¿Kojutusüche wamüin wakuwaʼipa?

**¿JAMÜSÜ ANAKAʼA KOJUTULE WAMÜIN WAKUWAʼIPA?**

Meisarale waya sümüin wakuwaʼipa mojutusat wamüin wakuwaʼipa jee nakuwaʼipa na waneinnua.

Nükaijapuʼule wanee wayuu matchinreesat naaʼin saapüle nümüin cáncer. Outaka wanee wayuu sutuma canceerüin nüsoso shia sutuma nükaijapuʼuin jee nüsapuʼule seejuu niima eekai nükaijain nüʼütpaʼa.
Wainma na wayuu ayuuikana nekiiruʼu sutuma shiʼinaʼannüin wayuu noʼupala. Anuu wanee pütchi sümaka wanee eʼikülee miyoʼu chakat Stanford (Estados Unidos): «Na wayuu eʼrakana shiʼinaʼannüin wayuu noʼupala suluʼu koleejia mmorüleesia naaʼin soʼu wainma juya».
Chupeerüle wanee wayuu süchikijee nüsüin yootshi jee nükaijain yüi, nüsaapünaajeena amaa na wanaakana nümaa suluʼu karateerü jee nayale na waraitakana sotpünaa. Wainma na wayuu eewaakana natuma na mojutukana amüin nakuwaʼipa na waneinnua.

TÜ ANAKAT SÜPÜLA PAAʼINRÜIN

Keisala pia sümüin pukuwaʼipa suulia ayuuijaain pia. Puunteerü puuʼulaain suulia paaʼinrüin wanee kasa ayuuika atuma pia maʼaka puuʼulaain suulia akaijaa, vapear, asawaa jee suulia akaijaa yüi. Na wayuu aaʼinrakana tia mojutusat namüin nakuwaʼipa jee sukuwaʼipa napüshi.

«Shia anaka aluʼu wasünneʼerüle tü kasa yarüttakalü atuma weʼiruku» (2 Corinto 7:1).

Keisala pia sümüin pukuwaʼipa suulia peewaain. Pukumaja wanee kasa eekai sumojujaain sünain pipia suulia peewaain sutuma. Nnojo maaʼinyaain paaʼin puʼunirapa peʼejena, pukumajira tü kasa eewaakat sünain. Nnojo paaʼinrüin tü münakat pümüin puluwataanüle sünain aaʼinraa wanee kasa peewaajeechika atuma jee outeechika atuma pia.

«Pukumajüle wanee pipia, pukumaja wanee kasa sotpünaa tü saajunakat, nnojoleechikalaka piain kasirüin namaa püpüshi nujutuule wanee wayuu saaʼujee» (Deuteronomio 22:8).a

Kamaneejiraa jia. Kojutule wamüin wakuwaʼipa, kojutushii wamüin na waneinnua jaʼitairü naatain neʼiruku, noumain, washirüle jee nnojorüle washirüin naya. Joutka maʼin atkawaa sainküin tü mmakat shia sutuma kachekalaʼatain wayuu jee naʼürülain na waneinnua.

«Anashii juuʼulaale suulia jashichikuʼu jümüin, suulia üttüin jaaʼin jee suulia ülüttüin jaaʼin, nnojo woottakuʼu jümüin jee nnojo juchuntuin pütchi eekai airuʼuluin otta juuʼulaa suulia wanee kasa eekai mojuin. Shia anaka aluʼu kamaneejiraale jia» (Éfeso 4:31, 32).

WAAʼINRAKA WAYAKANA AKÜJALIIKANA PÜTCHI NÜCHIKI JEHOVÁ

Anoutaasü nakuwaʼipa na wayuukana süka wekirajüin naya sünain tü sümakat tü Bibliakat. Nanouteʼerüin nakuwaʼipa jaʼitainna epeʼrüliipuʼuin naya jee nakaijüliipuʼuin yüi.

Wakumajapa wanee miichi outkajaalee waaʼinrüin tü münakat wamüin suulia weewaain. Ekirajünüshii na wawalayuu aʼyataakana sünain akumajaa tü miichi outkajaaleeinjatkat süpüla nnojoliinjanain neewaain jee jamajüin naya. Anaʼnnawaisü tia miichikat süpüla sütüjaanüin aaʼu müleka pansaale shia sümaa tü achuntunakat, tia shia süpüla nnojoluinjatüin seewaain wayuu sutuma.

Wakaalinjain na wayuu alatakana amüin kasa mojusü. Wainma na wayuu wakaalinjakana soʼu tü juyakat 2022. Müliashii naya wayuukana sutuma wawai jee sukutkujaain mma. Asülajüshii waya 12 miyoone dólar süpüla wakaalinjain naya.

Wanaa sümaa ayuulin maʼin wayuu sutuma tü ayuuliikat Ébola chaa África Occidental (2014) otta chaa República Democrática del Congo (2018), wayakana aküjaliikana pütchi nüchiki Jehová, wekirajüin na wayuukana sünain tü naaʼinrajatkat süpüla nnojoluin suʼttuin nanain tia ayuuliikat. Eeshii na wawalayuu aluwataanakana süpüla nekirajüin na wayuukana sünain tü pütchi kanüliakat «Kateerü poʼu poonoole sümaa tü aluwataanakalü anain pia». Eʼitaanüsü oʼlojoolee ajapüü soʼuluʼu tü Piichi Outkajaaleekat, waküjain maʼin namüin naya wayuukana noʼlojooinjatüin najapü otta naaʼinrüinjatüin waneirua kasa süpüla nnojoluin suʼttuin nanain tia ayuuliikat.

Jamüsüjaʼa chaa Sierra Leona alatinnüsü wanee pütchi suluʼupünaa raawia eere süküjünüin anain maʼin tü naaʼinrakat na aküjaliikana pütchi nüchiki Jehová, aküjünüsü nakaalinjain na nawalayuukana otta nakaalinjain waneinnua wayuu süpüla nnojoluin suʼttuin nanain tü ayuuliikat Ébola.

Waneinnua aküjalii pütchi nüchiki Jehová nnojoliikana ashapajaain aaʼin sünain aʼatapajaa süpüla noʼlojooin najapü süpülapünaa nekerotuin suluʼu tü Piichi Outkajaaleekat. — Oʼlojooshii najapü na wayuukana soʼuluʼu wanee Piichi Outkajaalee chaa Liberia. Soʼunnaajatü tia tü ayuuliikat Ébola soʼu 2014.

a Sutuma keisalain sümüin nakuwaʼipa na wayuu kepiapuʼukana chaa Oriente Medio, kojutusü nakuwaʼipa namüin, sukuwaʼipa napüshi jee nakuwaʼipa na waneinnua.