Pütchi anajiraajeenaka atuma waya sümaa wayuu

Moto waaʼin saainjala wayuu

«Jaaʼinra tü anasükat shiʼipajee eekai shiʼrülüin wayumüin jümüin, sümaa motüin jaaʼin saainjala» (COLOSAS 3:13).

Eesü waaʼinrüle wanee kasa nnojotka anain jee aika namüin na waneinnua. Eetaasü aire joo wamüin tü naaʼinrakat na waneinnuaya. Sülatüle wamüin tia, motuinjatü waaʼin naainjala na waneinnua. Motule waaʼin shia, nnojoleerü üttakuʼu müin waaʼin nanain. Mojulaale wanee wayuu wamüin, nnojo mojulaain waya niʼipajee. Nnojo weimain nümüin tü kasa mojusü naaʼinrakat wamüin (Roma 12:17). ¿Kasa waaʼinrajatka aire wamüin tü naaʼinrakat wanee wayuu jee kapüleere wamüin motuin waaʼin shia? Waashajaa nümaa nümüiwaʼa otta kojuta nia wamüin. Anajiraweeshii waya nümaa otta nnojo wachajaain jaralüin kasirüin tü alatakat (Roma 12:18).

Nnojo yaletayaain wakuwaʼipa jee kojuta wamüin wayuu

«Nnojo yaletayaain jukuaippa suʼupala wayuu. Shia anaka aluʼu kojutule napüshua na juwalayuukana jütüma» (FILIPOS 2:3).

Nnojorüle yaletayaain wakuwaʼipa jee kojutule wamüin na waneinnua, aneerü naaʼin wamaa. Natüjaajeerü aaʼu kamaneein waya, kojutuin naya wamüin otta nnojoleerüin waaʼinrüin wanee kasa aijeetka namüin. Macheʼere waya süchiirua saaʼinneein tü wamakat, nnojoleena anajiraain waya, nnojoleena namaweein waya na wayuukana jee maʼaleewainjeena waya.

Nnojo koʼuin wakuwaʼipa sümüin wayuu

«Shiimain nnojolüin koʼuin nükuaippa Maleiwakai sümüin wayuu. Wayuu eekai eein suluʼu mmakat süpüshua, kojutkat atüma Maleiwakai otta aaʼinrakat tü anasükat, nnojoleerü nüjütaain amaa shia» (ALUWATAAUSHIKANA [HECHOS] 10:34, 35).

Nnojotsü koʼuin nukuwaʼipa Maleiwa sümüin wayuu, kojutusü nümüin wayuu maʼleekalia jaʼitainna jalejeʼewaliin naya, jeʼtsüin nakuwaʼipa, kasuule jee mütsiiale nata. «Nünainjee waneeshia wayuu, naainjüin [Maleiwa] tü wayuukalüirua süpüshuaʼa, tü wattakat saalin shiʼipapaʼa sainküin mmakat» (Aluwataaushikana 17:26). Wayaawatüinjeseʼe saaʼu pawalaawain napüshuaʼa na wayuukana. Kojutule wamüin wanee wayuu jee kamaneere waya nümüin, talateerü naaʼin watuma jee talateerü waaʼinya. Talataleejeeria naaʼin Maleiwa waaʼinrüle tia.

Anamia waya sümüin wayuu

Nnojo «juuʼulaain suulia akaaliijaa [wayuu] mayaashiije nnojolüin jaaʼa müin jümüin» (COLOSAS 3:12).

Anamiale waya neʼipajee na waneinnua, talateerü naaʼin wamaa, aneerü naaʼin wamaa jee mapüleejeerü namüin nachiaain waya. Anamiale waya niʼipajee wanee wayuu eekai naashichijaain wooʼomüin, eimalaajeechi nia. Anuu sünüiki Proverbios 15:1: «Oʼunusü tü jashieekat, kamaneere waya sünain asoutaa».

Asülajüliinjana waya jee kojuta wamüin tü aaʼinnakat wapüleerua

«Anakuaippaʼireʼeya chi wayuu aapakai nuulia chi aapünakai amüin» (ALUWATAAUSHIKANA 20:35).

Maaʼulu yaa, eeshii na wayuu kamaʼaneekana wainma kasa otta jülüjasü naaʼin tü nakuwaʼipakat neʼe namüiwaʼa. Talatapejeʼe naaʼin wanee wayuu nüsülajüire (Lucas 6:38). Naaʼinrüin tia süka kojutuin nümüin wayuu suulialeʼeya waneirua kasa. Süka alin nüpüla na wayuukana asülajüishi nia otta kojutusü nümüin tü kasa aaʼinnakat nüpüleerua (Colosas 3:15). Püsakira paaʼin sünain tüü: «¿Anasüche paaʼin sümaale pia wayuu eekai jeʼiyerüin? ¿Shiataapa anain amaa paaʼin sümaale pia wayuu eekai süsülajülüin sümaa kojutuin sümüin tü aaʼinnakat süpüleerua?». Tü watüjakat sünainjee tia, shia aneerüin nakuwaʼipa na waneinnua wamüin anale wakuwaʼipa neʼipajee (Mateo 7:12).