TÜ WAAʼINRAJATKAT KOJUTUJAALE TÜ KASAKALÜIRUA
Asülajüliinjana waya
«Kojutusü maʼin tü kasakalüirua jee masetirasat tanneetse, ¿jamakuwaʼipat süpüla tasülajüin namüin na waneinnua?», eeshiijaʼa wamüle. Eʼreena waya kasa anasü wasülajüliire. Waashajaa süchiki tü waaʼinrajatkat süpüla kasetirain wanneetse sümaa wasülajüliin.
¿JAMÜSÜ CHOʼUJAAKAʼA WAAʼINRÜIN TIA?
Talateerü waaʼin jee aneerü waaʼin wasülajüle kasa namüin na waneinnua jaʼitairü palitchonle tü kasa wasülajakat. Nnojoleechi jooin wanee wayuu süpüla ayuulii nüsülajüire, naashin waneinnua tottoot. Jamüshiijaʼa wasülajüliire nnojoleerü shapaain maʼin waaʼin, nnojoleerü müin motsotokai waaʼin otta eeshii süpüla waawalaain aire wanee kasa wanain jee eemeraajeena waya süka anakalü akuwaʼipa.
Müleka wakaalinjawaire na waneinnua sükajee tü wasülajakat namüin aneerü wamüin wakaalinjünüin choʼujaapa shia wamüin. Anuu tü nümakat Howard wanee wayuu chejeʼewai Inglaterra: «Jülüjawaisü taaʼin sümaa tü taʼwayuusekat jaʼralin na wayuu choʼujaakana amüin akaalinjünaa». Sutuma waaʼinrüin tia, nnojotsü japülin waaʼin sünain achuntaa kaalinwaa. Nüsülajüinjachire wanee wayuu nnojotsü naʼatapajüinjatüin keeʼirakainjatüin shia nümüin. Wane kasa weʼreetka shia aleeweenain waya sümaa wayuu akaalinjeenaka waya.
TÜ EEKAT SÜPÜLA PAAʼINRÜIN
Püsülaja süpüshi tü eekat pümaʼana. Jaʼitairü palitchon tü eküülü eekat pümaʼana eesü süpüla pikiraain shia namaa na waneinnua. Jamüshijaʼa wanee wayuu chejeʼewai Uganda, Duncan nünülia, wayuu asülajüi nia namaa na nüpüshikana mayaainjeʼe maʼletsein naya. Anuu nünüiki Duncan: «Wounejaʼawalin wayuu wepialuʼu rimiinkoʼuwai süpüla nekaain namaa. Anasü waaʼin waaʼinrapa tia namaa».
Anasiaajeʼe kamaneere waya jee wasülajüliire, nnojotpejeʼe sülanaʼaleeinjatüin tü wasülajakat suulia müliajüin waaʼin sümaa wapüshi (Job 17:5).
Puuʼulaka paaʼinrüin tüü: Anasü pikiraale süpüshi tü eekat pümaʼana. Nnojotsü choʼujaain wainmainjatüin shia. Eere wane kasa pümaʼana anayütka jee nnojoluitpaka choʼujaain pümüin eesü süpüla püsülajüin shia nümüin wanee paʼaleewain jee shiale nümüin wanee wayuu kepiaka püʼütpünaa, jalouijeerü shia nümüin.
Wainma sukuwaʼipa süpüla weiyajüin wamanee sümüin wayuu. Nnojotsü choʼujaain kojutuinjatüin wanee kasa wasülajakat namüin na waneinnua süpüla anainjatüin naaʼin sutuma. Jamüshiijaʼa waya walatira kaʼi namaa, kapüla naya waaʼin. Waaʼinra kasa napüleerua, ana wanüiki namüin, anasü waküjawaire namüin alin naya wapüla jee talatüin waaʼin namaa.
Puuʼulaka paaʼinrüin tüü: Anasü pükaalinjale na waneinnua sünain waneirua kasa choʼujaaka namüin maʼaka saaʼin pukumajüin wanee kasa amojujaaka nepialuʼu jee shiale piyaʼlajüin wanee kasa choʼujaaka namüin. Püshaja wanee mensaaje jee shiale wanee carta nümüin wanee paʼaleewain, eere püshajüin nümüin pütchi talateetka atuma naaʼin jee shiale püshajüin nümüin sotuin nia paaʼin.
Talateerü paaʼin püchajaale sukuwaʼipa süpüla püsülajüin.