Eeja waaʼin suulia kaainjalajüin waya

1, 2. (1) ¿Kasa nüküjaka Jesús namüin na nikirajüinkana süpüla eejüinjatüin naaʼin? (2) ¿Jamüsü naaʼinrakaʼa na nikirajüinkana Jesús wanee kasa mojusü? (Piirakaa sümüin tü ayaakuaakat).

«MAYAAPEJEʼE naaʼinreein maʼin wanee wayuu wanee kasa, eesüjaʼa matsüinre niʼiruku süpüla naaʼinrajatüin shia» (Mat. 26:41₂).a Sükajee tia pütchikat watüjaa aaʼulu niyaawatüin saaʼu Jesús waleʼeruʼuin süchiki kaainjalaa otta eein süpüla woʼtchejaain sümaa wanee kasa. Sükajee tü nümakat Jesús wayaawata aaʼulu eejüinjatüin waaʼin suulia wekiiruʼuin nnojoleerüin waaʼinrüin kasa mojusü süka anain maʼin wanoula. Süpülapünaa nüküjain Jesús pütchikat tia, naküjain na nikirajüinkana nümüin nnojoleechin napütüin nia nümüiwaʼa (Mat. 26:35). Shiimain naaʼinreein maʼin tia, nnojotpejeʼe nayaawatüin saaʼu kapüleejeerüin nümüin wanee wayuu naaʼinrüin kasa anasü süpüleeruaanüle naaʼin. Müshijeseʼe nümüin Jesús namüin: «Nnojo jutunkajüin, shia anaka aluʼu juʼuraajüle waneepia suulia suuʼulakünüin jaaʼin» (Mat. 26:41₁).

² ¿Kasa naaʼinraka na nikirajüinkana Jesús wanaa sümaa nütaʼünüin? Nnojotsü eejüin naaʼin süpüla tü ooʼulakünakalü aka naaʼin. Müshijeseʼe napütüin Jesús nümüiwaʼa. Naaʼinrüin tü nnojoluinjatkat naaʼinrüin naashin (Mat. 26:56).

3. (1) ¿Kasa nnojoluinjatka jülüjain waaʼin süpüla waneepiain waya nümaa Jehová? (2) ¿Kasa wekirajaainjatka anain sünain ekirajaayakat tüü?

³ Nnojotsü anain jülüjale waaʼin nnojoleerüin waaʼinrüin kasa eekai mojuin süka anain wanoula. Wayouta achiki waaʼinrüin wanee kasa akayaleʼereenaka waya nuulia Jehová, eepejeʼe süpüla suchuntaain waaʼin kasa mojusü süka waleʼeruʼuin süchiki kaainjalaa (Roma 5:12; 7:21-23). Eesüjaʼa süpüla süntajaain suluʼu waaʼin waaʼinreein wanee kasa mojusü kapüleejeetka wamüin wachecherüin oulia waaʼin. Waneepieere waya nümaa Jehová otta Jesús waaʼinreerü tü nümakat Jesús süpüla eejüinjatüin waaʼin suulia kaainjalajüin waya. Shia wekirajaainjatka anain tia sünain ekirajaayakat tüü, wekirajaajeerü anain tü kasa eejüinjatkalü oulia waaʼin, tü waaʼinrajatkat suulia kaainjalajüin waya otta tü waaʼinrajatkat süpüla nnojoluin jülüjain waaʼin nnojoleerüin waaʼinrüin wanee kasa eekai mojuin.

TÜ KASA EEJÜINJATKALÜ OULIA WAAʼIN

4, 5. Mayaainjeʼe eein kasa nnojotka mojuin maʼin, ¿jamüsü eejüinjatkaʼa waaʼin suulia?

⁴ Mayaainjeʼe eein waneirua kasa nnojotka mojuin maʼin eesü süpüla sumojujaain wakuwaʼipa nümaa Jehová otta kaainjalain waya sutuma.

⁵ Ooʼulakünüsü waaʼin wapüshuaʼa, naatawaisü tü kasa ooʼulakünakalü aka waaʼin waneʼewai wakua. Eeshii na achechetkana naaʼin suulia naaʼinrüin kasa eekai mojuin maʼin maʼaka saaʼin tü aʼluwajirawaakalü akuwaʼipaa. Eeshii na achechetkana naaʼin suulia yarüttüin nakuwaʼipa maʼaka saaʼin suulia namülejüin nakorolo otta suulia nanajüin shiyaakua wayuu masheʼinsat. Eeshiʼiya na achechetkana naaʼin suulia jashiee, suulia neimmolojooin seema wayuu otta suulia neʼrüliijaain wayumüin. Anuu nünüiki Santiago: «Shiainjaʼaya ooʼulaküin naaʼin wanee wayuu tü kasa suchuntaakaliaʼaya neʼe naaʼin otta müshi nütaʼünakai aaʼin sutuma» (Sant. 1:14).

6. ¿Kasa wayaawatüinjatka sünain wakuwaʼipa?

⁶ Anasü piyaawatüle saaʼu tü kasa mojusü suchuntaakat paaʼin süpüla eejüin paaʼin suulia mojuin pukuwaʼipa (1 Juan 1:8). Naashin Pablo na laülaakana aaʼin sünain anoujaa jülüjeesü naaʼin nakuwaʼipa suulia naainjain kasa mojusü (Gal. 6:1). Anasü wayaawatüle saaʼu tü kapüleekat wamüin süpüla wachecherüin waaʼin suulia. Waaʼinrüle tia nnojoleena waya emeejiraain (2 Cor. 13:5).

7. ¿Kasa eejüinjatka oulia waaʼin? Püküja wanee sukuwaʼipa.

⁷ ¿Kasa waaʼinrajatka wayaawatapa saaʼu tü kapüleekat süpüla wachecherüin oulia waaʼin? Jamüsüjaʼa sümaiwa yaletapuʼusü maʼin süsepü tü pueulokot. Müleka sushutunule saaʼu, shia aaʼinmaanaka maʼin tü soʼukot natuma na naʼünüükana. Müsüjeseʼe saaʼinmajünüin maʼin tü soʼukot natuma na surulaatkana. Müsia neʼe wakuwaʼipa, süpüla nnojoluinjatüin waaʼinrüin tü kasa kaainjaleenakalü atuma waya wayaawatüinjatü saaʼu tü kasa mojusü suchuntaakat waaʼin (1 Cor. 9:27).

WAAʼINRAJATKA SUULIA KAAINJALAIN WAYA

8, 9. ¿Kasa naaʼinrajatka chi jimaʼai ashajünakai achiki suluʼu Proverbios kapiitulo 7 suulia kaainjalajüin nia? (Proverbios 7:8, 9, 13, 14, 21).

⁸ ¿Kasa waaʼinrajatka suulia kaainjalajüin waya? Anashii wekirajaale sünain tü ashajünakat suluʼu Proverbios kapiitulo 7. Aashajaasü nüchiki wanee jimaʼai aʼluwajiraaka nukuwaʼipa sümaa wanee wayuu maaʼinsat. Saashin tü wetsiikulokot 22 oʼunamaatüshi chi jimaʼaikai süchiirua tia wayuukot. Süpülapünaa tia wetsiikulokot ashajünüsü waneirua kasa naaʼinraka palajana süpülapünaa kaainjalain nia.

⁹ ¿Kasa naaʼinraka palajana chi jimaʼaikai süpülapünaa kaainjalain nia? Alatüshi shipiyuujaapa suluʼupünaa tü kaayekat eere kepiain tü wayuukot. Lotoko nia shipialuʼumüin (paashajeʼera Proverbios 7:8, 9). Niʼrapa tia wayuukot nnojoishi nia ouyanajaayaain nüchikuaʼa, eetaayaai nuʼunuin suulia. Anaka naaʼin sutuma sutuʼluin nia, süküjaka nümüin süchiki tü süsülajakat nümüin Maleiwa süpüla nülatirüinjatüin sooʼopünaa naaʼin saainjala (paashajeʼera Proverbios 7:13, 14, 21). Nnojoirejeʼe nuʼunuin chia jimaʼaikai eepünaale kepiain tü wayuukot nnojoishijeʼe kachajaalain nia jee kaainjalain nia.

10. ¿Kasa eeka süpüla kaainjalain atuma wanee wawala?

¹⁰ Eesü süpüla sülatüin nümüin wanee wawala tü alatakat nümüin chia jimaʼaikai. «Nnojotsü teʼitaain saaʼu kaainjalainjachin taya», eeshijaʼa nümüle wanee wawala kaainjalapa nia. Jülüjale naaʼin nukuwaʼipa paala eesüjaʼa niyaawatüle saaʼu naaʼinrüin waneirua kasa kaainjalaka atuma nia. Eeshijaʼa naʼaleewajaale nümaa wanee wayuu mojukai akuwaʼipa jee nünajüle wanee paajina suluʼupünaa internet nnojotka anain süpüla niʼrajüin. Eeshijaʼa nuuʼulaale suulia oʼuraajaa, suulia aashajeʼeraa tü Bibliakat, suulia oʼunaa sünain tü outkajawaakat jee suulia aküjaa pütchi. Kaainjalashi nia sutuma nnojoluin eejüin naaʼin maʼaka nnojoluin eejüin naaʼin chi jimaʼaikai suulia tü kasa kaainjalakalü atuma nia.

11. ¿Kasa eejüinjatka oulia waaʼin suulia kaainjalajüin waya?

¹¹ ¿Kasa watüjaka sünainjee tü alatakat nümüin chi jimaʼaikai? Nnojotsü neʼe wayoutajatüin tü kaainjalaakat, wayoutajatiaʼaya waaʼinrüin waneirua kasa kaainjaleenaka anainjee waya. Shia nikirajeeka anain Salomón wanaa sümaa naashajaain nüchiki chi jimaʼaikai sümaa tü wayuu maaʼinsatkat. Anuu nünüiki Salomón nümüin chi jimaʼaikai: «Nnojo puʼunuin suluʼupünaa tü süpünakat» (Prov. 7:25). Anuu tü naaʼinrajatkat naashin Salomón: «Wattaluʼu pia suulia otta jalia pürütkajaayai sünain shipia» (Prov. 5:3, 8). Jülüjeesü waaʼin wakuwaʼipa suulia waaʼinrüin wanee kasa kaainjaleenaka atuma waya.b Eesü waneirua kasa nnojotka mojuin naaʼinraka waneinnua wawalayuu jee nnojoleenaka kaainjalain atuma naya. Eesüjaʼa waneeküle nnojoluin waaʼinrüin waneirua kasa anaka namüin na waneinnua süka naatawalin tü wachecherakalü oulia waaʼin (Mat. 5:29, 30).

12. Sünainjee tü sümakat Job 31:1, ¿kasa naaʼinraka Job suulia naaʼinrüin tü kasa mojusü suchuntaakat naaʼin?

¹² Washata nukuwaʼipa Job, wayouta waaʼinrüin waneirua kasa kaainjaleenaka atuma waya (paashajeʼera Job 31:1). Sutuma jülüjain maʼin naaʼin nukuwaʼipa Job, nnojoishi aʼluwajiraain nukuwaʼipa. Müshiʼiya wayakana anasü jülüjale maʼin waaʼin wakuwaʼipa suulia waaʼinrüin tü kasa mojusü suchuntaakat waaʼin.

13. ¿Jamüsü eejüinjatkaʼa waaʼin suulia tü jülüjakat waaʼin? (Piirakaa sümüin tü ayaakuaakat).

¹³ Jalia waya suulia tü jülüjakat waaʼin (Éx. 20:17). Eeshii eekai namüin nnojoluin mojuin jülüjale naaʼin wanee wayuu kasa mojusü sümaa nnojoluin naaʼinrüin shia, emeejiraapejeʼe waya jülüjale waaʼin tia. Jülüjakuʼu müle waaʼin waneepia kasa mojusü suchuntaajeerü maʼin waaʼin waaʼinrüin shia, kachajaaleena waya waaʼinrüle tia. ¿Kasa waaʼinrajatka süntajaale kasa mojusü wekiiruʼu? Wasünneʼeramaatüinjatü shia. Anasü jülüjale waaʼin wanee kasa anasü soʼu tia suulia suchuntaain waaʼin waaʼinrüin kasa mojusü, tü kaainjaleenakalü atuma waya (Filip. 4:8; Col. 3:2; Sant. 1:13-15).

14. ¿Kasa amaa waaʼinrajatka suulia kaainjalajüin waya?

¹⁴ ¿Kasa amaa waaʼinrajatka suulia kaainjalajüin waya? Wayaawatüinjatü saaʼu aneerüin wakuwaʼipa waneepia waaʼinrüle tü nuluwataakalü anain Jehová. Eesüjaʼa süpüla kapüleʼewalin wamüin pansaain tü jülüjakat waaʼin otta tü keeʼireekat waaʼin sümaa tü nüchekakat Jehová wapüleerua. Jimateetpejeʼe waaʼin waaʼinrüle tia.

15. ¿Jamüsü aneetkaʼa wakuwaʼipa wulere tü suluʼukat waaʼin?

¹⁵ Wachajaainjatü sukuwaʼipa süpüla wulein tü suluʼukat waaʼin, wacheküinjatü waaʼinrüin kasa anasü otta wayoutuinjatü waaʼinrüin kasa mojusü (Amós 5:15). Waaʼinrüle tia kamalainjeerü wamüin waaʼinrüin tü nüchekakat Maleiwa otta nnojoleerü waaʼinrüin wanee kasa kaainjaleenaka atuma waya. Wachechereetkalaka maʼin waaʼin sülatalaʼa sümüle wamüin wanee kasa kaainjaleenaka atuma waya.

16. ¿Jamüsü eejeetkaʼa waaʼin waaʼinmaale tü anainjatkalü atuma wanoula? (Piirakaa sümüin tü ayaakuaakat).

¹⁶ ¿Kasa waaʼinrajatka süpüla wulein tü suluʼukat waaʼin? Waaʼinmaainjatü tü anainjatkalü atuma wanoula. Kamalainjeerü maʼin wamüin waaʼinrüin tü nüchekakat Jehová woutkajaale jee waküjale pütchi. Wanaa sümaa waaʼinrüin tia eesü süpüla wachecherüin waaʼin suulia kaainjalajüin waya (Mat. 28:19, 20; Heb. 10:24, 25). Wachekeerü waaʼinrüin kasa anasü waashajeʼerüle tü Bibliakat sümaa wasakireʼerüin waaʼin sünain otta wayouteerü waaʼinrüin kasa eekai mojuin (Jos. 1:8; Sal. 1:2, 3; 119:97, 101). Soto waaʼin tü nümakat Jesús: «Nnojo jutunkajüin, shia anaka aluʼu juʼuraajüle waneepia suulia suuʼulakünüin jaaʼin» (Mat. 26:41). Woʼuraajüle waneepia nümüin chi Washi iipünaajachikai nükaalinjeena waya otta talateechi nia watuma (Sant. 4:8).

JÜLÜJEESÜ MAʼIN WAAʼIN WAKUWAʼIPA WANEEPIA

17. ¿Kasa kapüleʼewaika nümüin Pedro?

¹⁷ Eesüjaʼa wanouteʼerüle wanee kasa isapuʼuka wachiki wachecherüin oulia waaʼin, eepejeʼe süpüla eeyülüinña waneirua kasa isaka wachiki wanouteʼerüin. Majatü nukuwaʼipa chi aluwataaushikai Pedro, mmotshi nia seema wayuu, apünüintua nüküjain nnojolin niʼraajüin Jesús (Mat. 26:69-75). Kakalia mapa meimmoluinsai nia sünain aashajawaa namüin na wayuu yalajanakana suluʼu tü kanüliakat Sanedrín. Eesüjaʼa nuuntuirüle nüchecherüin naaʼin suulia mmoluin nia seema wayuu (Aluw. 5:27-29). Maʼaka jeʼra juya süchikijee tia, «ooʼulaashi suulia ekawaa namaa [na wayuu nnojoliikana judíoin] otta nükatalaaka noulia suulia mojushiijüin tia namüin na wayuu antapaakana, na achoteʼerakana süta nakorolo» (Gal. 2:11, 12). Jaʼyasü naaʼu ayatayülüinña mmoluin nia seema wayuu, nnojotpejeʼe watüjaain saaʼu müle nukuwaʼipa waneepia.

18. ¿Jamüsü jülüjainjatkaʼa maʼin waaʼin wakuwaʼipa suulia tü kasa mojusü wachecherüinjatkalü oulia waaʼin?

¹⁸ Eesüjaʼa wachecherüinjatüle waaʼin suulia wanee kasa mojusü wooʼulaayaakai oulia waaʼinruʼu. Müshi wanee wawala: «Anajapuʼushi taya paala shiyaakua wayuu masheʼinsat. Ooʼulaayaashi taya taaʼinruʼu suulia tia süka eeitpain maʼaka 10 juya nnojoluitpain teʼrajüin shia. Ayatapejeʼe suchuntaain taaʼin tanajeein shia süchikuaʼa, müsü aka saaʼin wanee wüchii jashichisü awateeka tooʼomüin». Niyaawatüin chi wawalakai ayatüinjatüin nüchecherüin naaʼin suulia nünajüin shiyaakua wayuu masheʼinsat waneʼereeya lotopa nukuwaʼipa nutuma Maleiwa. Sükaalinjain nia tü nuʼwayuusekat otta na laülaashiikana süpüla eejüinjatüin naaʼin suulia nünajüin shiyaakua wayuu masheʼinsat.

19. Ayatülejeʼeya isain wachiki wachecherüin waaʼin suulia wanee kasa mojusü suchuntaaka waaʼin, ¿kasa waaʼinrajatka suulia kaainjalajüin waya?

¹⁹ Ayatülejeʼeya isain wachiki wachecherüin waaʼin suulia wanee kasa mojusü suchuntaaka waaʼin, ¿kasa waaʼinrajatka suulia kaainjalajüin waya sutuma? Jülüja waaʼin tü nümakat Jesús wanaa sümaa nümüin: «Nnojo jutunkajüin». Jaʼitairü nnojoluitpain waaʼinrüin wanee kasa mojusü waaʼinrapuʼuka, ayataʼaya wayoutuin waaʼinrüin wanee kasa waaʼinreeka atuma shia (1 Cor. 10:12). Ayataʼaya paaʼinrüin tü kasa achecherüinjatkat paaʼin suulia paaʼinrüin tü kasa mojusü suchuntaakat paaʼin. Müsü Proverbios 28:14: «Talatüsü naaʼin wanee wayuu müleka eejüle naaʼin waneepia» (2 Ped. 3:14).

EʼREENA WAYA KASA ANASÜ JÜLÜJALE WAAʼIN WAKUWAʼIPA

20, 21. (1) ¿Kasa weʼreetka jülüjale waaʼin wakuwaʼipa suulia kaainjalajüin waya? (2) ¿Kasa naaʼinreetka Jehová wapüleerua wachecherüle waaʼin suulia waaʼinrüin tü kasa kaainjaleenakalü atuma waya? (2 Corinto 4:7).

²⁰ Eʼreenaʼaya waya kasa anasü jülüjale waaʼin wakuwaʼipa suulia kaainjalajüin waya. Alanaʼaleejeeria tü kasa anasü weʼreetkat sutuma waaʼinrüin tü nuluwataakalü anain Maleiwa suulialeʼeya talatüin waaʼin motsomüin neʼe sünain aaʼinraa kasa mojusü (Heb. 11:25; Sal. 19:8). Nukumajüin waya Maleiwa süpüla waaʼinrüin tü nüchekakat wapüleerua (Gén. 1:27). Waaʼinrüle tü nüchekakat Maleiwa, jimateerü waaʼin otta kateerü woʼu süpüla kaʼikat süpüshuaʼa (1 Tim. 6:12; 2 Tim. 1:3; Jud. 20, 21).

²¹ Mayaainjeʼe waleʼeruʼuin süchiki kaainjalaa nükaalinjeena waya Jehová süpüla waaʼinrüin kasa anasü (paashajeʼera 2 Corinto 4:7). Isasüjeʼe wachiki wountuin tia nnojoliireje nükaalinjain waya Maleiwa sükajee tü nüpülainkat. Süpüla naapüin wamüin Maleiwa tü nüpülainkat jaʼyainjatü waaʼu wachecherüin waaʼin suulia waaʼinrüin wanee kasa kaainjaleenaka atuma waya. Nükaalinjeenakalaka waya wachuntapa kaalinwaa nümüin (1 Cor. 10:13).