¿Kojutushiiche waya wamüinjiraa?

**¿JAMÜSÜ ANAKAʼA KOJUTULE WAYA WAMÜINJIRAA?**

Na wayuu kojutukana namüinjiraa, nountuin nanouteʼerüin wanee kasa, nnojoishii ayüülajaain.

Na wayuu mojutukana namüinjiraa naashin na ekirajaakana süchiirua sukuwaʼipa wayuu, eesü shapaale naaʼin, mojuwaire naaʼin, nnojoliire nekeein jee nekeere pejeewa, eeshiijaʼa süpüla nasüliin, nasajüin wunuʼu sümaa nnojoluin ayuulin naya jee nakaijain yüi.
Na wayuu kojutukana namüinjiraa, nnojotsü nayoujireʼerüin nakuwaʼipa namaa na waneinnua. Makalaka anajiraain jee aleewajiraain naya suluʼujee tia. Akaajasaʼa na wayuu mojutukana namüinjiraa, mojusü neʼe nanüiki nachiki na waneinnua, mojujiraaka naya suluʼujee tia.
Na wayuu kojutukana namüinjiraa, nachecherüin naaʼin soʼunnaa müliaa, nnojotsü nooʼulaain tü keeʼireekat naaʼin sutuma tü kasa mojusü alatakat namüin. Akaajasaʼa na wayuu nnojoliikana kojutuin namüinjiraa, ayüülajaashii neʼe naya sutuma isain nachiki nanouteʼerüin tü kasa alatakat namüin.

TÜ ANAKAT SÜPÜLA PAAʼINRÜIN

Aleewa pia namaa na wayuu anakana akuwaʼipa. Aleewa pia namaa na wayuu kojutukana amüin wayuu, na wayuu akaalinjeekana pia, na aneenakana atuma pukuwaʼipa.

«Shiimainre alin nüpüla naʼaleewain wanee wayuu, aishi nia nüpüla waneepia, müshi aka naaʼin wanee nuwala müliale nia niʼrüin» (Proverbios 17:17).

Pükaalinja na waneinnua. Jalouijeechi pia namüin na waneinnua jee talateerü paaʼin kamaneere pia, paaʼinrüle kasa anasü napüleerua jaʼitainna na nnojoliikana süpüla nakaalinjain pia. Talateeriaʼaya paaʼin jaʼitairü nnojoluin saapünüin analuʼutkat pümüin.

«Talataleesia maʼin waaʼin wasülajüle wanee kasa suulialeʼeya süsülajünapa wamüin» (Aluwataaushikana [Hechos] 20:35).

Pikiraja püchonnii kojutai naya namüinjiraa. Wanee kasa anaka süpüla paaʼinrüin shia pikirajüin naya süpüla nanouteʼerüin tü alatakat namüin. Müle shia putuma, atüjeena naya süpüleerua nanouteʼerüin wanee kasa eekai kapüleein maʼin jee nalatüin süchikumüin. Suluʼujee tia kojuteena naya namüinjiraa maaʼulu yaa jee müsia miyoʼuyuupa naya.

«Pikiraja püchon wanaajiraa sümaa tü wopu kaluʼuinjachikat nia; laülaapa nia nnojoleechi ojunujaain suulia» (Proverbios 22:6).

Wanee wawala ekirajaka wanee wayuu eere oikaalee kepein.

WAAʼINRAKA WAYAKANA AKÜJALIIKANA PÜTCHI NÜCHIKI JEHOVÁ

Anoutaasü sukuwaʼipa wayuu sutuma wekirajüin naya sünain tü Bibliakat otta sutuma tü ekirajünakalü anain naya sünain tü outkajawaakat. Kojutushii naya namüinjiraa suluʼujee tia.

OUTKAJAASHII WAYA SEMAANAWAI

Ekirajünawaisü semaanawai sünain tü outkajawaakat wanee pütchi suluʼujeejatü tü Bibliakat, aküjünawaisü wamüin kojutuinjana waya wamüinjiraa. Eesü süpüla suʼunuin wayuu maʼleekalia sünain tü outkajawaakat, nnojotsü achekajünüin nneerü sünain. Puʼunule sünain pütüjaajeerü aaʼu...

... kojutuin pia noʼuluʼu Maleiwa.
... tü paaʼinrajatkat süpüla talatüin paaʼin.
... tü paaʼinrajatkat süpüla aleewain pia namaa na anakana akuwaʼipa.

Püntiraajeerü amaa wayuu nnojotka koʼuin akuwaʼipa sümüin wayuu (1 Corinto 12:25, 26).

Süpüla pütüjain sooʼomüin süchiki tü outkajawaakat pünaja suluʼu jw.org tü videokot ¿Kasache aainjünaka suluʼu tü Piichi Outkajaaleekat?

WEKIRAJAKA AKA WAYUU SÜNAIN TÜ BIBLIAKAT

Wekirajüin wayuu sünain tü sümakat tü Bibliakat sükajee tü karaloʼutakat Anainjatka atuma pukuwaʼipa waneepia. Nnojoishii waya achekajüin nneerü saaʼu, nayaawateerü aaʼu na wayuukana waneirua wetsiikulo otta waneirua kasa sünainjee tü asakinnakalü anain suluʼu tia karaloʼutakat. Mapüleesat atumawaa tü pütchikat, eʼitaanüsü video atanaleetka naaʼin na wayuukana jee ashajünüsü shiyaakua tü kasa ekirajünakalü anain. Kojutushii na wayuukana namüinjiraa jee anoutaasü nakuwaʼipa sutuma tü wekirajakalü anain naya suluʼujee tü Bibliakat.

Pikirajaweere sünain tü Bibliakat namaa na aküjaliikana pütchi nüchiki Jehová, pünaja suluʼu jw.org tü videokot ¿Jamüshii wekirajaainjanaka sünain tü Bibliakat?