EKIRAJAAYA 26
¿Jamüsü joutka mojulawaa jee müliaa?
«¿Jamüsüche joutka müliaa?» eeshii na wayuu makana wanaa sümaa neʼrüin sülatüin wanee kasa mojusü. Aneetpejeʼe waaʼin watüjaale saaʼu tü sümakat tü Bibliakat süchiki tia.
1. ¿Kasa naaʼinraka Satanás süpüla jouluin nutuma tü müliaakat?
Eʼrüijaashi wayumüin chi Yolujaakai nümüin Maleiwa. Nootuin Adán sümaa Eva süpüla neʼrüliinjanain wayumüin nümüin Maleiwa. Naaʼinrüin tia süka nuluwataweein saaʼu wayuu. Aküjashi nia naʼalain sümüin Eva (Génesis 3:1-5). Nüküjain namüin nuunjulajüin Maleiwa wanee kasa anasü noulia otta nnojotsü anain tia naashin Satanás. Anainjatü nakuwaʼipa na wayuukana naajüin müleka nnojorüle noonooin sümaa nünüiki Maleiwa. Aküjashi naʼalain Satanás wanaa sümaa nüküjain sümüin Eva nnojoluinjatüin outuin shia. «Nia kanainjeejachikaʼaya tü alawaakat» müsüjeseʼe müin tü Bibliakat nüchiki (Juan 8:44).
2. ¿Kasakaʼa naaʼinrüin Adán sümaa Eva?
Kamaneeshi maʼin Jehová nümüin Adán sümaa Eva. Nüküjain namüin eein süpüla neküin süchon tü wunuʼuirua eejatkat suluʼu tü apainkat Edén. Waneesüpejeʼe neʼe tü wunuʼu nnojotkat neküinjatüin süchon (Génesis 2:15-17). Neküin mapa süchon tia wunuʼu apülajünakat noulia. Anuu sünüiki tü Bibliakat süchiki tü saaʼinrakat Eva: «Süsüʼütüinjeseʼe tü süchonkot [wunuʼu] sünain shiküin. Shikiraakalaka shia nümaa chi suʼwayuusekaʼiya» (Génesis 3:6). Suluʼujee tia, kaainjalashii naya nümüin Maleiwa. Eetüjülia suluʼu naaʼin Adán sümaa Eva naaʼinrüinjatüin tü kasa anasükat, kaainjalapejeʼe naya soʼujee neʼrüin wayumüin nümüin Maleiwa jee nayoutuin nia süpüla niainjachin aluwataain naaʼu. Suluʼujee tia, müliashii maʼin naya (Génesis 3:16-19).
3. ¿Kasa alataka wamüin sünainjee naainjala Adán sümaa Eva?
Wanaa sümaa kaainjalain Adán sümaa Eva naleʼeruʼuitpa tü kaainjalaakat, nalatira namüsia shia nanainmüin na naikeyuukana. «Je sükajee kaainjalain Adán, oʼttüsü wayu ütamüinreʼeya sünain kaainjalaa. Ouktakalaka naya saaliijee» müsü tü Bibliakat nüchiki Adán (Roma 5:12).
¿Jamakaʼa müliaka waya? Eeshii müliale waya sutuma nnojoluin anain watuma sukuwaʼipa tü kasa waaʼinrakat, sutuma naainjala na waneinnua otta sutuma sülatalaʼa sümüin kasa wamüin (paashajeʼera Eclesiastés 9:11).
WEKIRAJAA SOOʼOMÜIN
Wekirajaa sünain nnojolin niain Maleiwa kasirüin tü mojulawaakat jee tü müliaakat otta wekirajaa sünain jamüin naaʼin Maleiwa wanaa sümaa niʼrüin müliain waya.
4. Chi kasitkai tü müliaakat
Wainma na wayuu makana niain Maleiwa aluwataain saaʼu tü mmakat. ¿Shiimainchejeʼe tia? Jünaja tü VIDEOKOT.
Jaashajeʼera Santiago 1:13 otta 1 Juan 5:19 otta yooto jia süchiki tüü:
¿Niache Maleiwa kasitka tü müliaakat jee tü mojulawaakat?
5. Tü eekat sünainjee nuluwataain Satanás
Jaashajeʼera Génesis 3:1-6 otta yooto jia süchiki tüü:
¿Kasa alawaa nüküjaka Satanás nüchiki Maleiwa? (Jaashajeʼera süchikuaʼa wetsiikulokot 4 otta 5).
¿Jamüsü nünüiki Satanás süpüla nüküjain nuunjulajüin Maleiwa suulia wayuu kasa anasü?
Naashin Satanás, ¿choʼujaashiche Jehová namüin na wayuukana süpüla anainjatüin nakuwaʼipa?
Jaashajeʼera Eclesiastés 8:9 otta yooto jia süchiki tüü:
¿Kasa alataka namüin na wayuukana süka nnojoluin niain Jehová aluwataain naaʼu?
1. Nnojoishii kaleʼeruʼuin kaainjalaa Adán sümaa Eva otta kepiashii naya suluʼu wanee Mma anasü. Naaʼinrapejeʼe tü nümakat Satanás otta eʼrüliishii wayumüin nümüin Jehová.
2. Sünainjee niʼrüin wayumüin Satanás sümaa Eva, kaainjalasü wayuu süpüshuaʼa, müliasü jee outusü.
3. Najaʼttireerü Jehová tü kaainjalaakat, tü müliaakat jee tü outaakat. Eejeerü neʼe suluʼu saaʼin wayuu tü kasa anasükat jee kepieena naya suluʼu wanee Mma anasü.
6. Aisü nümüin Jehová wamüliala
¿Kachipünaasüche naaʼin Jehová wamüliala? Anuu tü nüshajakat chi aluwataaikai David otta chi aluwataaushikai Pedro. Jaashajeʼera Salmo 31:7 otta 1 Pedro 5:7 otta yooto jia süchiki tüü:
¿Jamüsü paaʼin sutuma pütüjaain saaʼu kachipünaain naaʼin Jehová tü alatakat wamüin otta alin nümüin wamüliala?
7. Najaʼttireerü Maleiwa tü müliakalü atuma wayuu
Jaashajeʼera Isaías 65:17 otta Alateetkat Mapeena [Apocalipsis] 21:3, 4 otta yooto jia süchiki tüü:
Nüküjain Jehová najaʼttireerüin süpüshuaʼa tü müliakalü atuma wayuu jee nunouteʼereerü tü kasakalüirua. ¿Talatüsüche paaʼin sutuma tia? ¿Jamüsü talataka paaʼin sutuma?
¿Pütüjaa aaʼu tüü?
Mojutusai Jehová nümüin Satanás sükajee nüküjain alawaa nüchiki. Nnojoishi anain nia süpüla aluwatawaa naashin, najaʼttireetpejeʼe Jehová soʼu palitchon kaʼi süpüshuaʼa tü kasa müliakalü atuma wayuu. Kojuteerü nutuma nünülia otta atüjaaneerü aaʼu niain neʼe anaka süpüla aluwatawaa. Tü alanaʼaleekat maʼin shia kojutuinjatüin nünülia Jehová atumawaa (Mateo 6:9, 10).
EESHII WAYUU EEKAI NAMÜIN: «Aleinjanaʼaya waya müliain nutuma Maleiwa».
¿Jamüsüjaʼa pünüiki süchiki tia?
WATÜJAAITPAKA AAʼU
Chi kasitkai maʼin tü kasa mojusü alatakat maaʼulu nia Satanás namaa na palajanakana wayuu Adán sümaa Eva. Aisü nümüin Jehová wamüliala, makalaka najaʼttireerüin soʼu palitchon kaʼi tü müliakalü atuma waya.
Pusouta shiʼipajee
¿Kasa alawaa nüküjaka chi Yolujaakai sümüin Eva?
¿Kasa alataka wamüin sünainjee kaainjalain Adán sümaa Eva?
¿Jamüsü watüjaaka saaʼu alin nümüin Jehová wamüliala?
PÜNAʼLA SOOʼOMÜIN
Paashajeʼera tü sümakat tü Bibliakat süchiki tü kaainjalaakat.
Paashajeʼera süchiki tü alatakat nutuma Satanás suluʼu tü apainkat Edén.
«¿Jamüsü nuuʼulaaka Maleiwa eein tü müliaakat?» (Pütchi suluʼuka Aapiria Wayuu, 2014)
Anuu süchiki tü alatakat namüin wainma Judío. Wainma na wayuu nnojoliikana atüjaain saaʼu jamüin sülataka tia.
Pünaja süchiki tü kasa nütüjakat wanee wayuu alatirakai maʼin müliaa.