¿KEPISÜCHE TÜ ASHAPATAWAAKALÜ AAʼIN?
¿Ashapataasü paaʼin?
«Eesü tü kasa ashapataakalü atuma waaʼin wapüshuaʼa, jiwaʼatapejeʼe maʼin taaʼin sutuma tü alatakat tamüin. Nnojotsü waneesüin neʼe tü kasa alatakat tamüin, eesü tü eejiraakalü amaa taya, kakaliairü taya sünain aaʼinmajaa chi taʼwayuusekai süka ayuulin nia jee ayuulin nikii» (Julia).a
«Eeʼirataasü tü taʼwayuusekat toulia jee piamashii tachonnii tepijaka tamüiwaʼa. Kapüleesü tia. Ojutunushi taya sünainjee taʼyataain jee maʼletsesai taya süpüla takumajirüin teʼejena. Isasü tachiki tü takuwaʼipainjatkat. Ashapataasü maʼin taaʼin. Tatüjaa aaʼu mojuin toʼuniraale taaʼin, müshijeseʼe tachuntuin nümüin Maleiwa süpüla sajaʼttüin tamüliala» (Barry).
¿Eeirü ashapataain paaʼin maʼaka saaʼin Julia nümaa Barry? Sülatüle tia pümüin, kasataalejeseʼe sükaalinjain pia jee sümülialaain paaʼin sutuma tü pütchi suluʼukat karaloʼutakat tüü. Shia saashajaaka achiki kasain ashapataain atuma saaʼin wayuu, jamüin sukuwaʼipa wayuu sutuma jee tü waaʼinrajatkat süpüla nnojoluin süshapataain maʼin waaʼin.
a Aʼwanajaanüsü waneirua anüliee.