¿Ojuʼitüsüche naaʼin wanee wayuu outapa nia?

Eesüjaʼa mojule maʼin paaʼin nünaajaale wanee püpüshi. «Ojuʼitüsüche tü naaʼinkat? ¿Teʼreenache naya nachikuaʼa?» eesüjaʼa müle pünüiki. Sünain ekirajaayakat tüü jee sünain ekirajaaya 30, wekirajaweerü anain tü sümakat tü Bibliakat süchiki tia jee aneerü maʼin waaʼin watüjaapa saaʼu.

1. ¿Ojuʼitüsüche naaʼin wanee wayuu outapa nia?

Tü outaakat müsü aka saaʼin atunkaa maʼin naashin Jesús. Nutunkapa maʼin wanee wayuu, nnojotsü kasain nütüjaain aaʼu. ¿Jamüsü makaʼa aka saaʼin atunkaa tü outaakat? Outapa wanee wayuu nnojotsü kasain nütüjaain aaʼu otta nnojotsü niʼrüin nümüliala. «Nnojorüleesia kasain natüjaain aaʼu süka outuinnapain naya» müsü tü Bibliakat nachiki na outushiikana (paashajeʼera Eclesiastés 9:5).

2. ¿Jamüsü aneetka waaʼin watüjaapa saaʼu tü sümakat tü Bibliakat nüchiki wanee wayuu outapa nia?

Wainma na wayuu mmotkana seema outaa jee neema na outushiikana. Aneetpejeʼe paaʼin pütüjaapa saaʼu tü sümakat tü Bibliakat nüchiki wanee wayuu outapa nia. «Jiyaawateerü aaʼu tü shiimainkat süpüla jujuittüinjanain sütüma suulia achepchiaa» müshi Jesús (Juan 8:32). Naashin na suluʼukana waneirua iküleesia, ojuʼitüsü naaʼin wanee wayuu outapa nia. Nnojotpejeʼe süküjain tia tü Bibliakat. Outapa wanee wayuu, nnojotsü kasain nütüjaain aaʼu, nnojoishii süpüla jamajüin waya nutuma otta nnojotsü niʼrüin nümüliala, müsüjeseʼe nnojoluin choʼujaain waresaain naaʼu jee waaʼinrüin waneirua kasa nikiira.

Eeshii na wayuu aashajaakana naashin namaa na outushiikana, alawaapejeʼe tia. Watüjaaitpa aaʼu nnojoluin «kasain natüjaain aaʼu süka outuinnapain naya». Na wayuu aashajaakana naashin namaa na outushiikana, naya naashajaakana ama na yolujaakana, nayayaashii neʼe na outushiikana. Watüjaapa saaʼu nnojoluin sujuʼitüin naaʼin wanee wayuu outapa nia, nnojoleena waya jamajüin natuma na yolujaakana. Nüküjain wamüin Jehová nnojoliinjanain waashajaain namaa na outushiikana, jama nütüjaain saaʼu mojeerüin wakuwaʼipa jee nayeenain neʼe waashajaaka amaa na yolujaakana (paashajeʼera Deuteronomio 18:10-12).

3. Tü sümakat tü Bibliakat nüchiki wanee wayuu outapa nia

Sainküin mmakat süpüshuaʼa, naatayaa müsü tü namakat na wayuukana nüchiki wanee wayuu outapa nia. Waneesüpejeʼe neʼe tü shiimainkat süchiki tia.

• Eere kepiain pia, ¿jamüsü nanüiki na wayuukana nachiki na outushiikana?

VIDEO: ¿Shiimainchejeʼe sujuʼitüin naaʼin wanee wayuu outapa nia? (shiʼipa neʼe) (1:19)

Jaashajeʼera Eclesiastés 3:20 otta yooto jia süchiki tüü:

• Saashin wetsiikulokot tüü, ¿jamüsü sünüiki tü Bibliakat nachiki na outushiikana?

• ¿Ojuʼitüsüche naaʼin wanee wayuu outapa nia?

Ashajünüsü suluʼu tü Bibliakat nüchiki Lázaro wanaa sümaa outuin nia. ¿Jamüsü nünüiki Jesús nüchiki Lázaro? Jaashajeʼera Juan 11:11-14 otta yooto jia süchiki tüü:

• ¿Kasa makaʼa aka saaʼin tü outaakat naashin Jesús?

• ¿Kasa watüjaka sünainjee tü nümakat Jesús süchiki tü outaakat?

• ¿Pansaasüche tü sümakat tü Bibliakat nüchiki wanee wayuu outapa nia?

4. Taashisü wakuwaʼipa suulia aaʼinraa kasa namüin na outushiikana

Watüjaapa saaʼu tü sümakat tü Bibliakat nüchiki wanee wayuu outapa nia, nnojoliinnapa waya mmoluin neema jee nnojoliinnapa waya aaʼinrüin kasa nikiira. Jaashajeʼera Eclesiastés 9:10 otta yooto jia süchiki tüü:

• ¿Eesüche süpüla naaʼinrüin kasa mojusü wamüin na outushiikana?

Watüjaapa saaʼu tü sümakat tü Bibliakat nachiki na outushiikana, taashisü wakuwaʼipa suulia waaʼinrüin kasa nekiira otta suulia mmoluin waya neema. Jaashajeʼera Isaías 8:19 jee Alateetkat Mapeena 4:11 otta yooto jia süchiki tüü:

• Ayatüle naaʼinrüin wanee wayuu tü aaʼinnakat nekiira na outushiikana jee nachuntule kaalinwaa namüin, ¿jamüsü naaʼin Jehová sutuma tia?

5. Anasü waaʼin süka watüjaain saaʼu nnojoluin müliain na outushiikana

Ekirajünüshii na wayuukana sünain süsaleenain naya naainjala outapa naya. Anasü waaʼin süka watüjaaitpain saaʼu nnojoluin müliain na outushiikana jaʼitairü mojuin maʼin tü kasa naaʼinrapuʼukat kataiwaʼaya noʼu. Jaashajeʼera Roma 6:7, TNM otta yooto jia süchiki tüü:

• Saashin tü Bibliakat, nuwalaajüitpa wanee wayuu tü naainjalakat outapa nia. ¿Müliasüche naaʼin wanee wayuu outapa nia? ¿Jamüsüjaʼa saaʼin pümüin?

Weʼraajapa maʼin nukuwaʼipa Jehová, nnojoluitpa jülüjain waaʼin müliain naaʼin na outushiikana. Jaashajeʼera Deuteronomio 32:4 jee 1 Juan 4:8, TNM otta yooto jia süchiki tüü:

• Saashin tia wetsiikulokalüirua, ¿müliashiiche nutuma Maleiwa na outushiikana?

• ¿Jamüsü sümülialaka paaʼin tü sümakat tü Bibliakat nachiki na outushiikana?

WATÜJAAITPAKA AAʼU

Outapa wanee wayuu, nnojotsü ojuʼitüin tü naaʼinkat. Nnojoishi müliain nia jee nnojotsü süpüla jamajüin wayuu nutuma.

Pusouta shiʼipajee

• ¿Ojuʼitüsüche naaʼin wanee wayuu outapa nia?

• ¿Jamüsü taashika wakuwaʼipa suulia aaʼinraa kasa namüin na outushiikana?

• ¿Jamüsü anaka waaʼin sutuma tü sümakat tü Bibliakat nachiki na outushiikana?

PÜNAʼLA SOOʼOMÜIN

Paashajeʼera süchiki jamaluʼuluin tü pütchikat alma suluʼu tü Bibliakat.

«¿Jamaluʼut tü pütchikat alma?» (Pütchi suluʼuka jw.org)

¿Müliasüche wayuu nutuma Maleiwa saʼaka siki? Pünaja süchiki tia.

¿Shiimainchejeʼe müliain wayuu nutuma Maleiwa saʼaka siki? (3:07)

¿Mmoluinjanache waya neema na outushiikana?

Saaʼin wayuu ouktusü ¿Eeshii süpüla sükaaliinjüin waya? ¿Saainjüin kasa mojusü wamüin? ¿Shiimainchejee eein? (Poyeeto)

Paashajeʼera nüchiki wanee wayuu anakai aaʼin nütüjaapa saaʼu tü sümakat tü Bibliakat nachiki na outushiikana.

«Ponusü taaʼin tü sümakat tü Bibliakat süchiki tü tatüjaweekalü aaʼu» (Pütchi suluʼuka Aapiria Wayuu, 2015)