KEEMASÜ MAʼIN MMAPAʼAKAT

2 | Piisalaja pünneetse

¿JAMÜSÜ CHOʼUJAAKA TIA?

Wainma na wayuu aʼyataakana maʼin soʼukaiwai süpüla neʼe tü kasa choʼujaakat namüin. Kapüleʼereesia maʼin tia maaʼulu sutuma mojuin maʼin sukuwaʼipa tü mmapaʼakat.

Eere wanee kasachiki suluʼu wanee mma, kojutusü maʼin eküülü otta piichi.
Aisü shiiʼiree aʼyatawaa otta ashakajaasü sükanain wayuu.
Sukutkujaale mma otta eere wawai ajaʼttüsü kasa sutuma maʼaka saaʼin oikaalee, piichi jee waneirua kasa. Sutuma tia wainma wayuu maʼletsesat.

¿Pütüjaa aaʼu?

Pütüjale eisalajaa pünneetse, eejiraajeechi pia sümaa tü maʼletseekat.
Eesü süpüla nnojoluin anain sukuwaʼipa wanee wayuu waneepia süka eein süpüla süshakajüin sülia tü nneetkat, maliain tü anaajaanakat suluʼu Banco jee mojutulaʼa sümüle tü korolokot.
Eesü kasa nnojotka süpüla wayaʼlajüin süka nneerü maʼaka saaʼin tü talataakalü aaʼin jee paaʼinwain waya sümaa wapüshi.

¿Kasa paaʼinrajatka?

Tü sümakat tü Bibliakat: «Anakajaʼa talatüle waaʼin saaʼu eein wamaʼana tü weküinjatkat jee tü washeʼinjatkat» (1 Timoteo 6:8).

Tü talatakalü atuma waaʼin nnojotsü shiain sutuma wamaʼanain tü keeʼireekat waaʼin, shia wamaʼanale tü choʼujaakat wamüin. Anasü jülüjale waaʼin tia aire shiiʼiree nneerü wamaʼana.

Eesüjaʼa choʼujaale pümüin puʼwanajaain pukuwaʼipa süpüla talatüinjatüin paaʼin. Pujuyaajüle nneerü süpüla piyaʼlajüin kasa, eesü süpüla sajaʼttüin pünneetse sünain.

¿KASA EEKA SÜPÜLA PAAʼINRÜIN? Anuu waneirua kasa

Sülatüle pümüin kasa kapüleesü, paaʼinra tüü süpüla piisalajüin pünneetse

KASETIRA PUTUMA PÜNNEETSE

Kasetira putuma pünneetse

Nnojo pükataajüin pünneetse sünain ayaʼlajaa kasa nnojotka choʼujaain maʼin, maʼaka saaʼin nevera, telewisoot jee kuluulu. Püsakira paaʼin sünain tüü: «¿Choʼujaasüche maʼin keʼejenain taya? ¿Eeshiche süpüla tapünajüin suulia suʼunuin wainma nneerü tayaʼlajapa eküülü?».
Süpülapünaa piyaʼlajüin wanee kasa, püsakira paaʼin sünain tüü: «¿Choʼujaasüche maʼin tamüin? ¿Eesüche süpüla tawalaajüin?».
Eere süpüla, puchuntaka kaalinwaa namüin na sülaülakana mma jee sümüin waneirua organización.

• «Aashajaashi taya sümaa tapüshi jeʼrain nneerü wakataajaka. Wakumajüin sukuwaʼipa süpüla nnojoluin wakataajüin wainma nneerü sünain apasiajawaa jee sünain waneirua kasa. Otta wayaʼlajüin eküülü eekai jaʼyain» (Gift).

PÜSHAJA TÜ PIYAʼLAJÜINJATKAT

Püshaja tü piyaʼlajüinjatkat

Tü sümakat tü Bibliakat: «Chi wayuu jülüjakai aaʼin palajana tü kasa naainjainjatkat, aneerü sukuwaʼipa nutuma. Aluʼusaʼa chi wayuu ashapajaakai aaʼin sünain tü naainjainjatkat, mojeerü sukuwaʼipa nutuma» (Proverbios 21:5). Püshajüle süchiki tü pükataajüinjatkat, nnojoleerü wainmain nneerü oʼunaka.

Palajana, püshaja jeʼrain maʼin tü nneerü pükanajakat soʼu wanee kashi.
Süchikijee, püshaja tü pükataajakat süpüla wanee kashi otta jülüja paaʼin kasain pükataajüin anain shia.
Paaʼinrapa tia, puʼwanaajireʼera tü pükataajakat sümaa tü pükanajakat. Piyaawatüle saaʼu wainmain tü pükataajakat suulia tü pükanajakat, pukumaja sukuwaʼipa süpüla palirüin tü piyaʼlajakat.

«Waashajaain kashiwai süchiki tü wakanajakat jee tü wakataajakat. Anaajaashi taya nneerü sümaa taʼwayuuse süpüla tü eekai süpüla sülatalaʼa sümüin wamüin otta süpüla wayaʼlajüin tü kasa choʼujaweetkat wamüin mapeena. Müsüjeseʼe nnojoluin shapaain maʼin waaʼin» (Carlos).

NNOJO PUJUYAAJÜIN JEE PÜNAAJAA NNEERÜ

Nnojo pujuyaajüin jee pünaajaa nneerü

Pukumaja sukuwaʼipa süpüla palirüin pujuyaala. Eerejeʼe süpüla, nnojo pujuyaajüin. Anasü pünaajaale nneerü süpüla piyaʼlajüin tü choʼujaakat pümüin.
Pünaajaa nneerü kashiwai süpüla tü eekai süpüla sülatalaʼa sümüin.

TÜTÜ PIA SÜNAIN AʼYATAWAA

Tü sümakat tü Bibliakat: «Eesü kasa anasü wousütaka waʼyataale» (Proverbios 14:23).

Tütü pia sünain aʼyatawaa

Ana paaʼin sümaa tü piʼyataakalü anain. Mayaainjeʼe nnojoluin shiain tü aʼyatawaa keeʼireekat paaʼin, akanajüshia pia nneerü sutuma.
Laülaa paaʼin jee tütü pia sünain aʼyatawaa. Müle pukuwaʼipa mayaa, eeshijaʼa süpüla nnojolin pujutunuin suulia piʼyataain jee mapüleejeerü pümüin ousütaa sünain wanee aʼyatawaa.

«Aʼyataashi taya sünain eekai eein jaʼitairü nnojoluin kamalain tamüin jee nnojoluin walaain maʼin shia. Anasü maʼin taʼyataain tatuma, müshi taʼyataajiraakai aaʼin tapüla» (Dimitry).

¿Achajaashiche pia aʼyatawaa?

Püsakira suluʼu compañía eere aʼyatawaa püpüleerua. Püsakira jaʼitairü nnojoluin achajaanüin wayuu. Püma namüin püpüshi jee paʼaleewainyuu püchajaain aʼyatawaa.
Piʼyataa sünain aʼyatawaa eekai puusütüin sünain, jaʼitairü nnojoluin shiain tü kamalainkat pümüin.