tü nümakat (Prov. 2:10-12). Kekiijeere maʼin waya, jülüjainjatü waaʼin tia apünüinsükat kasa otta wooʼulaainjatü suʼunirüin wakuwaʼipa.

5. ¿Kasa saaʼinraka wayuu süka nnojoluin shiyaawatüin saaʼu niain Jehová kanainjeejachin tü kekiwaakat?

⁵ Wainma na wayuu waküjakana amüin pütchi ayaawataka saaʼu anain maʼin sukumajia tü kasakalüirua, nnojotpejeʼe nanoujain sünain eein chi Kakumalakai tia. Eeshii na anoujakana nünain Maleiwa, nnojotpejeʼe kasain saamüin tü sümakat tü Bibliakat naashin otta oʼunushii naya süchiirua tü suchuntaakat naaʼin. ¿Anasüche sukuwaʼipa wayuu sutuma noʼunuin süchiirua tü namakat suulia noʼunuin süchiirua tü nümakat Maleiwa? ¿Shiimainche talatüin naaʼin? ¿Naʼatapajüinche aneerüin nakuwaʼipa watta kaʼi? Nnojottaa. Sünainjee tü weʼrakat, wayaawata aaʼu pansaain maʼin pütchikat tüü: «Nnojoishi eein wanee wayuu kekiikai maʼin jee ayaawatakai maʼin saaʼu wanee kasa eeka süpüla nütaʼülüin sukuwaʼipa tü nümakat Jehová» (Prov. 21:30). Sütütüleʼerüin waaʼin tia pütchikat süpüla ayatüin wachuntuin nümüin Jehová kekiwaa. Wainmapejeʼe wayuu nnojoliikana aaʼinrüin tia. ¿Jamüsü nnojotka naaʼinrüin tia?

¿JAMÜSÜ SHIYOUTAKA WAYUU TÜ KEKIWAA NÜMAʼANAJEEJATKAT MALEIWA?

6. Saashin Proverbios 1:22-25, ¿jaralii na macheʼekana sümüin tü kekiwaa aʼwaatakat?

⁶ Wainma na wayuu macheʼekana sümüin tü kekiwaa nümaʼanajeejatkat Jehová, tü aʼwaatakat kaayeruʼupünaa. Saashin tü Bibliakat apünüinsü shiʼipapaʼa wayuu ayoutaka tia kekiwaakat, nayajaʼa na «mayaawatüinkana» saaʼu nakuwaʼipa, na «katuraaraliikana» otta na «maaʼinkana aaʼin» (paashajeʼera Proverbios 1:22-25). Wekirajaa süchiki jamüin nayoutaka tü kekiwaa nümaʼanajeejatkat Maleiwa otta kasainjatüin waaʼinrüin suulia washatüin nakuwaʼipa.

7. ¿Jamüsü naneekaka waneinnua wayuu ayatüin nnojoluin nayaawatüin saaʼu nakuwaʼipa?

⁷ Na mayaawatüinkana saaʼu nakuwaʼipa naya na jookana süpüla emeejünaa (Prov. 14:15, noota). Wainma na wayuu waküjakana amüin pütchi makana akuwaʼipa. Shiimainña wattain naalii na wayuu emeejünakana natuma na shikiipüʼükana iküleesia jee nayale na políticokana. Eeshii na ayüülajaakana natüjaapa saaʼu nemeejünüin. Eekajasaʼa nakuwaʼipa na wayuu süküjakana achiki Proverbios 1:22, naneeküin süka naaʼin namüiwaʼa nnojoluin nayaawatüin saaʼu nakuwaʼipa (Jer. 5:31). Nacheküin naaʼinrüin tü suchuntaakat naaʼin, nayoutuin nekirajaain sünain tü sümakat tü Bibliakat otta nayoutuin naaʼinrüin tü nuluwataakalü anain Maleiwa. Wainma na wanaawakana aaʼin sümaa wanee wayuu oʼunaka suluʼu wanee iküleesia, kepiasü shia Quebec chaa Canadá. Müsü shia nümüin wanee Aküjai pütchi awaraijaaka saaʼu: «Nimeejülejeʼe waya chi sacerdotekai nia kasitka niakai, nnojoishii wayain kasirüin». Nnojotkalaka washateein amüin nakuwaʼipa na wayuu kapülakana aaʼin nemeejünüin (Prov. 1:32; 27:12).

8. ¿Kasa waaʼinrajatka süpüla kekiinjanain waya?

⁸ Müsüjeseʼe sütütüleʼerüin waaʼin tü Bibliakat süpüla nnojoluin joʼuweein waaʼin. Anuu wanee pütchi anasü süküjaka wamüin: «Juuʼulaa suulia joʼuweein jaaʼin. Shia anaka aluʼu jülaüleʼerüle jaaʼin» (1 Cor. 14:20). Kekiishii waya waaʼinrüle tü sümakat tü Bibliakat. Weʼreerü shiʼipaʼaya anain watuma süneekia wanee kasa wooʼulaale suʼunirüin wakuwaʼipa tü sümakat otta nnojoleerü waaʼinrüin kasa eekai mojuin. Süpüla watüjaain saaʼu wooʼulaale suʼunirüin wakuwaʼipa tü sümakat tü Bibliakat, anasü wasakirüle waaʼin süchiki tü kasa waneekakat. Kakaliaichire pikirajaain sünain tü Bibliakat jee puutkajaain namaa na wawalayuukana, anasü püsakirüle paaʼin jamüin nnojoika woutiisain pia. Woutiisaichire pia, ¿tütüshiche pia sünain aküjaa pütchi jee ekirajaa wayuu? ¿Jaʼyasüche paaʼu sükajee tü kasa püneekakat puuʼulaain suʼunirüin pukuwaʼipa tü sümakat tü Bibliakat? ¿Anasüche pukuwaʼipa namaa na waneinnua maʼaka naaʼinrüin shia Jesús? Wayaawatüle saaʼu wanouteʼerüinjatüin wanee kasa sünain wakuwaʼipa, jülüja waaʼin «tü pütchi nüsoʼirakalü anain waaʼin Jehová», tü kekiijeechikalü atuma wanee wayuu (Sal. 19:7).

9. ¿Jamüsü sütüjaanaka aaʼu nayoutuin tü kekiwaa nümaʼanajeejatkat Jehová «na katuraaraliikana»?

⁹ Tü piamakat shiʼipapaʼa wayuu ayoutaka tü kekiwaa nümaʼanajeejatkat Maleiwa, naya «na katuraaraliikana». Eeshii waküjale pütchi namüin wayuu makana akuwaʼipa. Kamalainsü namüin nemeeʼerainpalain wayuu (Sal. 123:4). Süküjain tü Bibliakat wainmeenain na wayuu nemeeʼerainpaleenakana waya sülüʼütpa sükalia süpüla sajaʼttüin tü kasa mojusükat (2 Ped. 3:3, 4). Maaʼulu yaa, wainma wayuu nnojoliikana jaa namüin nümüin Maleiwa maʼaka nnojoliin naaʼinrüin shia na kasaalüinjanakana sümaa nüchonnii Lot (Gén. 19:14). Shime’erainpalashii wainma wayuu na oonookana sümaa tü sümakat tü Bibliakat. Naaʼinrüin tia süka naleʼeruʼuin tü kaainjalaakat (Jud. 7, 17, 18). Wanaawasü tü sümakat tü Bibliakat nachiki na wayuu katuraaraliikana namaa na ayoutakana Jehová otta namaa na ooʼulaakana suulia aʼwaajaa Jehová süpüleerua ekirajaa alawaa.

10. Saashin Salmo 1:1, ¿kasa waaʼinrajatka suulia washatüin nakuwaʼipa na katuraaraliikana?

¹⁰ ¿Kasa waaʼinrajatka suulia washatüin nakuwaʼipa na katuraaraliikana? Wanee kasa waaʼinrajatka shia nnojoliinjanain waʼaleewajaain namaa na wayuu kaʼyounaraliikana (paashajeʼera Salmo 1:1). Müsüjeseʼe nnojoluin waashajeʼerüin jee waapajüin wanee kasa naküjaka na ooʼulaakana suulia aʼwaajaa Jehová süpüleerua ekirajaa alawaa. Nnojorüle eejüin waaʼin, eeshii süpüla wayoʼunnalaain namüin na wawalayuukana jee wainmajüin waaʼin sünain tü nümakat Jehová jee sünain tü nuluwataakalü anain waya nakajee na wawalayuukana. Suulia müin wakuwaʼipa, anasü wasakirüle waaʼin sünain tüü: «¿Mojuwaisüche tanüiki wanaa sümaa süpansaajünüin wanee pütchi jee shiale waluwataanüin sünain aaʼinraa wanee kasa jeketü? ¿Jülüjasüche taaʼin waneepia tü kasa mojukat natuma na laülaashiikana wapüleerua?». Wanouteʼeramaatüle tia sünain wakuwaʼipa, talateerü maʼin naaʼin Jehová wamaa (Prov. 3:34, 35).

11. ¿Kasa naküjaka na maaʼinkana aaʼin süchiki tü nuluwataakalü anain Jehová?

¹¹ Tü apünüinkat shiʼipapaʼa wayuu ayoutaka tü kekiwaa nümaʼanajeejatkat Jehová, naya «na maaʼinkana aaʼin». Münüshii naya mayaa süka nayoutuin wulein nakuwaʼipa wanaapünaa sümaa tü nuluwataakalü anain Maleiwa. Shia naaʼinraka tü anakat neʼe noʼuluʼu (Prov. 12:15). Nayoutuin Jehová, chi kanainjeejachikai tü kekiwaakat (Sal. 53:1). Waküjapa pütchi namüin, mojusü nanüiki wamüin süka waaʼinrüin tü sümakat tü Bibliakat. Eekajasaʼa waaʼinrüle tü namakat, mojeerü wakuwaʼipa. Anuu sünüiki tü Bibliakat: «Nnojotsü aapünüin kekiwaa nümüin chi malakai, nnojotsü kasain eein süpüla nüküjain soʼuluʼu tü pueulokot» (Prov. 24:7). Chi maaʼinkai aaʼin, nnojotsü süpüla nüküjain wamüin wanee pütchi anainjatka atuma wakuwaʼipa, müsüjeseʼe nüküjain Jehová nnojoluin anain waʼaleewajaale nümaa chi makai akuwaʼipa (Prov. 14:7).

12. ¿Kasa waaʼinrajatka suulia majüin wakuwaʼipa maʼaka naaʼin na maaʼinkana aaʼin?

¹² Naata wakuwaʼipa noulia na mojutukana amüin tü nuluwataakalü anain Maleiwa. Kojutusü wamüin tü jülüjakat naaʼin Jehová süchiki wanee kasa otta tü pütchi nuluwataakalü anain. Kojuteerü maʼin wamüin tia, jülüjale waaʼin tü kasa anasü weʼrakat sutuma waaʼinrüin tü nümakat Jehová otta tü kasa mojusü neʼrakat na nnojoliikana aaʼinrüin tia. Na ayoutakana wulein nakuwaʼipa wanaapünaa sümaa tü nuluwataakalü anain Jehová, eʼrüshii maʼin naya müliaa. Eekajasaʼa wayakana, anasü wakuwaʼipa sutuma woonooin sümaa tü nuluwataakalü anain Jehová (Sal. 32:8, 10).

13. ¿Nüpüleeruasüche waaʼin Jehová süpüla jaa müin waya sümüin tü kekiwaa nümaʼanajeejatkat?

¹³ Mayaainjeʼe keeʼireein naaʼin Jehová kekiinjatüin wayuu süpüshuaʼa, nnojotsü nüpüleeruain naaʼin süpüla müinjatüin nakuwaʼipa. Nüküjapejeʼe tü alatüinjatkat namüin na nnojoliikana jaa müin sümüin tü kekiwaa nümaʼanajeejatkat (Prov. 1:29-32). Na aneekakana moonooin sümaa tü nünüikikat Jehová, nayeena kasitka tü alatakat namüin. Sutuma müin nakuwaʼipa, eʼreena naya müliaa otta ajaʼttinneena naya. Anuupejeʼe tü kasa anasü neʼrakat na oonookana sümaa tü nuluwataakalü anain Jehová: «Eekajasaʼa chi oonookai sümaa tanüiki, nnojoleechi jamajüin nia otta nnojoleechi mmoluin nia sülatüle kasa mojusü nümüin» (Prov. 1:33).

ANASÜ WAKUWAʼIPA SUTUMA TÜ KEKIWAA NÜMAʼANAJEEJATKAT MALEIWA

14, 15. ¿Kasa watüjaka sünainjee tü sümakat Proverbios 4:23?

¹⁴ Aneerü wakuwaʼipa waneepia waaʼinrüle tü nuluwataakalü anain Jehová. Wekirajaaitpa anain eein süpüla sütüjaain saaʼu wayuu süpüshuaʼa tü nuluwataakalü anain Jehová. Suluʼu tü karaloʼutakat Proverbios, eesü wainma pütchi jalouika maʼin sümüin wayuu süpüshuaʼa. Wekirajaa sünain pienchisü pütchi neʼe suluʼujee tia karaloʼutakat.

¹⁵ Waaʼinmaja tü waaʼinkat. Anuu sünüiki tü Bibliakat: «Paaʼinmaja tü paaʼinkat suulialeʼeya kasa süpüshuaʼa süka kateerüin poʼu sünainjee» (Prov. 4:23). Tü waaʼinrakat suulia ayuulin waya, meematüsü aka saaʼin tü waaʼinrakat suulia mojuin tü suluʼukat waaʼin. Jamüshiijaʼa waya, anasü weküin, aainjashii waya ejercicio otta eejüsü waaʼin suulia waaʼinrüin wanee kasa ayuuijeenaka atuma waya. Süpüla anain tü suluʼukat waaʼin, waashajeʼerüin tü Bibliakat weinshi, yapasü watuma tü wekirajaainjatkalü anain sünain tü outkajawaakat, oʼunushii waya sünain otta asoutushii waya shiʼipajee tü pütchi asakinnakat sünain. Süpüla ayatüin anain tü suluʼukat waaʼin, aküjashii waya pütchi semaanawai. Eejüsü waaʼin suulia tü kasa amojujeʼereetkat tü suluʼukat waaʼin, maʼaka saaʼin tü kasa mojusü anajünakat otta tü aapajünakat otta waʼaleewajaale namaa na wayuu mojukana akuwaʼipa.

16. ¿Jamüsü jalouika maʼin wamüin tü sümakat Proverbios 23:4, 5?

¹⁶ Talata waaʼin sümaa tü kasa eekat wamaʼana. Anuu sünüiki tü Bibliakat: «Nnojo kachiiruain paaʼin tü washirüükat [...]. Piirakaapa sümüin yüüʼülaa meerü shia, meerü sujuʼitakai saaʼin sütüna maʼaka saaʼin sütüna warulapai, suwateetka iipünaamüin» (Prov. 23:4, 5). Tü kasa sümaʼanakat wayuu, eesüjaʼa süpüla yüüʼülaa sümeerüin soʼu wanee kaʼi. Mayaainjeʼe müin tia, kachiiruasü saaʼin wayuu nakanajüin wainma nneerü jaʼitainna washirüin jee maʼletsein naya. Sutuma naaʼinmaain maʼin tia, nnojotsü kasajatüin namüin mojuin sünüiki wayuu nachiki, namojujain nakuwaʼipa namaa na waneinnua jee ayuulin naya (Prov. 28:20; 1 Tim. 6:9, 10). Eekajasaʼa wayakana, nnojotsü waaʼinmaain maʼin tü nneetkat sutuma tü sümakat tü Bibliakat. Sutuma tia, talatüshii waya sümaa tü kasa eekat wamaʼana suulia kachiiruain waaʼin kamaʼanaa wainma kasa (Ecl. 7:12).

17. ¿Kasa waaʼinrajatka süpüla watütüleʼerüin naaʼin na waneinnua sükajee wanüiki maʼaka süküjain Proverbios 12:18?

¹⁷ Jülüja waaʼin tü wanüikinjatkat süpülapünaa waashajaain. Nnojorüle waaʼinrüin tia, eesü süpüla mojuin saaʼin wayuu watuma. Anuu tü sümakat tü Bibliakat: «Eeshi chi eekai mayaawajaain saaʼu nünüiki, müshi nusotokai saaʼin wayuu süka shiʼichi chajaruuta, akaajasaʼa sutuma nanüiki na kekiikana maʼin aawalaasü saaʼin wayuu» (Prov. 12:18). Nnojorüle waküjakuʼu sümüin süchiki tü kasa mojukat natuma na waneinnua, anajiraajeena waya namaa (Prov. 20:19). Süpüla anain saaʼin wayuu sutuma tü wamakat, anasü waashajeʼerüle tü Bibliakat sümaa wasakireʼerüin waaʼin sünain (Luc. 6:45). Jülüjale maʼin waaʼin tü sümakat tü Bibliakat, waküjeerü pütchi namüin na waneinnua atütüleʼereetka naaʼin (Prov. 18:4).

18. ¿Jamüshii watüjeenaka aküjaa pütchi otta ekirajaa wayuu waaʼinrüle tü sümakat Proverbios 24:6?

¹⁸ Waaʼinra tü münakat wamüin. Anuu wanee pütchi süküjaka wamüin tü Bibliakat: «Aneerü sukuwaʼipa putuma tü atkawaakat pükaalinjünüle natuma na atüjashiikana. Wainmale na wayuu aküjakana tü aainjünajatkat, akanajeechi pia» (Prov. 24:6, noota). Waaʼinrüle tü sümakat pütchikat tüü, atüjeena waya aküjaa pütchi otta ekirajaa wayuu. Waaʼinra tü eʼitaanakat wapüleerua süpüla watüjain aküjaa pütchi otta ekirajaa wayuu, nnojo waaʼinrüin tü anakat neʼe saaʼin wamüin. Ekirajünüshii waya sünain tü outkajawaakat, aküjünüsü wamüin pütchi suluʼujee tü Bibliakat otta eeʼiyatünüsü sukuwaʼipa wamüin tü waaʼinrajatkat sünain aküjaa pütchi otta ekirajaa wayuu. Neʼitaain na wawalayuukana karaloʼutairua otta video süpüla nayaawatüinjatüin saaʼu na wayuukana tü sümakat tü Bibliakat. ¿Watüja apüleeruatche tü eʼitaanakat wapüleerua süpüla watüjain aküjaa pütchi otta ekirajaa wayuu?

19. ¿Jamüsü paaʼin sutuma tü kekiwaa nümaʼanajeejatkat Jehová? (Proverbios 3:13-18).

¹⁹ (Paashajeʼera Proverbios 3:13-18). Talatüsü waaʼin sutuma tü kekiwaa nümaʼanajeejatkat Maleiwa aküjünaka suluʼu tü Bibliakat. Nnojotsüjeʼe anain wakuwaʼipa müleka nnojorüle jülüjain shia waaʼin. Sünain ekirajaayakat tüü, wekirajaa anainrü waneirua kasa suluʼujee tü karaloʼutakat Proverbios süchiki tü kekiwaa nümaʼanajeetkat Maleiwa. Nüküjainña wamüin Jehová wainma pütchi anasü suluʼu tü Bibliakat. Waaʼinra tü nümakat wamüin sünain süpüshuaʼa wakuwaʼipa. Nnojotsü jülüjain waaʼin tü namakat na ayoutakana tü kekiwaa nümaʼanajeejatkat Jehová. Watüjaa aaʼu talateerüin maʼin naaʼin na achecheraakana süchiirua tia kekiwaakat.