Waainjüinjatka mojujiraale waya sünainjee wanee aʼyatawaa

Suluʼu 1 Corinto 6:1-8, TNM, aashajaashi Pablo süchiki tü waainjüinjatkat mojujiraale waya nümaa wanee wawala. Palajana, nüküjüin mojuin naaʼin süka noʼunüin noʼutku na anoujakana Corinto «suluʼu laülaapia eemüin na wayuu nnojoliikana lotuin akuwaʼipa» (wersiikulo 1). Süchikijee tia, nüküjaka nnojoluinjatüin sünoukteʼennüin suluʼu laülaapia tü mojujiraakat anainjee naya. Wekirajaa sünain tü nüküjakat suluʼu tü karaloukta nüshajakat süchiki jamüin nnojotka waainjüinjatüin tia otta süchikijee wekirajaajeerü anain waneeirua kasa eere nnojoluinjatüin waainjüin tü nümakat.

Mojujiraale waya nümaa wanee anoujüshi sünainjee wanee aʼyatawaa, nücheküin Jeʼwaa wanoukteʼerüin sukuwaʼipa wanaapünaa sümaa tü nümakat, nnojotsü shiainjatüin wanaapünaa sümaa tü wamakat (Proverbios 14:12). Maʼaka nüküjüin Jesús anasü wanoukteʼerüle maalü süpülapünaa mojuleeinya maʼin tü alatakat (Mateo 5:23-26). Waneeinnua anoujüshii atkaweesü naaʼin otta ounejiraashii laülaapialuʼumüin. Akatsaʼa naashin Pablo «akanajuushii» ‹na atkaajiraakana›. ¿Jamüshii nakanajuuka? Süka eein süpüla mojuin sünüiki wayuu nüchiki Maleiwa otta nachiki na anoujüshiikana. Süpüla nnojoluin sülatüin tia waainjüinjatü tü nümakat Pablo: «¿Jamüshii nnojoliika juuʼulaain saainjünüin kasa mojusü jümüin?» (wersiikulo 7).

Otta müsia naashin Pablo, niʼitaain Maleiwa na laülaashiikana süpüla nanoukteʼerüin sukuwaʼipa wanee atkawaa. Kekiishii maʼin naya süpüla naainjüin tia süka nekirajaain sünain tü Wiwüliakat. Nainküin na laülaashiikana ‹nakumajüin sukuwaʼipa tü oʼttaakat› namüin na nawalayuukana (wersiikulo 3-5). Nüküjüin Jesús apünüinsü kasa süpüla sünoukteʼennüin sukuwaʼipa wanee mojujirawaa eeka sünainjeein aküjaa alawaa nachiki waneeinnua süpüla amojujaa nakuwaʼipa otta emeejaa saaʼu nneerü. Tü palajatkat shia anoukteʼeraa sukuwaʼipa nümaa chi wawalakai; nnojorüle anain shia, aainjünajatü tü piamakat kasa, naashajiraain nachikuaʼa sümaa eein waneesia jee piamasü wayuu namaa otta nnojorüle anain tia naainjüinjatü tü apünüinkat kasa, naküjüinjatü namüin na laülaashiikana tü alatakat (Mateo 18:15-17).

Akanasaʼa na laülaashiikana, nnojoishii pütchipüʼüinjanain sümaa naküjüin jamüinjatüin sukuwaʼipa wanee aʼyatawaa otta nnojotsü nashatüinjatüin nakuwaʼipa na pütchipüʼükana. Nnojotsü naküjüin tü naainjüinjatkat na wawalayuukana süpüla nakumajüin sukuwaʼipa tü mojujiraakat anainjee naya. Tü naainjüinjatkat shia nakaaliinjüin na wawalayuu mojujiraakana süpüla naainjüin tü sümakat tü Wiwüliakat otta anajiraain naya. Kapüleere maʼin tü alatakat eeshii süpüla nasakirüin chi wawala waraittakai naaʼu eere noutkajaain otta nasakirüin na wawalayuu aʼyataakana suluʼu tü piichikat eere sükumajünüin sukuwaʼipa naʼyataain na aküjüliikana pütchi nüchiki Jeʼwaa. Akatsaʼa eesü waneeirua kasa eere nnojoluin choʼujaain waainjüin tü nümakat Pablo. Wekirajaa sünain.

Ounejiraa wanee wayuu suluʼu laülaapia nnojotsü shiain sutuma wachajaain tü wachekakat wamüiwaʼa. Eesü saainjünüle tia süpüla ekeraajaa tü namakat na sülaülashiikana mma otta sünoukteʼennüin sukuwaʼipa wanee kasa shiiʼiree anajiraain wayuu. Eesü choʼujaale saainjünüin tia süpüla ooʼulaajirawaa suulia kasaalüü, asütaa tepichi, achekajaa nneerü süpüla eküülü, achekajaa nneerü awalaajünaka paala süpüla sümüliajünüin wayuu sülatüle kasa mojusü sümüin, achuntaa nneerü amülouika sünain wanee aʼyatawaa otta ashajiraa suluʼu laülaapia tü karaloukta sümaajatkat jaralüin makatajatüin sümaa wanee kasa. Eeshi süpüla nuunejirüin wanee anoujüshi laülaapialuʼumüin shiiʼiraka nuunejinnüin. Naainjüin tia shiiʼiree nnojoluin jamajüin nia.a

Chi anoujüshi oʼunakai laülaapialuʼumüin sülatüle nümüin wanee kasa eeka müin aka saaʼin tia nnojoishi eʼrüin wayumüin sümüin tü nümakat Pablo. Naainjüin tia sümaa nnojoluin nütkaweein.b Nnojo motuin waaʼin tü palajanainjatkat watuma: kojutüinjatüin nünülia Jeʼwaa otta ayatüinjatüin jimatajiraain jee paaʼinwajiraain naaʼin na wawalayuukana. Na oʼunüshiikana nüchiirua Cristo eʼraajünüshii sükajee aijiraain naya, müsüjeseʼe, ‹nnojoluin nachajaain tü keeʼireekat naaʼin namüiwaʼa› (1 Corinto 13:4, 5, TNM; Juan 13:34, 35).